Әʹйантийа Йуһәнна 12:1-17
12 Һьнге нишанәкә мәзьн әʹзменда хӧйа бу: Жьнәкә бь кʹьнщед кӧ мина тәʹве шәԝԛ дьда, хәмьланди бу, у һив бьн ньгед ԝеда бу, у сәр сәре ԝе тʹащәкә жь 12 стәйрка һәбу.
2 Жьньк һʹәмлә бу у кʹәтьбу бәр зарʹе, санщу дькʹьшанд у дькьрә ԛирʹин.
3 Ль әʹзмен нишанәкә дьн жи хӧйа бу. Мьн зийаки мәзьн дит, рʹәнге ԝи сор бу у һʹәфт сәри у дәһ стьруйед ԝи һәбун, у сәр сәред ԝи һʹәфт тʹащ һәбун.
4 Әԝи пе почʹа хԝә жь се пʹара пʹарәкә стәйркед әʹзмен кʹьшанд у авитә сәр әʹрде. Зийа бәр жьнька һʹәмлә дьсәкьни у һивийа буйина зарʹа ԝе бу, ԝәки ԝи һʹуфи хԝә кә.
5 Әԝе жьньке кӧрʹ ани дьнйайе, йе кӧ ԝе бь шьва һʹәсьни шьвантийа һʹәму мьләта бькә. У зарʹ жь ԝе һатә стандьне у бьрьнә щәм Хԝәде у тʹәхте ԝи.
6 Ле жьньк рʹәви у чу бәрʹийе, кʹидәреда Хԝәде щи бона ԝе һазьр кьрьбу, ԝәки әԝ ԝедәре 1 260 рʹожи бе тʹеркьрьне.
7 Һьнге ль әʹзмен шәрʹ дәстпебу: Михайил мәләкед хԝәва мьԛабьли зийа шәрʹ кьр, у зийа жи мәләкед хԝәва тʹәви ԝан шәрʹ кьр,
8 ле ԝана данә дәр, әʹзменда жи ида бона ԝан щи нәма.
9 Әԝ зийайе мәзьн, мәʹре бәре, йе кӧ жерʹа Мире-щьна у Шәйтʹан те готьне, йе кӧ тʹәмамийа дьнйайе дьхальфинә, һатә авитьне сәр әʹрде. Мәләкед ԝи жи тʹәви ԝи жорда һатьнә авитьне сәр әʹрде.
10 У мьн ль әʹзмен дәнгәки бьльнд бьһист кӧ гот:
«Ньһа ԝәʹде хьлазбуне, ԛәԝате у Пʹадшатийа Хԝәдайе мә, ӧса жи һʹӧкӧме Мәсиһе ԝи, һатийә. Чьмки йе кӧ хәйбе бьред мә дькә, демәк йе кӧ шәв у рʹож бәр Хԝәдайе мә хәйбе ԝан дькә, һатийә авитьне сәр әʹрде.
11 Әԝана пе хуна Бәрх у пе мьзгинийа кӧ ԝана бәла дькьр, һьмбәри ԝи сәркʹәтьн, у әԝана һәла һе һазьр бун әʹмьре хԝә жи бьдьн.
12 Ләма жи бона ве йәке ша бьн, һәй әʹзманно у йед кӧ ль әʹзмен дьжин! Ле ԝәй ль әʹрде у ль бәʹре, чьмки Мире-щьна жорда сәр ԝәда һатә авитьне у әԝ жь һерсе хԝә дьхԝә, чьмки занә кӧ ԝәʹде ԝи һьндьк майә».
13 Гава зийа дит кӧ әԝ һатә авитьне сәр әʹрде, әԝ пәй ԝе кʹӧлфәте кʹәт, йа кӧ зарʹа кӧрʹин анибу.
14 Ле дӧ баскед тәйре мәзьн жьнькерʹа һатьнә дайине, ԝәки әԝ бьфьрʹә һәрʹә бәрʹийе, кʹидәреда щи жерʹа һатьбу һазьркьрьне. Ԝедәре әԝ гәрәке жь зийа дур, сәр ԝәхтәке, дӧ ԝәхта у нив ԝәхти* бьһата тʹеркьрьне.
15 Мәʹр жь дәве хԝә ав мина чʹәмәки мәзьн пәй жьньке бәрʹда, ԝәки жьньке бь аве бьхәньԛинә.
16 Ле әʹрд һатә һәԝара жьньке, дәве хԝә вәкьр у чʹәме кӧ жь дәве зийа дәркʹәт, даԛӧртанд.
17 Һьнге зийа һерса хԝә сәр жьньке рʹакьр у чу, ԝәки тʹәви зӧрʹәтед ԝейә майи шәрʹ кә, йед кӧ тʹәмийед Хԝәде тиньн сери у шьхӧле бәлакьрьна мьзгинийе дәрһәԛа Иса ԝанрʹа һатийә дайине.
Спартьн
^ Демәк се у нив ԝәхт.
