Ku bokona mu madisá

Ku bokona mu madisá

 DIAMBU DIA KAPA

O Kuila Saí Muthu u Tena Kuijiia o Ima Ia-nda Bhita ku Hádia?

O Kuila Saí Muthu u Tena Kuijiia o Ima Ia-nda Bhita ku Hádia?

Etu oso tu xinganeka ihi ia-nda bhita ni muenhu uetu ku hádia. Tu dibhuidisa kiebhi kia-nda kala o muenhu uetu ni ua jindandu jetu. Tu bhanga ibhuidisu kala íii: “O kuila an’ami a-nda tunga mu ixi iambote?” “O kuila o ixi a-nda i buikisa ku mavuua?” “O kuila saí kima ki nga tokala o ku bhanga phala ngi kale ni muenhu uambote ku hádia?” A tu bhange ni ukexilu ua ku bhanga o ibhuidisu íii mukonda tua mesena ku tunga ni ku kondama ni ku zediua. Se ua kexile ni kutena kua kuijiia o ima ia-nda bhita ku hádia, ueji tena ku di sokejeka kiambote ki kale mu nzumbi mba mu xitu.

Kienhiki, ihi ia-nda bhita n’eie ku hádia? O kuila u tena kuijiia? Saí ithangana, o jingijiie ene mu fikisa ku zambula o ima ia-nda bhita ku hádia, ene mu di tunda kiambote maji mu ithangana iavulu kene ué mu tena. Maji ene mu zuela kuila Nzambi u tena kuzuela o ima ia-nda bhita ku hádia ni kidi kioso. O Maka mê a zuela: “Ngi mukua kutanga o dizubhilu tundé kiá bhu dimatekenu, tundé mu xiahulu muná ngi tanga ima kiluua iiza-ku.” (Izaia 46:10) O kuila muéne uene mu di tunda kiambote mu ukexilu iú?

O IKANENU IA NZAMBI IA KIDI

Mukonda diahi ua tokala ku kala ni vondadi ia kuijiia kiebhi o ima ia kanene Nzambi kia di kumbidila m’ukulu? Se ua sangele muthu u tanga ni kidi kioso o izuua ia-nda noka mba ia-nda tema ni kuila i bhita muene kala kia tange muéne, eie kueji diuana kiavulu? Nange ueji kuata ku mu ivuidila kiambote kioso kia mu tanga kiebhi kia-nda kala o dikumbi mungu. Kiene kimoxi ué, se u di longa kuila  Nzambi ua tange ima iavulu ia dikumbidila kiá ni kidi kioso, ua-nda mesena kuijiia ihi ia tange muéne ia lungu ni muenhu uê ku hádia.

Lumbu ia mbanza iokulu ia Ninive

O KIBUIKILU KIA KIFUXI KIA DIKOTA:

Mu kifika, kima kia dikota ku tanga ni kidi kioso kuila o mbanza ionene ia beta ku tunda o mbanza joso ku hama ja mivu, a-nda i buika. Bhu kaxi ka mukunji uê, Nzambi ua tange o kizulukutu kiki—o kibuikilu kia mbanza ia Ninive. (Sofoniia 2:13-15) Ihi i tu sanga mu madivulu a mundu a lungu ni maka enhá? Ku hama ia kasambuadi A.K.K., nange kioso kia bhiti 15 dia mivu tundé kia kanene o kibuikilu, o Akua Babilonha ni akua Medo a bokona mu mbanza ia Ninive ia a i buikisa. Nzambi ua tangele ni kithangana kia soko kuila o mbanza ia Ninive ieji “xala ngundu, u kituka ixi ia kukuta mukuâ ni kikangalakata.” O kikanenu kiki, o kuila kia di kumbidila? Kiene, kia dikumbidila. Sumbala Ninive iexile mbanza ia dikota, ia kexile ni 518 a ji kilómetulu, akua Babilonha ni akua Medo, ka i tambula ni ku bhanga-mu mauenji kala kia fikile o athu. Mu veji dia kiki, ene a i buikisa ni ku i kitila kikangalakata kia hatu. O kuila saí muthu mukua ku tokuesa, ueji tena ku tanga ni kidi kioso o izulukutu íii?

O IFUBA IA ATHU A-NDA I IOHA:

Nanhi ueji kala ni nguzu ia kuzuela kiki—300 ja mivu ande dia kikanenu kiki ku dikumbidila—a zuelele kiá o dijina ni jikuku ja muthu iú ueji kuoha o ifuba ia athu ku thandu dia kalatódio ni dijina dia mbanza mueji kala o kalatódio kaka? Se o kikanenu kiki ki di kumbidila, o muthu ua ki tange ueji kala ni fuma iavulu. O mukunji ua Nzambi ua zuela: ‘M’onzo ia Davidi, a kà vuala-mu mona ua diiala ua ka kala ni dijina diê Joziia, ua-nda kuoha o ifuba ia athu’ ku thandu dia kalatódio ka kexile mu mbanza ia Betele. (1 Jisobha 13:1, 2) Mu ku bhita hama jitatu ja mivu, ku muiji ua Davidi a vuala-ku sobha dijina diê Joziia—ki dijina dioso-dioso kana. Kala kia ki tangele, Joziia “ua mono o jimbila ja kexile bhenbhobho ku mulundu, iu ua tumu kufukununa o ifuba iala-mu hé u i ohela ku thandu’a kalatódio” ka kexile mu mbanza ia Betele. (2 Jisobha 23:14-16) Muthu uebhi ueji tena  kuzuela ni kidi kioso o izulukutu ieji bhita ku hádia sé o kikuatekesu kia nzumbi ia Nzambi?

O ji polofeta ja Nzambi a tange ni kidi kioso kuila o mbanza ia Babilonha eji i buikisa

O DIZUBHILU DIA BABILONHA:

Kieji kala kima kia dikota muthu ku tanga ni kidi kioso o dijina dia diiala—mivu iavulu ande dia diiala didi ku mu vuala—ihi ieji bhanga muéne phala ku buikisa o mbanza ia dikota. Nzambi ua tangele kuila diiala dijina diê Silu dieji buikisa mbanza. O diiala didi, Silu, dieji bhulula ué o Jijudé akexile abhika ni ku kuatekesa o kikalakalu kia ku tunga o tembulu ia Nzambi. Nzambi ua zuelele ué kiebhi Silu kieji kukutisa o menha a jingiji iu ua tangele ué kuila o mabhitu a mbanza keji ku a jika, mukonda dia kiki Silu ni masoladi mê eji bokona sé kibhidi kioso-kioso. (Izaia 44:27–45:2) O kuila kia bhiti muene kala kia xindile Nzambi? Akua misoso a xikina kuila Silu ua bhange muene kala kia ki xindile. O masoladi a Silu ni uhete uoso a kukutisa o menha a ngiji ia dikota ia bhitile ku mbanza ia Babilonha. O masoladi a Silu a bhiti mu mabhitu enhá a kambele ku a jika. Kienhiki, Silu ua bhulula o Jijudé exile abhika ni ku a tumina ku tunga dingi o tembulu iâ mu mbanza ia Jeluzaleme. Iá exile madiuanu mukonda Silu kexile mu bheza o Nzambi ia Jijudé. (Ejidala 1:1-3) Muthu uebhi ueji tena ku tanga ni kidi kioso o izulukutu ioso íii ni ku bhita kala kia ki tange?

Tua di longo misoso itatu ia londekesa kuila Nzambi uala ni ku tena kua ku tanga o ima ia-nda bhita ku hádia ni ku i kumbidila. Ki iene ngó íii kana. O mutuameni Josuué ua zuelele kima kia dikota bhu pholo ia mundu uavulu: “Enu-phe mua k’ijiia ni muxima uenu uoso, ni muenhu uenu uoso, kuila ima ioso ia mi dielelesele Jihova Nzambi ienu, ki mua sonoka kima; iene ioso ia mi bhiti muene, ki bhuala kizuelu kia sukamena.” (Josuué 23:1, 2, 14) O mundu ua Josuué ka tenene ku dituna kuila ioso ia tangele Nzambi ia bhitile muene ni kidi kioso. Maji kiebhi Nzambi kia tena ku bhanga kiki? Nzambi ka difu ni athu mu maukexilu avulu. Ua tokala kuijiia o kidi kiki mukonda muéne ua bhange ikanenu iavulu ia lungu ni ima ia-nda bhita ku hádia, o ima íii ia ku tokala ué eie.

O IKANENU IA NZAMBI NI IKANENU IA ATHU

Athu a tanga o ima ia-nda bhita ku hádia mu ima ia tokuesa mu ku di longa kuâ, mukonda dia ima ia mona ku mundu, mba a fika a mu a kuatekesa ku ji nzumbi. Kioso kia zubha o ku zambula, o athu a kinga phala ku mona ihi ia-nda bhita.Jisabhu 27:1.

Maji ki kiene kimoxi ni Nzambi uejiia ioso. muéne uejiia o ukexilu ua athu ni ibanzelu iâ; kienhiki, kioso muéne kia sola ku bhanga kima, muéne u tena ku mona ihi ia-nda bhanga o athu. Maji Nzambi ka tena ku bhanga ngó kiki. Muéne u tena ku langa ni ku lungulula o ima phala ku kumbidila ia tange muéne. Muéne u zuela: ‘Kiene ue kiá kala o kizuelu ki tunda mu kanu diami; kiene ki kia kà vutuka kia hatu ko kuami, maji kia ka bhita kala kia ngi uabhela eme.’ (Izaia 55:11) Kienhiki, saí ikanenu ia Nzambi i tu londekesa ngó ihi ia-nda bhanga muéne ku hádia.

O IMA IA-NDA BHITA KU MUENHU UÊ KU HÁDIA

Ihi ia-nda bhita ni muenhu uê ni ua jindandu jê ku hádia? Se ua kijidile kuila o ixi ia-nda tunguta, se phata ueji bhanga ima ieji ku kuatekesa ku bhuluka. Kiene kimoxi ué ni ikanenu ia Bibidia. Nzambi ua kanena kuila kua kambe ngó kithangana o ixi ia-nda lunguluka. (Tanga o kitutu: “Ihi ia Jingunuina Nzambi ia Lungu ni Ima Ia-nda Bhita ku Hádia.”) O ima íii ki i difu ni ima iene mu zuela athu akua ku tokuesa.

Ua tokala ku xinganeka kiki: O ima ia-nda bhita ni mundu iú a i soneka kiá ni kuila eie u tena kuijiia o ima bhu kaxi ka Bibidia. Nzambi uambe: “Ngi mukua kutanga kiá o dizubhilu tundé bhu dimatekenu, . . . Ngixi: ‘Phangu iami inangenena, ngenda jinga ni ku bhanga vondadi iami ioso.’” (Izaia 46:10) Eie ni muiji uê mu tena ku kala ni muenhu uambote ku hádia. Ebhuidisa o Jimbangi ja Jihova ia lungu ni ihi i longa o Bibidia ia lungu ni ima ia-nda bhita ku hádia. O Jimbangi ja Jihova ki imbanda kana; kene mu di zuelesa ni ji nzumbi mba ala ni kutena kua ku zambula, kana. Ene a di longa ngó o Bibidia, a tena ku kulondekesa o ima iambote ia-nda bhanga Nzambi ku hádia.