ҺʹӘТА әԝ йәк бьԛәԝьмийа, мьн ида дьхԝест дәрһәԛа рʹастийе һе зедә пебьһʹәсьм. Бал дийа мьн һьнә әʹдәбйәтед сәр һʹиме Кʹьтеба Пироз һәбун, у мьн әԝ әʹдәбйәт бь дьл у щан дьхԝәнд. Гәләк мьн хԝәш дьһатьн шьклед ԝан әʹдәбйәтада. Баве мьн нәдьхԝест ԝәки дийа мьн дәрһәԛа рʹастийе тʹәви мьн хәбәрдә. Ле йәкә, мьн гәләк дьхԝәст һе зедә пебьһʹәсьм, у мьн гәләк пьрс дьда ԝе. Чахе баве мьн малда нибу, дийа мьн тʹәви мьн һинбун дәрбаз дькьр. Ахьрийеда, мьн жи сафи кьр, ԝәки әʹмьре хԝә тʹәсмили Йaһоԝа кьм. У сала 1943, чахе әз дәһ сали бум, әз һатьмә ньхӧмандьне Блекпʹуледа, (Инглистан).

Паши ве йәке, мьн у дийа хԝә тʹьме бь хирәт мьзгини бәла дькьр. Сәва бәлакьрьна мьзгинийе, мә фонограф дьда хәбате. Әԝ фонограф мәзьн у гьран бун, ԝәкә 4.5 кг. Мьн бьдьнә бәр чʹәʹве хԝә, ча әз, гәдәки бьчʹук, мал бь мал әԝ фонограф тʹәви хԝә дьгәрʹанд.

Ԝи ԝәʹдәйи әз 14 сали бум, у мьн дьхԝәст ча пешәнг хьзмәт кьм. Дийа мьн мьнрʹа гот  ԝәки пешийе әз гәрәке тʹәви бәрпьрсийаре мьһале хәбәрдьм. Бәрпьрсийаре мьһале мьнрʹа ширәт да, ԝәки әз пʹешәки һин бьм, сәва ԝәʹде хьзмәтийа хԝәйә пешәнгти бькарьбьм хԝә хԝәй кьм. Мьн ӧса жи кьр. Паши дӧ сала, мьн дәрһәԛа хьзмәтийа пешәнгти хәбәрда тʹәви бәрпьрсийарәки дьн. Әԝи готә мьн: «Һәрʹә у бьгьһижә нета хԝә!»

Ӧса, сала 1949, мәһа Нисане, мьн у дийа хԝә һур-муре мале фьрот, у дәрбази Мидлетоне, незики Манчестере бун, у мә ль ԝедәре дәстпекьр ча пешәнг хьзмәт кьн. Паши чар мәһа, мьн бьрак бьжарт кӧ тʹәви мьн пешәнг хьзмәт кә. Жь филиале мәрʹа ширәт дан ԝәки әм дәрбази щьвата тʹәзә бьн Ирламеда. Ле дийа мьн тʹәви хушкәкә дьн щьватәкә дьнда хьзмәт дькьр.

Рʹаст ә әз 17 сали бум, ле мьн у һәвал-хьзмәткʹаре мьнрʹа щабдари дан ԝәки әм щьвате дәрбаз кьн, чьмки ве щьвата тʹәзәда гәләк һьндьк бьред щерʹьбанди һәбун. Һьнә ԝәʹдә шунда, әз һатьм тʹәглифкьрьн, ԝәки дәрбази Щьвата Бакстоне бьм, кʹидәре кӧ тʹәне чәнд мьзгинван һәбун у аликʹари лазьм бу. Әԝ һʹәму щабдарийед кӧ дьданә мьн, әз гәләк тьшт һин кьрьм у һазьр кьрьм сәва щабдарийед ахьрийеда.

Сала 1951, мьн бланк тʹьжә кьр сәва кӧ һәрʹьмә Мәкʹтәба Гиләд. Ле сала 1952, мәһа Кануна Пешьн, гази мьн кьрьн кӧ һәрʹьмә әскәрийе. Мьн дьхԝәст аза бьм у нәчьмә әскәрийе, ләма мьн гот ԝәки әз хьзмәткʹаре һәртʹьм ьм. Ле диԝане хԝәстьна мьн ԛәбул  нәкьр, ԝәки чаԝа хьзмәткʹаре һәртʹьм аза бьм жь әскәрийе, у әз сәр шәш мәһа кьрьмә кәле. Чахе әз кәледа бум, мьн тʹәглифкьрьн станд сәр Мәкʹтәба Гиләд. У сала 1953 мәһа Тирмәһе, әз пе гәмийа бь наве «Щорщик», чумә Нийу Йорке, ԝәки Мәкʹтәба Гиләдда һин бьм.

Гава әз һатьмә Нийу Йорке, әз чумә сәр щьвата мәзьн бь наве «Щьмәʹта Дьнйа Тʹәзә». Әԝ сала 1953 бу. Паше, әз пе трене чумә Лансинга Башуре, (Нийу Йорк), кʹидәре кӧ әз гәрәке һин бума. Щәм мьн гәләк һьндьк пʹәрә һәбу, чьмки әз тʹәзә жь кәле дәркʹәтьбум. Чахе әз жь трене дәркʹәтьм, әз отобуседа рʹуньштьм сәва һәрʹьм Лансинге, ле пʹәре рʹийа мьн кем бу. Мьн жь мәрьве кӧ отобуседа кʹеләка мьн рʹуньшти бу, 25 сент хԝәст, у әԝи да мьн.

Мәкʹтәба Гиләдда мә һинкьрьна гәләк баш станд, ԝәки чаԝа «һәр кәсирʹа» бьбьнә «һәр тьшт» (1 Корн. 9:22, ИМ). Әз, Пол Бран у Раймонд Леч, һатьнә кʹьфшкьрьне кӧ Филипинеда хьзмәт кьн. Әм чәнд мәһа һивийа визе бун. Әм пешийе пе гәмийе чунә Ротердаме, паше Бәʹра Навбәре, Канала Суезе, Окйануса Һьндийе, Малазйайе, у Һон-Конге, бь тʹәмами рʹийа мә сәр бәʹре 47 рʹожа кʹьшанд! Ахьрийеда әм гьһиштьнә Манилайе. Әԝ сала 1954, 19 Мьждаре бу.

Жь ԝи ԝәʹдәйида әм гәрәке һини мәрьвед тʹәзә, ԝәлате тʹәзә, у зьмане тʹәзә буна. Ле йәкә әм һәр се бьра һатьнә кʹьфшкьрьне щьвата Кесон Ситида, кʹидәре кӧ бьнәлийа сәр зьмане Инглизи хәбәрдьдан. Ләма, мә нава шәш мәһа тʹәне чәнд гьлийед Тагалог заньбун. Ле кʹьфшкьрьна тʹәзә ида әв чәтьнайи сафи кьр.

Рʹожәке, мәһа Гӧлане, сала 1955, әз у бьре Леч жь хьзмәтийе һатьнә мале, у мә отʹаха хԝәда чәнд нәʹмәк дит. Жь нәʹма әм пеһʹәсийан, ԝәки әм һатьнә кʹьфшкьрьне ча бәрпьрсийаред мьһале. Ԝи чахи әз 22 сали бум, ле әԝ щабдарийа тʹәзә мьнрʹа мәщал да ԝәки «һәр кәсирʹа» бьбьмә «һәр тьшт».

Мәсәлә, мьн ча бәрпьрсийаре мьһале, готара хԝәйә пешийе дәрва бәр дькʹана гӧнд хԝәнд. Мьн фәʹм кьр ԝәки бона мәрьвед Филипи тʹәбийәти йә, ԝәки готара бона һʹәмуйа, гәрәке ԝан щийада бе хԝәндьне, кʹидәре кӧ гәләк мәрьв ьн! Чахе мьн ча бәрпьрсийар тʹәсәлийа щьвата дькьр, мьн готар дьхԝәнд базарада, бәр мунисипалитета, сәр мәйдана баскетболе, паркада, у гәләк щар кʹучада. Щарәке, Сан Пабло Ситида баранәкә ԛайим бари чахе мьн базареда готар дьхԝәнд, у мьн ширәт да бьред щабдар, ԝәки әԝ готар Ода Щьватеда бе хԝәндьне. Паше бьра жь мьн пьрсин кӧ гәло әԝана әԝе готаре дькарьн һʹәсаб кьн ча готар бона һʹәмуйа, чьмки әԝ дәрва бәр һʹәму мәрьва найе хԝәндьне, ле тʹәне Ода Щьватеда.

Әз тʹьме мала бьрада дьмам. Рʹаст ә әԝана дәԝләти нибун, ле малед ԝан тʹьме тʹәмьз бун. Гәләк щар әз сәр халича тәньк, сәр поле дар рʹадьзам. Ль ԝедәре щийе сәршуштьне вәкьри бун, у әз һин бум ԝәки кʹьнщава сәре хԝә бьшом. Әз пе отобусе дьчум, у щара бь ԛәйьке дәрбази гьравед дьн дьбум. Нава тʹәмамийа салед хьзмәтийа мьнда, авта мьн тʹӧнә бу.

Хьзмәткьрьн у тʹәсәликьрьна щьвата, али мьн кьрьн ԝәки әз зьмане Тагалог һин бьм. Әз курсед ԝи зьмани дәрбаз нәбум, ле бь сайа гӧһдайина хушк-бьра ԝәʹде хьзмәтийе у ӧса жи бь сайа щьвата, әз әви зьмани һин бум. Ве йәкеда бьра гәләк дьхԝәстьн али мьн бькьн, у әз гәләк рʹази бум ԝәки әԝана ча бь сәбьр бун һьндава мьнда у бь дьл у щан пʹайе мьн дьдан.

Ԝәʹдә дәрбаз дьбу, у мьн кʹьфшкьрьна тʹәзә станд, кʹижан кӧ мьн һелан кьр һини гӧһастьнед тʹәзә бьм. Сала 1956, чахе бьре Нейтан Нор сәрледан кьр, әз һатьмә кʹьфшкьрьне, ԝәки сәр щьвата мәзьнә һʹәмдьнйайе тʹәви медийа һәвкʹарийе бькьм. Ве  йәкеда әз щерʹьбанди нибум, ләма йед дьн бь дьл у щан мьн һин дькьрьн. Саләке кемтьр шунда, щьвата мәзьнә һʹәмдьнйайе йа майин дәрбаз бу, у Фредерик Франсе бьра жь офиса сәрәкә һатә ԝедәре. Сәр ԝе щьвате әз бәрпьрсийаре щьвата мәзьн бум, у әз жь Франс бьра һин бум кӧ бь дьл у щан ԛәдьре һʹәму мәрьва у әʹдәтед ԝан бьгьрьм. Чахе Франсе бьра готар хԝәнд, бьред ԝе мьһаледа әʹщебмайи ман у ша бун гава әԝ дитьн пе кʹьнще «баронг Тагалог», демәк кʹьнще мьләте Филипин.

Чахе әз һатьмә кʹьфшкьрьне ча бәрпьрсийаре нәһийе, мьнрʹа лазьм бу диса һини тьштед тʹәзә бьм. Ԝи чахи мә филм нишан дькьрьн бь наве «Бәхтәԝарийа Щьмәʹта Дьнйа Тʹәзә», у мә һʹәчʹи зәʹф дәрва щийед кӧ гәләк мәрьв бун әԝ филм нишан дькьрьн. Щара ԝәʹде филме, меш-моза әм әʹщьз дькьрьн. Әԝана дора мә тʹоп дьбун жь бо лусе, у дькʹәтьнә нава прожектора. Паши ԝан щьвина, мә ԝан прожектора тʹәмьз дькьр, у дькарьм бежьм ԝәки һеса нибу ԝана тʹәмьз кьн! Бәле мәрʹа һеса нибу кӧ әԝе филме нишан кьн, ле йәкә әм гәләк ша дьбун чахе мә дьдит кӧ мәрьва ча рʹьнд гӧһ дьдан, у ча әԝана педьһʹәсийан дәрһәԛа тʹәшкиләта Йaһоԝайә һʹәмдьнйайе.

Кʹәшишед Католик нав һьнә мәрьвед дәԝләте дьдан, сәва әԝана изьне нәдьн кӧ әм щьватед мәзьн дәрбаз кьн. Щара жи ԝан щийа кʹидәре кӧ щьвинед мә незики дера дәрбаз дьбун, әԝ кʹәшиш зәнгьлед дера ԛайим ледьхьстьн ԝәки тʹӧ кәс нькарьбә  готара бьбьһе. Ле әв һʹәму тьшти шьхӧле мә нә да сәкьнандьне, у рʹожа иройин ԝи щийида гәләк хьзмәткʹаред Йaһоԝа һәнә.

Сала 1959, мьн нәʹмәк станд кʹидәреда дьһатә готьне ԝәки әз һатьмә кʹьфшкьрьне кӧ филиаледа хьзмәт кьм. Ве кʹьфшкьрьнеда әз гәләк тьшт һин бумә у щерʹьбанди бум. Ԝи ԝәʹдәйи мьнрʹа щабдари дьдан ԝәки әз һәрʹьм тʹәсәлийа ԝәлатед дьн бькьм. Ԝәлатәкида мьн насийа хԝә да Щанет Думанд, кʹижан кӧ Тайландеда мисийонер бу. Мә һьнә ԝәхт һәв нас дькьр у паше әм һәв стандьн. Әм 51 сала тʹәвайи ча мер у жьн хьзмәт дькьн у шабунәкә мәзьн дьстиньн.

Бь тʹәмами әз чумә 33 ԝәлата у әз гәләк ша мә ԝәки тʹәви гәләк хушк-бьра бумә нас. Әз гәләк жь Йaһоԝа рʹази мә, ԝәки әԝ щабдарийед кӧ щаһьлтийеда мьн дьстанд, әз һазьр кьрьм сәва әз бькʹәвьмә һʹале щурʹә-щурʹә мәрьва! Тʹәсәликьрьна ԝәлата, ньһерʹандьна мьн сәр гәләк тьшта гӧһаст у али мьн кьр ԝәки әз пе чʹәʹве хԝә бьвиньм ԝәки Йaһоԝа һʹәму щурʹә мәрьва һмәр дькә (Кʹар. Шанд. 10:34, 35).

Чьԛас баш ә ԝәки әм тʹәви хушк-бьред Филипине хьзмәт дькьн! Ньһа ль ԝедәре мьзгинван 10 щара зедәтьр һәнә, нә кӧ чахе щара пешийе мьн дәстпекьр хьзмәт кьм ль ԝедәре. Әз у Щанет һʹәта ньһа хьзмәт дькьн филиала Филипинеда, кʹижан кӧ шәһәре Кезон Ситида йә. Ида 60 сала зедәтьр ә ча әз ԝәлате хәрибда хьзмәт дькьм, у һәла һе ньһа жи әз һазьр ьм ԝәки Йaһоԝа чь кӧ мьнрʹа бежә әзе әве йәке бькьм. Ԝан пашԝәхтийада тʹәшкиләта мәда гӧһастьн һатьнә кьрьне, у ньһа әм ида һини ԝан гӧһастьна дьбьн.

Нета мә тʹьме әԝ ә ԝәки рʹебәрийед Йaһоԝа ԛәбул кьн, у әԝ йәк әʹмьре мәда шабунәкә мәзьн тинә. Әм ӧса жи һини ԝан тьшта дьбун, кʹижан кӧ лазьм бун ԝәки әм хушк-бьред хԝәрʹа бәрдәстийе бькьн. Бәле, әм һазьр ьн ԝәки ԛьрара Йaһоԝа биньн сери, бь ве йәке кӧ «һәр кәсирʹа» әм бьбьнә «һәр тьшт».