Ku bokona mu madisá

Ku bokona mu madisá

Mukonda dyahi tu Suluka ni “Kubhana Ibundu Yavulu”

Mukonda dyahi tu Suluka ni “Kubhana Ibundu Yavulu”

“Kyene ki bhekela athu kuximana Tata yami, se enu mwa bhana ibundu yavulu, anga mu kala jinga mu jixibulu jami.”—NZUÁ 15:8.

MIMBU: 45, 10

1, 2. (a) Ihi ya zwela Jezú ni maxibulu mê mu usuku ande dya kufwa? (Tala o foto ya dyanga.) (b) Mukonda dyahi kima kyambote phala etu kulembalala o kima ki tu bhangesa kuboka? (c) Ihi i twa-nda dilonga?

MU USUKU ande dya kufwa kwê, Jezú wa zwela kyavulu ni jipoxolo jê. Wa a tangela kwila wa a zolele kyavulu. Wa a tela kifika kya muxi wa muvidi, ki twa dilongo mu semana ya tundu-mu. Jezú wa mesenene kuswinisa o maxibulu mê ‘kusuluka ni kubhana ibundu yavulu,’ kifwa kukolokota ni kuboka o njimbu yambote ya Utuminu.—Nzuá 15:8.

2 Maji, Jezú ka a tangela ngó ihi ya bhingile kubhanga, wa a tangela we mukonda dyahi a bhingile ku ki bhanga. Mwene wa a londekesa o ima yeji kwa bhangesa ku suluka ni kuboka. Kima kyambote we etu ku lembalala mukonda dyahi twa bhingi ku suluka ni kubhana “umbangi ku akwa jixi joso.” (Matesu 24:13, 14) Mu milongi yiyi, twa-nda dilonga ima i wana mu Bibidya, i tu bhangesa kusuluka ni kuboka. Twa-nda dilonga we mawjitu a wana a tunda kwa Jihova, a tu kwatekesa kusuluka ni kubhana ibundu.

 TU XIMANA JIHOVA

3. (a) Kala kilondekesa o divulu dya Nzuá 15:8, kyebhi o kima kya beta-o-kota ki tu bhangesa kuboka? (b) Ihi ilombolola o ibundu ya muxi wa muvidi wa kifika kya Jezú? Mukonda dyahi o kisokesu kiki kya tokala mwene?

3 O kima kya beta o kota ki tu bhangesa kuboka kyenyiki: Twa mesena kuximana Jihova ni kuzelesa o dijina dyê. (Tanga Nzuá 15:1, 8.) Kyoso Jezú kya te o kifika kya muxi wa muvidi, mwene wa sokesa Jihova ni kidimakaji, wa kunu mividi. Jezú wambe kwila, mwene wexile o kilombolwelu kya muxi wa muvidi, o akayedi’ê exile o jithangu. (Nzuá 15:5) Mu kifika kiki, o ibundu ya muxi wa muvidi, ilombolola o ibundu yeji bhana o maxibulu mba o kikalakalu kya kuboka kyeji bhanga. Jezú wambela o jipoxolo jê: “Kyene ki bhekela athu kuximana Tata yami, se enu mwa bhana ibundu yavulu.” Se mividi i bhana ibundu yambote, kijingu phala o kidimakaji. Kyene kimoxi we, kyoso ki tu bhanga yoso mu kuboka o njimbu ya Utuminu, tu bhana kijingu kwa Jihova.—Matesu 25:20-23.

Kyoso ki tu bhanga yoso phala kuboka ya lungu ni Utuminu, twa mu bhana kijingu kwa Jihova

4. (a) Kyebhi ki tu tena kuzelesa o dijina dya Nzambi? (b) Kyebhi ki u divwa ni ujitu wa kuzelesa o dijina dya Nzambi u wala na-u?

4 Dijina dya Nzambi, dijina dikola kyá. Ki tu tena kubhanga kima phala ku ki kôlesa dingi. Mu kiki-phe, kyebhi ki tu zelesa o dijina dya Nzambi kyoso ki tu boka? Tala ya zwela polofeta Izaya: “Kôlesenu Jihova dya Ilômbo yeta.” (Izaia 8:13) Tu zelesa o dijina dya Nzambi Jihova, kyoso ki tu xikina kwila dya túndu o majina moso, ni kyoso ki tu kwatekesa akwetu kutendela mukonda dyahi didi dijina dikôla. (Matesu 6:9) Mu kifika, kyoso ki tu longa o athu o kidi kya lungu ni idifwa ya Jihova, ni vondadi yê phala o athu kutambula o mwenyu wa kalela-ku mu Palaízu mu ixi, twa mu a kwatekesa kumona kwila, ima yoso yayibha ya tatela Satanaji kwa Jihova, makutu. (Dimatekenu 3:1-5) Tu zelesa we o dijina dya Nzambi, kyoso ki tu kwatekesa athu kwijiya kwila, Jihova kya mu fwama o “kutambula fuma ni ujitu, ni unéne.” (Dijingunuinu 4:11) Rune, wexile muboki wa thembu yoso mu 16 kya mivu wambe: “Kwijiya kwila, a ngi bhana o kithangana kya kubhana umbangi wa lungu ni Mubhangi wa ngongo yoso, kya ngi bhangesa kulondekesa kisakidilu. Kiki kya ngi bhana hanji ya kusuluka ni kuboka.”

TWA ZOLO JIHOVA NI MON’Ê

5. (a) Kyebhi o kima kyo tange mu divulu dya Nzuá 15:9, 10, ki tu bhangesa kuboka? Kyebhi Jezú kya kwatekesa o maxibulu mê kutendela kwila eji bhinga kukolokota?

5 Tanga Nzwá 15:9, 10. O kima kya kayadi ki tu bhangesa kuboka o Utuminu, o henda yetu kwa Jihova ni kwa Jezú. (Marku 12:30; Nzuá 14:15) ‘Kale-nu mu henda yami’ kyene kya tendelesa Jezú ku maxibulu mê.’ Mukonda dyahi Jezú wa zwela kiki? Mwene wejidile kwila, o maxibulu mê eji bhinga kukolokota phala kusuluka mu ukidistá wa kidi. Mu divulu dya Nzwá 15:4-10, tu mona kwila, Jezú wa tumbula lwavulu o kizwelu ‘kalenu’ phala kukwatekesa o maxibulu  mê kutendela kwila, eji bhinga kukolokota.

6. Kyebhi ki tu londekesa kwila, twa mesena kukala mu henda ya Kidistu?

6 Kyebhi ki tu londekesa kwila, twa mesena kukala mu henda ya Kidistu ni ku tu xikina kwala mwene? Mu ku mu belesela. Jezú wa mu tu bhinga ngó phala kubhanga o ima ya bhange mwene. Mwene wambe: ‘Ng’aluka o ijila ya Tata yami, eme ngala mu henda yê.’ Jezú wa tu xila phangu.—Nzuá 13:15.

7. Kyebhi o henda ya lungu ni kubelesela?

7 Jezú wa jimbulula kyambote kyebhi o henda ya lungu ni kubelesela, kyoso kyambe: “Woso wa kwata o ijila yami, anga u i aluka, mwène muthu wa ngi zola.” (Nzuá 14:21) O ijila ya Jezú i tunda kwa Tat’ê. Kyenyiki, kyoso ki tu belesela o kitumu kya Jezú kya kuboka, twa mu londekesa we kwila, twa zolo Jihova. (Matesu 17:5; Nzuá 8:28) Kyoso ki tu londekesa o henda yetu kwa Jihova ni Jezú, ene a suluka mu ku tu zola.

TU DIMUNA O ATHU

8, 9. (a) Kima kyebhi dingi ki tu bhangesa kuboka? (b) Kyebhi o izwelu ya Jihova i tu sanga mu divulu dya Izekiiele 3:18, 19 ni 18:23 i tu kwatekesa kuboka?

8 O kima kya katatu ki tu bhangesa kuboka kiki: Twa mesena kudimuna o athu ya lungu ni kizuwa kya Jihova kya mu kwiza ni lusolo. Nowé a mu tumbula mu Bibidya kala “mujimbwidi.” (Tanga 2 Phetele 2:5.) Ande dya dilúvyu dyonene, Nowé wa tokalele kudimuna o athu mukonda dya kibwika. Mukonda dyahi tu zwela kiki? Mukonda Jezú wambe: “Kya kexile mu izuw’omo, kyoso dilúviu kiluwa diza, a kala mu kúdya, a kala mu kúnwa, ahatu ni mala a kala mu sakana, a bhana mu sakana, katé kizuwa kya bokona Nowé mu álaka. Kejidile kima katé dilúvyu dya menya ki dya tula dí dya a kungulula ene oso. Ni kya kà tukuluka Mon’a Muthu we kyene. (Matesu 24:38, 39) Sumbala athu avulu a kambe kwívwa Nowé, mwene wa suluka ni ku boka o njimbu ya ku dimuna ya mu bhele Jihova.

9 Lelu, etu tu boka o njimbu ya Utuminu phala kubhana kithangana ku athu kya kwijiya ya mesena Nzambi phala o athu ku hádya. Kala Jihova, etu twa mesena ni muxima woso kwila, athu oso evwa o njimbu yambote ni “a kole mwenyu.” (Izekiiele 18:23) Kyoso ki tu boka nzo ni inzo, ni mu ididi mu bhita athu avulu, twamu dimuna oso u tu tena kwila, o Utuminu wa Nzambi  wa-nda kwiza ni ku bwikisa o athu a yibha.—Izekiiele 3:18, 19; Daniiele 2:44; Dijingunuinu 14:6, 7.

TWA ZOLO O ATHU

10. (a) Kyebhi o kima kyo tange mu divulu dya Matesu 22:39, ki tu bhangesa kuboka? (b) Kyebhi Phawlu ni Sila kya kwatekesa o kasalelu wa kexile mu langa o kaleya ku Filipe?

10 O kima kya Kawana ki tu bhangesa kusuluka ni kuboka o henda yetu kwa athu. (Matesu 22:39) O henda yiyi i tu kwatekesa ku suluka ni kuboka, mukonda twejiya o kwila o athu nange a tena kulungulula o ibanzelu yâ, kyoso o ima ku myenyu yâ i lunguluka. Mu kifika, mu mbonge ya Filipe, Phawlu ni Sila a a tele mu kaleya kwala o jinguma. Maji mu kaxi ka usuku kwa bhiti kitungutu kya mavu, o kaleya anga ka tunguta katé ku madisésa, o mabhitu moso ma jikuka. O kasalelu mba kajisabhi ka kexile mu langa o kaleya, woma wa mu kwata, yú wa mesenene kudijibha, mukonda wa fika kwila o jipelêzu ja jituka, jí ja lenge. Maji Phawlu-phe wa mu handekela, wixi: “Ku di bhange kyokyo!” O kasalelu webhudisa: ‘Eme ngi bhanga kyebhi phala kubhuluka?’ Phawlu ni Sila a mu tangela exi: “Xikana Ngana Jezú, nda u bhuluke.”—Ikalakalu 16:25-34.

Etu tu boka mukonda dya henda yetu kwa Jihova, Jezú, ni athu (Tala o kaxi 5, 10)

11, 12. (a) Ihi i tu longa o musoso wa kasalelu ya lungu ni ukunji wetu? (b) Mukonda dyahi twa mesena kusuluka ni kuboka?

11 Disá dyahi di tu longa o musoso wa kasalelu wa lungu ni kikalakalu kya kuboka? O kasalelu wa lungulula ngó o ibanzelu yê, wa bhingi ngó o kikwatekesu kyoso kya bhiti o kitungutu mu kaleya. Kyene we kimoxi, say athu a ditunu kudilonga o njimbu ya Bibidya a tena ku lungulula o ixinganeku yâ, ni ku bhinga ki kwatekesu kyoso kya bhita ni mavuwa ku mwenyu. Nange a luwala mukonda dya ku a kaya ku salu mba a di senge. Amukwa a tena kuluwala mukonda dya kukata mba kufunda ndandu. Kyoso ima yiyi ki i bhita, o athu a mateka kudibhanga ibhwidisu ya lungu ni mwenyu, ka banzele kudibhanga yú. Nange ene a dibhwidisa, ‘Eme ngi bhanga kyebhi phala kubhuluka?’ Ene a tena kyâ kumesena kudilonga o njimbu ya lungu ni kidyelelu ki twala na-kyu, mu veji ya dyanga.

12 Kyenyiki-phe, se tu suluka ni kuboka, twa-nda tena kusanga o athu a mesena kuxikina o kiximbakatesu ki twa a bhekela. (Izaia 61:1) Charlotte, wexile muboki wa thembu yoso mu 38 dya mivu wambe: “O athu lelu a jimbidila. Ene a bhindamena kwívwa o njimbu yambote.” Ejvor, wexile muboki wa thembu yoso mu 34 dya mivu wambe we: “Mu izuwa ya lelu, athu avulu ala ni kikote ku muxima. Eme nga mesenene mwene kwa kwatekesa. Kiki kya ngi swinisa kuboka.” Sé phata, o henda yetu kwa athu, kima ki tu bhangesa o kuboka!

MAWJITU A TU KWATEKESA KUKOLOKOTA

13, 14. (a) Ujitu webhi u tu sanga mu divulu dya Nzuá 15:11? (b) Kyebhi ki tu tena kusanguluka kala kya sangulukile Jezú? (c) O kusanguluka ku tu kwatekesa kyebhi mu ukunji?

13 Mu usuku ande dya kufwa kwê, Jezú wa tumbula we mawjitu eji kwatekesa o maxibulu mê ku suluka ni kubhana ibundu. Mawjitu enyá ihi? A tu kwatekesa kyebhi?

14 O ujitu wa kisangusangu. O kwila o sidivisu ya kuboka dibunda dya neme phala etu? Kana. Kyoso Jezú kya te o kifika kya muvidi, mwene wambe kwila, kyoso ki tu boka tu sanguluka kala kya sangulukile  mwene. (Tanga Nzuá 15:11.) Kiki ki bhita kyebhi? Lembalala kwila, mu kifika kya muxi wa muvidi, Jezú wa di sokesa ni muvidi, o maxibulu wa a sokesa ni jithangu. O jithangu jya muvidi, ji tambula ngó menya ni ima ya mukwa ya tokala, se ji naminina ku muxi. Se tu naminina we kwa Jezú, twa-nda kala ni kusanguluka kwala na-ku mwene, o kusanguluka kwijila mu kubhanga o vondadi ya Nzambi. (Nzuá 4:34; 17:13; 1 Phetele 2:21) Hanne, wexile muboki wa thembu yoso mu 40 a mivu, wambe we: “O kusanguluka ku ngi kala na-ku ku muxima kyoso ki ngi tunda mu boka, kwa ngi swinisa kusuluka mu sidivisu yami kwa Jihova.” O kusanguluka ku tu bhana nguzu ya kusuluka, né mwene se athu avulu ka mu tu bhana mátwi.—Matesu 5:10-12.

15. (a) Mu divulu dya Nzuá 14:27, tu sanga-mu ujitu webhi? (b) Kyebhi o kutululuka ku tu kwatekesa kubhana ibundu?

15 O ujitu wa kutululuka. (Tanga Nzuá 14:27.) Mu usuku ande dya kufwa kwê, Jezú wambela o jipoxolo jê: ‘nga mi bhana o ku tululuka kwami.’ O kutululuka kwa Jezú ku tu kwatekesa kyebhi mu sedivisu ya kuboka? Kyoso ki tu suluka mu kuboka, muxima wetu u tululuka mukonda twejiya kwila twa mu sangulukisa Jihova ni Jezú. (Jisálamu 149:4; Loma 5:3, 4; Kolose 3:15) Ulf, wa kalakala kala muboki wa thembu yoso mu 45 a mivu, wambe: “O sidivisu ya kuboka i ngi bhangesa kubhwila, maji i ngi bhekela kisangusangu kya kidi, i bhana we valolo ku mwenyu wami.” Tu sakidila kyavulu mu kusanga o kutululuka kwa kidi, ku nangenena!

16. (a) Ujitu webhi u tu sanga mu divulu dya Nzuá 15:15? (b) Kyebhi o jipoxolo kyeji kolesa o ukamba wâ ni Jezú?

16 Ujitu wa ukamba. Kyoso Jezú kyambela o maxibulu mê kwila, wa mesenene o kusanguluka kwâ, mwene wa jimbulula mukonda dyahi kima kyambote kulondekesa henda ya kidi. (Nzuá 15:11-13) Mwene wambe: “Nga m’ixana-phe mu makamba.” Ujitu wa dikota kukala dikamba dya Jezú! Maji ihi ya tokalele kubhanga o jipoxolo phala kukala mu ukamba yú? Jezú wa jimbulula: “Eme nga mi tumu ni mwende ni kubhana ibundu.” (Tanga Nzuá 15:14-16.) Kiki kilombolola, kusuluka ni kuboka. Mu kubhita mivu iyadi, Jezú wambela o jipoxolo jê: “O ki muya, mwenda ni kuta Maka, kwila:  ‘Utuminu wa Dyulu wa zukama.’” (Matesu 10:7) Kiki kyene kya bhangesa Jezú kuswinisa o maxibulu mê kukolokota ni kuboka, mu usuku ande dya kufwa. (Matesu 24:13; Marku 3:14) Sé phata Jezú wejidile kwila, kweji bhonza kukumbidila o kitendelesu kyê. Maji ene eji tena kubhanga kiki, ni kukolesa o ukamba yú. Kyebhi? Ni kikwatekesu kya ujitu wa mukwá.

17, 18. (a) Mu divulu dya Nzuá 14:27, tu sanga-mu ujitu webhi? (b) O ujitu yú wa kwatekesa kyebhi o jipoxolo? (c) Ujitu webhi u tu kwatekesa lelu?

17 Itambwijilu ya misambu yetu. Jezú wambe: “Bhingenu yoso i mwa mesena, a mi bhana-yu.” (Nzuá 15:7, 16) O kikanenu kya Jezú nange kya kolokotesa o jipoxolo! * (Tala kulwiji.) Mu kidi, o jipoxolo ka kexile mu tendela kyambote kwila, kwa kambele ngó Jezú weji fwa. Maji o kufwa kwê ki kulombolola kwila, ene eji kamba kikwatekesu. Jihova wa kexile polondo phala kutambwijila o misambu yâ ni ku a kwatekesa mu kikalakalu kya kuboka. Kyene mwene kya bhange. Ki kubhiti thembu yavulu kyoso Jezú kyafu, o jipoxolo a bhingi kuswina kwa Jihova, Jihova wa tambwijila o misambu yâ.—Ikalakalu 4:29, 31.

Tu tena kudyelela kwila, Jihova wa-nda tambwijila kyoso ki tu bhinga kikwatekesu mu musambu (Tala o kaxi 18)

18 Kiki kyene we kyene mu bhita lelu. Kyoso ki tu kolokota mu sidivisu ya kuboka, tu kala tu makamba a Jezú. Se kya mu tu bhonza kuboka, tu tena kudyelela kwila, Jihova wa-nda tambwijila kyoso ki tu mu bhinga kikwatekesu mu musambu. (Filipe 4:13) Tu sakidila kyavulu Jihova mu kutambwijila o misambu yetu, tu sakidila mu kukala tu makamba a Jezú. O mawjitu a tunda kwa Jihova, a tu bhana nguzu phala ni tu suluke mu kubhana ibundu.—Tiiaku 1:17.

19. (a) Mukonda dyahi twa mu suluka ni kuboka? (b) Ihi i tu kwatekesa kuzubha o kikalakalu kya tu bhana Nzambi?

19 Mu milongi yiyi, twa dilongo ima itatu i tu kwatekesa kusuluka mu kuboka: Kuximana Jihova, kuzelesa o dijina dyê, kulondekesa o henda yetu kwa Jihova ni kwa Jezú, kudimuna ni kulondekesa henda yetu ku athu. Twa dilongo we ya lungu ni mawjitu a wana: kisangusangu, kutululuka, ukamba ni itambwijilu ya misambu yetu. O mawjitu yâ, a tu bhana nguzu ya kuzubha o kikalakalu kya tu bhana Nzambi. Jihova u sanguluka kyavulu kyoso kya tu mona twa mu kalakala ni nguzu yoso “phala kwima ibundu”!

^ kax. 17 Kyoso kya kexile mu zwela ni jipoxolo, Jezú wa a lembalesa kwila Jihova weji tambwijila o misambu yâ veji javulu.—Nzuá 14:13; 15:7, 16; 16:23.