Ku bokona mu madisá

Ku bokona mu madisá

Kiebhi ki u Tena ku Longa An’ê?

Kiebhi ki u Tena ku Longa An’ê?

“Nga kexile mu kuívua o jibuia ja makalu moso a kexile mu bhita. Kiexile kiá o veji ia katatu ia lalekele Jordan ku bhixila ku bhata. Eme nge bhuidisa: ‘Muéne uala kuebhi?’ ‘O kuila muéne ua di te mu jinvunda? O kuila muéne uejiia kuila tua thandanganha kiavulu?’ Kioso kia bhixila, ng’edile kala muthu ua-nda baza ni njinda.”GEORGE.

“Mon’ami ua muhatu ua dikola eme nga thandanganha kiavulu. Nga bhiluka nga mu mono ua kexile mu dila. Mukonda o phang’ê ua kexile ni mivu iuana, ua mu betele.”NICOLE.

“Mon’etu Natalie uala ni mivu isamanu uambe kala ka bhange kima, uixi: ‘Ki ngi nhana o nela. Nga i bongo. Mukonda dia ku dituna kuê, tua mateka o ku dila. Mukonda tuejidile kuila muéne ua kexile mu tanga makutu.”STEPHEN.

EIE U tata, ua divuile kiá kála o jitata jiji? Kioso ki u bhita mu maka enhá, eie u di bhuidisa kiebhi ki ua tokala ku longa mon’ê? O kuila kima kia iibha ku longa o tuana?

O KU LONGA IHI?

Mu Bibidia o kizuelu ‘ku longa,’ ki kilombolola ku kaxtikala muthu. O ku longa, kulombolola ku bhana milongi, kilunji ni ku bazela. Ki kulombolola ku kaxtikala muthu kana.—Jisabhu 4:1, 2.

O milongi i bhana o jitata ia difu ni kikalakalu ki bhanga o mukuni ua muxi. O mukuni u iudika o mavu, u ta o menha ku muxi ni ku u sonzola. Kioso kiia ni ku kula o muxi, nange ku bhinga kuila o mukuni u batula o jithangu ji moneka, phala ku kula kiambote. O mukuni uejiia kuila o ku bhanga o ima íii ia-nda kuatekesa o muxi ku kula kiambote. Kiene kimoxi ué ni jitata, a langa o tuana tuâ mu maukexilu avulu. Maji saí bhabha a tokala ku bazela o tuana—kia difu ni ku batula o jithangu ku muxi, mu ku bhanga kiki, a mu batula o ifua ia iibha ia tuana, ni ku a kuatekesa ku kula kiambote. Maji o muxi a tokala ku u batula kiambote o jithangu, se kiki ka ki bhange, o muxi ki ua-nda kula kiambote. Kiene kimoxi ué, o jitata a tokala ku bazela o tuana ni henda.

Jihova u bhana phangu iambote ku jitata ia lungu ni ku longa. O milongi i bhana Jihova ku jiselevende jê ja belesela, milongi iambote i bhangesa kuila ene a ‘uabhela o ku a longa.’ (Jisabhu 12:1) Ene ‘keha o ulongelu.’ (Jisabhu 4:13) Eie u tena ku kuatekesa mon’ê ku xikina o milongi se u kaiela Nzambi mu maukexilu atatu: (1) o ku longa ni henda, (2) ku longa mu  kizongelu kia fuama, (3) ku kala muthu ua kidi mu ku longa.

KU LONGA NI HENDA

O henda ia Nzambi iene i mu bhangesa ku tu bhana milongi. O Bibidia i zuela: “Kuma Ngana, uoso ua mu zola u mu longa; mukua ni tata kia longa mona uoso’a mu indila kumona mbote.” (Jisabhu 3:12) Jihova ué, “Nzambi ia jihenda, ua lenduka, u kokoloka mu ku kuatela njinda.” (Makatukilu 34:6, NW) Mukonda dia kiki, Jihova ka kaxtikala muthu. Mu kanu diê ki mu tunda ué izuelu ia iibha, ku tatela, mba ku xinga, mukonda ima íii, i tena ku kuama “kala jiphondo ja xibhata.”—Jisabhu 12:18.

IVUA

Tuejiia kuila, o jitata ka tena ku kaiela ni ku iuka kuoso o phangu ia Jihova, ia ku tululuka. Sai ithangana, ki bhonza o ku tululuka, maji ua tokala kuijiia kuila o ku kaxtikala mona mukonda uala ni njinda ki luualesa o mona, ki mu fidisa ku katula-ku mbote. O ku kaxtikala ué o mona mukonda dia njinda ki ukexilu uambote ua ku mu longa. Kulondekesa ku kamba ku tululuka.

Maji kioso ki u longa ni henda ni ku tululuka, o mon’a ua-nda kuívua. Talesa kiebhi George ni Nicole, o jitata ji tua tange ku dimatekenu, kia di bhana ni maka enhá.

SAMBA

“Kioso Jordan kia bhixila, eme ni muhatu’ami tuedile kala tua-nda baza ni njinda, maji tua tululukile, etu tua muívu kioso kia kexile mu zuela. Mukonda kiexile kia tádidi tua xisa o maka phala o kizuua kiéngi. Tua sambe kumoxi, etu tuai mu zeka. Kioso ki kuáki, tua tululukile phala kuzuela ni mon’a, ni ku mu kuatekesa ku sunga kilunji. Muéne ua xikina o milongi i tua mu bhana, iu ua xikina o kaxtiku. Tua mono kuila o ku bazela mukonda tua luuala, ki ku kuatekesa o mon’a. Kioso ki tu dianga o kuívua, o mona u tuívua ué kiambote.”George.

ZUELA

“Nga sasumuka kioso ki nga mono kuila mona’mi ua betele ndeng’ê. Mu veji dia ku mu beta mu kithangana kieniókio, nga mu jikila mu dixilu diê, mukonda nga kexile ni njinda iavulu. Kioso ki nga tululuka, nga mu jimbulula kuila ki kima kiambote ku beta, nga mu londekesa kiebhi kia kuamene phang’ê. Kiki kia mu kuatekesa kiavulu. Muéne ua bhingi muloloke kua phang’e iu ua mu bhabhe.”Nicole.

 O ku longa né muene se ku bhinga ku bhana kaxtiku, a tokala ku u bhana ni henda.

KU LONGA MU KIZONGELU KIA FUAMA

Jihova uene mu bhana o milongi iê “mu kizongelu kia tokala.” (Jelemiia 30:11; 46:28) Muéne u sota kuijiia o ima ioso ia lungu ni maka. Kiebhi o jitata a tena ué o ku kaiela o phangu iê? Stephen tua mu tange kiá ku dimatekenu, u zuela: Sumbala nga luualele, ki ngejidile se mukonda diahi Natalie ua kexile mu dituna kuila ka nhanene o nela, maji tua xinganeka o kitala kiê, ni kilunji kiê.”

O muadi ua Nicole, Robert, u xinganeka ué o ukexilu ua tuana. Kioso o ana kia bhanga ima ki i tokala, muéne u dibhuidisa: ‘O kuila íii o veji ia dianga, inga uene mu ki bhanga kiá? O mon’a ua bhuila, mba ka mu divua kiambote? O kuila mukonda ua bhiti mu ibhidi?’

O jitata ja tululuka ejiia ué kuila o tuana, ana-ndenge hanji. O poxolo Phaulu uejidile o kidi kiki, iu ua soneka: “Ki nga kexile ngi mon’a ndenge, ngi zuela kia undenge, ngi xinganeka kia undenge, ngi fika kia undenge.” (1 Kolindo 13:11) Robert uambe: “O kima kiene mu ngi kuatekesa ku xinganeka kiambote ande dia ku bhanga kima, o ku xinganeka o ima i nga kexile mu bhanga kioso ki ng’exile ngi mona ndenge.”

Kana ku kingila ima iavulu, maji kana kuehela ué o tuana ku bhanga ioso ia mesena mukonda ana-ndenge. Mu kuijiia o uhete ua mon’ê, ni ima ka tena ku i bhanga, ni kitala kiê, eie ua-nda longa ni henda ni ku tululuka.

KU KALA MUTHU UA KIDI MU KU LONGA

O divulu dia Malakiia 3:6 di zuela: ‘Eme Jihova, ki ngi lunguluka.’ O jiselevende ja Nzambi a dielela mu kidi kiki. O tuana ué a bhingi ku a longa ni kidi. Se o itumu iê u i lungulula, kioso ki u luuala mba ki u sanguluka, o mon’ê ka-nda kuijiia ihi ia uabhela o tata.

Lembalala o izuelu ia Jezú: “O kudikunda kuenu-phe ku kale kua kuila: Kiene, kiene; kana, kana.” O izuelu íii i fuama ué ku jitata. (Matesu 5:37) Xinganeka kiambote ande dia ku bhana kitumu, sota kuijiia hanji se ua-nda ki kumbidila muene. Se uambela mon’ê kuila ua-nda mu kaxtikala se muéne ka belesela, bhanga-kiu muene kala ki ua mu tangela.

Se o jitata a di zuelesa kiambote mudiâ, o ku longa kua-nda kala kua kidi. Robert u jimbulula: “Se mon’etu u ngi bhinga kima kia ditunu kiá o manh’â, eme ué ngi dituna.” Se o jitata ka kala ni ibanzelu imoxi ia ku batula maka, ka tokala kuzuela bhu pholo dia ana, a tokala ku di kunda o maka mu kasuekelu.

KIMA KIAMBOTE KU LONGA O TUANA

Se u kaiela Jihova mu ku longa ni henda, ku tululuka ni kidi kioso, ijiia kuila an’ê a-nda katula mbote iavulu. O ku longa an’ê ni henda, kua-nda ku a kuatekesa ku sunga kilunji, ni ku dimuka. O Bibidia izuela: “Longa mona-ndenge mu njila ioso ia tokala o kuendela; katé kieza mu ku kuka, ka xikina ku i xisa, lémbue.”Jisabhu 22:6.