Ku bokona mu madisá

Ku bokona mu madisá

 O BIBIDIA I LUNGULULA O UKEXILU UA ATHU

O Ukexilu Uami ua Iibha ua Kexile mu Dibandekesa

O Ukexilu Uami ua Iibha ua Kexile mu Dibandekesa
  • MUVU UA MU VUALA: 1952

  • MUKUA: ESTADOS UNIDOS

  • MUSOSO: UEXILE MUKUA NJINDA

MUSOSO UAMI:

Nga kudila mu mbanza ia Los Angeles, California, ku Estados Unidos ia América, mu jisanzala ja fumene mukonda dia jibandi ni kubuakula diamba. Tata jami akexile ni ana kisamanu, eme ng’exile o mona ua kaiadi.

Mam’etu ua kexile mu tuambata mu ngeleja ia evangélica. Maji, mu kitala kiami kia kikumbi, ki ngi kexile mu kaiela kiambote o ilongesu ia ngeleja. Mu Malumingu, nga ng’exile mu kuimba mu kibuka kia kuimba mu ngeleja. O izuua ia mukua ia semana, nga kexile múia mu jifesa, kubuakula diamba ni ku bhanga undumbu.

Eme ng’exile ngi kindanda, u kuata njinda ni lusolo. Mu kubhânga, ng’exile mu kuata kima kioso-kioso, kala uta phala kukuama mba kujibha. O ia kexile mu ngi longa mu ngeleja, ki ia kexile mu ngi kuatekesa mu kima. Nga kexile mu zuela, “o kuvutuila o phonzo kua tokala Ngana—maji ua ngi tumu eme phala kuvutuila o phonzo!” Kioso ki nga kexile mu dilonga o xikola ku muvu ua 1960, nga kaiela o ukexilu ua kibuka kia Black Panthers, kibuka kia ku bhukumuka kia kexile mu bhângela o ufolo ua athu. Bhu xikola nga dibundu mu kibuka kia kexile mu zokela o ufolo ua athu. Mu veji javulu, tua kexile mu bhanga kavuanza, ka kexile mu bhangesa ku jika o xikola.

Ng’exile mu divua kala o kubhanga kiki, ki kua kexile mu bhuisa o njinda iami. Mu kiki, nga mateka ku bhanga ima ia iibha kala o kubeta o athu. Mu kifika, eme ni makamba mami, tua mono filme ia londekesa o hadi ia kexile mu tala o abhika akua África ku Estados Unidos. Mukonda dia ima íii ia iibha i tua mono mu filme, o njinda ietu ia dibandekesa dingi, etu tua kuata o ku beta o minzangala ia mindele bhu kididi kieniókio kia filme. Mu suluka tuai ku jisanzala ja mindele kusota dingi athu phala kua beta.

Mu ku bhita thembu ku disukilu dia kikumbi kiami, o jiphange jami n’eme, tua bhangele kiá ima iavulu ia iibha. Tua kexile ni maka avulu ni xiku dia ngoji. O ndeng’ami uexile mu kibuka kia jibandi, ja kexile ni fuma iavulu ia ku bhanga ima ia iibha. Eme nga di bundile ni ene.

O BIBIDIA IA LUNGULULA O UKEXILU UA MUENHU UAMI:

Kamba diami uexile ni jitata exile Jimbangi ja Jihova. Ene a ngi bhingi phala kuia mu iônge, eme nga xikina. Tundé o kizuua ki nga mateka kuia mu iônge, nga mono kuma o Jimbangi ja Jihova a di tungula, ka difuile ni athu a mukua. Ene oso akexile ni Bibidia iâ, ia akexile mu i tanga mu ola ia kiônge. O minzangala exile ué mu bhanga madiskursu! Nga diuana o kuijiia kuila Nzambi uala ni dijina diê Jihova, ni kuivua o athu kutumbula o dijina didi. (Jisálamu 83:18) O kilunga kiezalele ni athu,  mindele ni ambundu, maji ki bhu kexile kathombo mudiâ.

Ku dimatekenu eme ki ngi mesenene kudilonga o Bibidia ni Jimbangi ja Jihova, maji nga uabhela o kuia mu iônge iâ. Saí kizuua, kioso ki nga kexile mu kiônge ni Jimbangi ja Jihova, o makamba mami ai mu fesa, kuenioko ene a beta munzangala katé kiafu, mukonda muéne ua ditunu kubhana o kazaku kê. Mu kizuua kia kaiela-ku, ene a dinanze mukonda dia kujibha o munzangala. Kioso kia a fundisa, ene akexile mu kuelela mukonda afikile kuma o ia bhangele, ki kituxi kana. Avulu mudiâ, a a balakala katé ku ufilu uâ. Eme nga sanguluka mukonda mu usuku uenió, eme ki ngi kexile na-u. Mu kiki, nga mesenene kulungulula o muenhu uami, eme nga xikina kudilonga o Bibidia.

Mu mivu iavulu, nga monene ngó athu ala ni kathombo mudiâ, kienhiki o i nga mono bhu kaxi ka Jimbangi ja Jihova, ia ngi bhangesa kudiuana kiavulu. Mu kifika, saí kizuua nga mono Mbangi ia Jihova, uexile mundele ua mesenene kuenda njila, ua xisa o tuana tuê ku dibhata dia jiphange exile ambundu. Nga mono ué jiphange ja mindele, ambata munzangala mumbundu ku bhata diâ, phala ku kala né, mukonda ua bhindamene kididi kia ku kala. Nga xinganeka muene mudiami kuila, o Jimbangi ja Jihova a mu kaiela o milongi ia Jezú iala mu divulu dia Nzuá 13:35 diambe: “Kiene kia m’ijidila ku athu oso, kuma muala mu jixibulu jami, se mua di zolo mu dienu.” Eme nga kijidile kuila nga sangele o jiphange ja kidi.

Mu kudilonga o Bibidia, nga mono kuila nga tokalele o ku lungulula o ukexilu ua ibanzelu iami. Ngeji lungulula o ixinganeku iami, ki phala ngó ku kala muthu ua tululuka, maji ni kumona ué kuila uene o ukexilu uambote ua muenhu. (Loma 12:2) Bhofele-bhofele, nga kuata kulungulula o ukexilu uami. Ku mbeji ia Katatu ka muvu ua 1974, a ngi batizala kala ngi Mbangi ia Jihova.

Ngeji lungulula o ixinganeku iami, ki phala ngó ku kala muthu ua tululuka, maji ni kumona ué kuila uene o ukexilu uambote ua muenhu

Maji né muene kioso kia ngi batizala, nga suluka ni kulungulula o ukexilu uami ua kukala ni njinda. Mu kifika, sai kithangana kioso ki ng’exile múia nzo ni inzo mu boka, nga kaie muii ua nhanene o mutelembe ua dikalu diami. Kioso ki nga zukamene phala ku mu kuata, muéne ua sonona o mutelembe iu ua lenge. Kioso ki nga ki tangela akuetu kiebhi ki nga sange o mutelembe uami, o phang’etu kafunga ua ngi bhula: “Stephen, ihi i ueji bhanga se ua mu kuatele?” O kibhuidisu kiki, kia ngi bhangesa kuxinganeka, kia ngi bhangesa ué kusuluka mu kusota o kutululuka.

Ku mbeji ia Kamusasadi ka muvu ua 1974, nga mateka o kikalakalu kia muboki ua thembu ioso, mu kubhanga 100 ia ji ola ku mbeji mu kulonga o Bibidia ku athu. Ku pholo, nga tambula o ujitu ua kusidivila ku Mbonge ia Jimbangi ja Jihova ku Brooklyn, Nova Iorque. Ku muvu ua 1978, nga vutuka ku mbanza ia Los Angeles phala ku langa mam’etu ua katele. Mu kubhita mivu iiadi, nga kazala ni kazola kami Aarhonda. Muéne ua ngi kuatekesa kiavulu kioso ki nga kexile mu langa mam’etu, katé mam’etu kiafu. Mu ku bhita thembu Aarhonda n’eme, tua dilongo o xikola ia Ngiliade, ia a tu tumikisa ku ixi ia Panamá ku tua mu sidivila kala tu Akunji katé lelu.

Tundé kia ngi batizala, nga dibhana ni ima iavulu ieji ngi bhangesa kubhânga mukonda dia njinda. Nga dilongo o kusondoloka bhu kaxi k’athu a mesena ku ngi lokalala mba ngi sota kutululuka mu ukexilu uengi. Athu avulu katé muene ni muhatu’ami, a ngi ximana mukonda dia kudibhana kiambote ni maka iâ. Katé muene eme, ngi diuana mudiami! Ngejiia kuila ki nga mu lungulula o ukexilu uami mu nguzu iami ngó. Ngi xikina kuila nga mu bhanga kiki, mukonda dia kutena kua Bibidia kua mu bhangesa o kulungulula o ukexilu ua muenhu uami.Jihebeleu 4:12.

MABESÁ U NGA TAMBULA:

O Bibidia ia ngi kuatekesa o kumona o valolo ia muenhu, ia ngi kuatekesa ué o kukala ngi muthu ua tululuka. Ki ngene mu beta dingi o athu; maji ngene kiá mu a kuatekesa kukala makamba a Nzambi. Katé muene nga longo o Bibidia ku muthu ua kexile nguma iami bhu xikola! Kioso kia mu batizala, tua kexile mu zeka xilu dimoxi. Tua bhiluka tu makamba a kidi katé lelu. Katé lelu, o muhatu uami n’eme, tua kuatekesa 80 a athu ku kituka Jimbangi ja Jihova mu kua longa o Bibidia.

Eme ngi sakidila kiavulu Jihova, mukonda dia ku ngi bhana o muenhu, ni kuzediua bhu kaxi ka jiphange ku mundu.