Ku bokona mu madisá

Ku bokona mu madisá

O ku Sola ni Unjimu mu Unzangala

O ku Sola ni Unjimu mu Unzangala

‘Enu mu minzangala ia maiala, ni enu mu an’a ilumba ximanenu o dijina dia Jihova.’JISÁ. 148:12, 13.

1. Kikalakalu kiahi kia mu bhanga o minzangala Jikidistá ni kisangusangu kioso?

TUALA mu ithangana ia kisangusangu. Mazunda ni mazunda a athu a mu kuíza mu ku bheza Jihova. (Dij. 7:9, 10) Minzangala iavulu a sanguluka kiavulu mu ku kuatekesa akuâ kuijiia o kidi kia Bibidia. (Dij. 22:17) O minzangala íii, a kuatekesa o athu ku di longa o Bibidia ni ku zediua ku muenhu. A mukuá a di longa o dimi dia ixi iéngi phala ku kuatekesa o athu a zuela o dimi dienhidi. (Jisá. 110:3; Iza. 52:7) Ihi i u tena ku bhanga phala ku kuatekesa o kikalakalu kiki, kia mu bhanga o mundu ua Jihova?

2. Kiebhi ki londekesa o phangu ia Timote kuila, Jihova ua uabhela ku bhana ikalakalu ku minzangala? (Tala o foto ia dianga.)

2 Eie u tena ku sola ni unjimu ku bhanga ima mu unzangala uê, ia-nda ku ku kuatekesa ku tambula maujitu a mukuá mu kilunga phala ku sidivila Nzambi. Mu kifika, kioso kiexile mona-ndenge, Timote mukua Listra, ua solo ni unjimu, mu kiki muéne ua tambula o ujitu ua ku kala mukunji ua ixi iéngi, kioso kia tenesa 20 a mivu. (Ika. 16:1-3) Nange o poxolo Phaulu ua tumina ngó Timote ku vutuka mu Tesalonika phala ku kuatekesa o jiphange, kioso kia zukutisa Phaulu, anga u xisa o kilunga kia Tesalonika, mu ku bhita jimbeji. (Ika. 17:5-15; 1 Tes. 3:1, 2, 6) U tena ku xinganeka kiebhi kia divu Timote kioso kia tambula o ujitu iú?

 O KIMA KIA BETA-O-KOTA KI UA TOKALA KU SOLA

3. Kiebhi o kima kia beta-o-kota ki u tena ku sola ku muenhu, ni thembu kuxi ki ua tokala ku sola?

3 Ua tokala ku sola ni unjimu kindala, ki uala hanji munzangala. Maji kuala kima kia beta-o-kota ki ua tokala ku sola—o ku sola ku sidivila Jihova. Kithangana kiebhi ki ua tokala ku sola ku sidivila Nzambi? Jihova u zuela: “Mu izuua ia unzangala ué, lembalala Ió uoso ua ku bhanga.” (Ndo. 12:1) U tena ngó ku “lembalala” Jihova se u mu sidivila ni muxima uoso. (Mate. 10:12) O kima kia beta-o-kota ki u tena ku sola, o ku sidivila Jihova ni muxima uoso. Kiki kia-nda ku kuatekesa ku muenhu uê uoso.Jisá. 71:5.

4. Ima iahi i u sola e tena ku ku kuatekesa mba ku ku fidisa ku sidivila Nzambi?

4 Mu kidi, o ku sola ku sidivila Jihova, ki kiene ngó o kima ki tena ku ku kuatekesa ku muenhu. Mu kifika, nange u dibhuidisa se ua-nda kazala mba kana, se ua-nda kazala ni nanhi, ni kuebhi ku ua-nda kalakala. O ima ioso íii iala ni valolo, maji kia dianga ua tokala ku sola ku sidivila Jihova ni muxima uê uoso. (Mate. 30:19, 20) Mukonda diahi? Mukonda o ima ioso íii i kalakala kumoxi. O ima i u sola ia lungu ni ukaza mba salu i tena ku kuatekesa mba ku fidisa o sidivisu i u bhanga phala Nzambi. (Sokesa ni Luka 14:16-20.) O kia mukuá se u sola ku sidivila Nzambi, ua-nda sola ué kiambote kaza diê ni salu iê. Mu kiki, kia dianga ua tokala ku sola o kima kia beta-o-kota ku muenhu uê.Fil. 1:10.

IHI I UANDA BHANGA MU UNZANGALA UÊ?

5, 6. Bhana phangu i londekesa kiebhi o ku sola kiambote, ku kuatekesa ku tambula maujitu a mukuá a ku sidivila Jihova. (Tala ué o diambu, “O Kima ki Nga Solo ki Nga Kexile Ngi Mon’a Ndenge” mu mulangidi iú.)

5 Se u dianga ku sola ku sidivila Nzambi, ua-nda kuijiia ihi ia mesena muéne kokué, ni ku sola kiebhi ki ua-nda mu sidivila. Saí phange mukua Japão ua soneka: “Kioso ki nga kexile ni 14 a mivu, ngendele mu boka ni kafunga ka kilunga, muéne ua mono kuila ki ngi uabhele o sidivisu ia ku boka. Ni henda ioso muéne ua ngi ambela: ‘Ndé ku bhata, Yuichiro. Xikama u xinganeke kiambote o ima ia bhange Jihova phala eie.’ Nga bhange kala kia ngi tendelesa. Mu kidi, nga bhiti izuua mu ku xinganeka ni ku samba ia lungu ni maka enhá. Bhofele bhofele, nga lungulula o ukexilu uami. Mu ku bhita kithangana, nga mateka ku uabhela ku sidivila Jihova. Nga mateka ku tanga milongi ia lungu ni akunji a jixi jengi, anga ngi mateka ku xinganeka ia lungu ni ku sidivila Nzambi ni muxima uoso.”

6 Yuichiro u suluka: “Nga solo ku bhanga ima ieji ngi kuatekesa ku sidivila Jihova mu jixi jengi. Mu kifika, nga solo ku di longa o dimi dia Kingileji. Kioso ki nga zubha o xikola nga solo ku kalakala ngó kaxaxi ka kizuua, nga kexile mu longa o dimi dia Kingileji, phala ku kala muboki ua thembu ioso. Kioso ki nga tenesa 20 a mivu nga mateka ku di longa o dimi dia Mongólia, eme ngai ku kunda kibuka kia aboki a dimi dia Mongólia. Mu ku bhita mivu iiadi, ku muvu ua 2007 ngai mu ixi ia Mongólia. Kioso ki ngai mu boka ni aboki a thembu ioso, nga mono kuila o athu a mesenene kuijiia o kidi, mukonda dia kiki nga solo kuia ku tunga mu ixi ienioió phala ku a kuatekesa. Nga vutuka ku Japão phala ku di sokejeka. Nga mateka o sidivisu ia thembu ioso ku ixi ia Mongólia ku mbeji ia Kasamanu, ku muvu ua 2008. Ki bhonza ku tunga mu ixi íii. Maji o athu a mu xikina o njimbu iambote, mu kiki, ngi tena ku a kuatekesa ku zukama kua Jihova. Nga mono kuma nga solo o kima kia beta-o-kota ku muenhu uami.”

7. Ihi i tua tokala o ku sola, ni phangu iahi ia tu xila Mozé?

7 Muthu uoso-uoso, mbangi ia Jihova ua tokala ku sola ihi ia-nda bhanga ni kithangana kiê. (Josu. 24:15) Ki tu tena ku mi tangela se mua tokala ku kazala, mba se nanhi  mua tokala ku kazala né, mba salu iebhi i mua tokala ku sola. O kuila mua-nda sola salu ki i bhingi ku tambula ilongesu mu ithangana iavulu? Saí minzangala mudienu Jikidistá, a tungu mu jisanzala muene o uadiama, a mukuá a tungu mu jimbanza muene o umvuama. Ku mundu uoso kuezala minzangala kála enu, kala muthu uala ni ídifua iê ni uhete uê ni kixikanu kiê. Nange ima iavulu ki i difu ko kuenu, kála kia kexile o minzangala akua Jihebeleu mu ixi ia Ijitu, ka difuile ni munzangala Mozé. Muéne uexile mvuama mukonda uexile mulaula a sobha Falaó, maji o minzangala ia mukuá, exile abhika. (Mak. 1:13, 14; Ika. 7:21, 22) Kála enu, ene akexile mu ithangana ia bhonzele. (Mak. 19:4-6) Muthu ni muthu ua solo ihi ia tokalele o ku bhanga ni muenhu uê. Maji Mozé ua solo kiambote.Tanga Jihebeleu 11:24-27.

8. Kuebhi ku mu tena ku sanga kikuatekesu phala ku sola ni unjimu?

8 Jihova u ku kuatekesa ku sola ni unjimu mu unzangala uê. Muéne u ku longa itumu ia Bibidia i ku kuatekesa mu ithangana ioso. (Jisá. 32:8) O jitata jê ja Kidistá ni tufunga mu kilunga a tena ku kulondekesa o ibatulu i tena ku ku kuatekesa kioso ki u dibhana ni ibhidi. (Jisa. 1:8, 9) Tu di longe itumu itatu ia Bibidia i tena ku ku kuatekesa ku sola ni unjimu.

ITUMU ITATU IA BIBIDIA I TENA KU KU KUATEKESA

9. (a) Kiebhi Jihova kia tu bhana o ujitu ua ku sola kia uabha mu kiki kia iibha? (b) ‘O ku dianga o ku sota o Utuminu ua Nzambi’ ku tu bhekela maujitu ahi?

9 Diangenu-phe kusota o Utuminu ua Nzambi ni uiukilu uê. (Tanga Matesu 6:19-21, 24-26, 31-34.) Jihova ua tu bhana o ufôlo ua ku sola. Muéne ka zuela kuila ua tokala ku bhita o kithangana kioso ku muenhu uê mu ku boka o Utuminu ua Nzambi. Maji Jezú ua tu bhana kitumu ki tu kuatekesa ku dianga ku sota o Utuminu. O ukexilu uê ua ku kaiela o kitumu kiki, kia-nda ku kuatekesa kulondekesa o henda iê kua Nzambi, o henda iê ku athu ni kisakidilu kiê ku kidielelu kia muenhu ua kalela-ku. Kioso ki u xinganeka mu ukaza ni salu, xinganeka ué se o kima ki ua-nda sola kia-nda ku bhangesa ku sota kiavulu o jimbongo mba kia-nda ku kuatekesa ku bandekesa o vondadi iê ia ku boka o Utuminu ua Nzambi ni uiukilu uê.

10. Ihi ia bhangesa Jezú ku sanguluka, ni ihi i tena ku ku sangulukisa?

10 Sota o ku zediua mu ku sidivila akuenu. (Tanga Ikalakalu 20:20, 21, 24, 35.) Jezú ua tu longo o kitumu kiki kia dikota. Muéne ua sangulukile kiavulu ku muenhu, mukonda muéne ua bhangele o vondadi ia Tat’ê mu veji dia ku bhanga o vondadi iê. Jezú ua sangulukile kiavulu mu ku mona o athu ku xikina o njimbu iambote. (Luka 10:21; Nzuá 4:34) Nange eie uejiia kiá o ku sanguluka kuijila mu ku kuatekesa o athu. Se u sola ni kikuatekesu kia itumu ia tu longo Jezú, ua-nda sanguluka, ua-nda sangulukisa ué Jihova.Jisa. 27:11.

11. Mukonda diahi Mbaluke ka sangulukile dingi, ni ihi ia mu tendelesa Jihova?

11 O ku sanguluka kuetu kua beta-o-kota kuijila mu ku sidivila Jihova. (Jisa. 16:20) Maji tu mona kuma nange Mbaluke, uexile musoneki ua Jelemiia ua jimbile o kidi kiki. Saí kithangana muéne ka sangulukile dingi mu ku bhanga o sidivisu ia Jihova. Jihova ua mu ambela: “Eie anga uia ni kusota maunéne? Kana ku a sota; Mukonda nga-nda ku bheka kuiibha ku thandu dia xitu ioso . . . eie-phe o muenhu ué uene u nga-nda ku ku bhana kuma iene o mbole ié kuoso-kuoso ku u di texila.” (Jel. 45:3, 5) Ihi i u banza? Ihi ia sangulukisa Mbaluke—o ku sota o jimbongo mba ku bhuluka kala selevende ia fiiele ia Nzambi, kioso kia buika Jeluzaleme.Tiia. 1:12.

12. Ihi ia solo Ramiro ia mu bhangesa ku sanguluka ku muenhu?

12 Phang’etu Ramiro, ua sange ku  sanguluka kua kidi mu ku sidivila o athu. Muéne uambe: “O muiji uami ngadiama, ua tungu mu sanzala ku Milundu ia Andes. Phang’ami ia dikota ua mesenene ku ngi futila o xikola ia katunda, iú uexile ujitu ua dikota. Maji ki ku bhitile luua thembu, tundé kia ngi batizele kala Mbangi ia Jihova, nga tambuile ué o ujitu ua mukuá—saí muboki ua thembu ioso ua ngi ixana phala kuia mu boka ni muéne mu sanzala iofele. Eme ngai, nga di longo ku bhuta o ndemba, anga ngi iudika kididi kiami phala ku bhuta o ndemba, phala ku dikila o ibhindamu iami. Kioso ki tuai mu boka, o athu a xikina ku di longa o Bibidia. Mu ku bhita kithangana, nga mateka kuia mu kilunga kia ubhe kia dimi diami dia uvualukilu. Kua bhiti kiá dikuinhi dia mivu tundé ki nga mateka ku kalakala kala muboki ua thembu ioso. Se-ku kikalakalu ki tena ku ngi bhana o kisangusangu ki ngala na-kiu mu ku kuatekesa o athu ku di longa o njimbu iambote mu dimi dia uvualukilu.”

Ramiro uene mu sanguluka mu ku sidivila Jihova mu unzangala uê (Tala o kaxi 12)

13. Mukonda diahi, o kithangana kia unzangala kiene o kithangana kiambote phala ku sidivila Jihova ni muxima uoso?

13 Sanguluka mu ku sidivila Jihova mu unzangala uê. (Tanga Ndongixi 12:1.) Kana ku banza kuila ua tokala ku dianga ku sota salu phala ku sidivila Jihova. Lelu ki uala hanji munzangala kiene o kithangana kiambote phala ku sidivila Jihova ni muxima uoso. Minzangala iavulu ka kazala luua, ene ala ni sauidi, ni ngunzu ia ku tena ku dibhana ni ibhidi i moneka mu ikalakalu ia bhanga. Ihi i ua mesena ku bhanga phala Jihova mu unzangala uê? Nange ua mesena ku kala muboki ua thembu ioso. Nange ua mesena ku kalakala mu mbambe ia madimi a jixi jengi. Mba nange ua mesena ku kuatekesa dingi o kikalakalu mu kilunga kiê. Kabasa kikalakalu ki ua mesena ku bhanga mu sidivisu ia Nzambi, kia-nda bhinga kuila u dikila o ibhindamu iê. Thembu kuxi i nga-nda bhinga phala ku tambula ilongesu? Kikalakalu kiebhi ki nga-nda sola?

 BELESELA O ITUMU IA BIBIDIA PHALA KU KU KUATEKESA KU SOLA NI UNJIMU

14. Ihi i ua tokala kuijiia kioso ki u sola o salu?

14 O itumu itatu ia Bibidia i tua di longo, i tena ku kuatekesa ku sola o kikalakalu kia tokala phala eie. Sé phata o jimesene jê ja xikola ejiia kuebhi ku u tena ku sanga o salu mu mbanza iê. Mba nange o matenda a unguvulu a tena ku ku londekesa kuebhi ku u tena ku sanga salu mu mbanza iê mba mu mbanza mu ua mesena kuia ku sidivila Nzambi. O athu iá a tena ku ku kuatekesa—maji di lange. O athu ka zolo Jihova, nange a ku suínisa ku kala ni vondadi ia ku zola o mundu ku muxima uê. (1 Nzuá 2:15-17) Kioso ki u mona o ima iala ku mundu, o muxima uê u tena ku ku nganala.Tanga Jisabhu 14:15; Jel. 17:9.

15, 16. Nanhi u tena ku ku bhana ndunge phala ku sola kiambote o kikalakalu kiê?

15 Kioso ki u sanga o ikalakalu íii, ua-nda bhinga kikuatekesu kia Bibidia. (Jisa. 1:5) Nanhi u tena ku ku kuatekesa ku sola o salu iê bhu kaxi ka itumu ia Bibidia? Ívua o athu a zolo Jihova, a ku zolo, a kuijiia eie ni ibhindamu iê. Ene a-nda ku ku kuatekesa ku kala fiiele mu ima i u bhanga ni ima i ua mesena ku bhanga. Nange o milongi ia-nda ku bhana, ia-nda ku kuatekesa ku tonginina kiambote o ima i ua mesena. Se o Jitata jê a zolo Jihova, didi dibesá dia dikota! O tufunga mu kilunga kiê athu a kulu mu nzumbi, ene a tena ué ku ku bhana kikuatekesu. Ua tokala ué kuzuela ni aboki a thembu ioso ni tufunga tua ilunga. Mukonda diahi ene a solo ku sidivila Nzambi ni muxima uoso? Kiebhi kia mateka ku bhanga o sidivisu ia thembu ioso, ni kiebhi kia dikila o ibhindamu iâ? Mabesá ahi a tambula?Jisa. 15:22.

16 O athu ió a kuijiia kiambote a tena ku ku bhana ndunge iambote. Mu kifika, nange ua mesena ku xisa o xikola phala ku kala muboki ua thembu ioso mukonda kua mesena ku bhanga o kikalakalu kia bhonzo kia xikola. O muthu ua ku zolo u tena ku mona se mukonda diahi eie ua mesena ku xisa o xikola. Mu kiki, muéne u tena ku ku kuatekesa ku tendela kuila, o ku kolokota bhu xikola, kua-nda ku kuatekesa ku di longa ku kolokota. O ukexilu iú kima kia bhingi phala ku sidivila Jihova ni muxima uoso.Jisá. 141:5; Jisa. 6:6-10.

17. Salu iahi ki tu tokala ku i sola?

17 O athu oso a sidivila Jihova a-nda dibhana ni ibhidi i tena ku a zozesa mu nzumbi mba ku a sondolokesa kua Jihova. (1 Kol. 15:33; Kol. 2:8) Maji saí ikalakalu ia beta ku kala iluezu mu nzumbi phala eie. O kuila saí athu mu mbanza iê ‘a jimbidisa o kixikanu kiâ,’ mukonda dia ku sola salu ia iibha? (1 Tim. 1:19) Ua tokala ku dilanga phala ku sole salu i tena ku zanga o ukamba uê ni Nzambi.Jisa. 22:3.

SANGULUKA MU KU KALA U MUNZANGALA UA KIDISTÁ

18, 19. Se o muthu kala luua ni vondadi ia ku sidivila Jihova, ihi ia tokala ku bhanga?

18 Se ua mesena ku sidivila Jihova ni muxima uoso, katula mbote mu maujitu ejila mu ku kala munzangala ua Kidistá ua Nzambi. Sola o ima ia-nda ku ku kuatekesa ku sidivila Nzambi ni kisangusangu kioso mu ithangana íii ia bhonzo.Jisá. 148:12, 13.

19 Ku mbandu ia mukuá, ihi i ua tokala ku bhanga, se ki uala ni vondadi ia ku sidivila Jihova? Kana ku bhuila mu ku suínisa o kixikanu kiê. Kioso o poxolo Phaulu kia zubha ku jimbulula o ngunzu ia bhange phala ku tambula o mabesá a Nzambi, muéne ua soneka: “O ki kala sai ni bhuma bhu mua kuatela kilunji kiengi, kieniokio ue Nzambi u mi jimbuluila-kiu. Maji bhuoso kiá bhu tua suku, tu kuatienu uendelu umoxi.” (Fil. 3:15, 16) Kolokota mu ku xinganeka ku henda ia Nzambi ni itendelesu iê ia unjimu. Jihova muene o muthu u tena ku ku kuatekesa ku sola o kima kia beta-o-kota kindala ki uala hanji munzangala.