ӘЗ Сала 1923-да шәһәре Һемсԝортеда (Инглистан) һатьмә буйине. Бьре мьн жь мьн мәстьр бу, наве ԝи Боб бу. Баве мьн дӧрʹути религийада дьдит, у әԝ йәк бәр чʹәʹве ԝи рʹәш бу. Чахе әз ԝәкә 9 сали бум, чәнд кʹьтеб кʹәтьнә дәстед ԝи кʹижана кӧ ԛәлптийа религийа әшкәрә дькьрьн. Әԝи чь кӧ хԝәнд, гәләк дьле ԝи гьрт. Чәнд сал дәрбаз бун, у кәсәки дәре мала мә хьст. Әв Боб Аткинсон бу, әԝи пе фонографе готара ньвисанди йа Рутерфорд бьра мәрʹа вехьст. Мә фәʹм кьр кӧ әԝ йәк жь ԝе кʹоме йә, кʹижани әв кʹьтеб дәрхьстьнә йед кӧ баве мьн хԝәнд! Де-баве мьн Аткинсонрʹа готьн, ԝәки әԝ һәр евар тʹәви мә шиве бьхԝә у щаба гәләк пьрсед мә бьдә, кʹижан кӧ Кʹьтеба Пирозва гьредайи бун. Әԝи әм тʹәглифи щьвине кьрьн кӧ мала бьраки мәда дәрбаз дьбу, у чәнд километра жь мә дур бу. Әм дәрберʹа ԛайил бун. Ԝәʹдә шунда Һемсԝортеда щьватәкә бьчʹук саз бу. Зутьрәке бәрпьрсийаре мьһале һатә щьвата мә, у мә ԝи тʹәглиф кьр кӧ мала мәда бьминә. Мә ӧса жи пешәнгед кӧ незики мә дьжитьн, тʹәглифи сәр нанхԝарьне дькьр. Хәбәрдана тʹәви ԝан гәләк баш сәр мьн һʹӧкӧм бу.

Һьнге малбәта мә бизнесәк дәстпекьр, ле баве мьн бьре мьнрʹа гот: «Һәрге тӧ дьхԝази бьби пешәнг, әме ԝи шьхӧли бьһельн». Боб ԛайил бу, у әԝ 21 салийа хԝәда жь мал чу у пешәнгти дәстпекьр. Дӧ сал шунда, чахе әз 16 сали бум, әз һатьмә кʹьфшкьрьне ча пешәнг. Шәми у Ләʹде мьн тʹәви хушк-бьра хьзмәт дькьр, ле рʹожед дьн һʹәчʹи зәʹф мьн тʹәне хьзмәт дькьр пе бәлге шәʹдәтикьрьне у фонографе. Йаһоԝа әз кʹәрәм кьрьм, у мьн тʹәви жьнькәке һинбуна Кʹьтеба Пироз дәстпекьр. Әԝ рʹӧһʹанида гәләк зу пешда дьчу. Гәләк жь нәфәред ԝе жи ахьрийеда һатьнә нава рʹастийе. Паши саләке, әз тʹәви Мери Һеншел ча пешәнге мәхсус һатьмә кʹьфшкьрьне шарьстана Чеширеда.

Һьнге Шәрʹе Һʹәмдьнйайе йе II дьчу, у жьнарʹа фәрман дьдан, кӧ бона шәрʹ аликʹарийе бьдьн. Хьзмәткʹаред рʹелигийед дьн аза дькьрьн жь ве йәке, у ләма әм дьфькьрин кӧ ԝе мә жи аза кьн, чьмки әм хьзмәткʹаред һәртʹьм бун. Ле диԝан ԛайил нәбу кӧ  мә аза кьн, ләма сәр мәһәке әз кьрьмә кәле. Саләк шунда, чахе әз ида бумә 19 сали, дӧ щара мьн данә диԝане, чьмки мьн пьштгьрийа шәрʹ нәдькьр, ле диԝане әз һәрдӧ щара жи аза кьрьм. Ԝан дәрәщада, мьн фәʹм кьр кӧ рʹӧһʹе пироз али мьн дькьр у кӧ Йаһоԝа дәсте мьн дьгьрт, мьн ԛәԝи дькьр у дьшьданд (Иша. 41:10, 13).

Мьн у Артур Метйус сала 1946-да һәв нас кьр. Әԝ се мәһа кәледа бу чьмки нәчу шәрʹ, у паши ве йәке әԝ чу Һемсԝорте бал бьре хԝә Денис, йе кӧ пешәнге мәхсус бу, сәва тʹәви ԝи хьзмәт кә. Әԝана бьчʹуктайеда жь баве хԝә дәрһәԛа Йаһоԝа пеһʹәсийабун, у чахе Артур 17 сали бу әԝ һатә ньхӧмандьне, ле Денис 16 сали. Ԝәʹдә шунда Денис һатә кʹьфшкьрьне Ирләндеда, у Артур бе һәвалхьзмәткʹар ма. Де-баве мьн әʹщебмайи дьман кӧ әԝ гәде щаһьл ча мәʹрифәт ә у ча бь дьл у щан хьзмәт дькә. Ләма ԝана әԝ тʹәглиф кьрьн, сәва мала мәда бьминә. Чахе мьн тʹәсәлийа де-баве хԝә дькьр, паши нанхԝарьне мьн у Артур фьраԛ дьшуштьн. Ахьрийеда мә дәстпекьр һәврʹа бьньвисьн. Сала 1948, Артур диса сәр 3 мәһа кʹәтә кәле. Сала 1949-да мәһа Чьләйе мә һәв станд. Нета мә әԝ бу кӧ хьзмәтийа һәртʹьм нәһельн. Ԝәʹде һесабуне әм дьхәбьтин, мә емиш тʹоп дькьр. Мә пʹәре хԝә бь аԛьлайи хәрщ дькьр у пе кʹәрәма Йаһоԝа мә хьзмәтийа хԝә нәһишт.

Ԝәкә саләк шунда, әм һатьнә кʹьфшкьрьне ль Ирләнда Бакʹуре, пешийе шәһәре Армайеда, у паше шәһәре Нийурийеда. Һәрдӧ шәһәрада жи мәрьв һʹәчʹи зәʹф Католик ьн. Ԝан щийада рʹелигийед дьн һʹьз нәдькьрьн, у ләма мә ԝедәре гәләк фәсал у бь сәрԝахти хьзмәт дькьр. Щьвин дәрбаз дьбун мала хушк-бьраки мә кӧ жьн-мер ьн. Мала ԝана жь мала мә 16 километр дур бу. Ԝәкә 8 мәрьв дьһатьнә щьвине. Щара әм мала ԝанда шәв дьман, у сәр пола рʹадьзан. Паше шәбәԛе ԝана тәʹштекә мәзьн мәрʹа датанин у мә тʹәвайи дьхԝар. Әз гәләк ша мә кӧ ньһа ль ԝедәре гәләк Шәʹдә һәнә.

Бьре мьн у жьна ԝи Лоти, Ирләнда Бакʹуреда ида ча пешәнгед мәхсус хьзмәт дькьрьн, у сала 1952-да әм һәр чар чунә Бәлфасте сәр щьвата мәзьн. Бьраки мә бь дьл у щан әм тʹәви Прис Һйус кʹижан кӧ һьнге хьзмәткʹаре филиала Британйайе бу, тʹәглифи мала хԝә кьрьн. Еварәке мә тʹәвайи шеԝьр дькьр дәрһәԛа буклета тʹәзә бь наве «Рʹийа Хԝәде Һʹьзкьрьн ә» (God’s Ԝay Is Lovе). Әв буклет һатә дәрхьстьне илаһи бона мәрьвед Ирләнде. Һйус бьра гьли дькьр кӧ ча чәтьн ә дьле мәрьвед Католик бькʹьрʹьн, йед кӧ Ирләндайеда дьжин. Кʹидәре бьра дьман, жь ԝан мала бәри ԝан дьдан у кʹәшиша нав щьмәʹте дьдан ԝәки мьԛабьли хушк-бьред мә дәрен. Прис гот: «Мәрʹа жьн у мер лазьм ьн, автойед кʹижана кӧ һәнә, сәва нав тʹәмамийа ԝәлат кампанийа мәхсусда кʹар бькьн, демәк буклета бәла кьн». * Мә ча әв йәк бьһист,  дәрберʹа мә гот: «Әм ԛайил ьн!». Әв гьли ԝә хԝәнд дәстпека сәрһатийа мьнда.

Дӧблинеда һәбу хушкәкә амьн кӧ гәләк сала нава рʹастийеда бу, у тʹьме һазьр бу кӧ пешәнг мала ԝеда бьминьн. Наве ԝе Ма Рутланд бу. Мә һьнә һур-муре хԝә фьрот у һьнә ԝәʹдә мала ԝе хушкеда ман. Паше әм һәр чар пе моторсиклета баркʹеш йа Боб, чун авто бьгәрʹьн. Мә автокә хәбьтанди дит у кʹьрʹин. Ле жь мә тʹӧ кәси нькарьбу бажота, ләма мә жь хԝәйе авте һиви кьр у әԝи мәрʹа авто ани. Ве еваре Артур сәр ньвина рʹуньштьбу у дьда бәр чʹәʹве хԝә кӧ йанчь автойе дажо. Шәбәԛа дьн чахе әԝи дьхԝәст авто жь гараже дәрхьста, мисйонерәк бь наве Милдред Ԝилет һатә бал мә (ахьрийеда әԝ бу жьна Щон Бар). Әԝе ажотьн заньбу! Әԝе мә һин кьр кӧ чаԝа авте бажон, у әм ида һазьр бун кӧ һәрʹьн!

Паше мә хԝәрʹа щи дьгәрʹийа сәва бьминьн. Мәрʹа готьн кӧ фәсал бьн сәва траилереда бьжин, чьмки мәрьвед мьԛабьл дькарьн траилере бьшәԝьтиньн. Ләма мә хԝәрʹа мал дьгәрʹийа, ле мә ԛә маләк жи нәдит. Ве шәве әм һәр чар автеда рʹазан. Рʹожа дьн, мә тʹәне траилерәкә бьчʹук дит кʹидәреда ньвине дӧԛәти һәбу. Әв траилер бу мала мә. Әʹщеб ә, ле ԛә чәтьнайед мә сәва ве траилере тʹӧнә бун, чьмки мә әԝ дьда сәкьнандьне кʹарханед ԝан мәрьвада йед кӧ гәләк һʹәйф бун. Мә 16 һʹәта 24 километьр дур хьзмәт дькьр. Чахе мә ида щики дьн траилера хԝә дьда сәкьнандьне, әм диса вәдьгәрʹийанә щийе пешийе сәва мәрьвед ԝедәрерʹа мьзгинийе гьли кьн.

Мә тʹәсәлийа һʹәму мала кьр кӧ Ирләнда алийе башур-рʹоһьлатеда бун, у дькарьн бежьн чәтьнайед мә гәләк һьндьк бун. Мә 20 000 буклет бәла кьр у мә филиала Британийерʹа ньвиси һʹәму навед ԝан мәрьва, кʹера мьзгини һʹәԝас бу. Әԝ кʹәрәмәкә мәзьн ә кӧ ньһа ԝедәре бь сәда Шәʹдед Йаһоԝа һәнә.

Ԝәʹдә шунда әм һатьнә кʹьфшкьрьне Лондона башуреда. Чәнд һʹәфти дәрбаз бун, жь филиала Британйайе Артуррʹа тʹелехьстьн у готьн һәла әԝ дькарә рʹожа дьн дәстпекә шьхӧле бәрпьрсийартийе бькә. Бона ԝи шьхӧли, әм һʹәфтеки һатьнә һинкьрьне, у паше әм чунә Скотләндайеда сәва бәрпьрсийартийе бькьн. Ԝәʹде Артур һьндьк бу кӧ готаред хԝә һазьр кә, ле әԝ һазьр бу хьзмәтийеда һәр тьшти бькә, һәрге жи әԝ йәк чәтьн бә. Мәсәла ԝи гәләк әз дьшьдандьм. Мә гәләк һʹьз кьр ве кʹьфшкьрьнеда хьзмәт кьн. Пешийа ве кʹьфшкьрьне, мә чәнд сала хьзмәт дькьр щурʹә-щурʹә щийада, ле шьхӧле бәрпьрсийартийеда кʹәрәм бу кӧ әм нава гәләк хушк-бьрада бун.

Сала 1962-да Артур тʹәглифкьрьн станд кӧ һәрʹә Мәкʹтәба Гиләд, кʹижан кӧ дәһә мәһа дәрбаз дьбу. Әв сафикьрьн нәһеса бу. Әз нькарьбум тʹәви ԝи бьчума, чьмки әз нәһатьбумә тʹәглифкьрьне, ле мә сафи кьр кӧ ԝе рʹаст бә һәрге Артур һәрʹә. Әз бе һәвалхьзмәткʹар мам, ләма диса әз шандьмә Һемсԝорте кӧ чаԝа пешәнге мәхсус хьзмәт кьм. Саләк шунда чахе Артур вәгәрʹийа, ԝи ча бәрпьрсийаре нәһийе кʹьфш кьрьн у әм щабдар бун бона Скотләнда, Инглистана бакʹуре у Ирләнда Бакʹуре.

Сала 1964-да, Артур Ирләндеда ча хьзмәткʹаре филиале кʹьфш кьрьн. Мьн гәләк һʹьз дькьр хьзмәтийа бәрпьрсийарти, ләма әз һьнәки бәрхԝә дькʹәтьм дәрһәԛа хьзмәтийа Бәйтʹәледа. Ле мьн заньбу кӧ һәрге әз ԛәбул кьм ве кʹьфшкьрьне йа кӧ дьле мьн найе, Йаһоԝа ԝе әʹсә мә кʹәрәм кә. Бәйтʹәледа мьн щурʹә-щурʹә шьхӧл дькьр, мәсәлә шьхӧле офиси, пʹечʹандьна әʹдәбйәта, хԝарьнчекьрьн, у һәвдан. Щара мә ӧса жи шьхӧле бәрпьрсийаре нәһийе жи дькьр, у ӧса нав тʹәмамийа ԝәлат әм рʹасти гәләк хушк-бьра дьһатьн. Әԝе йәке у рʹӧһʹанида пешдачуйина ԝан мәрьва йед кӧ Кʹьтеба Пироз һин дьбун, һәләԛәтийа ортʹа хушк-бьред Ирләндеда ԛәԝи кьр. Әԝ рʹасти жи кʹәрәм ә!

Щара пешийе Дӧблинеда сала 1965-да щьвата мәзьнә һʹәмдьнйайе дәрбаз бу. * Рʹаст ә гәләк чәтьнайи һәбун, ле йәкә щьвата мәзьн гәләк рʹьнд дәрбаз бу. Бь тʹәмами 3 948 мәрьв һатьн у 65 һатьнә ньхӧмандьне. Хԝәйед ԝан мала, кʹижанада 3 500 хушк-бьред мәйә жь щурʹә-щурʹә ԝәлата мабун, нәʹмәке рʹазибуне стандьн. Ле хԝәйед мале гәләк пʹайе хушк-бьра дьдан бона рʹабун-рʹуньштьна ԝанә баш. Әԝе йәке бона Ирләнде кʹарәкә мәзьн ани.

Сала 1966 Ирләнда бакʹуре у башуре кʹәтьнә бьн рʹебәрийа филиала Дӧблине. Әԝ йәкти гәләк мәхсус бу, чьмки ве гьраведа мәрьв сәва политике йан жи религийа һәврʹа дькʹәтьнә шәрʹ-дәʹԝа. Әм гәләк ша дьбун кӧ гәләка йед кӧ бәре Католик бун, һатьнә нава рʹастийе у хьзмәт дькьрьн тʹәви ԝан хушк-бьра кӧ бәре Протестант бун.

Сала 2011-да әʹмьре мә бь тʹәмами һатә гӧһастьне, чахе филиала Британийе у Ирләндайе, бунә йәк у әм һатьнә кʹьфшкьрьне Бәйтʹәла Лондонеда. Һьнге әз гәләк бәрхԝә дькʹәтьм бона сьһʹәт-ԛәԝата Артур. Нәхԝәшийа ԝи һәбу бь наве Паркинсон. Сәд һʹәйф, малхе мьн 20 Гӧлане сала 2015 мьр.

Паши мьрьна ԝи, әз гәләк дьлшкәсти бум, депресийа мьн һәбу у дьлтәнг бум. Артур тʹьме кʹеләка мьн бу, әз гәләк бира ԝи дькьм! Ле ԝан тәнгасийада, әз һе незики Йаһоԝа бум. Дьле мьн гәрм дьбә чахе әз педьһʹәсьм кӧ чьԛас ԝи һʹьз дькьрьн. Мьн нәʹмәк станд жь хушк-бьред Ирләнде, Британйайе, у һәла һе Дәԝләтед Йәкбуйи жи. Әв нәʹмәк, у ӧса жи бәрдьлийа Денисе бьре Артур, жьна ԝи Мавис у ԛизед бьре мьни мәзьн Рут у Щуди, ӧса али мьн кьрьн кӧ әз нә жи дькарьм пе гьлийа бежьм.

Рʹезәк жь Кʹьтеба Пироз кӧ гәләк али мьн кьр, әв һәйә Ишайа 30:18. Ль ԝедәре те готьне: «Йаһоԝа бь сәбьр һивийе йә, ԝәки ԛәбулкьрьна хԝә ԝәрʹа нишан кә, у әԝ ԝе рʹабә сәва кӧ рʹәʹма хԝә ԝәрʹа бьдә кʹьфше. Чьмки Йаһоԝа Хԝәдейе һәԛийе йә. Һʹәмушк кӧ һивийа ԝи нә бәхтәԝар ьн», (ДТʹ). Әв гьли гәләк дьле мьн рʹьһʹәт дькьн кӧ Йаһоԝа бь сәбьр һивийе йә, ԝәки һʹәму чәтьнайед мә кʹӧта кә у дьнйа тʹәзәда шьхӧлед ӧса бьдә мә кӧ әм ләзәте бьвиньн.

Гава әз дьфькьрьм сәр жийина мә, әз дьвиньм кӧ Ирләндеда Йаһоԝа ча рʹебәрийа шьхӧле мьзгинийе кьр у ча әԝ шьхӧл кʹәрәм кьр! Әԝ бона мьн ԛәдьрәки мәзьн ә кӧ мьн жи ԝи шьхӧлида кʹар кьр. Бәле, бешьк чахе әм хԝәстьна Йаһоԝа тиньн сери, әм кʹәрәма дьстиньн.