Хԝәде һ′әму щур′ә мәрийа т′әглиф дькә, ԝәки әԝана бь дӧакьрьн незики ԝи бьн (Зәбур 65:2). Ле Хԝәде һ′әму дӧа ԛәбул накә. Мәсәлә һәгәр мер жьна хԝәр′а хьраб ә, Хԝәде дӧайед ԝи ԛәбул накә (1 Пәтрус 3:7). Чахе щьмә′та Исраел нәдьхԝәст гӧр′а Хԝәде бькьра у хьраби дькьрьн, Йаһоԝа Хԝәде дӧайед ԝан инк′ар дькьр. Р′аст ә дӧакьрьн ԛәдьрәки гәләк мәзьн ә. Ле Йаһоԝа т′ьме һазьр ә мә бьбьһе, әԝ һәла һе дӧайед ԝан жи дьбьһе, к′и кӧ гӧнед гьран кьрьнә ле жь гӧнед хԝә п′ошман бунә у т′обә кьрьнә. Бьхунә Ишайа 1:15; 55:7.

Әм гәрәке т′әне Йаһоԝар′а дӧа бькьн, чьмки әԝ ә ә′фьрандаре мә у Хԝәдайе р′аст (Мәтта 4:10; 6:9). Әм мәрийед гӧнәк′ар ьн у гәрәке бь наве Иса Мәсиһ дӧа бькьн, чьмки әԝи сәва гӧнед мә ә′мьре хԝә да (Йуһ′әнна 14:6). Йаһоԝа Хԝәде нахԝазә, ԝәки дӧайед мә п′ьр′ хәбәр бьн, йан жи бь әзбәри бьн. Ле әԝ дьхԝазә, ԝәки әм бь дьл у щан ԝир′а дӧа бькьн. Бьхунә Мәтта 6:7; Филипи 4:6, 7.

Ә′фьрандаре мә ӧса жи ԝан дӧа дьбьһе, йед кӧ әм дь дьле хԝәда дьбежьн (1 Самуйел 1:12, 13). Йаһоԝа Хԝәде мә т′әглиф дькә т′ьме ԝир′а дӧа бькьн. Мәсәлә сьбәһе зу чахе р′адьбьн, йан жи еваре пешийа р′азане. Ӧса жи әм дькарьн дӧа бькьн пешийа нан-хԝарьне, у чахе р′асти чәтьнайа тен. Бьхунә Зәбур 55:22; Мәтта 15:36.

Һеса нинә незики Хԝәде бьн, чьмки дор-бәре мә мәрьвед ӧса дьжин, йед кӧ баԝәрийа хԝә Хԝәде найньн у ԛәрфе хԝә созе Хԝәде дькьн, кӧ ль сәр ә′рде ԝе ә′дьлайи һәбә (2 Тимот′ейо 3:1, 4; 2 Пәтрус 3:3, 13). Ләма жи әм һ′әԝщә нә, кӧ һелана бьдьнә һәв у һәв ԛәԝи кьн. Бьхунә Ибрани 10:24, 25.

 Чахе әм т′әви ԝан мәрьва дьщьвьн, к′и кӧ Хԝәде һ′әз дькьн, әв йәк али мә дькә, ԝәки һе незики Хԝәде бьн. Щьватед Шә′дед Йаһоԝа мәщаләкә баш дьдә мә, ԝәки әм жь баԝәрийа хушк-бьра ԛәԝи бьн. Бьхунә Р′омайи 1:11, 12.

Тӧ дькари һе незики Хԝәде би, һәгәр дьшьрмиш би ль сәр ԝе йәке, чь кӧ жь Хәбәра Хԝәде һин дьби. Чахе К′ьтеба Пироз дьхуни, у педьһ′әси дәрһәԛа кьред, ширәтед у созед Йаһоԝа Хԝәде, һәр гав дьшьрмиш бә тӧ жь ван тьшта чь һин дьби дәрһәԛа Хԝәде. Дьшьрмишбун у дӧакьрьн али мә дькьн фә′м бькьн, кӧ чьԛас мәзьн ә һ′әзкьрьн у биланийа Йаһоԝа Хԝәде. Бьхунә Йешуа 1:8; Зәбур 1:1-3.

Һәгәр тӧ дьхԝази незики Хԝәде би, тӧ гәрәке баԝәрийа хԝә ԝи бини у гӧмана хԝә бьди сәр ԝи. Баԝәрбун әм дькарьн бәрамбәри кӧлирке бькьн. Мәсәлә ча кӧлиркер′а т′ьме лазьм ә ав, ӧса жи мәр′а т′ьме лазьм ә дьшьрмишбун дәрһәԛа һинкьрьнед К′ьтеба Пироз, ԝәки баԝәрбуна мә ԛәԝи бә. Бьхунә Мәтта 4:4; Ибрани 11:1, 6.

Йаһоԝа Хԝәде хәм дькә бона ԝан мәрийа к′и кӧ ԝи һ′әз дькьн. Әԝ ӧса жи жь ԝан һ′әму тьшта мә хԝәй дькә, йе кӧ дькарә баԝәрбун у гӧмана мәйә ә′мьре һ′әта-һ′әтайе бьдә ӧндакьрьне (Зәбур 91:1, 2, 7-10). Йаһоԝа ӧса жи пешда ә′лами мә дькә дәрһәԛа ԝан тьшта, чь кӧ дькарә зийане бьдә сьһ′әт-ԛәԝат у бәхтәԝарбуна мә. Бь р′астийе жи т′әне Йаһоԝа дькарә р′ийа лапә баш мә һин кә, р′ийа кӧ бәр бь жийине дьбә. Бьхунә Зәбур 73:27, 28; Аԛуб 4:4, 8.