Ширәтед бона Хԝәйкьрьна Әʹдьлайе
Әʹфьрандаре мә мәрʹа дьбежә кӧ әм чаԝа дькарьн тʹәви мәрьва әʹдьлайеда бьн, фьрԛи тʹӧнә малда, сәр хәбате йан жи тʹәви һәвала. Дина хԝә бьдьнә һьнә ширәтед ԝийә билан, йед кӧ али гәләк мәрьва кьрьнә.
Бьбахшинә Мәрьва
«Ль һәв бьбахшиньн, һәгәр газьне йәки ль һьндава йәкида һәбә» (КОЛОСИ 3:13).
Әм гьшк жи шашийа дькьн. Щара әм дькарьн мәрьва бьдьнә хәйдандьне, щара жи әԝана мә дьдьнә хәйдандьне. Чь жи һәбә, әм гьшк жи һʹәԝще бахшандьне нә у гәрәке һәв бьбахшиньн. Чахе әм дьбахшиньн кәсәки кӧ мә дайә хәйдандьне, әм ида сәр ԝи һерс накʹәвьн. Әм «жь бәр хьрабийева хьрабийе ль тʹӧ кәси» накьн, у шаши йан кемасийед ԝан, накьнә бира ԝан (Рʹомайи 12:17). Ле һәгәр кәсәк гәләк дьле мә ешандийә у әм нькарьн әве йәке бир кьн, гәрәке әм чь бькьн? Һьнге әм гәрәке башԛә бь ԛәдьр тʹәви ԝи кәси хәбәр дьн. У нета мә гәрәке әԝ бә кӧ ль һәв бен, нә кӧ избат кьн кʹе нәһәԛ ә у кʹе рʹаст ә (Рʹомайи 12:18).
Мьлук у бь Ԛәдьр бә
«Жь ԝә һәр йәк бь мьлуктийе һәвале хԝә сәр хԝәрʹа бьгьрә» (ФИЛИПИ 2:3).
Чахе әм мьлук ьн у һьндава мәрьвада бь ԛәдьр ьн, ԝана хԝәш те тʹәви мә һәвалтийе бькьн. Әԝана заньн кӧ әме һьндава ԝанда һʹәйф у дьлшәԝат бьн, у бь һʹәмде хԝә тʹӧ щар дьле ԝан нәешиньн. Ле һәгәр әм хԝә сәр
мәрьварʹа бьгьрьн, йан жи тʹьме бьхԝазьн йа хԝә бькьн, әме һәләԛәтийа ортʹа һәвда хьраб кьн у шәрʹ-дәʹԝ ԝе пешда бен. Мәрьв ԝе хԝә жь мә дур бьгьрьн, у һәвалед мә жи ԝе һьндьк бьн, йан жи ԛә тʹӧнә бьн.Фьрԛийе Нәкьнә Нава Мәрьва
«Хԝәде рʹасти жи фьрԛийе накә нава мьләта. Ле жь нав һәр мьләтида, йе кӧ жь ԝи хоф дькә у рʹастийе дькә ль ԝи ԛәбул ә» (КʹАРЕД ШАНДИЙА 10:34, 35).
Әʹфьрандаре мә фьрԛийе накә ортʹа мәрьва жь бо мьләт, зьман, һәбук, йан жи рʹәнге чʹәрме ԝан. Әԝи «һʹәму мьләтед дьнйайе жь хунәки хӧльԛанд» (Кʹаред Шандийа 17:26). Әв те һʹәсабе кӧ һʹәму мәрьв хушк у бьра нә. Гава әм мәрьварʹа һʹәйф ьн у бь ԛәдьр ьн, әм ԝана ша дькьн, хԝәха жи әм бәхтәԝар дьбьн у һьн жи дьле Әʹфьрандаре хԝә ша дькьн.
Нәрм у Бәрбьһер Бьн
«Бәрбьһерийе . . . ль хԝә ԝәргьрьн» (КОЛОСИ 3:12).
Гава әм бәрбьһер у нәрм ьн, мәрьварʹа тʹәви мә һеса йә. Әԝана аза тʹәви мә хәбәр дьдьн у һәла һе дькарьн ширәта жи бьдьнә мә, чьмки заньн кӧ әме рʹьһʹәт бьминьн у сәр ԝан һерс нәкʹәвьн. Ӧса жи һәгәр кәсәк сәр мә һерс дькʹәвә, щаба мәйә нәрм дькарә һерса ԝи мәрьви дайнә. Мәтʹәлок 15:1 дьбежә кӧ «щаба нәрм һерсе датинә, ле готьна һʹьшк һерсе рʹадькә».
Мәрʹд у Шекьрдар бә
«Хԝәзи ль дайийа, нә кӧ ль стандийа» (КʹАРЕД ШАНДИЙА 20:35).
Иро гәләк мәрьв тьма нә у тʹәне дәрһәԛа хԝә дьфькьрьн. Ле бь рʹасти һәгәр әм дьхԝазьн бәхтәԝар бьн, әм гәрәке дәствәкьри бьн (Луԛа 6:38). Мәрьвед мәрʹд бәхтәԝар ьн, чьмки мәрьва дьһа зәʹф һʹьз дькьн, нә кӧ тьшта. У һәма әв һʹьзкьрьн һелане дьдә ԝан, ԝәки шекьрдар бьн у рʹазибуне бьдьнә кʹьфше, гава кәсәк ԝанрʹа ԛәнщийе дькә (Колоси 3:15). Жь хԝә бьпьрсьн: «Әз һʹьз дькьм тʹәви кʹе һәвалтийе бькьм, тʹәви кәсед бешекьр у тьма, йан тʹәви йед дәствәкьри у шекьрдар?» Щаба ве пьрсе чь әʹйан дькә? Әм гәрәке һьндава мәрьвада ӧса бьн, чаԝа кӧ дьхԝазьн ԝәки әԝана һьндава мәда бьн (Мәтта 7:12).