1, 2. Һьнә мәрьв дәрһәԛа Хԝәде чь дьфькьрьн?

 ГӘЛӘК мәрьв дьфькьрьн, кӧ тʹалаша Хԝәде нинә әԝана чь дькьн. Әԝана дьфькьрьн кӧ бь рʹастийе хәма Хԝәде нинә, кӧ чь сәре ԝан дьԛәԝьмә. Мәсәлә, чахе Филипинеда сала 2013 мәһа Тәшрине, фьртонәкә мәзьн ԛәԝьми әԝ ԝәлат ниве зәʹф кʹӧта бу, сәрәккʹомаре шәһәрәки Филипинейи мәзьн гьлийед ӧса гот: «Хԝәде дьбәкә ԝи чахи щики дьн бу».

² Һьнә мәрьв жи дьфькьрьн, кӧ Хԝәде нькарә бьвинә кӧ әԝана чь дькьн (Ишайа 26:10, 11; 3 Йуһʹәнна 11). Ԝәʹде Паԝлос жи, һьнә мәрьв ӧса дьфькьрин. Паԝлос дәрһәԛа ԝана ӧса гот: «Ԝана нәхԝәст Хԝәде занәбуна хԝәда хԝәйкьрьна». Әԝана мәрьвнә нәһәԛ, зӧлм, тьма у хьраб бун (Рʹомайи 1:28, 29).

3. а) Әм гәрәке кʹижан пьрса бьдьнә хԝә? б) Кʹьтеба Пирозда «дәсте» Хԝәде гәләк щар чь те һʹәсабе?

³ Ле әм чь дькарьн бежьн дәрһәԛа хԝә? Әм заньн кӧ Йаһоԝа һʹәму тьшти дьвинә чь кӧ әм дькьн. Ле гәло әм баԝәр дькьн кӧ әԝ бона мә хәм дькә? Гәло әм дәсте ԝи жийина хԝәда дьвиньн? Дь Кʹьтеба Пирозда «дәсте» Хԝәде гәләк щар те һʹәсабе ча ԛәԝата ԝи. Әԝ ԛәԝата хԝә дьдә хәбате, сәва кӧ али хьзмәткʹаред хԝә бькә у сәва кӧ дьжмьнед хԝә кʹӧта кә. (Бьхунә Ԛануна Дӧщари 26:8.)  Иса гот кӧ һьнә мәрьв ԝе бькарьбьн «Хԝәде бьбиньн» (Мәтта 5:8). Гәло әм дькʹәвьнә нава ԝан мәрьва? Әм ча дькарьн «Хԝәде бьбиньн»? Ԝәрен әм жь Кʹьтеба Пироз бьньһерʹьн мәсәлед ԝан мәрьва, йед кӧ дәсте Хԝәде дитьнә жийина хԝәда у ӧса жи йед кӧ нәхԝастьнә бьвиньн. Әме ӧса жи пебьһʹәсьн кӧ чаԝа баԝәри али мә дькә, сәва кӧ дәсте Хԝәде бьвиньн.

4. Чьрʹа дьжмьне Исраелийа нәхԝастьн кӧ дәсте Хԝәде бьвиньн?

⁴ Бәре, мәщала гәләк мәрьва һәбу, кӧ бьвиньн у бьбьһен кӧ чаԝа Хԝәде али щьмәʹта хԝә дькә. Йаһоԝа кʹәрәмәт дькьр, сәва кӧ щьмәʹта хԝә жь Мьсьре аза кә у гәләк пʹадшед дь Әʹрде Создайида кʹӧта кьр (Йешу 9:3, 9, 10). Гәләк пʹадшед майин рʹаст ә бьһистьбун у дитьбун кӧ чаԝа Йаһоԝа щьмәʹта хԝә хԝәй дькьр, ле йәкә ԝана «бона ль дьжи Йешу у гәле Исраеле шәрʹ бькьн, һатьн щәм һәв» (Йешу 9:1, 2). Чахе ԝана дәстпекьр тʹәви Исраелийа шәрʹ кьн, мәщала ԝан пʹадша һәбу, кӧ дәсте Хԝәде бьвиньн. Чьмки бь сайа ԛәԝата Йаһоԝайә мәзьн, «һʹәта кӧ гәл [щьмәʹт] жь нәйаред хԝәва тола [һʹәйфа] хԝә һьлда, рʹож сәкьни у һив жи ль щиһе хԝә ма» (Йешу 10:13). Ле Йаһоԝа ӧса кьр, кӧ дьле дьжмьне Исраелийа «һʹьшк» бә, у ләма әԝана мьԛабьли Исраелийа дәркʹәтьн (Йешу 11:20). Дьжмьне Исраелийа кʹӧта бун, чьмки ԝана нәхԝаст баԝәр кьн, кӧ Йаһоԝа бона щьмәʹта хԝә шәрʹ дькә.

5. Аһаб Пʹадша чь нәдьхԝаст баԝәр кә?

⁵ Мәщала Аһаб Пʹадшайе зӧлм жи һәбу, кӧ гәләк щар дәсте Хԝәде бьвинә. Елйас готә ԝи: «Һʹәта кӧ готьна мьн нәбә, ԝе дь ван саланда хӧнав у баран нәкʹәвә!» (1 Пʹадшати 17:1). Әԝ йәк тʹәне бь дәсте Хԝәде дькарьбу бьԛәԝьмийа, ле Аһаб нәдьхԝаст әԝе йәке баԝәр бькә. Һьнә ԝәʹдә шунда, Елйас Йаһоԝарʹа дӧа кьр, у Йаһоԝа щаба дӧайе ԝи да бь агьре жь әʹзмана. У Аһаб жи әв йәк дит. Паше, Елйас Аһабрʹа гот кӧ Йаһоԝа ԝе ӧса бькә, кӧ әʹрд ида һʹьшк нәбә, ле дәԝсе барана ԛайим бьшинә (1 Пʹадшати 18:22-45). Аһаб әԝ һʹәму кʹәрәмәт дит, ле диса жи нәдьхԝаст баԝәр кьра кӧ әԝи ԛәԝата Йаһоԝа дит. Әм чь һин дьбьн жь ԝан мәсәла? Дь жийина хԝәда, әм гәрәке тʹьме дәсте Йаһоԝа бьгәрʹьн.

6, 7. Гибәонийа у Рʹәхабе чь фәʹм кьрьн?

⁶ Гибәони гәләк щӧдә дьбун жь мьләтед кӧ дор бәре ԝан бун. Ԝана дәсте Хԝәде дит. Ԝана нәдьхԝаст тʹәви Исраелийа шәрʹ бькьн, ле дәԝсе дьхԝастьн тʹәви ԝана әʹдьлайе гьредьн. Гәло чьрʹа? Гибәонийа готьн, кӧ ԝана дәрһәԛа Йаһоԝа у кьрьнед ԝи бьһистьнә (Йешу 9:3, 9, 10). Биланийа ԝана һатә кʹьфше чахе ԝана фәʹм кьр, ԝәки Йаһоԝа бона Исраелийа шәрʹ дькә.

⁷ Рʹәхабе жи дәсте Йаһоԝа дит. Рʹаст ә әԝ Исраели нибу, ле әԝе бьһист кӧ чаԝа Йаһоԝа щьмәʹта хԝә жь Мьсьре аза кьр. Чахе дӧ щәʹсус һатьнә щәм ԝе, әԝе готә ԝан: «Әз дьзаньм кӧ Хӧдан ви ԝәлати дайә ԝә». Рʹәхабе баԝәр дькьр кӧ Йаһоԝа дькарә ԝе у малбәта ԝе хьлаз кә. Әԝе баԝәрийа хԝә һьндава Йаһоԝа әʹйан кьр, у нәфькьри сәр ве йәке кӧ әԝ тьштәки хоф дькә (Йешу 2:9-13; 4:23, 24).

8. Чаԝа һьнә Исраелийа дәсте Хԝәде демәк ԛәԝата ԝи дитьн?

⁸ Һьнәк Исраелийед кӧ дитьн агьре жь әʹзмана, кʹижан кӧ щаб бу жь Йаһоԝа сәр дӧайе Елйас, мина Аһабе пʹадша нибун. Чьмки ԝана фәʹм кьр кӧ Хԝәде әв йәк кьр. У ләма ԝана кьрьнә ԛарʹини: «Йаһоԝа йә Хԝәдайе рʹаст» (1 Пʹадшати 18:39, ДТʹ). Ԝана рʹьнд фәʹм кьр, кӧ ԝана ԛәԝата Хԝәде дит.

9. Әм иро ча дькарьн бьвиньн Йаһоԝа у дәсте ԝи?

⁹ Мә шеԝьр кьр мәсәлед баш у хьраб, кʹижан кӧ али мә дькьн фәʹм кьн чь те һʹәсабе «Хԝәде бьбиньн», йан жи дәсте Хԝәде  бьвиньн. Чахе әм Йаһоԝа у һʹӧнӧред ԝи нас дькьн, әм бь «чʹәʹве дьле» хԝә дәсте ԝи дьвиньн (Әфәси 1:18). Һьлбәт әм дьхԝазьн кӧ чʹәʹв бьдьнә мәрьвед амьн йе бәре у йе иройин, кʹижана кӧ дитьнә кӧ чаԝа Йаһоԝа али щьмәʹта хԝә дькьр. Ле гәло чь мәрʹа избат дькә, кӧ Хԝәде иро жи али мәрьва дькә?

10. Чь избат дькә кӧ Йаһоԝа иро жи али мәрьва дькә? (Бьньһерʹә шькьле әʹԝльн.)

¹⁰ Гәләк избаткьрьнед мә һәнә, кӧ Йаһоԝа иро жи али щьмәʹта хԝә дькә. Әм гәләк щар дьбьһен кӧ мәрьва бона аликʹарийе Хԝәдерʹа дӧа кьрьнә у щаб сәр дӧайед хԝә стандьнә (Зәбур 53:2). Мәсәлә, дь гьравәкә бьчʹукә Филипинеда ԝәʹде хьзмәтийе, Алан рʹасти жьнәке һат, кʹижан кӧ чахе бьһист кӧ Алан Шәʹде Йаһоԝа йә, дәстпекьр бьгьри. Алан гьли дькә: «Ве шәбәԛе, әԝе жьньке Йаһоԝарʹа дӧа кьрьбу, сәва кӧ Шәʹдед ԝи ԝе бьвиньн». Әԝ жьньк щаһьлтийа хԝәда, тʹәви Шәʹдед Йаһоԝа һинбуна Кʹьтеба Пироз дәрбаз бьбу. Ле чахе әԝе мер кьрьбу у дәрбази ве гьрава бьчʹук бьбу, әԝе ида жь Шәʹдед Йаһоԝа кәсәк нәдитьбу. Хԝәде щаба дӧайе ԝе ӧса зу да, кӧ әԝ әʹщебмайи ма. Нава саләкеда әԝе хԝә тʹәсмили Йаһоԝа кьр.

11, 12. а) Йаһоԝа ча али хьзмәткʹаред хԝә дькә? б) Шьровәкьн кӧ чаԝа Йаһоԝа али хушкәке кьр.

¹¹ Гәләк хьзмәткʹаред Йаһоԝа аликʹарийа ԝи дитьнә, чахе пешийа кӧ бьбуна хьзмәткʹаред Хԝәде тьштед хьраб тʹәрк данә кʹижан кӧ ԝанрʹа бьбу хәйсәт, мәсәлә кʹьшандьна щьхаре, хәбьтандьна наркотикайе, йан жи ньһерʹандьна порнографийайе. Һьнәк дьбежьн кӧ ԝана дьхԝастьн кӧ бь ԛәԝата хԝә бьтʹәркиньн әԝан тьшта, ле йәкә нькарьбун. Ле, чахе ԝана жь Йаһоԝа аликʹари хԝастьн, һьнге «зорайийа ԛәԝате жь Хԝәде» стандьн, у паше ида ԝана карьбун ԝан тьштед нәрʹаст бьтʹәркиньн (2 Корьнтʹи 4:7; Зәбур 37:23, 24).

 ¹² Йаһоԝа ӧса жи али хьзмәткʹаред хԝә дькә, сәва кӧ әԝана бәр чәтьнайед хԝәйә шәхси тәйах кьн. Ԝәрә мәсәла Еми бьньһерʹьн. Әԝ дь гьравәкә бьчʹукда һатә кʹьфшкьрьне бона шьхӧле авакьрьна Одед Щьвата у малед бона мисйонера. Дь ве гьраведа култура щӧдә бу, гәләк щар жи ав у рʹонайи тʹӧнә бу, у кʹучә тʹьжә ав бун. Һьн жи әԝе бира малбәта хԝә дькьр у дь Отеледа отʹаха бьчʹукда дьжит. Щарәке Еми сәр хушкәке кʹижан тʹәви ԝе дьхәбьти кьрә ԛужини. Жь бо ве йәке, әԝе хԝә гәләк хьраб тʹәхмин дькьр. Чахе әԝ вәгәрʹийа отʹаха хԝәйә тәʹри, әԝе Йаһоԝарʹа дӧа кьр у һиви кьр кӧ али ԝе бькә. Паше чахе рʹонайи һат, әԝе жь «Бьрща Ԛәрәԝьлийе» готар хԝәнд, дәрһәԛа хьлазийа һинбуна Гиләдеда. Дь ве готареда дьһатә готьне дәрһәԛа ԝан чәтьнайа, кʹижан кӧ әԝе тәйах дькьр. Әԝ гьли дькә: «Мьн тʹәхмин кьр, кӧ ве шәве Йаһоԝа тʹәви мьн хәбәрдьда. Әве йәке али мьн кьр у һелан кьр, кӧ бәрдәԝам кьм кʹьфшкьрьна хԝәда бьминьм» (Зәбур 44:25, 26; Ишайа 41:10, 13).

13. Чь избаткьрьна мә һәйә кӧ Йаһоԝа али щьмәʹта хԝә дькә мафе шьхӧле мәйи хьзмәтийе хԝәй кьн?

¹³ Йаһоԝа ӧса жи али щьмәʹта хԝә дькә, сәва кӧ бькарьбьн мьзгинийа хере бьпʹарезьн у мафе мә һәбә мьзгинийа хере бәла кьн (Филипи 1:7). Мәсәлә, чахе һьнә сәрԝера дьхԝастьн шьхӧле мәйи хьзмәтийе бьдьнә сәкьнандьне, мә бәр диԝане хԝә хԝәй дькьр. Жь сала 2000, нав тʹәмамийа дьнйайеда, әм диԝанада ԝәкә 268 щара сәркʹәтьн, жь ԝан сәркʹәтьна 24 щар дь Диԝана Әԝропайеда бу, йа бона Мафе Мәрьва. Рʹасти жи әʹйан ә, кӧ тʹӧ кәс нькарә дәсте Хԝәде бьдә сәкьнандьне! (Ишайа 54:17; бьхунә Ишайа 59:1.)

14. Диса кʹижан избаткьрьнед мә һәнә кӧ Хԝәде тʹәви щьмәʹта хԝә йә?

¹⁴ Бәлакьрьна мьзгине нав тʹәмамийа дьнйайе, әԝ жи избаткьрьн ә кӧ Хԝәде али мә дькә (Мәтта 24:14; Кʹаред Шандийа 1:8). У йәктийа кӧ нава хьзмәткʹаред Йаһоԝада һәйә, йед кӧ жь һʹәму мьләта нә, дькарә тʹәне бь аликʹарийа Йаһоԝа һәбә. Әԝ йәкти тʹәк ә! Һәла һе әԝ мәрьвед кӧ Йаһоԝарʹа хьзмәт накьн жи, дьбежьн: «Рʹасти жи Хԝәде нав ԝәда йә». Избаткьрьнед мә гәләк ьн, кӧ Хԝәде тʹәви щьмәʹта хԝә йә. (Бьхунә Ишайа 66:14.) Ле гәло тӧ жийина хԝәда дәсте Йаһоԝа дьвини?

15. Чьрʹа щара әм дьбәкә жийина хԝәда дәсте Йаһоԝа нәвиньн?

¹⁵ Щара әм дьбәкә навиньн дәсте Йаһоԝа жийина хԝәда. Ле гәло чьрʹа? Чахе проблемед мә гәләк ьн, әм дьбәкә бир кьн кӧ Йаһоԝа чаԝа бәре али мә дькьр. Әԝ йәк тʹәви Елйас ԛәԝьми. Елйас мәрьвәки мерхас бу, ле чахе Изабел жьн-пʹадша дьхԝәст ԝи бькӧжә, тьрс кʹәтә дьле ԝи. Дәмәке әԝи бир кьр кӧ чаԝа Йаһоԝа бәре али ԝи дькьр. Кʹьтеба Пироз дьбежә кӧ Елйас һәла һе дьхԝәст бьмьра жи (1 Пʹадшати 19:1-4). Әԝи жь кʹидәре дькарьбу аликʹари у мерхаси  бьстанда? Ԝирʹа лазьм бу гӧмана хԝә бьдә сәр Йаһоԝа (1 Пʹадшати 19:14-18).

16. Чахе проблемед мә һәнә, әм ча дькарьн Хԝәде бьвиньн?

¹⁶ Ибо һаԛас зәʹф хәмгин дьбу дәрһәԛа тәнгасийед хԝә, кӧ әԝи дәрәща хԝә ӧса нә дьдит, чаԝа кӧ Йаһоԝа дьдит (Ибо 42:3-6). Щара дьбәкә жь бо проблемед мә, мәрʹа жи чәтьн ә дәсте Хԝәде бьвиньн. Ле чь дькарә али мә бькә кӧ бьвиньн дәсте Хԝәде? Әм гәрәке бьфькьрьн сәр ве йәке, кӧ Кʹьтеба Пироз чь дьбежә дәрһәԛа проблемед мә. Паше Йаһоԝа ԝе бона мә һе реали бә, у әме жи чаԝа Ибо, бькарьбьн бежьн: «Мьн жь бо тә, жь гӧһва бьһистьбум; ле ньһа жи чʹәʹвед мьн тә дитьн».

17, 18. а) Тӧ ча дькари жийина хԝәда дәсте Йаһоԝа бьвини? б) Мәсәләке бинә, кʹижан кӧ әʹйан дькә кӧ Хԝәде али мә дькә.

¹⁷ Тӧ ча дькари жийина хԝәда дәсте Йаһоԝа бьвини? Ԝәрә әм пенщ мәсәла бьньһерʹьн. Йа пешийе дьбәкә тә тʹәхмин кьрийә, кӧ Йаһоԝа али тә кьр кӧ тӧ рʹастийе бьвини. Йа дӧда, дьбәкә те бира тә чахе тӧ сәр щьвате буйи, тә готар бьһист у хԝәрʹа ӧса гот: «Хут әԝ йәк мьнрʹа лазьм бу!» Йа сьсийа, тә дьбәкә дитийә кӧ чаԝа Йаһоԝа щаба дӧайед тә дайә. Йа чара, дьбәкә тә дьхԝәст һе зедә бона Йаһоԝа бьки, у тә дит кӧ ча әԝи али тә кьр кӧ бьгьһижи әԝе нета хԝә. Йа пенща, дьбәкә тә жь бо ԛӧльхкьрьна хԝә Йаһоԝарʹа хәбата хԝә ӧнда кьр, чьмки гәләк ԝәʹдә жь тә дьстанд у паше тә дит кӧ чаԝа Хԝәде созе хԝә ани сери: «Әзе . . . тʹӧ щар тә бәрʹнадьм» (Ибрани 13:5). Чахе һәләԛәтийа мә тʹәви Йаһоԝа ԛәԝи йә, әм һеса дькарьн жийина хԝәда дәсте ԝи бьвиньн.

¹⁸ Хушка мә Сара жь Кәнйайе дьбежә: «Мьн Йаһоԝарʹа дӧа дькьр дәрһәԛа ԝе, тʹәви кʹе мьн һинбуна Кʹьтеба Пироз дәрбаз дькьр, чьмки әз дьфькьрим кӧ әԝ мәрьв ԛимәт накә һинбуна хԝәйә Кʹьтеба Пироз. Мьн дӧайе хԝәда Йаһоԝарʹа гот, кӧ дьбәкә әз гәрәке һинбуна тʹәви ԝе бьдьмә сәкьнандьне. Хьлазийеда чахе мьн гот «Амин», ньшкева дәнге тʹеле һат. Әԝе мәрьве мьнрʹа тʹелехьст, тʹәви кʹе жи әз һинбуне дәрбаз дькьм, у әԝе мьнрʹа гот кӧ гәло әԝ дькарә тʹәви мьн бе сәр щьвате! Әз зәндәгьрти мам!» Һәрге әм мәщале дьгәрʹьн сәва кӧ бьвиньн Йаһоԝа бона мә чь дькә, әме дәсте ԝи бьвиньн, кʹижан кӧ али мә дькә. Роһана хушк жь Асйайе, дьбежә кӧ лазьм ә ԝәʹдә хәрщ ки, ԝәки бьвини кӧ Йаһоԝа ча али тә дькә. Әԝ зедә дькә: «Ле чахе тӧ әве йәке бьки, тӧйе әʹщебмайи бьмини, чьмки тӧйе бьвини кӧ Йаһоԝа чьԛас зәʹф бона мә хәм дькә!»

19. Әм гәрәке диса чь бькьн сәва кӧ Хԝәде бьвиньн?

¹⁹ Иса гот кӧ әԝед кӧ «Хԝәде бьбиньн» гәрәке «дьлпаԛьж» бьн (Мәтта 5:8). Әԝ те һʹәсабе кӧ фькьред мә гәрәке тʹәмьз бьн у әм гәрәке тьштед нәрʹаст нәкьн. (Бьхунә 2 Корьнтʹи 4:2.) Дь ве тʹемайеда әм пеһʹәсийан, кӧ гәрәке һәләԛәтийа хԝә тʹәви Хԝәде ԛәԝи кьн, ԝәки дәсте ԝи бьвиньн. Дь тʹемайа дьнда, әме шеԝьр кьн кӧ чаԝа баԝәри дькарә али мә бькә, кӧ һе зәлал жийина хԝәда дәсте Йаһоԝа бьвиньн.