Ku bokona mu madisá

Ku bokona mu madisá

O Kristu ia Makutu Nanhi?

O Kristu ia Makutu Nanhi?

Mu izuua íii a bhange filimi iala ni diambu Antichrist (Kristu ia makutu).

Saí kibuka kia kuimba, o dilonga diâ a di ixana Antichrist Superstar (Kristu ia makutu ia fuma).

O ngijiie Friedrich Nietzsche, ku hama ia 19, o divulu diê ua dixana The Antichrist (o kristu ia makutu).

Jisobha ni jinguvulu mukulu akexile mu kuixana o jinguma jâ ji kristu ja makutu.

Martin Luther, mukua Alemanhã ua bhilukile o ngeleja ia Katolika, uambe kuila o ji papa exile ji kiristu ja makutu.

KUMA o kizuelu “kristu ia makutu,” tundé ukulu kiene mu moneka mu ima ia jinguvulu ni mu jifilimi, mukonda dia kiki ku moneka o kibhuidisu kiki: O Kristu ia makutu nanhi? O kuila o kizuelu kiki kia lungu ni izuua ietu? Sé phata, o kididi kia fuama ku sota-mu o kristu ia makutu, o Bibidia, mu tu sanga o kizuelu kiki veji jitanu.

O KRISTU IA MAKUTU A MU LONDEKESA

Musoneki umoxi ngó ua Bibidia ua tumbula o kizuelu “kristu ia makutu,” o musoneki iú, poxolo Nzuá. Kiebhi muéne kia jimbulula o kristu ia makutu? Tanga o izuelu iii i tu sanga mu divulu diambata o dijina diê: “Enu tuana tuami, kumb’idi diene dia sukidila-ku. O ki muevu’okio, kuila hinu kuiza Kristu ia makutu, kiene kiabhu’iki. Kuma kiki kueza kiá jikristu javulu ja makutu, kiene ki tua k’ijidila kuila o kumb’idi diene kiá dia sukidila-ku, o dizubhilu dia zukama. Ni kidi, athu enhó a di katula mudietu, mukonda ene ka tu tokala . . . O mukua makutu-phe, nanhi? Oko muenhó uoso u dituna kuma Jezú ki muene Kristu. Muene o Kristu ia mukutu, mukonda muène u dituna ni Tata ni Mona.”1 Nzuá 2:18, 19, 22

O poxolo Nzuá ua londekesa kuila o kristu ia makutu, o athu oso ene mu tanga makutu ia lungu ni Jezú Kristu, ni ilongesu iê

Ihi i tu longa o izuelu íii? Kioso Nzuá kia tumbula “jikristu javulu ja makutu,” kia londekesa kuila o kristu ia makutu ki muthu umoxi, maji kibuka kia athu. O athu mba isangela alombolola o kristu ia makutu, a zuela makutu, a dituna kuila Jezú muéne Kristu mba Mexiia, a longa makutu a lungu ni Nzambi, ni Mon’ê Jezú Kristu. O athu enhá a di bhangesa kristu, amba kuila ene o Kristu ia kidi, mba eza mu dijina diê. Maji mukonda “athu enhó a di katula mudietu,” ene a xisa o milongi ia kidi ia Bibidia. O athu enhá akexile kiá mu izuua ia poxolo Nzuá, kioso kia soneka ‘o kumb’idi dia sukidila-ku,’ nange o disukilu dia jipoxolo.

Nzuá ua soneka dingi ihi ia lungu ni kristu ia makutu? Mu kuzuela ia lungu ni jipolofeta ja makutu, muéne ua dimuna: “Uoso u tanga kuma Jezú Kristu ueza mu mukutu ua xitu, ió uala ni Nzumbi ia tundu kua Nzambi. Maji o uoso u kamba kutanga kiki kua Jezú, kala ni Nzumbi ia tundu kua Nzambi. Ioio iene o nzumbi ia tundu kua Nguma ia Kristu. Enu muevu kuila o iene hadia iza, kindala ieza-phe kiá mu ngongo.” (1 Nzuá 4:2, 3) Mu mukanda uê ua kaiadi Nzuá uambe dingi: “Kuma mu ngongo mua tukuluka axombi avulu. Athu a kamba kufisala kuila Jezú Kristu uejile ni mukutu ua xitu. Muthu u bhanga kiki, muxombi, muen’ió Nguma ia Kristu.” (2 Nzuá 7) Sé phata Nzuá uejidile kuila o nguma ia Kristu o athu a muanga makutu a lungu ni Jezú kristu ni ilongesu iê.

“JIPOLOFETA JA MAKUTU” NI “MUTHU UA KISUEIA”

Jezú ua dimuna kuila o jipolofeta ja makutu jeji kuíza kála ‘jimbudi manhi jimbinji’

Ande dia Nzuá, ku soneka ia lungu ni akua ku nganala, Jezú Kristu ua dimuna o akaied’ê: “Dimukinenu o jipolofeta ja makutu, a mi kana mu izuatu ia jimbudi, maji moxi diâ-phe ala jimbinji jahame.” (Matesu 7:15) O poxolo Phaulu ua tendelesa o Jikidistá mu Tesalonika: “Ki bhu kale muthu u mi nganala kioso-kioso. Mukonda kizuu’okio ki kiza luua, kikale ku dianga hanji kubhita o thembu ia athu kubaluka, a balukila Nzambi, o muthu ua Kisueia, n’a kà tukuluke, o mona kibuika io a mu elesela kuia [ku-alunga]”2 Tesalonika 2:3.

Mukonda dia kiki o jipolofeta ja makutu ni akua ku lungulula o kidi ku hama ia dianga, akexile kiá mu bhangesa o jiphange mu kilunga mu kilunga, ku zoza mu nzumbi. Athu oso akexile mu tanga makutu ni kulonga ilongesu ia makutu ia lungu ni Jezú Kristu, o athu enhá “jikristu ja makutu.” O kibanzelu kia Jihova kia lungu ni athu enhá a ki tukulula kioso kia exana Phaulu “o mona kibuika.”

DILANGE KU IBHANGELU IA KRISTU IA MAKUTU

Ihi ia mu bhita lelu? Saí athu ni isangela lelu a di bhanga o kristu ia makutu ene mu bhilukila o Kristu ia kidi ni ilongesu iê. Ene a tanga makutu ni ku nganala athu, phala o athu kejiie o kidi kia lungu ni Tata Jihova Nzambi, ni mona Jezú Kristu. Ki tuala ni phata kuila o jingeleja jene mu nganala o athu. Tu di longe phangu jiiadi.

Mu hama ia mivu o jingeleja jene mu longa kuila o tata ni mona, athu kiiadi ku muthu umoxi. O kristu ia makutu u sueka o kidi kia lungu ni Jihova Nzambi ni Jezú Kristu. O kusueka o kidi kiki, ki fidisa o athu ku kaiela o phangu ia Jezú Kristu, ni ku zukama kua Nzambi, kala kia a suínisa mu Bibidia.1 Kolindo 11:1; Tiiaku 4:8.

O jingeleja ué jene mu sueka o kidi kia Nzambi, mu ku bhangesa o athu ku tanga o Bibidia ja lungulula mua katula o dijina dia tokala kua Nzambi, Jihova. Sumbala kioso kia dianga ku soneka o Bibidia o dijina dia Jihova dia moneka 7.000 ja jiveji. Mukonda dia kiki ihi ia bhiti? Lelu athu avulu ala mua vundu kejiia se Nzambi nanhi.

Maji o kuijiia o dijina dia Nzambi Jihova, kua mu kuatekesa athu ku mu bheza ni ku mu zukama. Kiene kia bhiti ni Richard, ua dikundile ni Jimbangi jiiadi ja Jihova. Richard uambe: “Ene a ngi londekesa mu Bibidia kuila o dijina dia kidi dia Nzambi, Jihova. Nga sangulukile kiavulu mu kuijiia o kidi kuila Nzambi uala ni dijina, ki ngi kijidile nuka nga kivuile.” Tunde o kithangana kieniókio, muéne ua lungulula o muenhu uê, mu ku belesela o itumu ia Bibidia, ni ku bheza Jihova. “O ku dilonga o dijina dia Nzambi kua ngi kuatekesa ku zukama kua Nzambi ni ku mu bheza.”

O kristu ia makutu uene mu ta o athu mua vundu mu hama ja mivu. Maji o ku dilonga o Mak’â Nzambi, o Bibidia, tu tena kuijiia se o kristu ia makutu nanhi, ni ku kala dikanga dia jingeleja ja makutu jene mu nganala.Nzuá 17:17.