Ә′фьрандаре мә жь мә дьһа билантьр ә. Әԝ ча бав, мә һ′әз дькә у бона мә хәм дькә. Хԝәде мәри ӧса нәә′фьрандийә, кӧ бькарьбьн бейи р′ебәрийа ԝи бьжин (Йерәмйа 10:23). Ча зар′а бьч′укр′а лазьм ә р′ебәрийа де-бава, ӧса жи мә һәр кәсир′а лазьм ә р′ебәрийа Хԝәде (Ишайа 48:17, 18). Иро әм р′ебәрийе дьстиньн бь сайа ԝан ԛануна, кӧ дь К′ьтеба Пирозда ньвисар ьн, у әв р′ебәри р′асти жи п′ешк′еша жь Хԝәде йә. Бьхунә 2 Тимот′ейо 3:16.

Ԛанун у ширәтед Хԝәде мә һин дькьн ча р′ожед иройин әм бәхтәԝар бьн у ль ахьрийе жи ә′мьре һ′әта-һ′әтайе бьстиньн. Чьмки Хԝәде әм ә′фьрандьнә, ләма һәԛ ә кӧ әԝи ԛанун у фәрман дайә мә кӧ ча әм гәрәке бьжин. Әм гәрәке әве йәке бьшекьриньн у бь шабун гӧр′а ԛанунед ԝи бькьн. Бьхунә Зәбур 19:7, 11; Ә′йанти 4:11.

Һьнә ԛанунед жь К′ьтеба Пироз дькарьн дь щур′ә-щур′ә дәрәщада бенә хәбьтандьне. Ле һәнә ԛанунед ӧса жи кӧ т′әне дь дәрәщәкеда тенә хәбьтандьне (Ԛануна Дӧщари 22:8). Әм гәрәке һ′ьш-аԛьле хԝә бьдьн хәбате, ԝәки фә′м бькьн ча р′астийед жь К′ьтеба Пироз мәр′а дьбежьн чь бькьн, чь нәкьн (Мәт′әлок 2:10-12). Мәсәлә, К′ьтеба Пироз мә һин дькә кӧ ә′мьр п′ешк′еша жь Хԝәде йә. Жь ве һинкьрьне әм чь ширәт у р′ебәрийе һьлдьдьн? Һәгәр әм һ′әсаб дькьн кӧ ә′мьр п′ешк′еша жь Хԝәде йә, әме т′ьме һаш жь хԝә һәбьн, ԝәки нә ә′мьре хԝә нә жи йе мәрийед дьн нәкьнә бьн хофе, ӧса жи зийане нәдьнә нә хԝә, нә жи мәрийед дьн. Бьхунә К′аред Шандийа 17:28.

Иса Мәсиһ дәрһәԛа дӧ ԛанунед фәрз хәбәр да. Ԛануна пешьн нишан дькә, ԝәки нета ә′мьре мәрьва әԝ ә, кӧ дәрһәԛа Хԝәде  бьзаньбьн, ԝи һ′әз бькьн у бь амьнийе ԝир′а ԛӧльх кьн. Әв ԛанун әм гәрәке дь һ′әму шьхӧлед хԝәда бьдьн хәбате (Мәт′әлок 3:6). Әԝ мәри к′и кӧ бь ве ԛануне дьжин, ԝе һәвалтийа т′әви Хԝәде, бәхтәԝарбуна р′аст у ә′мьре һ′әта-һ′әтайе бьстиньн. Бьхунә Мәтта 22:36-38.

Ԛануна дӧда дькарә али мә бькә, кӧ һәләԛәтийа мә т′әви мәрьва бь ә′дьлайи бә (1 Корьнт′и 13:4-7). Әва ԛануна дӧда али мә дькә әм ч′ә′в бьдьнә Йаһоԝа Хԝәде, ԝәки ча кӧ әԝ т′әви мәрийа йә ӧса жи әм бьн. Бьхунә Мәтта 7:12; 22:39, 40.

Ԛанунед К′ьтеба Пироз малбәта һин дькьн ԝәки ча дь һ′әзкьрьнеда бьбьнә йәк (Колоси 3:12-14). Хәбәра Хԝәде ӧса жи ԛанунәкә ӧса дьдә, ԝәки мер у жьн гәрәке һәв нәԛәтьн. Әв ԛанун малбәта хԝәй дькә. Бьхунә Дәстпебун 2:24.

Һәгәр әм ван ԛануна бьԛәдиньн, әв йәк ԝе али мә бькә, ԝәки һ′але мә һ′әму алийава хԝәш бә. Мәсәлә, әԝ к′и хәбатчийа дьхԝазьн, т′ьме мәрийед ӧса дьгәр′ьн, к′и кӧ бь ԛанунед у ширәтед К′ьтеба Пироз дьжин, чьмки мәрийед ӧса һ′әлал у хирәт ьн (Мәт′әлок 10:4, 26; Ибрани 13:18). Хәбәра Хԝәде ӧса мә һин дькә, кӧ һәгәр һ′әму тьштед кӧ сәва ә′мьр лазьм ә бал мә һәйә, әм гәрәке ида р′ази бьн у һәвалтийа хԝә т′әви Йаһоԝа Хԝәде жь һ′әму тьштед дьн һе ԛимәт бькьн. Бьхунә Мәтта 6:24, 25, 33; 1 Тимот′ейо 6:8-10.

Чахе әм ԛанунед К′ьтеба Пироз дьдьнә хәбате, әм бь ве йәке ӧса жи сьһ′әт-ԛәԝата хԝә хԝәй дькьн (Мәт′әлок 14:30; 22:24, 25). Мәсәлә, ԛануна Хԝәде мә һин дькә кӧ әм гәрәке т′ӧ щар сәрхԝәш нәбьн. Әв ԛанун мә жь нәхԝәшийед гьран у жь ԛәзийа хԝәй дькә (Мәт′әлок 23:20). Йаһоԝа Хԝәде дьһелә ԝәки әм ич′ке вәхԝьн, ле т′әне гәрәке фәсал бьн, ԝәки сәрхԝәш нәбьн (Зәбур 104:15; 1 Корьнт′и 6:10). Бь һинбуна ԛанунед Хԝәде әм к′аре дьстиньн, чьмки бь ван һинкьрьна нә кӧ т′әне кьред мә, ле ӧса жи фькьред мә тенә хԝәйкьрьне (Зәбур 119:97-100). Мәсиһийед р′аст ԛанунед Хԝәде дьԛәдиньн нә кӧ т′әне сәва к′ара хԝә, ле сәва кӧ Йаһоԝа Хԝәде һӧрмәт бькьн. Бьхунә Мәтта 5:14-16.