Ku bokona mu madisá

Ku bokona mu madisá

 DIAMBU DIA KAPA | O UTUMINU UA NZAMBI—ULOMBOLOLA IHI PHALA EIE?

O Utuminu ua Nzambi—Ulombolola Ihi Phala Jezú

O Utuminu ua Nzambi—Ulombolola Ihi Phala Jezú

Kioso kia kexile mu ixi, Jezú ua zuela maka avulu. Mu kifika, muéne ua longo o akaiedi’ê o ku samba, ku bhanga o vondadi ia Nzambi, ni kiebhi kia sanga o ku zediua kua kidi. (Matesu 6:5-13; Marku 12:17; Luka 11:28) Maji o kima kia betele o kuzuela ni athu—kia betele o ku uabha ku muxima uê—o Utuminu ua Nzambi.Luka 6:45.

Kala ki tua mono kiá ku milongi ia bhiti, Jezú ua tele ku pholo o kikalakalu kia “ku boka ni kutula o Njimbu Iambote ia Utuminu ua Nzambi.” (Luka 8:1) Muéne ua kexile mu kuenda njila ja lebha mu ixi ia Izalaiele mu ku longa o athu o Utuminu ua Nzambi. O ukunji ua Jezú a u soneka mu divulu dia Matesu, Marku, Luka ni Nzuá, mu tu sanga 100 a ji veji ndenge o kizuelu Utuminu. Jezú muéne ua beta o ku tumbula o kizuelu kiki, maji né kiki o asoneki ka soneka ioso ia zuela muéne ia lungu ni Utuminu ua Nzambi!Nzuá 21:25.

Mukonda diahi o Utuminu ua Nzambi ua kexile ni valolo ia dikota phala Jezú kioso kia kexile mu ixi? Mukonda Jezú uejidile kuila Nzambi ua mu solele ku kala Sobha ia Utuminu uê. (Izaia 9:6; Luka 22:28-30) Maji Jezú ka kexile mu sota unéne mba fuma phala muéne. (Matesu 11:29; Marku 10:17, 18) Muéne ka fumanesa o Utuminu ua Nzambi phala o mbote iê-muene, kana. Maji Jezú ua bhanene valolo ku Utuminu ua Nzambi katé ni lelu ua mu u bhana hanji valolo, * mukonda dia ima ia-nda bhanga o Utuminu iú kua ió a a zolo kua Jezú—Tat’ê ia diulu ni akaiedi’ê a fiiele.

IHI IA-NDA BHANGA O UTUMINU UA NZAMBI KUA TATA IA JEZÚ

Jezú ua zolo kiavulu Tat’ê ia diulu. (Jisabhu 8:30; Nzuá 14:31) Muéne u ximana kiavulu o ídifua ia Tat’ê, kála o henda ni kuiuka Kuê. (Matendelelu 32:4; Izaia 49:15; 1 Nzuá 4:8) Sé phata, Jezú ua iibhila kiavulu o makutu a ta o athu kua Nzambi, kuila muéne ka zolo o athu ni kuila ua mesena kuila etu tu tala hadi. Kiki kiene kia bhangesa Jezú ku boka o “Maka ma utuminu ua Nzambi”—muéne uejidile kuila ku hádia o Utuminu iú ueji zelesa o dijina dia Tat’ê. (Matesu 4:23; 6:9, 10) Kiebhi kia-nda bhanga kiki?

Bhu kaxi ka Utuminu, Jihova ua-nda lungulula o ima ni ku bheka mabesá ku athu mu ixi. “Muène u . . . kondona o masoxi moso” ku mesu ma athu a fiiele. Jihova ua-nda zubha o ima i didisa o athu. O Bibidia i zuela: “Ki ku kala dingi kùfua, nè ngó mukôndo, mba kudila, mba kukata.” (Dijingunuinu 21:3, 4) Bhu kaxi ka Utuminu, Nzambi ua-nda zubha o hadi ioso muene mu bhita o athu. *

 Kiki kiene kia bhangesa Jezú ku mesena ku tangela o athu o njimbu iambote ia Utuminu! Muéne uejidile kuila o Utuminu ueji londekesa o unéne ni henda ia Tat’ê. (Tiiaku 5:11) Jezú uejidile kuila o Utuminu ueji bheka ué mabesá ku athu a bheza Nzambi.

IHI IA-NDA BHANGA O UTUMINU UA NZAMBI KU ATHU

Ande dia Jezú kuíza mu ixi, muéne ua kexile ni Tat’ê ku diulu. O Tata ua tumu o mona ku bhanga o ima ia mukuá kála o diulu ni jithéthembua, o ixi ni iama. (Kolose 1:15, 16) Maji ku ima ioso íii, Jezú ua betele ku zola o athu.Jisabhu 8:31.

O henda ku athu iene ia bhangesa Jezú o ku boka. Tundé ku dimatekenu, muéne ua londekesa kuila, uejile mu ixi phala ‘ku tula o Njimbu Iambote’ kua ió a bhindamene. (Luka 4:18) Maji Jezú ka zuelele ngó ia lungu ni ku kuatekesa o athu. Mu veji javulu, muéne ua londekesa kuila ua zolele kiavulu o athu. Mu kifika, kioso kifuxi kia dikota kiéza kua muéne, Jezú “u a kuatela henda, hé u saka o jihaxi jâ.” (Matesu 14:14) Kioso diiala dia kexile ni uhaxi ua dibhute, ua londekesa o kixikanu kiê kua Jezú kuila se ua mesenene ueji mu saka. Jezú henda ia mu kuata. Muéne ua sake o diiala iu ua mu ambela ni henda ioso: “Nga mesena muene, disanze.” (Luka 5:12, 13) Kioso Jezú kia mono kamba diê, Madiia, ua kexile mu dila o kufua kua phang’ê Lázalu, Jezú “u kumba ku muxima uê, malamba a mu kuata,” “anga u dila.” (Nzuá 11:32-36) Muéne anga u bhanga madiuanu—ua fukununa Lázalu sumbala ua kexile kiá izuua iuana mu mbila!Nzuá 11:38-44.

Sé phata, Jezú uejidile kuila o kikuatekesu kia kexile mu bhana muéne, ki kieji nangenena. Muéne uejidile kuila, athu oso a a sakele, eji kata dingi; athu oso ua a fukunuine eji kufua dingi. Maji Jezú uejidile ué kuila o Utuminu ua Nzambi ueji zubha o maka oso mu ngongo. Kiki kiene kia bhangesa kuila Jezú mu veji dia ku bhanga ngó madiuanu, muéne ni ku suína kuoso ua boko ué o “Maka ma Utuminu.” (Matesu 9:35) O madiuanu a bhangele muéne mu ixi, alondekesa o ima ia-nda bhanga o Utuminu ua Nzambi mu ixi ioso ku hádia. Tala o ima i tanga o Bibidia kuila ia-nda bhita ku hádia.

  •  Ki kua-nda kala dingi ku kata.

    “Bhenhobho-phe o mesu a ifofo a kà jikuka, ni matuí a maxilu a kà xitunuka. Kizuu’okio-phe, inema ia kà tuka-tuka, kala jimbambi; o dimi dia mabubu dia k’emba.” O Bibidia i zuela ué, ‘ki bhua kà kala mukua bhata uila: ‘nga mu kata, lembua.’’Izaia 33:24; 35:5, 6.

  • Ki kua-nda kala dingi ku fua.

    “Ixi-phe i xalela ku athu iá aiuka, ene a i lundula, muene mua tunga, o thembu iâ ki ibhu.”Jisálamu 37:29.

    “O kalunga ua kà ka bhuisa-ku muene nzaká, kienhiki Jihova ua kà kondona o masoxi mu pholo joso.”Izaia 25:8.

  • Oso afu a kà vutuka ku muenhu.

    “Oso ala mu jimbila [a-nda] kuívua o dízui diê, ni kutunda-mu.”Nzuá 5:28, 29.

    “Kuma hádia ku kala difukunukinu.”Ikalakalu 24:15.

  • Ki kua-nda kamba jinzo ni salu.

    “Ene-phe a kà tunga jinzo, anga a kala-mu; a kà dima milenga ia mivide, anga a kà dia idima iê. Ene ka kà tunga phala akuâ engi kukala-mu; ka kà phapha phala athu engi ku i dia. . . . athu’ami ósole a kà kemba ni ikalakalu ia maku mâ katé mu ukukilu.”Izaia 65:21, 22.

  •  Ki kua-nda kala dingi ita.

    ‘Ita ua i sukisa katé ku maxokololo a ixi.’Jisálamu 46:9.

    “Ki bhua ka kà kala dingi ku-di-zengela jixibhata kifuxi ni kifuxi, né ku di-longa dingi kúlua ita.”Izaia 2:4.

  • Ki kua-nda kala dingi nzala.

    “Phala o mavu ende ni ku bhana dingi o idima iê; o Nzambi, Nzambi ietu muene, a tu bhane o kuzediua.”Jisálamu 67:6.

    “Mu ngongo mu kale nzungule ia masa katé ku thandu dia milundu.”Jisálamu 72:16.

  • Ki kua-nda kala dingi uadiama.

    ‘O ngadiama ua tate, ka-nda mu jimba.’Jisálamu 9:18.

    “Kuma muéne u bhindumuna o phulungu kioso kia dikola; ni ngadiama, ni uoso ua kambe o dilemba di mu kuatekesa. U lendukila o ngadiama ni phulungu ua bhondalala, u kala kibhuamuenhu kia iá atate.”Jisálamu 72:12, 13.

Mu ku xinganeka ku ikanenu íii ia lungu ni Utuminu ua Nzambi, o kuila u tena ku mona se mukonda diahi uene uala ni valolo ia dikota phala Jezú? Kioso kia kexile mu ixi, muéne ua kexile polondo phala kuzuela ia lungu ni Utuminu ua Nzambi ni muthu uoso-uoso ua mesenene ku muivua, mukonda muéne uejidile kuila o Utuminu ua-nda zubha o jiphaxi ji tu bhita na-ju lelu.

O kuila seua uabhela o mabesá a-nda bheka o Utuminu ua Nzambi? Se kiene, kiebhi ki u tena ku di longa dingi ia lungu ni Utuminu iú? Ihi i ua tokala o ku bhanga phala u lundule o mabesá enhá? O mbandu ia sukina ku milongi íii, ia-nda tambuijila o ibhuidisu íii.

^ kax. 5 O milongi íii ilondekesa o ibanzelu ia Jezú lelu, mukonda Jezú uala ku diulu ni kuila kioso muéne kia vutuka ku diulu, sé phata ua beta ku uabhela o Utuminu.Luka 24:51.

^ kax. 8 Phala kuijiia dingi se mukonda diahi Nzambi uehela o hadi, tanga o kibatulu kia 11 mu divulu, Mu Kidi Ihi i Longa o Bibidia? a di bhange ku Jimbangi ja Jihova. A tena ué ku di katula mu, www.jw.org/kmb.