Ль Гора Мәтта 15:1-39

  • Әʹдәтед мәрьва (1-9)

  • Тьштед кӧ жь дьл дәртен, мерьв дьһʹәрʹьминьн (10-20)

  • Баԝәрийа мәзьн йа жьнәкә жь Финикйайе (21-28)

  • Иса мәрьва жь гәләк нәхԝәшийа ԛәнщ дькә (29-31)

  • Иса 4 000 мәрьва тʹер дькә (32-39)

15  Һьнге жь Оршәлиме, Ферьси у ԛанунзан һатьнә бал Иса, у жь ԝи пьрсин:  «Чьма шагьртед тә әʹдәтед кал-бава әʹрде дьхьн? Мәсәлә, әԝана пешийа нанхԝарьне дәстед хԝә нашон».  Иса щаба ԝан да: «Ле һун чьма бона хатьре әʹдәтед хԝә тʹәмийа Хԝәде әʹрде дьхьн?  Мәсәлә, Хԝәде готийә ‹Ԛәдьре де у баве хԝә бьгьрә› у ‹Кәсе кӧ тьштед хьраб де йан баве хԝәрʹа бежә, гәрәке бе кӧштьне›.  Ле һун дьбежьн, ‹Кʹи кӧ де йан баве хԝәрʹа дьбежә: «Һәр тьшт, бь чь жи мьн дькарьбу аликʹари бьда тә, мьн соз дайә ԝәки Хԝәдерʹа ԛӧрбан кьм»,  әԝ ида борщдар нинә ԛәдьре баве хԝә бьгьрә›. Бь ви аԝайи, ԝә хәбәра Хԝәде бона хатьре әʹдәтед хԝә пʹучʹ у бәтал кьрийә.  Дӧрʹуно, Ишайа пʹехәмбәр сәр ԝә чьԛас рʹаст гот:  ‹Әв щьмәʹт бь заре хԝә рʹумәте дьдә мьн, ле дьле ԝан жь мьн дур ә.  Әԝана бадиһәԝа мьн дьһʹәбиньн, чьмки һинкьрьнед ԝан сәр һʹиме тʹәмийед мәрьва нә›». 10  Һьнге Иса гази хәлԛе кьр у ԝанрʹа гот: «Рʹьнд гӧһ бьдьн у фәʹм бькьн. 11  Нә кӧ тьште дькʹәвә дәве мерьв, ԝи дьһʹәрʹьминә, ле тьште кӧ жь дәве мерьв дәрдькʹәвә, әԝ ԝи дьһʹәрʹьминә». 12  Паше шагьртед Иса һатьнә бал ԝи у ԝирʹа готьн: «Тӧ зани ԝәки Ферьси жь бо готьнед тә әʹщьз бун?» 13  Иса щаба ԝан да: «Һәр дара кӧ Баве мьни әʹзмана данәчʹькандийә, ԝе кʹокева бе рʹакьрьне. 14  Жь ԝан вәгәрʹьн. Әԝана рʹебәред кор ьн. Һәрге йе кор рʹебәрийе йәки кор бькә, һәр дӧ жи ԝе бькʹәвьнә чʹәʹле». 15  Пәтрус ԝирʹа гот: «Ве мәсәле мәрʹа шьровәкә». 16  Иса ԝанрʹа гот: «Һун жи һәла һе фәʹм накьн? 17  Чьма һун ньзаньн, һәр тьште кӧ дькʹәвә дев, зькрʹа дәрбаз дьбә у паше дәрте дәр? 18  Ле тьштед кӧ жь дев дәртен, жь дьл тен, у һәма әв тьшт мерьв дьһʹәрʹьминьн. 19  Мәсәлә, фькьред хьраб, кӧштьн, ԛави, зьнекʹари*, дьзти, шәʹдәтийа дәрәԝ у кʹьфьр жь дьл дәрдькʹәвьн. 20  Әв һʹәму тьшт мерьв дьһʹәрʹьминьн, ле хԝарьна бь дәстед нәшушти мәрьва наһʹәрʹьминә». 21  Иса жь ԝедәре чу һәрема Сур у Сайдайе. 22  Жьнәкә жь Финикйайе, йа кӧ ԝедәре дьжит, һат у кьрә гази: «Хӧдан, Кӧрʹе Даԝьд, гӧне хԝә мьн бинә*. Ԛиза мьн щьна кʹәтийә, гәләк дьчәрчьрә». 23  Ле Иса ԛә щаба ԝе нәда. Һьнге шагьртед ԝи һатьнә бал ԝи у готьн: «Ле бьшинә, бьра һәрʹә, чьмки әԝ пәй мә те у дькә ԛарʹә-ԛарʹ». 24  Иса щаб да: «Әз тʹәне бона пәзед Исраелейә ӧндабуйи һатьмә шандьне». 25  Ле әв жьньк һат, бәр Иса кʹәтә сәр чока у гот: «Хӧдан, али мьн бькә!» 26  Иса щаба ԝе да: «Нә рʹаст ә нане бәр зарʹа һьлдьн у бавежьнә бәр тʹула». 27  Әԝе жи гот: «Бәле, Хӧдан, ле тʹулә жи һурькед кӧ жь сьфра хԝәйед ԝан дькʹәвьн әʹрде, дьхԝьн». 28  Һьнге Иса жьнькерʹа гот: «Баԝәрийа тә чьԛас мәзьн ә! Бьра анәгори хԝәстьна тә тәрʹа бә». Һәма ԝе дәме ԛиза ԝе ԛәнщ бу. 29  Иса жь ԝедәре чу у незики Бәʹра Щәлиле бу. Әԝ һьлкʹьшийа сәр чʹийе у ԝедәре рʹуньшт. 30  Гәләк мәрьв һатьнә бал ԝи. Нав ԝанда, кәсед тʹопал, сәԛәт, кор, лал у гәләк нәхԝәшед дьн жи һәбун. Ԝана әԝ анин, данә бәр пʹийед Иса у әԝи һʹәму ԛәнщ кьрьн. 31  Гава мәрьва дитьн ԝәки йед лал хәбәр дьдьн, сәԛәт ԛәнщ дьбьн, тʹопал рʹе дьчьн у кор дьвиньн, гәләк әʹщебмайи ман, у пәсьне Хԝәдайе Исраеле дан. 32  Иса гази шагьртед хԝә кьр у гот: «Гӧне мьн ве әʹлаләте те. Ида 3 рʹож ә әԝана тʹәви мьн ьн у хԝарьна ԝан нәмайә. Әз нахԝазьм ԝана бьрʹчи бьшиньм, чьмки әԝана рʹеда дькарьн ԛьдум кʹәвьн». 33  Ле шагьрта ԝирʹа гот: «Ви щийе хәԝлә, әм жь кʹӧ дькарьн һаԛас нан биньн, ԝәки ван һʹәму мәрьва тʹер кьн?» 34  Иса жь ԝан пьрси: «Чәнд нанед ԝә һәнә?» Ԝана гот: «7 нан у чәнд мәʹсийед бьчʹук». 35  Иса мәрьварʹа гот ԝәки әԝана сәр әʹрде рʹунен. 36  Әԝи әв 7 нан у чәнд мәʹси һьлдан, шькьри да Хԝәде, у паше нан кәр кьрьн*, данә шагьртед хԝә, у ԝана жи мәрьварʹа бәла кьр. 37  Һʹәмуйа хԝар у тʹер бун. У чахе ԝана нанед бәрмайи тʹоп кьр, 7 сәвәтед* мәзьн тʹьжә бун. 38  Әԝед кӧ хԝарьн, хенщи жьн у зарʹа, 4 000 мер бун. 39  Паше, чахе Иса мәрьв вәрʹекьрьн, кʹәтә ԛәйике у чу һәрема Мәгәдане.

Спартьн

Йан «бенамусийа сексуали».
Рʹастә-рʹаст «мьн ԝәрә рʹәʹме».
Рʹастә-рʹаст «нан шкенанд».
Йан «зәмбил».