Ku bokona mu madisá

Ku bokona mu madisá

 DIAMBU DIA KAPA | KIEBHI KI TU DIBHANA NI MAKA

Maka ku Muiji

Maka ku Muiji

Janet uambe: “Kioso tat’etu kiafu, mu kubhita tu izuua muadi uami ua ngi tangela kuila ueji sota muhatu uéngi. Mu kubhita izuua, sé ku ngi lekela, ua longela o izuatu iê iu uai, ua ngi xisa ubheka ni tuana tuiadi.” Janet ua mateka o kukalakala maji o kitadi kia kexile mu nganhala, ki ki sokele phala kudikila kiambote o tuana tuê. Muéne ka bhiti ngó mu ibhidi ia lungu ni kukamba kitadi. Muéne uambe: “Ikalakalu ioso ia lungu ni muiji, eme nga kexile mu i bhanga ubheka uami, kiki kia kexile mu ngi bhuidisa kiavulu. Nga kexile mu divua kia iibha mukonda ki ngi tenene kubhana ku tuana tuami ioso ia bhindamene kála kia kexile mu bhanga o jitata jengi. Katé muene lelu, ngene mu dibhuidisa kiebhi o athu kiene mu ngi mona, eme ni tuana tuami. O kuila ene mu dibhuidisa se nga bhange muene ioso phala kusuínisa o ukaza uami?”

Janet

O kusamba, kua kuatekesa Janet kutululukisa o muxima uê ni kukolesa o ukamba uê ni Nzambi. “O ima iene mu ngi bhonza dingi mu usuku, mukonda mu usuku ima ioso ia tululuka, ngi kala mu banza kiavulu ku muenhu uami. Maji o kusamba ni kutanga o Bibidia, ku ngi kuatekesa kukuata kilu. O divulu di nga uabhela dingi o kutanga, o divulu dia Filipe 4:6, 7, diambe: ‘Ki mu kale ni hele ia kima, ki mu ile bhidibhidi, maji ima ioso-phe iiza-ku, mu ila ni kusamba ni kudionda, kumoxi ni kusakidila, mu ende ni kubhinga kua Nzambi ioso i mua mesena. Bheniobho o kutululuka kua Nzambi kua somboka o kitongoluelu kioso kia muthu, kuanda ku mi bateka mixima ni ilunji.’ Nga bhitile mausuku avulu mu kusamba, ng’evu o kutululuka kua Jihova moxi diami.”

O ia zuela Jezú ia lungu ni musambu mu Diskursu dia bhange ku Mulundu, i tu kuatekesa kudibhana ni maka oso-oso a moneka ku muenhu uetu, muéne uixi: “Tat’enu uejiia kiá ima ioso i mua bhindamena, kioso enu kiluua ngó mu mu bhinga.” (Matesu 6:8) Etu tua tokala ku mu bhinga. O kusamba, o kima kia dianga ki tua tokala o kubhanga phala ‘kuzukama kua Nzambi.’ Ihi ia-nda bhita se tu bhanga kiki? ‘Muéne ua-nda tu zukama uetu.’Tiiaku 4:8.

 Mu kidi, o misambu ki i tu kuatekesa ngó kudivua kiambote mu kuila tua zuela ioso ia tu kala ku muxima. Jihova, o “Mukua kuívua o kusamba,” u zokela ué uoso u mu sota ni kixikanu. (Jisálamu 65:2) Kiki kiene kia bhangesa Jezú ku tendelesa o akaiedi’ê o “kusamba jinga, sé kubhuila.” (Luka 18:1) Tua tokala tu suluka mu kubhinga kua Nzambi, phala ku tuendesa ni ku tu kuatekesa ni kudielela kuila muéne ua-nda tu besoala mukonda dia kixikanu kietu kua muéne. Etu tua tokala ku dielela kuila, muéne uala ni vondadi ni kutena kua ku tu kuatekesa. O ‘ku samba sé kufula’ kulondekesa kuila, tuala ni kixikanu kia kidi kua Nzambi.1 Tesalonika 5:17.

IHI ILOMBOLOLA O KUKALA NI KIXIKANU KUA NZAMBI

Maji o kixikanu kilombolola ihi? O kixikanu kilombolola ‘kuijiia’ Nzambi ni ku mu mona kála muthu ua kidi. (Nzuá 17:3) Tu dianga kubhanga kiki, mu kudilonga o ibanzelu ia Nzambi i tu sanga mu Bibidia. Mu kudilonga o Bibidia tua-nda mona kuila muéne u mona muthu ni muthu anga u mesena ku tu kuatekesa. Maji o kixikanu kia kidi, ki kilombolola ngó kuijiia kima kia lungu ni Nzambi, kana. Kilombolola ué kukala ni ukamba uambote ni muéne. Kála kiene mu bhita ni makamba mu xitu, phala etu kukala tu makamba a Nzambi, kubhinga ué thembu. O kixikanu kietu ki “kula dingi” mu kubhita thembu kioso ki tuia ni kubandekesa o kuijiia kuetu kua lungu ni muéne, ni kioso ki tu “bhanga jinga ioso ia mu uabhela muène,” ni kioso ki tu mona o kikuatekesu kiê ku muenhu uetu. (2 Kolindo 10:15; Nzuá 8:29) Kiki kiene o kixikanu kiene mu kuatekesa Janet kudibhana ni maka ku muenhu uê.

Janet uambe: “O ia ngi kuatekesa kukolesa o kixikanu kiami, o kumona o kikuatekesu kia Jihova ku muenhu uami. Mu ithangana iavulu tua bhiti mu ibhidi ia makota. Tua kexile mu samba kiavulu, mu kiki Jihova ua kexile mu tu kuatekesa jinga mu ibhidi ioso, sé o kikuatekesu kiê, ki ngeji tena kukolokota. Ithangana ioso kioso ki ngi mu sakidila, ngi lembalala ioso iene mu bhanga phala ku ngi kuatekesa. Muéne uene mu moneka jinga mu kithangana kia tokala, phala ku tu kuatekesa. Muéne ua ngi bhana makamba a kidi, maiala ni ahatu ala uá ni kixikanu kia kidi kua muéne. O makamba enhá ene mu ngi kuatekesa kiavulu, a bhana uá phangu iambote ku tuana tuami.” *

“Lelu ngejiia kiambote se mukonda diahi Jihova u zuela mu divulu dia Malakiia 2:16 kuila, ‘ nga zembe o ku di xisa.’ Phala o muthu a mu xisa kua kaza diê, kiki o kibhidi kia tundu o ibhidi ioso. Kua bhiti kiá mivu iavulu tundé muadi uami kia ngi xisa, ngene mu divua hanji ubheka. Kioso ki ngi bhanga kima phala kukuatekesa muthu, kiki ki ngi kuatekesa ué kukolokota.” Mu kubelesela o itumu ia Bibidia ia kueha o ukexilu ua kudiunga, kuene mu kuatekesa Janet kutululuka. *Jisabhu 18:1.

Nzambi “tata ia jihukunhi o dilemba dia ahatu a xala atudi.”Jisálamu 68:5

Janet uambe: “O i beta-o-kota ku ngi kuatekesa, o kuijiia kuila Nzambi ‘tata ia jihukunhi o dilemba dia ahatu a xala atudi.’ Muéne nuka ua-nda tu xisa kála kia tu xisa muadi uami.” (Jisálamu 68:5) Janet uejiia kuila Nzambi kene mu tu diangula “ku kima kiaiibha kioso-kioso.” Maji “muène ubhana kiavulu” unjimu ku athu oso ni kua bhana “nguzu i lenda ioso” phala ku tu kuatekesa kudibhana ni maka a moneka ku muenhu uetu.Tiiaku 1:5, 13; 2 Kolindo 4:7.

Maji ihi i tu bhanga se tua thandanganha mukonda dia mavuua?

^ kax. 9 Tanga 1 Kolindo 10:13; Jihebeleu 4:16.

^ kax. 10 Phala kuijiia dingi maukexilu a mukuá a kudibhana ni maka a moneka ku muenhu, tanga o Despertai! dia Kavua dia 2015 ni diambu “Como recuperar o Controlo da Sua Vida?” o Despertai! didi diala mu www.jw.org.