Мьзгинийа дәрһәԛа ԝе йәке, кӧ мәри ԝе ль сәр ә′рде һ′әта-һ′әтайе бьжин, дь К′ьтеба Пирозда ньвисар ә (Зәбур 37:29). Т′әмамийа К′ьтеба Пироз, бь 66 к′ьтебед бьч′ук һатийә т′оп кьрьне. Хԝәде бона ньвисандьна ван к′ьтеба, 40 п′ехәмбәред хԝә да хәбате. Пенщ к′ьтебед пешийе, бь дәсте Муса п′ехәмбәр ԝәкә 3 500 сал пешда һатьнә ньвисаре. Ле к′ьтеба пашийе, бь дәсте Йуһ′әнна п′ехәмбәр ԝәкә 1 900 сали зедәтьр пешда һатийә ньвисаре. Ле гәло ньвиск′аред К′ьтеба Пироз нет-фькьред к′е дьньвисин? Бь р′астийе ԝана фькьред Хԝәде дьньвисин, Хԝәде фькьред хԝә бь р′ӧһ′е пироз ә′лами ԝан ньвиск′ара дькьр (2 Самуйел 23:2). Әԝана нет-фькьред Хԝәде дьньвисин, нә кӧ фькьред хԝә. Ләма жи авторе К′ьтеба Пироз, Йаһоԝа Хԝәде йә. Бьхунә 2 Тимот′ейо 3:16; 2 Пәтрус 1:20, 21.

Хенщи Хԝәде т′ӧ кәс нькарә пешда дәрһәԛа ахьрийе п′ехәмбәртийе бькә. Дь К′ьтеба Пирозда, дәрһәԛа ахьрийе р′аст у һур бь һур һатийә п′ехәмбәртикьрьне (Йешуа 23:14). Ләма жи әм баԝәр дькьн, ԝәки К′ьтеба Пироз жь Хԝәде йә. Чьмки т′әне Хԝәде дәрһәԛа ахьрийа мәрийа занә. Бьхунә Ишайа 42:9; 46:10.

Дьбәк һун жи ԛайил ьн, ԝәки к′ьтеба жь Хԝәде гәрәке к′ьтебәкә мәхсус бә. Әԝ р′асти жи к′ьтебәкә ӧса нә. К′ьтеба Пироз ль сәр сәда зьмана у бь милйарда һ′әв тенә нәшьр кьрьне. Р′аст ә К′ьтеба Пироз к′ьтебәкә кәвьн ә, ле дь алийе зандарийеда әԝ р′аст ә у һәвгьредайи йә. К′ьтеба Пироз ԝәкә 40 мәри ньвисинә, ле ньвисаред ԝан мьԛабьли һәв ниньн, әԝана һәвва гьредайи нә *. Хенщи ве йәке, К′ьтеба Пироз һ′әзкьрьна Хԝәде дьдә  к′ьфше. К′ьтеба Пироз һәла һе иро жи дькарә ә′мьре мәрьва бәрбь башбуне бьгӧһезә. Әв һ′әму тьшт у избаткьрьн, баԝәрийа милйона мәрийа ԛәԝи дькә, кӧ К′ьтеба Пироз Хәбәра Хԝәде йә. Бьхунә 1 Т′есалоники 2:13.

К′ьтеба Пироз дина мә дьдә ль сәр мьзгинийа Хԝәде, демәк әԝ гьли дькә дәрһәԛа нета Хԝәдейә баш бона мәрийа. К′ьтеба Пироз шьровәдькә кӧ ча мәрийа ӧнда кьр мәщал, ԝәки дь щьнәтеда ль сәр ә′рде бьжин, у ча ә′рд ԝе диса бьбә щьнәт. Бьхунә Ә′йанти 21:4, 5.

Дь Хәбәра Хԝәдеда, ӧса жи һәнә ԛанун, принсип у ширәт. Хенщи ве йәке дь К′ьтеба Пирозда те гьликьрьне дәрһәԛа һәләԛәтийа Хԝәде т′әви мәрийа, у жь ве йәке әм педьһ′әсьн Хԝәде чь щур′әйи йә. Бь ви щур′әйи К′ьтеба Пироз дькарә али тә бькә, ԝәки тӧ Хԝәде нас бьки. Әԝ шьровәдькә, ча тӧ дькари бьби һәвале Хԝәде. Бьхунә Зәбур 19:7, 11; Аԛуб 2:23; 4:8.

Иса Мәсиһ ньвисаред К′ьтеба Пироз р′ез бь р′ез пәй һәв шьровәдькьр, сәва кӧ мәри р′ьнд «ньвисара фә′м бькьн». Дь ве брошуреда жи те хәбьтандьне әԝ метода һинкьрьна К′ьтеба Пироз, йед кӧ Иса Мәсиһ дьда хәбате. Ләма жи әва брошура ԝе али тә бькә К′ьтеба Пироз р′ьнд фә′м бьки. Бьхунә Луԛа 24:27, 45.

Мьзгинийед Хԝәде, жь һ′әму тьшти һе гәлә һ′әԝаск′ар у ԛимәт ьн. Р′аст ә һьнә жь мәрийа дь һьндава ван мьзгинийада бет′алаш ьн. Һьнәк жи, жь ван мьзгинийа ә′щьз дьбьн у һерс дьк′әвьн. Ле тӧ жь бо ве йәке ԛәт бәрхԝә нәк′әвә. Бьзаньбә, кӧ һәгәр тӧ занәбуне дәрһәԛа Хԝәде бьстини, гӧмана тә дәрһәԛа жийина һ′әта-һ′әтайе ԝе һәбә. Бьхунә Йуһ′әнна 17:3.