O Kuila Nzambi ua mu tu Kaxtikala?
Kioso kia bhiti o kitungutu kia ixi kia kexile ni 9.0 dia nguzu, ni kalemba ka bhiti ku mbeji ia Katanu ku muvu ua 2011, o nguvulu mukua Japão uambe kuila, “né muene nga kexile ni henda i’athu a kuata ku mavuua, maji o mavuua a ngi bhekela ué malamba, ngejiia kuila tembatsu (kaxtiku ka Nzambi).”
Kioso kiafu 220.000 a athu mu itungutu ia bhiti mu ixi ia Haiti ku mbeji ia Katatu ku muvu ua 2010, saí diiala mukua ngeleja, u zuela mu mutelembe ua izunzumbia, uambe kuila o athu enhá, afú mukonda ene “a bhange kikutu ni diabhu,” ia a tokalele ku “vutuka kua nzambi.”
Mu jinvunda ja bhiti mu ixi ia Filipina mu mbanza ia Manila muafu 79 a athu, o padele ia Katolika uambe kuila “Nzambi ua mesena ku tu jibha.” Saí jurnale iambe kuila, “makuinhi a iiadi ni imoxi, ia porcento ia adiakimi, ambe kuila Nzambi ua mu londekesa o njinda iê mu ku tumikisa o nguzu ia ibhangelu,” iene mu bhita mu ixi ietu.
O IBANZELU ia kuila Nzambi u bheka o mavuua, phala ku kaxtikala o athu aiibha, ibanzelu iokulu ki ia lelu. Ku muvu ua 1755, kuafu 60.000 a athu mu itungutu ia ixi, mu túbhia, ni mu kalemba ka bhiti ku ixi ia Phutu mu mbanza ia Lisboa, saí ngijiie mukua fuma a mu ixana Voltaire, uebhula: “O kuila mu mbanza ia Lisboa kuene kua sange dingi ima ia iibha, mu mbanza ia Paris ndenge kuene o ku zediua ni kuiibha kuavulu? Kuene athu avulu ene mu dibhudisa se Nzambi uene mu kaxtikala athu mu mavuua. Saí jixi kioso kia mona o mavuua, ene a ixana ikalakalu ia Nzambi.
Mu ku mona o ima ioso íii, nange tu dibhula: O kuila Nzambi uene mu kaxtikala athu mu ku a bhekela mavuua? O kuila o mavuua ene mu bhita, kaxtiku ka Nzambi?
Mu ku mesena ku tatela Nzambi, saí athu a tumbula o ibatulu ia Bibidia ilondekesa kuila Nzambi ua jibha athu ni mavuua. (Dimatekenu 7:17-22; 18:20; 19:24, 25; Dialuilu 16:31-35) Se tu tanga mu Bibidia mu misoso itatu, tua-nda mona maukexilu atatu, alondekesa se mukonda diahi Nzambi ua jibha o athu enhá. Kia dianga, Nzambi ua dianga ku dimuna o athu. Kia kaiiadi, Nzambi ua jibha ngó o athu a iibha, maji o mavuua a lelu, ene mu jibha athu a iibha ni athu ambote. Nzambi ua buika ngó o athu a mu bhukumukine, ka belesela o kitendelesu kiê. Kia katatu, Nzambi ua bhange kima phala ku bhulula o athu ambote.—Dimatekenu 7:1, 23; 19:15-17; Dialuilu 16:23-27.
O mavuua ene mu jibha athu avulu lelu, maji Nzambi kala ni kikuma. Mukonda diahi o mavuua ene mu dimendala dingi? Kiebhi ki tu tena ku dibhana ni mavuua ejila mu ngunzu ia ibhangelu? O kuila ku hádia ki kua-nda kala dingi mavuua? Ua-nda sanga o itambuijilu ia ibhuidisu íii, mu milongi ia-nda kaiela.
