Бәле, мәләкед зӧлм һәнә. Ле әԝана жь кʹӧ һатьнә? Бькә бира хԝә кӧ Хԝәде, мәләк бь азайа бьжартьне әʹфьрандьн. Һьнә ԝәʹдә шунда паши ԝе йәке ча мәрьвед пешьн Адәм у Һева һатьнә әʹфьрандьне, әʹфьринәки рʹӧһʹанийи кʹамьл азайа бьжартьна хԝә нәрʹаст да хәбате. У әԝ бу сәбәбе мьԛабьлибуне сәр әʹрде. Әԝи ӧса кьр, кӧ Адәм у Һевайе мьԛабьли Хԝәде дәркʹәтьн (Дәстпебун 3:1-7; Әʹйанти 12:9). Кʹьтеба Пироз әʹйан накә, кӧ наве ԝи әʹфрине рʹӧһʹани чь бу у әԝи ль әʹзмана чь щи дьгьрт пешийа кӧ мьԛабьли Хԝәде дәркʹәта. Ле әʹйан ә кӧ паши мьԛабьлибуна хԝә, әԝ һатә навкьрьне ча Шәйтʹан у Мире-щьна, чь кӧ те һʹәсабе «Нәйар» у «Бӧхданбеж» (Мәтта 4:8-11).

Ле йазьх, мьԛабьлибун һьндава Хԝәде һәма ԝе дәре хьлаз нәбу. Ԝәʹде Нӧһ һьнә мәләка «щийе хԝә шьһʹьтандьн» у жь малбәта Хԝәдейә әʹзмани дәркʹәтьн. Әԝана пәйа бунә сәр рʹуйе әʹрде, кʹәтьнә ԛальбе мәрьвайи сәва кӧ бенамӧсийева мьжул бьн. Рʹасти жи әв кьред ԝан чьԛас щӧдә дьбун жь ԛьрара Хԝәде, кӧ әԝи мәләкарʹа кʹьфш кьрьбу (Щьһуда 6; Дәстпебун 6:1-4; 1 Пәтрус 3:19, 20).

Ахьрийе чь һатә сәре ԝан мәләкед зӧлм? Чахе Хԝәде селав рʹакьр, сәва кӧ әʹрде жь зӧлмийе тʹәмьз кә, әв мәләк ԛальбе мәрьвайи һиштьн у пашда ԝәгәрʹийанә әʹзмен. Ле Хԝәде ида изьн нәда ԝан мәләкед нәамьн, кӧ ԝәгәрʹьн «щийе хԝә». Дәԝсе, Хԝәде ԝана синор кьр у авитә «тәʹристанийа [рʹӧһʹани]», чь кӧ әʹйан ә ча Тартарус (Щьһуда 6; 2 Пәтрус 2:4, ДТʹ). Әԝ щьн бунә бәрдәстийед Шәйтʹан Мире-щьна, йе кӧ сәр щьна һʹӧкӧм дькә у «хԝә дькә дьлԛе мьлйакʹәте рʹонайи» (Мәтта 12:24; 2 Корьнтʹи 11:14).

Кʹьтеба Пироз әʹйан дькә, кӧ Пʹадшатийа Хԝәде бьн сәрԝертийа Иса дь 1914-да һатә кʹьфшкьрьне. * Һәма ԝи ԝәʹдәйида Шәйтʹан у щьнед ԝи жь әʹзмен һатьнә авитьне сәр рʹуйе әʹрде, кʹидәре кӧ кьред ԝан һатьн синор кьрьне. Зӧлми у бенамусийа бәлабуйи йед кӧ тʹәмамийа дьнйайе зәфт кьрьнә, әʹшкәрә избат дькьн кӧ Шәйтʹан жь бо һерсе, һʹәму тьшти һьлдьшинә (Әʹйанти 12:9-12).

Зедәбуна бенамусийе у зӧлмийе, ӧса жи избат дькә кӧ кʹӧтасийа сәрԝерийа ԝанә зӧлм ида незик ә. Зутьрәке һʹӧкӧмкьрьна ԝан әʹфринед рʹӧһʹанийе хьраб, ԝе бе һьлдане. Паши 1,000 салийа сәрԝертийа Пʹадшатийа Хԝәде йа сәр әʹрде, әԝ рʹӧһʹед зӧлм ԝе щара пашьн, сәр ԝәʹдәки кьн бенә бәрдане кӧ инсанәте бьщерʹьбиньн. Паше ида әԝана ԝе бенә кʹӧтакьрьне сәр һʹәта-һʹәтайе (Мәтта 25:41; Әʹйанти 20:1-3, 7-10).