Хԝәде зӧр′әтед Бьраһим п′ехәмбәр бәрәк′әт кьр. Әԝана жь һәв зедә бун, бунә щьмә′тәкә мәзьн, у Хԝәде ԛанунед хԝә да ԝан. Хԝәде әв щьмә′т нав кьр «Исраел» у хԝәр′а жьбарт, ԝәки әԝана ԛӧльхкьрьна р′аст у хәбәра ԝи хԝәй кьн (Зәбур 147:19, 20). Ләма жи мәрийед жь һ′әму мьләта бь сайа щьмә′та Исраел гәрәке бьһатана к′әрәмкьрьне. Бьхунә Дәстпебун 22:18.

Хԝәде щьмә′та Исраел жьбарт, ԝәки әԝана бьбьнә шә′дед ԝи. Т′әрихийа щьмә′та Исраел нишан дькә, кӧ чахе щьмә′те гӧр′а ԛанунед Хԝәде дькьр, әԝана гәләк бәхтәԝар бун (Ԛануна Дӧщари 4:6). Һәма ӧса, бь сайа щьмә′та Исраел, мьләтед дьн жи гәрәке һин буна дәрһәԛа Хԝәдайе р′аст. Бьхунә Ишайа 43:10, 12.

Пәй гәләк ԝә′дәр′а щьмә′та Исраел ԛәбулкьрьна Хԝәде ӧнда кьр, у Йаһоԝа Хԝәде дәԝса ԝан, щьвата Мәсиһийа жьбарт (Мәтта 21: 43; 23:37, 38). Ньһа дәԝса щьмә′та Исраел, мәсиһийед р′аст шә′дәтийе дьдьн дәрһәԛа Йаһоԝа Хԝәде, у ԛӧльх дькьн ча шә′дед Йаһоԝа. Бьхунә К′аред Шандийа 15:14, 17.

Иса Мәсиһ шагьрт т′ӧп кьрьн, ԝәки әԝана даннасин бькьн һ′әму мьләтар′а у ԝана бькьнә шагьрт (Мәтта 10:7, 11; 24:14; 28:19, 20). Әв шьхӧл т′ӧ щар ӧса нәһатийә кьрьне ча р′ожед иройин, демәк дь р′ожед хьлазийа дьнйа хьрабда. Р′ожед иройин Йаһоԝа Хԝәде бь милйона мәри жь щур′ә-щур′ә мьләта т′оп кьрийә, дь нава т′әрихийеда әв щара пешьн ә кӧ һаԛас мәри т′оп бунә, сәва кӧ ԝир′а р′аст ԛӧльх кьн (Ә′йанти 7:9, 10). Мәсиһийед р′аст һатьн т′опкьрьне, ԝәки һәвдӧ дьлгәрм кьн у али һәв бькьн. Ӧса жи, ԝәки дь т′әмамийа дьнйайеда ль сәр һ′әму щьвата, бь бәрнәмәке К′ьтеба Пироз һин бьн. Бьхунә Ибрани 10:24, 25.

Дь сала 1870-да к′омәкә бьч′ук, йед кӧ К′ьтеба Пироз леколин дькьрьн, дәстпекьрьн ә′йан кьн һьнә һинкьрьнед жь К′ьтеба Пироз, йед кӧ вәшарти бун. Ԝана заньбу кӧ Иса Мәсиһ ләма саз кьр щьвата мәсиһийа, ԝәки әԝана даннасин бькьн. Ләма жи ԝана саз кьрьн даннасинкьрьна дәрһәԛа п′адшатийе ль нав т′әмамийа дьнйайе. Дь сала 1931-да ԝана наве ӧса данә сәр хԝә «Шә′дед Йаһоԝа». Бьхунә К′аред Шандийа 1:8; 2:1, 4; 5:42.

Дь ԛӧр′на йәкеда, һәбу к′ома меред маԛул у щер′ьбанди, йед кӧ ль сәр щьватед дь щур′ә-щур′ә ԝәлатада бәрпьрсийари дькьрьн. Әван мера ԛәбул дькьрьн, кӧ Иса Мәсиһ йә сәрк′аре щьвате (К′аред Шандийа 16:4, 5). Р′ожа иройин жи, Шә′дед Йаһоԝа тенә р′ебәрикьрьне бь сайа к′ома бьред маԛул у щер′ьбанди, әва к′ома бьра тенә навкьрьне ча К′ома р′ебәрийе. Әԝана ль сәр һ′әму филиалед Шә′дед Йаһоԝа бәрпьрсийарийе дькьн. Филиал жи бәрпьрсийар ә кӧ ә′дәбйәтед сәва һинбуна К′ьтеба пироз, ль сәр 600 зьмана бе ԝәлгәр′андьне, нәшьркьрьне у бәлакьрьне. К′ома р′ебәрикьрьне ӧса жи р′ебәрийе дьдә у дьлгәрм дькә хушк-бред жь 100 000 щьвата зедәтьр ль сәр т′әмамийа дьнйайе. Дь һ′әму щьватада меред лайиԛ ԛӧльх дькьн ча р′успи, демәк бәрпьрсийар. Әв мер бь дьл у щан хәм дькьн дәрһәԛа ԛӧльхк′аред Хԝәдейә р′аст. Бьхунә 1 Пәтрус 5:2, 3.

Шә′дед Йаһоԝа һатьнә сазкьрьне, сәва кӧ бәла кьн мьзгинийа хере, у мәрийа бькьнә шагьрт. Мина шандийед дь ԛӧр′на йәкеда, әм жи мал бь мал шә′дәтийе дьдьн (К′аред Шандийа 20:20). Әм ӧса жи т′әглиф дькьн мәрийед һ′әлал, йед кӧ р′астийе һә′з дькьн, т′әви мә К′ьтеба Пироз һин бьн. Ле Шә′дед Йаһоԝа нә кӧ т′әне т′әшкиләт ә. Әм чаԝа зар′ед бавәки нә, йе кӧ мә гәлә һ′әз дькә. Әм чаԝа хушк у бьра дәрһәԛа һәв хәм дькьн (2 Т′есалоники 1:3). Р′аст ә Шә′дед Йаһоԝа һатьнә сазкьрьне, ԝәки ԛьрара Хԝәде бьԛәдиньн у алик′арийе бьдьнә мәрийа, ле ԝана сәрда жи саз кьрийә малбәтәкә жь һ′әмушка бәхтәԝар ль нав т′әмамийа дьнйайе. Бьхунә Зәбур 33:12; К′аред Шандийа 20:35.