Ku bokona mu madisá

Ku bokona mu madisá

O Ukexilu Uambote ua ku Kuka

O Ukexilu Uambote ua ku Kuka

KIEBHI ki u divua kioso ki u banza mu ku kuka? Avulu kioso kia banza o maka enhá, ene a thandanganha, a kala ni hele ni ku kala ni uôma. Ene a divua kiki, mukonda o ku kuka kubhangesa o mukutu ua muthu ku zoza, o muthu u jimba o ima ni kukata kiavulu.

Maji tua tokala kuijiia kuila kala muthu uala ni ukexilu uê ua ku kuka. Amoxi a kuka ni sauidi iambote. Mukonda dia maukexilu a katunda a ku saka, a mukuá a mu tena ku disanza ni ku di langa. Mukonda dia kiki, mu jixi javulu saí athu, a mu tena ku kala dingi ku muenhu mu mivu iavulu ni ku kala ni sauidi iambote.

Maji ki kale se a mu bhita ni ibhidi ijila mu ku kuka mba kana, athu avulu a mesena ku kuka kiambote. Kiebhi kia tena kubhanga kiki? Kia dianga, phala tu tene ku bhanga kiki, tua tokala kukala ni ibanzelu iambote, kukala ni vondadi ni kuxikina kuila tua mu kuka. Phala ku tu kuatekesa mu maka enhá, tua-nda di longa itumu i tu kuatekesa.

KU DI TULULA: “Oso a di tululula, ene adimuka.” (Jisabhu 11:2) Mu maka u tua mu zuela, “oso a di tululula,” o adiakimi a mu kuka kiá, a xikina kuila ka tena dingi kubhanga o ima kala kia kexile mu i bhanga mu unzangala. Charles uala ni 93 ua tungu ku ixi ia Brazil, u xikina o kidi kiki, muéne uambe: “Se uala ku muenhu, ijiia-kiu kuma hadia ua-nda kuka. Kana-ku muthu u tena ku kala ngó sé ku kuka.”

Maji o ku di tulula, ki kulombolola kukala ni ibanzelu ia iibha kala íii: “Eme nga kuka kiá, ki ngala’mi dingi ni valolo.” O kubanza kiki, kutena kuluualesa o muthu. O divulu dia Jisabhu 24:10, dizuela: ‘Bhu kizuua kia phaxi, se u beleketa, kuabhu, ni nguzu ié i tola’. Maji o muthu u di tulula ulondekesa unjimu, u sota kubhanga o ima ia tena o kubhanga.

Corrado uala ni 77 ia mivu, ua tungu mu ixi ia Itália, ni unjimu uoso uambe: “Kioso ki u kuka, phala kusuluka eie ku tokala kubhanga dingi o ima ni lusolo.” Mu kiki, kioso o muthu kia kuka, muéne ua tokala kulungulula ima iavulu ku muenhu uê. Corrado ni muhatu uê kioso kia mu kalakala kubhata diâ, a katula ithangana phala kunhoha phala ka bhuile kiavulu. Marian uala ni 81 ia mivu ua tungu mu ixi ia Brazil, uala ué ni mulongi uambote ua lungu ni ku kuka. Muéne uambe: “Nga di longo o kulungulula o ukexilu  uami. Kioso ki nga mu kalakala, se nga mono nga bhuila, ngi katula kithangana phala kunhoha. Ngi xikama, ngi tanga mba ng’ivua muimbu. Mukonda nga mono kuila ki ngi tena kubhanga dingi o ima kála ki nga kexile mu i bhanga mu unzangala.”

Zuata ni Kilunji

ZUATA NI KILUNJI: “Ahatu a kemba ni izuatu ia fuama muthu ua sonhi, a kala jinjimu.” (1 Timote 2:9) O kizuelu “izuatu ia fuama” kilombolola kusola kiambote o izuatu. Barbara uala ni 74 kia mivu, ua tungu ku ixi ia Cánada, uambe: “Ngi sota kuzuata kiambote. Ki ngi mesena kuzuata ngó kabasa kima mukonda ‘nga kuka kiá; ki ngi di bhana dingi valolo,’ kiki kana.” Fern uala ni 91 ia mivu ua tungu ku ixi ia Brazil, uambe: “Saí ithangana ngi sumba izuatu ia ubhe mukonda kiki ki ngi bhangesa kudivua kiambote.” Abha o maiala akuka kiá? Antônio uala ni 73 kia mivu, ua tungu ku ixi ia Brazil, uambe: “Ngi sota kukala kiambote, ngi zuata izuatu ia zele, ia uabha.” Ia lungu ni kuzela, muéne uambe dingi: “Ngi zóua, ngi di bhuta o muezu izuua ioso.”

Maji ki kima kiambote kuthandanganha kiavulu ni pholo iê, kima kiambote kulondekesa “kilunji.” Bok-im uala ni 69 dia mivu ua tungu ku ixi ia Korea do sul uala ni ibanzelu iambote ia lungu ni kuzuata. Muéne uambe: “Ngejiia kuila saí izuatu i nga kexile mu i ta mu unzangala, lelu ki ngi tokala dingi ku i ta mukonda nga kuka kiá.”

Kana ku di Tata

KANA KU DI TATA: ‘Mukua hadi izuua iê ioso ia lamba ngó; uoso-phe mukua muxima ua tana ió muéne mukua ji fesa ja kal’é.’ (Jisabhu 15:15) Mu ku kuka, eie nange u divua kia iibha kioso ki u lembalala o nguzu i ua kexile na-iu mu unzangala ni ima i ua tenene o kubhanga. Ki kima kia iibha ku divua kiki. Maji kana kuehela kuila o ibanzelu íii i ku zozese. O kubanza izuua ioso mu unzangala uê, kubhangesa o izuua iê kukala ngó ia lamba, ni ku ku katula o nguzu ia kubhanga o ima i u tena hanji o kubhanga. Joseph uala ni 79 dia mivu ua tungu ku ixi ia Cánada, uambe: “Ngi sota kubhanga o ima i ngi tena o kubhanga mu veji dia kudila mukonda lelu ki nga mu tena kubhanga dingi o ima i nga kexile mu bhanga m’ukulu.”

O kutanga ni kudilonga ima ia ubhe, kutena ué ku kubhangesa kudivua kiambote ni kuijiia dingi ima iavulu ia ubhe. Mu kiki, sota kutanga ni kudilonga ima ia ubhe. Ernesto uala ni 74 kia mivu ua tungu ku ixi ia Filipinas, uene múia mu ididi ia madivulu, u sola-ku madivulu anga u a tanga. Muéne uambe: “Ngi uabhela kiavulu kutanga misoso, ni ima ia lungu ni jixi ja makanga.” Lennart uala ni 75 kia mivu ua tungu ku ixi ia Suécia, ua xikina kudilonga dimi diéngi.

Ku Uabhela Kubhana

KU UABHELA KUBHANA: “Bhanenu akuenu, enu uenu Nzambi a mi bhane.” (Luka 6:38) Sota kukatula kithangana phala kukala ni akuenu ni kua  kuatekesa. O kubhanga kiki, kia-nda ku kuatekesa kudivua kiambote ni kusanguluka. Hosa uala ni 85 kia mivu ua tungu ku ixi ia Brazil, u sota kukuatekesa akuâ sumbala kalé dingi ni nguzu iavulu ku mukutu. Muéne uambe: “Ngi xindila o makamba a mu kata, mba a luuala. Ngi a sonekena phala kua kuatekesa. Saí ithangana ngi a sumbila kima. Nga uabhela ué kulamba phala o makamba mami a mu kata.”

Kudibhana ku dibhakesa. Jan uala ni 66 ia mivu ua tungu ku ixi ia Suécia uambe: “Kioso ki u zola akuenu, ene ué a ku zola.” Mu kidi, o mukua kubhana u tambulula kiambote o athu, o athu a divua kiambote kukala ni muéne.

KALA U MUKUA NGALASA: “Uoso u kala ubheka uê, u sota ku bhanga o jivondadi jê, ka tena ku kala ni unjimu ua kidi.” (Jisabhu 18:1, NW) Sumbala saí ithangana eie u mesena kukala ubheka uê, maji kana ku dikexila ithangana ioso mba kukala sé kuzuela ni athu. Innocent uala ni 72 kia mivu ua tungu ku ixi ia Nigéria, ua uabhela kiavulu kukala kumoxi ni makamba. Muéne uambe: “Nga uabhela kukala ni athu a itala ioso.” Börje uala ni 85 kia mivu ua tungu ku ixi ia Suécia, uambe: “Ngi bhanga ioso phala kukala kumoxi ni minzangala. O nguzu iâ i ngi bhangesa kudivua kala ngi munzangala hanji—maji moxi ngó.” Kienhiki, exana makamba ku dibhata diê. Han-sik uala ni 72 kia mivu ua tungu mu ixi ia Korea do Sul uambe: “Muhatua’mi n’eme tua uabhela kiavulu kuixana o makamba metu phala tu dile kumoxi—ki kale adiakime ni minzangala.”

Kala u Mukua Ngalasa

O makamba a kidi a uabhela kiavulu kudizuelesa mudiâ. Maji mu kudizuelesa ni makamba mê, eie ué ua tokala kua evua kioso ene kia kala mu zuela. Suua akuenu. Helena uala ni 71 ia mivu ua tungu ku ixi ia Moçambique, uambe: “Eme ngi mukuá ngalasa, ngi sota kuxila o athu. Ng’ivua kioso kia mu zuela phala ngi tene kuijiia ihi iala ku mixima iâ ni ihi ia uabhela ene.” José uala ni 73 kia mivu ua tungu ku ixi ia Brazil, uambe: “O athu a uabhela kukala ni athu a a evua kioso kia mu zuela—athu evua ni henda ioso, a ximana akuâ mu kithangana kia tokala, athu a sanguluka.”

Mu kuzuela ni akuenu, ‘o kuzuela kuê ku kale kua ujitu, kuotoue ni môngua.’ (Kolose 4:6) Mu kiki, xinganeka kiambote ande dia kuzuela, zuela ima i suínisa akuenu.

SAKIDILA: “Muila ue ni kusakidila.” (Kolose 3:15) Kioso kia ku kuatekesa, kima kiambote kusakidila. O kusakidila ku tu kuatekesa kukala ni makamba a kidi. Marie-Paule uala ni 74 kia mivu ua tungu ku ixi ia Cánada, uambe: “Muadi uami n’eme, tuai mu tunga kididi kiéngi. Makamba avulu eza mu tu kuatekesa. Ki tuejidile kiebhi ki tueji kua sakidila. Tua a sonekena mikanda mu ku a sakidila mu ioso ia tu bhange, a mukuá tu a exana phala tu dile kumoxi.” Jae-won uala ni 76 ia mivu ua tungu ku ixi ia Korea do Sul u sakidila o jiphange ene ku muambata mu dikalu diâ katé mu Kididi kia Ubhezelu. Muéne uambe: “Ngi sakidila kiavulu, ngi bhana tu itadi phala kukuatekesa mu kusumba o ngazolina. Saí ithangana ngi a sumbila ima ni kua sonekena mikanda ia ku a sakidila.”

Ku ima ioso, ua tokala u sakidila o ujitu ua muenhu. O njimu Sobha Solomá u tu tangela: “Kota o ímbua iala ni muenhu, kuindi o hoji ia fu kiá.” (Ndongixi 9:4) Mu kidi, o kukala ni ibanzelu iambote ni kuxikina kuila ua mu kuka, kutena kukuatekesa o muthu ku kuka kiambote.

Sakidila