Ku bokona mu madisá

Ku bokona mu madisá

O Kuila Eie Ua-nda Kolokota mu ku di Langa?’

O Kuila Eie Ua-nda Kolokota mu ku di Langa?’

‘Dilangienu, kuma kizuua ki mua k’ijiia, kithangana ki mua k’ijiia.’​—MATESU 25:13.

1, 2. (a) Ihi ia jimbulula Jezú ia lungu ni izuua isukidila-ku? (b) Ibhuidisu iebhi i tua-nda tambuijila?

XINGANEKA, Jezú ua xikama ku Mulundu ua Midiva, mu ku tala o tembulu ia Jeluzaleme. Muéne uala ni jipoxolo jê jiuana, Phetele, Mandele, Tiiaku, ni Nzuá. O jipoxolo a mu kuívua kiambote, kioso Jezú kia mateka kua longa ia lungu ni kikanenu kia-nda di kumbidila ku hádia. O kikanenu ki jimbulula o ima ia-nda bhita ku disukilu dia mundu iú ua iibha, kioso Jezú kia-nda mateka ku tumina ku Utuminu ua Nzambi. Mu kithangana kieniókio, Jezú ua ambela kuila, mu thembu ioio, o ‘kimbadi kia fiiele’ kieji mu kalela ku pholo mu ixi, kieji bhana o kudia mu nzumbi mu kithangana kia tokala.​—Matesu 24:45-47.

 2 Mu kikanenu kiki, Jezú ua mateka ku ta kifika kia lungu ni kuinhi dia ilumba. (Tanga Matesu 25:1-13.) Mu milongi íii, tua-nda di longa ia lungu ni ibhuidisu i kaiela: (1) Ihi ilombolola o kifika kia kuinhi dia ilumba? (2) Kiebhi o Jikidistá ja fiiele a a undu, kia kaiela o kitendelesu mu kifika kiki, ni mbote iahi ia katula? (3) Kiebhi kala muthu mudietu, kia tena ku katula mbote mu kifika kia Jezú lelu?

IHI I LONGA O KIFIKA?

3. M’ukulu, kiebhi o madivulu metu kia kexile mu jimbulula o kifika kia kuinhi dia ilumba, ni ihi ia kexile mu bhita?

3 Mu milongi ia dianga, tua di longo kuila, o kimbadi kia fiiele ua lungulula o ukexilu ua ku jimbulula o misoso ia mukuá ia Bibidia. Lelu, o kimbadi kia fiiele, ki jimbulula dingi o mbote i tu tena ku katula mu misoso ni mu ifika, mu veji dia ku zuela kiebhi o kikanenu kia-nda di kumbidila ku hádia. Mu kiki, xinganeka mu kifika kia Jezú kia lungu ni kuinhi dia ilumba. O madivulu metu akexile mu longa kuila, o tundeia, ni maji, ni jimbinda, ja kexile mu lombolola kima kioso-kioso mba muthu. O kuila tu tena ku kamba ku katula mbote mu kifika, se tu mateka ku jimbulula kala kima kiofele ki tu sanga mu kifika? O kitambuijilu kia kibhuidisu kiki, kiala ni valolo ia dikota phala etu oso.

O ilumba ia tokala ku kala polondo ni tundeia tuâ, kioso o ngà-iala kia-nda kuíza

4. Mu kifika kiki, kiebhi ki tu tena kuijiia sé (a) nanhi o ngà-iala? (b) a nanhi o ilumba?

4 Tua-nda di longa o mbote i tu tena ku katula mu kifika kia Jezú. Kia dianga, xinganeka ku athu mu kifika kia kuinhi dia ilumba. Nanhi o ngà-iala? Mu kidi, Jezú. Tu zuela kiki, mukonda ande dia ima íii ku bhita, Jezú ua zuelele kuila, muéne o ngà-iala. (Luka 5:34, 35) A nanhi o ilumba? O ilumba ilombolola o “kakilunga kófele” ka Jikidistá a a undu. Kiebhi ki tuejiia o maka enhá? Mu kifika, o ilumba a tokala ku kala polondo ni tundeia tuâ, kioso o ngà-iala kia-nda kuíza. Tala iambe Jezú ku akaiedi iê, a a undu: “Di iudikienu, mbé ioso iambe kuiza i mi sange mua di lungu. Bholenu o phonda mu mbunda, uikenu o jikandeia jenu. Mu di fangana kala athu a kinga ngana iâ, kia vutuka ku fesa ia ukaza.” (Luka 12:32, 35, 36) Ki kale poxolo Phaulu mba poxolo Nzuá, kiiadi kiâ a sokesa o Jikidistá a a undu ni ilumba. (2 Kolindo 11:2; Dijingunuinu 14:4) Mu kiki, tu tena ku mona kuila, o kitendelesu ki tu sanga mu divulu dia Matesu 25:1-13, phala o Jikidistá a a undu.

5. Kiebhi Jezú kia jimbulula o thembu ieji di kumbidila o kifika kiê?

5 Kia kaiiadi, o kitendelesu kia Jezú kia lungile ni thembu iebhi? O ia zuela Jezú mu disukilu dia kifika, i tu kuatekesa kuijiia o ima íii. Muéne uambe: “O ngà-iala u tula.” (Matesu 25:10) Mu Mulangidi ua 15 ua Kavua ua 2013, tua di longo kuila, o kikanenu kia Jezú mu divulu dia Matesu, kibatulu  24 ni 25, ki tumbula dinake dia ji veji, ia lungu ni “kuíza” kua Jezú. Kioso Jezú kia zuela ia lungu ni “kuíza” kuê, muéne ua kexile mu tanga ia lungu ni kithangana kia hadi ia dikota, kioso muéne kia-nda kuíza, phala ku buika o mundu iú ua íibha. Mu kiki, tu tena ku mona kuila, o kifika kia Jezú kia lungu ni izuua ia sukidila-ku, kioso muéne kia-nda “kuíza” mu kithangana kia hadi ia dikota.

6. Ihi i longa o kifika?

6 Ihi i tua di longo mu kifika kiki? Lembalala o musoso ua Bibidia. Mu divulu dia Matesu kibatulu 24, Jezú ua zuela ia lungu ni ‘kimbadi kia fiiele.’ O kimbadi kiki, kieji kala kibuka kiofele kia maiala a a undu, eji kala ku pholo dia akaiedi a Kristu, mu izuua isukidila-ku. Jezú ua tendelesa o maiala enhá kuila, ene a tokalele ku kala fiiele. Mu kibatulu kia kaiela, Jezú ua zuela ia lungu ni kifika kia kuinhi dia ilumba, phala ku bhana itendelesu ku akaiedi iê oso a a undu mu izuua isukidila-ku. Muéne, ua kexile mu a longa kiebhi ene kia tokalele ku ‘kolokota mu ku di langa,’ phala ka texi o dibesá diâ, dia kuia ku diulu. (Matesu 25:13) Mu kiki, tua-nda di longa o kifika, phala ku mona kiebhi o Jikidistá a a undu kia kaiela o kitendelesu kia a bhana.

KIEBHI O JIKIDISTÁ A A UNDU KIA KAIELA O KITENDELESU KIA KIFIKA?

7, 8. (a) Mukonda diahi o ilumba ia dimuka akexile polondo? (b) Kiebhi o Jikidistá a a undu kia di pelepalala?

7 Mu kifika kiê, Jezú ua zuela kuila, kioso o ngá-iala kia tula, ua sange o ilumba ia dimuka a di pelepalale kiambote, maji o ilumba ia tobho kana. Mukonda diahi kia bhiti kiki? Mukonda o ilumba ia dimuka, a di pelepalele ni ku kolokota mu ku di langa. O kuinhi dia ilumba, a tokalele ku kolokota mu ku di langa, ni ku muika o tundeia tuâ mu usuku uoso. O kitanu kia ilumba ia dimuka, ka sokela ni ilumba a tobhele, mukonda ene a di pelepalele kiambote ni ku ambata maji a soko mu tundeia tuâ. Kiebhi o Jikidistá a a undu a fiiele kia di pelepalala kiambote phala o kizuua kia-nda kuíza Jezú?

8 O Jikidistá a a undu, a di pelepalala kiambote, phala ku kumbidila o kikalakalu kiâ, katé ku disukilu. Ene ejiia kuila, o sidivisu iâ kua Nzambi, i bhinga ku xisa o ima ia mundu iú ua Satanaji ku dima, maji né kiki, ene a sanguluka mu ku bhanga kiki. Ene a mesena ku sidivila Jihova ni ufiiele uoso, kana mukonda dia kuijiia kuila o dizubhilu dia zukama, maji mukonda a zolo kiavulu Jihova ni Mon’ê. Ene athu a kolokota mu ufiiele uâ, kehela o ukexilu ua mundu iú kua xidisa, mu ku mesena ima iavulu, ku di ta mu usuéia, ni luímbi. Kála o ilumba ia dimuka a di pelepalale kiambote ni tundeia tuâ, o Jikidistá a a undu ene mu bhenha, ni ku kala ni  muanhu, mu ku kingila o Ngá-iala, né muene se a mona kala muéne ua mu laleka.​—Filipe 2:15.

Jezú ua tendelesa o Jikidistá a a undu ku kolokota ku kala fiiele

9. (a) Ihi ia tendelesa Jezú, ia lungu ni ku boua? (b) Kiebhi o Jikidistá a a undu kia bhange, kioso kiévu-ku nzôngo, exi: “Ngà-iala iú uiz’ó?” (Tala ku luiji.)

9 O ilumba ia dimuka, akexile polondo, kioso o ngà-iala kiéza, mukonda ene a kolokotele mu ku di langa. Maji mu kifika, tua mono kuila, o kuinhi dia ilumba ene oso ‘a bouo, ai ku kilu’ kioso kia kexile mu kingila o ngà-iala, ua kexile kala ua mu laleka. O kuila o Jikidistá a a undu a tena, kuia ku “kilu,”mba ku landuka kioso kiaia ni ku kingila o kuíza kua Kristu? Kiki, ki tena ku bhita. Jezú ua kijidile kuila, né muene sé o muthu u thandanganha ku kingila Jezú, u tena ku zoza ni ku landuka kioso kiaia ni ku kingila. Mu kiki, o Jikidistá ja fiiele a a undu, ene mu bhanga ioso phala ku kolokota mu ku di langa. Kiebhi ene kia bhanga kiki? Mu kifika, o kuinhi dia ilumba, ia fundumuka kioso kiévu-ku, exi: “Ngà-iala iú uiz’ó!” Maji, o ilumba ngó ia dimuka a di pelepalale kiambote. (Matesu 25:5, 6; 26:41) Kiki kiene ki bhita ué ni Jikidistá a a undu a fiiele mu izuua isukidila-ku, ene ué a fundumuka, kioso kievu, exi: “Ngà-iala iú uiz’ó!” Ene a xikina ni muxima uoso o kijimbuete kia londekesa kuila Jezú iu uíza, anga ene a kala polondo phala ku mu tambulula. * (Tala ku luiji.) Kindala, tua-nda di longa o disukilu dia kifika kia Jezú, kia lungu ni kithangana kia tokala.

MABESA PHALA IÓ A DIMUKA NI KIBUIKILU KIA IÓ A TOBHO

10. Ihi i tu tena o kuibhula, ia lungu ni kithangana kioso o ilumba ia dimuka ni ió a tobho kia kexile mu di zuelesa?

10 Mu disukilu dia kifika, tu mona kuila, o ilumba ia tobho a bhinga ku ilumba ia dimuka ku a bhana tu maji phala ku ta ku tundeia tuâ. Maji o ilumba ia dimuka, ka xikina ku a kuatekesa. (Tanga Matesu 25:8, 9.) Maji, mu kithangana kiebhi o Jikidistá a a undu a dituna ku kuatekesa muthu u bhindamena kikuatekesu? Lembalala o thembu i di kumbidila o kifika. Jezú, o Ngá-iala, ua-nda kuíza ku disukilu dia hadi ia dikota phala ku fundisa o athu. Mu kiki, nange o ku di zuelesa kuku kua ilumba, kua lungu ni ima ia-nda bhita ande dia disukilu dia hadi ia dikota. Mukonda diahi tuamba kiki? Mukonda, mu kithangana kiki, o Jikidistá a a undu a-nda tambula o kidimbu kia sukina.

11. (a) Ihi ia-nda bhita ande dia ku mateka o hadi ia dikota? (b) Ihi ilombolola o izuelu ia ilumba ia dimuka ku ilumba ia tobho, kioso kia tangela kuila ene a tokelele kuia mu sumba o maji?

11 Mu kiki, ande dia ku mateka o hadi ia dikota, o Jikidistá joso a a undu, a-nda tambula kiá o kidimbu kia suku. (Dijingunuinu 7:1-4) Mu kithangana kieniókio, ene a-nda kuijiia kuila, mu kidi a a solo phala kuia ku diulu. Maji, xinganeka ku mivu ia-nda bhita ande dia hadi ia dikota. Ihi ia-nda bhita ni Jikidistá a a undu ka-nda kala polondo ni ku kamba ku kala fiiele? Ene ka-nda tambula o kidimbu kia suku. Mu kithangana kieniókio, Nzambi  ua-nda sola Jikidistá jengi ja fiiele. Kioso o hadi ia dikota kia-nda mateka, nange o a tobho a-nda divua kia iibha kioso kia-nda mona o kibuikilu kia Babilonha ia Dikota. Nange mu kithangana kieniókio ngó, kia-nda mona kuila, ene ka kexile polondo phala ku tambulula Jezú. Mu kithangana kieniókio, ihi i tena ku bhita se ene a bhinga kikuatekesu? O kitambuijilu tu ki sanga mu kifika. O ilumba ia dimuka a ditunu ku bhana o maji ku ilumba ia tobho, ni kua tangela kuila a tokalele kuia mu a sumba. Mukonda kia kexile “mu kaxi ka usuku,” ki bhu kexile muthu phala ku a sumbisa maji. Kia kexile tádidi!

12. (a) Ku hadi ia dikota, ihi ia-nda bhita ni Kidistá a mu undu, maji u kamba ku kala fiiele, ande dia ku tambula o kidimbu kia suku? (b) Ihi ia-nda bhita ni ió a difuangana kala o ilumba ia tobho?

12 Ku hadi ia dikota, o Jikidistá a a undu, ka-nda tena dingi ku kuatekesa muthu uoso uoso u kamba ku kala fiiele. Kia-nda kala tádidi kiá. Mu kiki, ihi-phe ia-nda bhita ni athu a-nda kamba ku kala fiiele? Tala ihi ia bhiti ni ilumba ia tobho a íle mu sumba o maji: “Ngà-iala u tula. Oso a di iudika, anga a bokona-nê ku fesa ia ubhanga, dibhitu, ia a di jika.” Kioso Jezú kia-nda kuíza ni nguzu ni fuma, mu disukilu dia hadi ia dikota, muéne ua-nda bhongolola o Jikidistá ja fiiele a a undu ku diulu. (Matesu 24:31; 25:10; Nzuá 14:1-3; 1 Tesalonika 4:17) Maji Jezú ua-nda ku dituna o athu ki jifiiele. Kala kia bhiti ni ilumba ia tobho, nange ene a-nda dikola: “Ngana, Ngana, tu jikuile!” Maji kiebhi Jezú kia-nda tambuijila? Mu kidi, muéne ua-nda kua tambuijila kála kia-nda tambuijila ió a di londekesa kala jihombo: “Kidi kiene ngi mi ambela, ki nga m’ijiia!”—Matesu 7:21-23; 25:11, 12.

Kala Kidistá a mu undu ua tokala ku sola ku kala polondo ni ku kolokota mu ku dilanga

13. (a) Mukonda diahi ki tu tokala ku banza kuila, Jikidistá javulu a a undu ka-nda kala fiiele? (b) Mukonda diahi tu tena ku zuela kuila, o kifika kia Jezú kilombolola kuila, muéne ua dielela kiavulu ku Jikidistá a a undu? (Tala o foto ia dianga.)

13 O kuila Jezú ua kexile mu zuela kuila, Jikidistá a a undu avulu a-nda kamba ku kala fiiele ni ku bhinga ku sola athu engi bhu kididi kiá? Kana. Mu divulu dia Matesu, mu kibatulu 24, tu mona kuma Jezú ua tendelesa o kimbadi kia fiiele ku di langa phala ka kituke mubhika ua íibha. Kiki, ki kilombolola kuila, kieji bhita ni ene. Kiene kimoxi ué, o kifika kia kuinhi dia ilumba kitendelesu. Kala ki bhita ni ilumba mu kifika, kitanu kiá a dimukine, maji kitanu a tobhele, kala Kidistá a mu undu ua tokala ku sola ku kala polondo, ni ku kolokota mu ku di langa. Se ka bhange kiki, ene a tena ku tobha mba ku kituka athu ki jifiiele. Kiki kiene kia tendelesa ué poxolo Phaulu, ku jiphange jê a a undu. (Jihebeleu 6:4-9; sokesa ni Matendelelu 30:19.) Mu kidi, muéne ua a tendelesa ni ku suína kuoso, maji muéne ua dielele ué kuila, o jiphange jê eji tambula o kikoué kiâ. O kitendelesu ki tu sanga mu kifika kia kuinhi dia ilumba, kilondekesa kuila, Jezú ua dielela ué kiavulu ku  Jikidistá a a undu. Muéne uejiia kuila, kala Kidistá a mu undu u tena ku kolokota mu ufiiele ué ni ku tambula o kikoué kiê!

KIEBHI O ‘JIMBUDI JA MUKUÁ’ JA KRISTU KIA TENA KU KATULA MBOTE MU KIFIKA?

14. Mukonda diahi o ‘jimbudi ja mukuá’ a tena ué ku katula mbote mu kifika kia kuinhi dia ilumba?

14 O kifika kia Jezú phala o Jikidistá a a undu. Maji o kuila, o “jimbudi ja mukuá” a tena ué ku katula mbote mu kifika kia Jezú? (Nzuá 10:16) Mu kidi, ene a tena ué ku katula mbote! O kifika kiala ni kilomboluelu kia bhebhuluka: ‘Dilangienu.’ Saí kizuua Jezú uambe: “Kioso ki nga mi tangela enu, ene oso nga a tangela-kiu: Di langienu!” (Marku 13:37) Jezú ua mesena kuila, o maxibulu mê oso a kala polondo, ni ku kolokota mu ku di langa. O Jikidistá joso a tena ku kaiela o phangu ia Jikidistá a a undu, ene mu tá o sidivisu ia ku boka ku pholo dia mienhu iâ. Lembalala kuila, o ilumba ia tobho ia bhingi ku ilumba ia dimuka ku a bhana tu maji. Maji ene ka xikina. Kiki ki tu lembalala kuila, kala muthu mudietu muene uejiia se ua-nda kala fiiele kua Nzambi, ua-nda kala polondo, mba ku kolokota mu ku di langa. Sé-ku muthu u tena ku bhanga kiki bhu kididi kietu. Kala muthu mudietu ua-nda bhakula ji konda ku mufundixi ua iuka, Jezú Kristu, kua kambe ngó ua-nda kuíza. Mu kiki, tua tokala ku kala polondo!

Sé-ku muthu u tena ku kala fiiele bhu kididi kietu mba ku tu langa

15. Mukonda diahi o ukaza ua Kristu ni dibhanga diê, u bhangesa o Jikidistá joso ja kidi ku sanguluka?

15 O Jikidistá joso, a kingila ni ku sanguluka kuoso o ukaza a u tange mu kifika kia Jezú. Ku hádia, kioso o ita ia Alumajedone ia-nda bhita, o Jikidistá a a undu oso, a ka kituka dibhanga dia Kristu. (Dijingunuinu 19:7-9) Athu oso mu ixi a-nda katula mbote mu ukaza ua-nda bhita ku diulu. Mukonda diahi? Mukonda kua-nda kala utuminu ua iuka phala o athu mu ixi. Ki kale tua mu kingila kuia ku diulu mba ku tunga mu ixi, tua tokala ku bhanga ioso phala ku kala polondo ni ku sota ku kolokota mu ku di langa. Se tu suluka ni ku bhanga kiki, tua-nda tena ku katula mbote javulu ku muenhu uambote ua tu kanena Jihova ku hádia!

^ kax. 9 Mu kifika tu mona kuila, kua bhiti kithangana, kioso kiévu-ku nzôngo, exi: “Ngà-iala iú uiz’ó (velusu 6) ni kioso o ngà-iala kieza (velusu 10). Mu izuua íii isukidila-ku, o Jikidistá a a undu ala polondo. Ene a mono o kijimbuete kia londekesa kuila, Jezú ua mateka kia ku tumina ku diulu. Mu kiki, ene ejiia kuila, Jezú ua mu tumina kiá kala Sobha ia Utuminu ua Nzambi. Né kiki, ene a tokala hanji ku kala polondo katé kia-nda kuíza muéne.