Ku bokona mu madisá

Ku bokona mu madisá

O Kuila tu Tena Kusangulukisa Nzambi?

O Kuila tu Tena Kusangulukisa Nzambi?

Ua tangele kiá mu Bibidia misoso ia lungu ni athu, a a ximana kiavulu mukonda dia ima ia bhange, eie uambe: ‘Kana, eme ki ngi tena kusoka ni ene!’ Eie nange u zuela: ‘Eme ki ngi muthu ua iuka, saí ithangana ki ngi tena kubhanga o ima ia iuka.’

Jobe uexile ‘muthu ua kidi, ua iuka.’Jobe 1:1

O Bibidia i tu tangela kuila, Jobe uexile ‘muthu ua kidi, ua iuka.’ (Jobe 1:1) Lote a mu ixana “muthu ió uaiuka.” (2 Phetele 2:8) O Bibidia i tu tangela ué kuila, Davidi ua kexile mu ‘bhanga ngó kia iukila’ ku mesu’a Nzambi. (1 Jisobha 14:8) Tu di longe kiambote o misoso ia athu enhá. Mu kudilonga o misoso iâ, tua-nda mona kuila (1) ene uá a tele ituxi, (2) ene a tu longa ima iavulu (3) o athu a ituxi a tena kusangulukisa Nzambi.

NI ENE UÁ A TELE ITUXI

“[Nzambi] ua kudidile ue muiuki Lote, a mu tele bhu kibhidi kiavulu kuala athu ió abhukumuka, mukonda dia uendelu uâ ua ufusa.”2 Phetele 2:7

Jobe ua bhiti mu ibhidi iavulu. Muéne ua kexile ni ibanzelu ia iibha mu kuamba kuma, Nzambi kene mu suua athu, ki kale se ala ni kixikanu kua Muéne mba kana. (Jobe 9:20-22) Jobe ua xikinine ni kidi kioso kuila, muéne uexile muthu ua iuka, katé o athu bhu kaxi kê a mu fikile kuila ua kexile mu dimona kála ua beta o kuiuka, Nzambi ndenge.Jobe 32:1, 2; 35:1, 2.

Lote kia mu bhonzele kubhanga kima sumbala ki ki bhonzele ku ki bhanga. Muéne ua tale hadi iavulu mukonda dia uendelu ua ufusa ua athu a  tungile mu mbanza ia Sodoma ni Ngomola. O Bibidia i tu tangela kuila muéne ua ‘tale hadi ku muxima uê ua iuka izuua ioso’ mukonda dia ukexilu uâ ua iibha. (2 Phetele 2:8) Nzambi ua mesenene kubuikisa o mbanza ia Sodoma ni ia Ngomola mukonda dia kuiibha kuâ, maji ua bhana kithangana kua Lote ni muiji uê phala kubhuluka. Lote muéne ueji diangela o kutunda bhu kanga dia mbanza. Maji mu veji dia kiki, Lote ua laleka o kutunda. O ji-anju ja tumine Nzambi phala kubhulula muéne ni muiji uê, a kuata mu lukuaku luê ni lua muiji uê ia a a bheka bhu kanga mu kididi kia kondama.Dimatekenu 19:15, 16.

Davidi ‘ua kaiela Nzambi ni muxima uê uoso mu kubhanga ngó kia iuka ku mesu ma Nzambi.’1 Jisobha 14:8

Saí kizuua Davidi ka lange o jihanji jê ja xitu, mukonda dia kiki ua te phánda ni muhatu ua ngene. Davidi ua mesenene kusueka o kituxi kiê, kienhiki ua tumina kujibha o diiala dia muhatu uenhó. (2 Samuuele kibatulu 11) O Bibidia i zuela kuila “kima kiki-phe kia bhange Davidi, Jihova kia mu iibhila.”2 Samuuele 11:27.

Ki kale Jobe, Lote, ni Davidi, kitatu kiâ a tele ituxi. Maji kála ki tua-nda mona ku pholo, ene a mesenene ni mixima iâ ioso kusidivila ni kubelesela Nzambi. Ene a londekesa kuila a diela o ituxi iâ, ia a mesenene kulungulula o ibanzelu iâ ni uendelu uâ. Mukonda dia kiki, Nzambi ua a xikina; o Bibidia ixana o athu enhá, athu a fiiele.

IHI I TU LONGA O ATHU ENHÁ?

Mukonda tu athu a ituxi, saí ithangana tua-nda lueza. (Loma 3:23) Maji se tua te kituxi, tua tokala kulondekesa kuila tua diela o ituxi ietu, ni kubhanga ioso phala kulungulula o ukexilu uetu, ni u kale uambote.

Ihi ia bhange Jobe, Lote, ni Davidi phala kulungulula o ukexilu uâ? Mu kidi, Jobe uexile muthu ua kidi, ua iuka. Kioso Nzambi kia zuela ni Jobe, Jobe ua lungulula o ibanzelu iê, iu ua diela  mu kuzuela kia iibha kia lungu ni Nzambi. (Jobe 42:6) Mu kumona o ukexilu ua iibha ua akua Sodoma ni Ngomola, Lote ua mono o valolo ia kubelesela o itumu ia iuka ia Nzambi. O maka mê exile ngó o kulaleka kioso kia mu tendelesa o kutunda ni lusolo mu mbanza. Maji muéne ua lenge ua tundu moxi dia jimbanza jojo, iu ua bhuluka. Ni kubelesela kuoso, muéne ka tale kudima phala kumona o ima ia kexile mu xisa mu mbanza. Sumbala Davidi ua tele ituxi ia makota mu kubhukumukina o itumu ia Nzambi, muéne ua londekesa ihi ia kexile ku muxima uê, mu kudiela o ituxi ni kubhinga muloloki kua Nzambi.Jisálamu 51.

O ukexilu ua Nzambi ua kudibhana ni athu enhó, ua londekesa kuila muéne uejidile kuila ene exile akua ituxi. O Bibidia i tu tangela kuila, Nzambi “uejiia kioso kia tu sokejeka u lembalala kuma tuala tu mavu.” (Jisálamu 103:14) Mu kiki, se Nzambi uejiia kuila etu tu akua ituxi, ihi-phe i bhinga muéne ko kuetu?

Nzambi “uejiia kioso kia tu sokejeka u lembalala kuma tuala tu mavu.”Jisálamu 103:14

KIEBHI O ATHU A ITUXI KIA TENA KUSANGULUKISA NZAMBI?

O mulongi ua bhana Davidi kua mon’ê Solomá, u tu londekesa kiebhi ki tu tena kusangulukisa Nzambi. Davidi uambe: “Eie-phe mon’ami Solomá, o Nzambi ia tat’enu ua mu ijiia, mu bheze ni muxima uaiuka.” (1 Malunda 28:9) Ihi ilombolola kubheza ni muxima ua iuka? O muthu uala ni muxima ua iuka, muthu ua zolo Nzambi ni muxima uê uoso, u bhanga o vondadi iê ni kubelesela o itumu iê. Ki kilombolola kukala muthu ua kambe ituxi, maji muthu uala ni vondadi ia kusidivila Nzambi anga u xikina o ku mu bazela. O kuzola Nzambi ni kumesena ku mu belesela, kua bhangesa Nzambi kumona Jobe kála “muthu ua iuka,” ni kuixana Lote kuila “muthu ió uaiuka.” Mukonda dia kiki, Nzambi ua mono ué Davidi kála muthu mukua ‘kubhanga ngó kia iukila’ ku mesu mê. Sumbala ene a tele ituxi, maji a tenene kusangulukisa Nzambi.

O muthu uala ni muxima ua iuka, u mesena kubhanga o vondadi ia Nzambi, u sidivila Nzambi ni kubelesela kuoso

Kienhiki, se etu tuala ni ibanzelu ia iibha ki tu mesena kuila i kala ku muxima uetu, mba tua zuela kima ki tu kuatesa jisonhi, mba tua bhange kima kia tu bhangesa kudiela, tua tokala tu bhanga kála kia bhangele Jobe, Lote ni Davidi. Nzambi uejiia kuila etu ki tu tena hanji kubhanga o ima ni kuiuka kuoso. Maji muéne u mesena kuila tu mu zola ni kubhanga nguzu ia ku mu belesela. Se tu kala ni muxima ua iuka, tu tena kudielela kuila tu tena ué kusangulukisa Nzambi.