Ku bokona mu madisá

Ku bokona mu madisá

Isangela ia Jingeleja ku Samba Kumoxi—O Kuila Vondadi ia Nzambi?

Isangela ia Jingeleja ku Samba Kumoxi—O Kuila Vondadi ia Nzambi?

“O jingeleja ji bhekela ukamba ku athu inga ji uanuna o athu?” O kibhuidisu kiki a ki bhange ku atangi a jurnale, The Sydney Morning Herald. Avulu a tambuijila—89 a athu ndenge, ambe—o jingeleja ji uanuna o athu.

O ATHU ene mu zokela o isangela ia jingeleja kuila a tokala ku samba kumoxi, a banza kiéngi. O Eboo Patel, ua mateka ni kisangela kia Interfaith Youth Core, uebhuidisa: “Ngi londekese ngeleja ka mesena o henda . . . , ka mesena ku langa kiambote o ima . . . , mba ka mesena ku londekesa o ukexilu ua ku zalela asonhi.”

O akua Buda, akua Katolika, akua Prostante, akua Hindu, ni akua Muxulumanu, ene mu kalakala kumoxi phala ku zubha o uadiama mu ngongo, ni ku zokela o ufôlo ua athu, a thandanganha ni ku langa kiambote o ibhangelu mu ngongo. Jingeleja javulu ene mu diongeka phala kuzuela maka alungu ni ku kala ni ukamba ni ku sota o paze mudiâ. Ene a bhanga fesa ni ji nvela, mimbu, misambu ni ima ia kamúkua dingi.

O kuila o ku bhanga kiki, kia-nda tena ku zubha o unguma ua jingeleja? O kuila o isangela ia jingeleja ku samba kumoxi, uene o ukexilu ua Nzambi ua ku bheka paze ku mundu?

UKAMBA UA KIDI—IHI IA BHINGI?

Saí kisangela kia dikota ki kuatekesa o isangela ia jingeleja ku samba kumoxi, ki di zangeleka mu ku kala ni athu ala mu 200 ja jingeleja mu 76 a jixi. O kisangela kiki kia tokala “ku suínisa o ku kolokota ni ukamba ua jingeleja izuua ioso.” Maji kiki kuzuela ngó, kene mu ilondekesa mu ibhangelu iâ. Mu kifika, kala kia zuela o adiakimi ala ku pholo dia kisangela kiki, o dukumendu diâ a tokalele ku di soneka kiambote phala ka soneke ima i xinga o jingeleja ja mukuá a xikina ué o dukumendu didi. Mukonda diahi? Mukonda akexile mu zoka se o dijina dia Nzambi a tokalele ku di soneka mu dukumendu didi. Mukonda dia kiki, ka tumbula o dijina dia Nzambi.

Se Nzambi ka mu tumbula o dijina, kikalakalu kiebhi kiala na-kiu o kixikanu? Maji kiebhi o kisangela kia jingeleja ku samba kumoxi ki ki difu ni isangela ia mukuá iene mu bhindumuna o athu a bhindamena? Kiki kiene kia bhangesa o kibuka kia jingeleja ki tua tumbula kia ku dima kuzuela kuila, ki ngeleja kana, maji kisangela “ki kuatekesa o jingeleja ku kala ni ukamba mudiâ.”

O KISANGELA KIKI KIA MU BHEKA MUENE O KIKUATEKESU KIA TOKALA?

O ngana Dalai Lama, diiala dia fuma, u suínisa o isangela ia jingeleja ku samba kumoxi, uambe: “Ngeleja joso ji longa kima kimoxi: O henda, ukamba ni ku di loloka.” Anga u zuela dingi: “Maji o kia beta o kota, o kulondekesa o ídifua íii izuua ioso ku muenhu uetu.”

Mu kidi o valolo ia ídifua íii, o henda, ukamba ni ku di loloka, ka tokala ku i zangeleka kiavulu. Kia lungu ni Kijila kia Ulu, Jezú uambe: ‘Ima ioso-phe i mua mesena kuila athu a mi bhanga-iu, iene ué i mu  a bhanga ene.’ (Matesu 7:12) Maji o kuila o kixikanu kia kidi, kia lungu ngó ni ku suínisa o athu ku bhanga ima iambote?

O poxolo Phaulu ua zuela kua ió akexile mu zuela mu izuua iê kuila a mu sidivila Nzambi, uixi: ‘Eme ngi mbangi iâ kuma ene a mu suína bhu pholo ia Nzambi. Maji o ku suína kuâ kua ku kamba ku tongoloka kua kidi.’ Mukonda diahi Phaulu ua zuela kiki? ‘Mukonda dia ku kamba kuijiia o ku iuka kua Nzambi’ Phaulu uambe kuma ene akexile mu ‘di lungisa mudiâ.’ (Loma 10:2, 3) O ku kamba ku kala ni kuijiia kua kidi kua lungu ni ima ia mesenene Nzambi kua ene, ia bhangesa o ku suína kuâ—ni kixikanu—ku kala sé valolo.Matesu 7:21-23.

IHI I ZUELA O BIBIDIA IA LUNGU NI ISANGELA IA JINGELEJA KU SAMBA KUMOXI

Jezú uambe: “Azediua ió a bheka o paze.” (Matesu 5:9) Jezú ua kexile mu bhanga o ima ia kexile mu longa ku athu ni ku suínisa o ukamba ni ku boka o njimbu ia ku tululuka ku athu a jingeleja. (Matesu 26:52) O athu akexile mu belesela o milongi iê, akexile ni ukamba uambote ni akuâ. (Kolose 3:14) Maji o kuila Jezú ua mesenene ngó ku kuatekesa o athu a jixi javulu ku di bhana kiambote mudiâ ni ku kala ni paze? O kuila muéne ua di bundu ni athu mu ubhezelu uâ?

O atuameni a jingeleja ja ji Falizeu ni ji Saduzeu ni ku suína kuoso a zukutisa Jezú—a soto ku mu jibha. Kiebhi kia divu muéne? Jezú ua longo o maxibulu mê, uixi: “A ehi’enu! Ala atuameneni a ifôfo.” (Matesu 15:14) Jezú ua ditunu ku bhanga ukamba ni athu enhó.

Mu ku bhita thembu, ku mbanza ia Kolindo, mu Grécia, a bhange-ku kilunga—o mbanza ioio a betele ku i ijiia mukonda dia kuvula o ijila ni ku kala-mu athu a jixi javulu ni jingeleja javulu. Kiebhi o Jikidistá kia tokalele ku kala mu mbanza ienioió? O poxolo Phaulu ua a sonekena: “Ki mu sote ku di ta mu kikalakalu kimoxi ni iá a kambe kixikanu.” Mukonda diahi kana? Phaulu uebhuidisa: “Kristu u di tambulula kiebhi ni Kadiaphemba? Mba o mukua kixikanu u kala ni kima kiahi kumoxi ni ió ua kambe o kixikanu?’ Mu ku suluka Phaulu ua a dimuna kiki: ‘Tundenu mu kaxi kâ, mu di kalele.’2 Kolindo 6:14, 15, 17.

Kienhiki, o Bibidia ki i xikina o ibhangelu ia isangela ia jingeleja ku samba kumoxi. Maji u di bhuidisa: ‘Kiebhi ki tu tena o ku sanga o ukamba ua kidi?’

KU BHEKA UKAMBA UA KIDI

O Estação Espacial Internacional—kima kia madiuanu kiene mu nhunga o ixi ku diulu—kia bhingile ukamba ua dikota phala o 15 dia jixi a tunge o kima kiki kumoxi. O kuila o kikalakalu kiki kieji kuenda ku pholo ni ku ki zubha se o jixi jiji ka kexile ni kibanzelu kimoxi kia lungu ni kiebhi kieji tunga o kima kiki?

Iá o maka ene mu di bhana nau lelu o isangela ia jingeleja. Sumbala ene mu di xila ni ku di kuatekesa, kala ni kibanzelu kimoxi kia lungu ni ku kolesa o kixikanu kia athu. Mukonda dia kiki, o ukexilu ua athu ni ilongesu ki i difu, kiki kiene mu uanuna o athu.

O Bibidia iala ni ijila ia Nzambi ilondekesa kiebhi kia tokala ku bhanga o ima. Tu tena ku kolesa o kixikanu kietu mu ima i longa o Bibidia. O athu ene mu belesela o ijila ia Bibidia kene dingi mu londekesa kathombo ku athu a jixi jengi mba a jingeleja ni ku kalakala kumoxi mu ku sota o paze ni ukamba ua kidi. Nzambi ua ki zuelele kiá kuila: “Ifuxi ioso nga kà i bhana [dimi dia zele], phala ene oso a tene ku hingila o dijina dia Jihova, phala ene oso a mu bhikile ni muxima umoxi.” Kienhiki, o ukamba ua kidi, uijila mu kuzuela o ‘dimi dia zele’ o ijila ia Nzambi ia lungu ni ubhezelu.Sofoniia 3:9; Izaia 2:2-4.

O Jimbangi ja Jihova a mu kuixana phala kuia mu Kididi kia Ubhezelu mu diembu mu ua tungila phala ni u mone o paze ni ukamba uene mu kaxi kâ.Jisálamu 133:1.