Иса нә мина һ′әму мәрийа бу, чьмки пешийа һатьна ль сәр ә′рде, әԝ ль ә′змана ча мьлйак′әт дьжит (Йуһ′әнна 8:23). Пешийа ә′фьрандьна һ′әму тьшти, Йаһоԝа Иса ә′фьрандьбу, у паше жи һ′әму тьштед дьне Йаһоԝа Хԝәде у Иса т′әвайи ә′фьрандьн. Йаһоԝа Хԝәде хԝәха Иса ә′фьрандийә, ләма жи Иса те навкьрьне Кӧр′е Хԝәдейи «тайе т′әне» (Йуһ′әнна 1:14). Иса Хәбәрване Хԝәде бу, әԝи хәбәра Хԝәде дәрбази кәсед дьне дькьр, ләма жи әԝ те навкьрьне «Хәбәр». Бьхунә Колоси 1:15, 16.

Хԝәде ә′мьре Кӧр′е хԝә дәрбази зьке Мәрйәме кьр, у ӧса Иса шандә ль сәр ә′рде. Мәрйәм ԛизәкә щьһу у бьк′ьр бу. Ләма жи баве Исайи мәрьвайи т′ӧнәбу (Луԛа 1:30-35). Иса Мәсиһ һатә ль сәр ә′рде сәва кӧ: 1) дәрһәԛа Хԝәде р′астийе һин кә, 2) мәсәле бьдә мә, чаԝа ԝә′де чәтьнайа ԛьрара Хԝәде бьԛәдиньн, у 3) ә′мьре хԝәйи ԛәданди бәрва бьдә у мә бьк′ьр′ә. Бьхунә Мәтта 20:28.

Ль вьр, к′ьр′ин те һ′әсабе һәԛдайин, сәва кӧ кәсәк жь мьрьне бе хьлазкьрьне (Дәрк′әтьн 21:29, 30). Нета Хԝәде әԝ нибу, ԝәки мәрьв кал бьн, пир бьн у бьмьрьн. Ле әве йәке әм жь к′ӧ заньн? Хԝәде мәрьве пешьн Адәмр′а гот, кӧ һәгәр әԝ гӧр′а ԝи нәкә демәк ча дь К′ьтеба Пирозда те готьне гӧнә бькә, әԝе бьмьрә. Ләма жи һәгәр Адәм гӧнә нәкьра, әԝ ԝе т′ӧ щар нәмьра (Дәстпебун 2:16, 17; 5:5). Жь К′ьтеба Пироз әм педьһ′әсьн, кӧ гӧнә жь Адәм «к′әтә» дьне у дәрбази ль сәр мәрьва бу. Бь ве йәке Адәм гӧнә у мьрьн дәрбази ль сәр һ′әму зӧр′әтед хԝә кьр. Ләма жи мәр′а лазьм ә к′ьр′ин  сәва кӧ мә жь мьрьне хьлаз кә, кӧ жь Адәм дәрбази мә бу. Бьхунә Р′омайи 5:12; 6:23.

Ле к′и дькарьбу һәԛе к′ьр′ине бьда, сәва кӧ мә жь мьрьне хьлаз кә? Чахе әм дьмьрьн әм т′әне һәԛе гӧнед хԝә дькарьн бьдьн. Т′ӧ мәрьвәки гӧнәк′ар нькарә һәԛе гӧнед мәрьвед дьн бьдә. Бьхунә Зәбур 49:7-9.

Иса нә мина мә бу, әԝ ԛәданди бу. Ләма жи нә лазьм бу ԝәки әԝ сәва гӧнед хԝә бьмьра, әԝи т′ӧ щар гӧнә нәкьрьбу. Ле әԝ мьр сәва гӧнед мәрьвед дьн. Хԝәде Иса шанд, ԝәки әԝ сәва гӧнед мә бьмьрә, у бь ве йәке әԝи һ′әзкьрьна хԝәйә п′ьр′ мәзьн дь һьндава мәрьвада ә′йан кьр. Иса жи һ′әзкьрьна хԝә дь һьндава мәда ә′йан кьр, әԝи гӧр′а Баве хԝә кьр у ә′мьре хԝә сәва гӧнед мә бәрва да. Бьхунә Йуһ′әнна 3:16; Р′омайи 5:18, 19.

Чахе Иса ль сәр ә′рде бу, әԝи нәхԝәш ԛәнщ дькьрьн, мьри жь мьрьне р′адькьр у дь чәтьнайада али мәрьва дькьр. Бь ве йәке Иса нишан кьр, кӧ дь ахьрийеда сәва мәрьвед гӧһдар ԝе чь бькә (Мәтта 15:30, 31; Йуһ′әнна 5:28). Паши мьрьне Хԝәде Иса пашда бьрә ль ә′змана, ча кәсед р′ӧһ′ани (1 Пәтрус 3:18). Ль ԝьр Иса Мәсиһ алийе дәсте Хԝәдейи р′асте р′уньшт у һивийе бу, кӧ һ′әта Йаһоԝа Хԝәде ԛәԝате бьдә ԝи, ԝәки әԝ ча п′адша ль сәр т′әмамийа ә′рде п′адшатийе бькә (Ибрани 10:12, 13). Ньһа Иса Мәсиһ ль ә′змана п′адшатийе дькә у шагьртед ԝи жи мьзгинийа Хԝәде дь т′әмамийа дьнйайеда ә′лам дькьн. Бьхунә Данийел 7:13, 14; Мәтта 24:14.

Зутьрәке Иса Мәсиһ ча п′адша ԝе ԛәԝата хԝә бьдә хәбате, ԝәки һ′әму чәтьнайа у ӧса жи ԝан к′и кӧ чәтьнайа тиньн, ԝе к′ӧтакә. Һәр кәс к′и кӧ баԝәрийа хԝә Иса Мәсиһ тинә у гӧр′а ԝи дькә, әԝе ль сәр ә′рде дь щьнәтеда бьжи. Бьхунә Зәбур 37:9-11.