Ku bokona mu madisá

Ku bokona mu madisá

Nga uabhela kukala kumoxi ni minzangala ia kilunga kiami

 O BIBIDIA I LUNGULULA O UEXILU UA ATHU

Nga Zolele Kiavulu Kujokala Beisebol o Ima Ioso Ndenge!

Nga Zolele Kiavulu Kujokala Beisebol o Ima Ioso Ndenge!
  • MUVU UA MU VUALA: 1928

  • MUKUÂ: COSTA RICA

  • MUSOSO: UA ZOLELE KIAVULU KUJOKALA BEISEBOL NI KUTA UÁDI

MUSOSO UAMI

Nga kudila mu mbanza ia Puerto Limón, ia tokala mu ixi ia Costa Rica. O jitata jami a kexile ni dinake dia tuana, éme ngexile ngi mona ua kasambuadi. Tat’etu uafu kioso eme ki nga kexile ni dinake dia muvu. Mukonda dia kiki, mam’etu ua tu sase ubheka ue.

O kujokala o Beisebol * ua bhangele mbandu ku muenhu uami. Mu unzangala uami nga zolele kiavulu kujokala. Nga bokonene mu kibuka kia kujokala phala ngó kutonoka. Kioso ki nga kexile mu kitala kia 20, nga kexile mu jokala, mu kithangana kienhókio kua moneka diiala ua ngi bhingi phala kujokala mu kibuka kia dikota kia jihete mu ixi ia Nicaragua. Maji kuma mu kithangana kienhókio mam’etu ua katele, éme nga kexile ku mu tambula konda, mukonda dia kiki ki ngi mesenene kuia mu tunga mu ixi ia Nicaragua. Nga ditunu o ujitu iú. Mu kubhita thembu, kueza dingi muthu ua ngi xana phala kujokala mu kibuka kia beisebol kia ixi ia Costa Rica, o eji jokala mu kibuka kienhókio a tundile mu ibuka iofele ia ixi. Mu kiki, nga xikina o ujitu iú. Nga jokala mu kibuka kia ixi tundé ku muvu ua 1949 ndú 1952, nga jokala veji javulu mu ixi ia Cuba, México, ni mu ixi ia Nicaragua. Éme ngexile ngi ngunji ia kibuka, nga jokala 17 dia jijoko, ki ngi luezele né ngó lumoxi, lémbua, nga jokala kiambote. Nga uabhelele kiavulu kuivua o athu ku ngi ximana!

Maji o fuma ienióio ia ng’endesa mu njila ia ufusa. Sumbala nga kexile ngó ni kahatu kamoxi, maji nga kexile dingi mu tunda ni ilumba ia mukuá. Nga kexile mu nua kiavulu. Sai kizuua nga nuine kiavulu, mu kamene kioso ki nga balumuka mu xilu diami, ki ngi kijidile kiebhi ki nga vutukile kubhata! Nga kexile ue mu ta uádi ni kuseta kiela.

Mu ku bhita thembu, mam’etu ua kituka Mbangi ia Jihova. Muene ua ngi suínisa ku mu kaiela, maji ku dimatekenu nga ditunine mukonda muxima uami ua kexile ngó mu jijoko. Se mu ola ia kudia, ngi kala mu jokala, ki ngivua’mi nzala! Muxima uami ua kexile  ngó mu joko. Nga zolele kiavulu kujokala beisebol ima ioso ndenge!

Maji mu kitala kia 29, nga di kuamene kiavulu mu kuata o bola. Kioso ki nga disanze, nga ditunu kukala mu jokala mu jijoko ja makota. Mu kiki, nga mateka kukuatekesa o minzangala ia kexile mu jokala mu ibuka iofele mu diembu dietu.

O BIBIDIA IA LUNGULULA O UKEXILU UA MUENHU UAMI

Ku muvu ua 1957, ngai mu kiônge kia dikota kia Jimbangi ja Jihova kia bhitile mu kambu mu nga kexile mu jokala o beisebol m’ukulu. Mu kuxikama, nga mono o ukexilu uambote ni kuxila kua Jimbangi ja Jihova, ki uene ua kexile na-u o athu akexile muia mu tala o jijoko ja beisebol. O ima i nga mono mu kiônge kiókio kia dikota ia ngi suínisa kumateka kudilonga o Bibidia ni Jimbangi ja Jihova ni kuia mu iônge mu kilunga.

Nga diuanene ni ima iavulu i nga dilongele mu Bibidia. Mu kifika, Jezú ua tangele kuila mu izuua isukidila-ku, o maxibulu mê eji tula o njimbu iambote ia Utuminu ua Nzambi mu ngongo ioso. (Matesu 24:14) Nga dilongo ue kuila o Jikidistá ja kidi kene mu boka phala kunganhala kitadi. Jezú uambe: “Mua tambula ngoho, bhanenu ngoho.”Matesu 10:8.

Kioso ki nga kexile mu dilonga o Bibidia, nga kexile mu sokesa o milongi ia Bibidia ni ima i nga kexile mu mona ku Jimbangi ja Jihova. Nga diuanene mu kumona o nguzu ia kexile mu bhanga ene, mu kuboka o jimbu iambote ia Utuminu ua Nzambi mu ngongo ioso. Nga mono kua ene, o ukexilu ua kubhana ua tendelesa Jezú ku Jikidistá. Kioso ki nga tange mu divulu dia Marku 10:21 nga mono o kixanu kia Jezú kioso kiambe ‘Zá u ngi kaiele.’ Mu kiki nga solo kukala Mbangi ia Jihova.

Maji kua bhiti thembu iavulu phala kukituka Mbangi ia Jihova. Mu kifika, ku mivu iavulu nga kexile mu jokala semana joso ni numelu iami ia “sólote” mu kiela kia ixi. Nga dilongo mu Bibidia kuila Nzambi ua zembe o abhezi a “Kilundu-kia-Jimbongo”, ni athu a kuá luimbi lua kitadi. (Izaia 65:11; Kolose 3:5) Mukonda dia kiki nga xisa o kuta o uadi. O Lumingu lua dianga kioso ki nga xisa kuta o uádi, numelu iami ia “sólote” ia nganhala! O athu a kexile mu ngi tobhesa mukonda eme ki nga tele o uadi mu semana ienióio, mu kiki ene a kexile mu ngi suínisa phala kuta dingi o uádi maji eme nga ditunu. Ki nga kexile dingi kuta uádi.

Mu kizuua kia ngi batizala mu kiônge kia dikota kia Jimbangi ja Jihova, nga bhiti mu tendasá iengi ‘mu ukexilu uami ua ubhe.’ (Efezo 4:24) Mu usuku uenhó nga vutuka mu hotele, nga sange o kilumba uexile saí iami m’ukulu ua kexile mu ngi kingila bhu kanga. Muene uambe “Sammy eió. Tu tonoke bhofele!” Maji eme nga mu tangela ni kusuína kuoso, “Kana!” Nga mu lembalesa kuila, nga kexile kiá mu belesela o itumu ia iuka ia Bibidia. (1 Kolindo 6:18) Muene ua dikola “Ua zuela ihi?” Muene ka bhana valolo ku milongi ia Bibidia ia lungu ni undumbu, iu ua ngi jijidika kuila tua tokalele ku vutuka dingi ni ukamba uetu. Maji nga bokona mu xilu diami, anga ngi jika o dibhitu. Lelu nga zediua, tundé ki nga kituka ngi Mbangi ia Jihova ku muvu ua 1958, ngene mu bhanga nguzu mu ku lungulula o ukexilu ua muenhu uami.

MABESÁ U NGA TAMBULA

Ngi divua kuila ngi tena kusoneka divulu, mukonda dia mabesá u ngene mu tambula mu kubelesela o itumu ia Bibidia! O mabesá amoxi o kukala ni makamba avulu a kidi, o muenhu uami uala dingi ni valolo ni kutululuka kua kidi.

Lelu nga zolo hanji o beisebol, maji nga mu i tala kiá mu ukexilu uengi. Mu kujokala o beisebol nga nganhala fuma iavulu ni kitadi, maji ima íii ki ia nangenena. Maji o ukamba uami ni Nzambi ni jiphange jami, ua-nda nangenena katé ku hádia ni hádia. O Bibidia iambe: “O mundu-phe u buila, ni ima iê ioso iene mu kuinda athu. Maji uoso-phe u bhanga o vondadi ia Nzambi, ió muène o muthu u nangenena.” (1 Nzuá 2:17) Lelu eme nga zolo dingi Jihova Nzambi ni mundu ue o ima ioso ndenge!

^ kax. 9 Beisebol, joko ia ibuka iiadi, kala kibuka ki kala ni divua dia muthu. Mu joko íii o jokadolo ia kibuka kiki, u takula o bola, anga o jokadolo ia kibuka kia mukuá, u bhanga ioso phala kubeta o bola íii ni mbangala.