Ku bokona mu madisá

Ku bokona mu madisá

 DIAMBU DIA KAPA

Ihi ia Bhange Nzambi Phala Eie

Ihi ia Bhange Nzambi Phala Eie

‘Mbata Nzambi ua zolo o mundu, katé kia suku mu ku bhana Mon’ê umoxi-élele, phala uoso u mu xikina muéne, ka fué, maji a kale ni muenhu ki uábhua.’Nzuá 3:16.

Íii o velusu a beta ku ijiia ni ku i tumbula mu Bibidia. Se-ku dingi velusu ia mukuá “ilondekesa kiambote o ukamba ua Nzambi ni athu ni ukexilu ua muéne ku a bhulula.” Mukonda dia kiki, saí jixi, o izuelu ia velusu íii, mba o divulu dia “Nzuá 3:16,”di moneka veji javulu mu iônge ia mundu, ku makalu, ku ilumbu ni mu ididi ia mukuá dingi.

Nange o athu ene mu tumbula o velusu íii, a xikina kuila o henda ia Nzambi ia-nda kua bhulula ni kua bhana muenhu ua kalelaku. Abha eie? Ihi ilombolola o henda ia Nzambi phala eie? Kiebhi ki uene mu mona kuila Nzambi ua ku zolo?

‘NZAMBI UA ZOLO O MUNDU’

Athu avulu a xikina kuila Nzambi muéne ua bhange o ngongo, o ima ioso ni athu. Saí ima iavulu mu ngongo i tu diuanesa kiavulu mukonda dia ukexilu uâ, i tu bhangesa ku xikina kuila, saí muthu ua unjimu ua i bhange. Athu avulu ene mu sakidila Nzambi izuua ioso mukonda dia ku a bhana o muenhu. A mona uá kuila, a bhingi Nzambi phala kua bhana ima—kala o muha ua muenhu, menha, kudia, ni ima ia mukuá dingi—phala ku kala ku muenhu ni ku sanguluka ku ioso ia bhanga.

Kima kiambote etu oso ku sakidila Nzambi mu ku tu bhana o ima ioso íii, mukonda muéne o Mubhangi uetu, muéne ué u tu dikila. (Jisá. 104:10-28; 145:15, 16; Ika. 4:24) Tu tena ku sakidila o henda ia Nzambi ko kuetu, se tu  xinganeka kiambote ku ioso iene mu tu bhangela muéne phala tu kale ku muenhu. O poxolo Phaulu uambe: ‘Nzambi u bhana ku athu oso muhu ua muenhu ni, ni ima ioso.’Ika. 17:25, 28.

Maji Nzambi kene mu londekesa ngó o henda iê mu ku tu langa mu xitu, kana. Muéne ka tu bhange kala o iama, ua tu jingisa mu ku tu bhanga ni vondadi ia ku muijiia ni ku tu kuatekesa ku kolesa o ukamba uetu ni muéne. (Matesu 5:3) Mu kiki, o athu a belesela ala ni kidielelu kia ku tokala ku muiji ua Nzambi, ku kala ‘an’â.’Loma 8:19-21.

Kala ki tu londekesa dingi o divulu dia Nzuá 3:16, Nzambi ua londekesa o henda iê ko kuetu mu ku tumikisa Mon’ê, Jezú, mu ixi phala ku tu longa o kidi kia lungu ni Nzambi, o Tat’ê ni ku tu fuila. Maji saí athu ka tendela kiambote se mukonda diahi Jezú uafu ni kiebhi o kufua kua Jezú kulondekesa o henda ia Nzambi ko kuetu. Tu mone kiebhi o Bibidia ki jimbulula se mukonda diahi Jezú uafu ni valolo iebhi iala na-iu o kufua kuê.

‘UA BHANA MON’Ê UMOXI-ÉLELE’

Athu oso a kata, a kuka ni kufua. Maji ki kiene kia mesenene Nzambi mu dimatekenu. Muéne ua bhange o diiala dia dianga ni muhatu ni kidielelu kia ku kala ni muenhu ua kalelaku mu palaízu mu ixi. Maji ene a tokalele ku bhanga kima: Ku belesela Nzambi. Nzambi uambe kuila se a solele ku bhukumuka, eji fua. (Dimatekenu 2:17) O diiala dia dianga ua solo ku bhukumukina o ungana ua Nzambi, kienhiki, ua bheka o kufua kua muéne ni ku muiji uê. O poxolo Phaulu ua jimbulula: ‘Mukuá ni kia bokona o kituxi mu ngongo ku muthu umoxi, o kufua kú kuejila mu kituxi; kiene ué kia bhiti o kufua ku thandu dia athu oso, kuma ene oso kituxi a ki te.’Loma 5:12.

Maji Nzambi, ‘ua uabhela o ku batula mu kidi.’ (Jisálamu 37:28) Sumbala ka jimbi o kituxi kia tele o diiala dia dianga, Nzambi ka fundisa o athu oso kuila a tokala ku tala hadi ni kufua, mukonda dia ku bhukumuka kua muthu umoxi. Maji mu ku kaiela o kitumu kia ku bhana “muenhu mu muenhu,” muéne ua batula mu kidi ni ku bhangesa kuila o athu a belesela a kale ni kidielelu kia ku kala ni muenhu ua kalelaku. (Makatukilu 21:23) O kibhusidisu kienhiki: Kiebhi Nzambi kieji bhulula o athu ku kituxi ni kufua? Kitambuijilu: Saí muthu ueji bhana o muenhu uê kala sata—muthu sé kituxi kala kia kexile Adá ande dia ku ta o kituxi.

Jezú uéza mu ixi mu vondadi iê, iu ua bhana o muenhu uê phala ku bhulula o athu ku ituxi ni kufua

Maji se-ku muthu ku muiji ua Adá, ueji tena ku bhanga kiki mukonda ene oso akua ituxi, maji Jezú ueji tena. (Jisálamu 49:6-9) Kuma Jezú ka lundula o kituxi kia Adá, muéne uexile muthu sé kituxi kala kia kexile Adá ande dia ku ta kituxi. Kienhiki, mu kufua, Jezú ua bhulula o athu ku ubhika ua ituxi. Mu ku bhanga kiki, muéne ua bhana ku muiji ua dikaza dia dianga o  kidielelu kia ku sanguluka ku muenhu, kala kia kexile Adá ni Eva. (Loma 3:23, 24; 6:23) O kuila saí kima ki tua tokala o ku bhanga phala ku katula mbote ku henda ia Nzambi ko kuetu?

‘UOSO U MU XIKINA MUÉNE’

O divulu dia Nzuá 3:16, di zuela dingi: ‘Uoso u xikina Jezú ka fué, maji a kale ni muenhu ki uábhua.’ Kiki kilondekesa kuila phala ku kala ni muenhu ki uábhua, tua tokala ku bhanga kima. Se tua mesena ku “kala ni muenhu ki uábhua,” tua bhingi ku xikina Jezú ni ku mu belesela.

Nange u dibhuidisa: ‘Maji mukonda diahi kua bhingi ué ku belesela? Jezú ka zuela ngó kuila, “uoso u mu xikina muéne” ua-nda kala ni muenhu ki uábhua?’ Kiene muene, o ku xikina kima kiambote. Maji tua tokala ku lembalala kuila, ki ku bhingi ngó ku xikina kana. Kala kilondekesa o divulu, Vine’s Expository Dictionary of Old and New Testament Words, o izuelu ia tumbula Nzuá mu velusu íii, ki ilombolola “kixikanu kia hatu kana.” Phala ku mu xikina kua Nzambi, o muthu ka tokala ku xikina ngó ku muxima kuila, Jezú muéne o Mubhuludi. O muthu ua tokala ué ku bhanga ioso phala ku belesela ioso ia longo Jezú ni muxima uê uoso. Se o muthu ka bhange kiki, o kixikanu kiê kiafú. O Bibidia i zuela: ‘O kixikanu, kia di kalela sé ima ia ku bhanga, kiafú.’ (Tiiaku 2:26) Kiki kilombolola kuila, o muthu ua tokala u kala ni kixikanu kua Jezú, o kuenda kuê kua tokala kulondekesa kuila muéne ua mu xikina ni kidi kioso.

Phaulu u jimbulula kiki: ‘O henda ia Kristu ia tu kuatela, mukonda tua k’ijiia kuila muthu umoxi ua fuila ene oso. . . . O muéne ua fuila ene oso bhu kididi, phala oso ala ku muenhu, ki ki kale ene dingi a divu, maji ua avu muéne ua a fuila bhu kididi, iú ua fukunuka.’ (2 Kolindo 5:14, 15) O sata ia Jezú ia tokala ku tu suínisa ku lungulula o ukexilu ua muenhu uetu—mu veji dia ku bhanga o vondadi ietu, tua tokala ku bhanga o vondadi ia ió ua fuila bhu kididi kietu, Jezú. Kiki kilombolola kuila, tua tokala ku ta ku pholo ni ku kumbidila o ilongesu ia Jezú. Kiki kia-nda funhisa o ibanzelu ietu, o ima i tua mesena ku sola ku muenhu uetu ni ioso i tua mesena o ku bhanga. Ihi ia-nda tambula ió a kala ni kixikanu kua Jezú?

‘KA FUÉ MAJI A KALA NI MUENHU KI UÁBHUA’

O izuelu ia sukina ia divulu dia Nzuá 3:16, ilondekesa o kima kia kanena Nzambi kua ió a kala ni kixikanu ku sata ia bhana Jezú ni ku belesela o itumu iê. Nzambi ua mesena kuila, o athu iá a fiiele, “ka fué maji a kala ni muenhu ki uábhua.” Maji o athu ka-nda tambula dibesá dimoxi kana.

Saí athu, Jezú ua a kanena muenhu ua kalelaku ku diulu. Muéne ua zuela ku maxibulu mê kuila, ueji ku a pelepalala kididi phala n’a kale nê kumoxi mu utuminu uê. (Nzuá 14:2, 3; Filipe 3:20, 21) O athu a-nda ku a fukununa phala kuia ku diulu ‘a ka kala akunji a Nzambi ni a Kristu, a kala nê ku ungana midi ia mivu.’Dijingunuinu 20:6.

Akaiedi ofele ngó a Jezú eji tambula o ujitu iú. Jezú uambe: ‘Ki mu kale ni uôma kilunga kiofele! Mukonda tata ienu kia mu uabhela muene o ku mi bhana o Ungana.’ (Luka 12:32) Athu akuxi eji kala mu “kilunga kiofele” kiki? O divulu dia Dijingunuinu 14:1, 4, di zuela: ‘Ngi mona Kambudi kemana ku mulundu ua Ziione. Anga ku kala athu kumoxi ni Muéne, hâma ni makuinhi a uana ni kiuana a midi, ala ni dijina diê ni dijina dia Tata iê, dio soneke bhu mabhômo mâ. . . . Enhá ene a a sumbu m’axaxi ka athu mu ngongo, mu ku kala ibundu ia ku tomona ia bhakuila Nzambi ni Kambudi.’ Se tu a sokesa ni mundu uafu kiá, tua-nda mona kuila o 144.000 a athu “kilunga kiofele,” muene. A a tangela kuila a-nda kala jisobha, kienhiki a-nda tumina nanhi?

Jezú ua zuela o athu a mukuá a-nda tambula o mbote ia Utuminu ua diulu. Kala ki tu mona mu divulu dia Nzuá 10:16, Jezú uambe: ‘Ngala ué ni jimbudi ja mukuá, ki jala mu kibhanga kiki. Jenhiji ki bhinga ngi ji Takana. Jene jívua o dízui diami, ji kala kilunga kimoxi ni mubhidi umoxi.’ O “jimbudi” jiji a mu kinga ni vondadi ioso o ku tambula o muenhu ua kalelaku mu ixi—O  muenhu ueji kala nau Adá ni Eva. Kiebhi ki tuejiia kuila ene a mu kinga ku kala mu ixi?

Veji javulu, o Bibidia i zuela ia lungu ni Palaízu mu ixi. Phala ku mona o kidi kiki, jikula mu Bibidia iê ni ku tanga o ibatulu íii ia Bibidia: Jisálamu 37:9-11; 46:8, 9; 72:7, 8, 16; Izaia 35:5, 6; 65:21-23; Matesu 5:5; Nzuá 5:28, 29; Dijingunuinu 21:4. O ibatulu íii ilondekesa kuila o ita, ni nzala, ni ku kata ni kufua, ioso íii ia-nda bhita. I zuela ué kuila, kua-nda kuíza thembu o athu ambote a-nda sanguluka ni ku tunga jinzo jâ, ku kala ni mábhia ni ku sasa an’â mu kididi kia iuka. * O kuila o ikanenu íii ki i ku sangulukisa? Tu tena ku dielela kuila kua kambe ngó bhofele ima ioso íii a-nda i kumbidila.

NZAMBI UA BHANGE IMA IAVULU

Se u xikina ni muxima uoso mu ioso ia bhange Nzambi ko kuê ni ku mundu uoso, ua-nda mona kuila muéne ua bhange kiá ima iavulu phala etu. Tuala ni muenhu, ni kuijiia ni sauidi ni ima ia mukuá i tua bhindamena phala ku kala ku muenhu. Maji o kia beta o kota, o ujitu ua tu bhana Nzambi bhu kaxi ka sata ia Jezú, uafu bhu kididi kietu, o ujitu iú u tena ku tu bhana mabesá avulu se tu di longa kiambote o divulu dia Nzuá 3:16.

O ku kala ni muenhu ua kalelaku ni ku tululuka, sé uôma ua ku kata, ua ita mba ua kufua, ioso íii ieji lombolola ku zediua ku hádia ni hádia. Eie kiá uejiia se ua-nda tambula o mabesá enhá. O kibhuidisu kienhiki: Ihi i ua mu bhanga phala Nzambi?

^ kax. 24 Phala kuijiia dingi ia lungu ni ikanenu, tanga o kibatulu 3 kia divulu, Mu Kidi Ihi i Longa o Bibidia? a di bhange ku Jimbangi ja Jihova.