Кʹьтеба Пироз дьдә кʹьфше, кӧ мәләк щар-щара аликʹарийа лазьм дьданә хьзмәткʹаред рʹаст, сәва кӧ ԛьрара Хԝәде биньн сери (Зәбур 34:7). Мәсәлә:

• Чахе Йаһоԝа сафи кьр бажаред Содом у Гоморайе кʹӧта кә, мәләка али Луте амьн у малбәта ԝи кьрьн, сәва кӧ жь ԝе дәре бьрәʹвьн (Дәстпебун 19:1, 15-26).

• Чахе дь Бабилонеда сафи кьрьн се хортед Ибрани бавежнә фьрна бь агьр у бькӧжьн, Хԝәде «мьлйакʹәте хԝә шанд у ԛулен хԝә йен кӧ пе әԝлә бун хәлас кьрьн» (Данийел 3:19-28).

• Чахе Данийеле амьн һатьбу авитьне чʹәʹла шера у тʹәмамийа шәве теда бу, әԝ карьбу хьлаз бә, чьмки чаԝа әԝи гот «Хԝәдайе мьн мьлйакʹәте хԝә шанд у дәве шеран гьртьн» (Данийел 6:16, 22).

Щар-щара, мәләкед Хԝәде тʹәви шӧхӧлед щьвата Мәсиһийа дьбун, гава лазьм бу ԛьрара Йаһоԝа биньн сери. Мәсәлә:

• Мәләк дәргәһед кәле вәкьр у рʹебәрийа шандийа кьр, кӧ бәрдәԝам кьн дь пʹарьстгәһеда мьзгинийе бәла кьн (Кʹаред Шандийа 5:17-21).

• Мәләкәки рʹебәри Филипойе мьзгинван кьр, ԝәки һәрʹә сәр рʹе, кӧ жь Оршәлиме дьгьһиштә Хәззәйе, сәва кӧ дәрһәԛа Хԝәде тʹәви мәрьвәки Әтʹийупийайе хәбәр дә, йе кӧ бона һʹәбандьне дьчу Оршәлиме (Кʹаред Шандийа 8:26-33).

• Чахе ԝәʹдә гьһишт кӧ нәщьһу бьбьнә Мәсиһи, мәләкәк сәрәскәре Рʹомайирʹа Корʹнелйорʹа хӧйа бу у готә ԝи, кӧ Пәтрусе шанди тʹәглифи мала хԝә кә (Кʹаред Шандийа 10:3-5).

• Чахе Пәтрус кәледа гьрти бу, мәләк ԝирʹа хӧйа бу у али ԝи кьр, сәва әԝ жь кәле дәркʹәвә (Кʹаред Шандийа 12:1-11).

Иро тьштед ӧса тʹӧнә, кӧ Хԝәде бь кʹәрәмәти мәләкед хԝә бьдә хәбате кӧ али мәрийа бькьн. Ле дәрһәԛа ԝәʹде мә Иса гот: «Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне, кӧ һʹәму мьләтарʹа бьбә шәʹдәти у һьнге хьлази ԝе бе» (Мәтта 24:14). Ԝә заньбу кӧ шагьртед Мәсиһ бь пьштгьрийа мәләка әви шьхӧли пек тиньн?

Кʹьтеба Әʹйанти, әʹйан дькә кӧ мәләкед Хԝәде ԝе бь дьл у щан нав тʹәмамийа дьнйайеда али мәрийа бькьн, кӧ дәрһәԛа Йаһоԝа Хԝәде у ԛьрара ԝи йа сәва инсанәте, пебьһʹәсьн. Йуһʹәннайе шанди ньвиси: «Һьнге мьн дина хԝә дайе, ва мьлйакʹәтәки дьн кӧ әʹзменда дьфьрʹи у Мьзгинийа ԝийә һʹәта-һʹәтайе һәбу, ԝәки ԝе Мьзгинийе бьдә йед рʹубари дьне, аԝа готи һʹәму мьләта, бәрәка, зьмана у щьмәʹта. Ԝи бь дәнгәки бьльнд дьгот: ‹Жь Хԝәде бьтьрсьн у шькьрийе бьдьнә ԝи, чьмки сьһʹәта диԝанкьрьна ԝи перʹа гьһишт. Сәре хԝә бәр ԝи дайньн, йе кӧ әʹрд у әʹзман, бәʹр у авед канийа әʹфьрандьнә›» (Әʹйанти 14:6, 7). Иро гәләк избати һәнә, кӧ мәләк нав тʹәмамийа дьнйайеда пьштьгьрийа шьхӧлед бәлакьрьна мьзгинийе дькьн. Бь рʹасти чахе һәла һе гӧнәкʹарәк тʹобә дькә у ԝәдьгәрʹә щәм Йаһоԝа, «мьлйакʹәтед Хԝәде . . . ша дьбьн» (Луԛа 15:10).

Чь ԝе бьԛәԝьмә чахе шьхӧле бәлакьрьна мьзгинийе бе тʹәмам кьрьне? Ордийед мәләка ԝе пьштгьрийа Иса Мәсиһ бькьн, кӧ һәйә Пʹадше Пʹадша. Әԝана ԝе «шәрʹе ԝе Рʹожа Мәзьнә Хԝәдейе Һʹәму Зорайийе» демәк Армагедонеда, шәрʹ бькьн (Әʹйанти 16:14-16; 19:14-16). Хӧдан тʹәви мәләкед хԝәйи ԛәԝи ԝе диԝана ԝан мәрийа бькьн, йед кӧ нахԝазьн Хԝәде нас кьн, у гӧрʹа Мьзгинийа Хӧдане мә Иса накьн (2 Тʹесалоники 1:7, 8).

Баԝәр бә, кӧ мәләк хут дәрһәԛа тә жи хәм дькьн. Әԝана бь рʹасти жи хәм дькьн дәрһәԛа һʹалхԝәшийа ԝан, йед кӧ дьхԝазьн Хԝәдерʹа хьзмәт кьн. У Йаһоԝа Хԝәде жи тʹьме мәләка дьдә хәбате, сәва кӧ ԛәԝи кә у бьпарезә хьзмәткʹаред хԝәйә амьн (Ибрани 1:14).

Һәр кәс жь мә бәрбь бьжартьнәкә муһим сәкьнийә. Гәло әм гӧһ дьдьнә мьзгинийе у ԛәбул дькьн, йа кӧ нав тʹәмамийа дьнйайеда бәла дьбә? Шәʹдед Йаһоԝа жь мьһала ԝә, ԝе бь дьл у щан али ԝә бькьн, кӧ һун кʹаре бьстиньн жь аликʹарийа мәләкед Хԝәдейи ԛәԝи.