Ku bokona mu madisá

Ku bokona mu madisá

Ngalasa—Kidifua ki Tunda Kua Nzambi

Ngalasa—Kidifua ki Tunda Kua Nzambi

ATHU oso a mesena kusanguluka. Maji o Bibidia iambele kiá kuila mu izuua iii ia sukidila-ku, “kuanda kuiza jithembu jabhonzo.” (2 Timote 3:1) Sai athu a kambe kisangusangu mukonda a a talatala kiaiibha, amukuá mukonda dia mauhaxi, ku kamba salu, mba ku funda ndandu. Amukuá ka sanguluka mukonda kua bhiti kima ku muenhu uâ kia a thandanganhesa mba kia a luualesa. O abhezi a Jihova, a tena uá kubhita mu maka a a katula o kusanguluka. Se ki bhita n’eie, kiebhi ki u tena kusanguluka dingi?

Phala kutambuijila o kibhuidisu kiki, kia dianga tua bhingi kutendela kiebhi ki kala o kusanguluka mba ngalasa ia kidi. Lua mukuá, tua-nda mona ue phangu ia athu a sangulukile né muene ni ibhidi ku mienhu iâ. Mu kusuluka tua-nda mona kiebhi ki tu tena kukala ni kisangusangu ni ku ki bandekesa dingi.

O NGALASA MBA KUSANGULUKA IHI?

Kusanguluka ki kiene kimoxi ni kuelela. Xinganeka: O muthu ua kodiua, kama koso-koso uelela ngó. Maji kioso o uhólua ki u bhita, anga u mona o ibhidi ku muenhu, muene kolela dingi. Mu kidi, o uhôlua ua mu bhangesa kuolela, maji o kusanguluka kuê, ki kua kidi kana.—Jisabhu 14:13.

O kusanguluka kua kidi, o ukexilu u tu divua ku muxima kioso ki tu tambula mba ki tu kingila kima kiambote ku muenhu. Kusanguluka kulombolola ue kukala ni ngalasa né muene se tua mu bhita mu ibhidi mba tuala kiambote ku muenhu. (1 Tesalonika 1:6) Mu kidi, tu tena kuluuala mukonda dia kima, maji né kiki tu kala ni kisangusangu. Mu kifika, o jipoxolo a a betele mukonda dia kuboka o njimbu ia lungu ni Jezú. Maji, ene ‘a tunda mu Inzo ia Kufundisa ni kusanguluka kuavulu, kuma Nzambi ua a kiti athu a fuama kutambula malebhu mukonda dia dijina didi dia Jezú.’ (Ikalakalu 5:41) Ene ka sangulukile mukonda a a betele, maji mukonda a tenene kukala fiiele kua Nzambi.

O kusanguluka kua kidi, ki kuiza mu kingoho. Mukonda diahi? Mukonda o kusanguluka kua kidi mba ngalasa i bhanga mbandu ia kibundu kiima o nzumbi ikola ia Nzambi. O nzumbi ikola, i tu kuatekesa ku “zuata o muthu uobhe.” O kusanguluka kubhanga mbandu ku uthu iú uobhe. (Efezo 4:24; Ngalásia 5:22) Mu kiki, se tu sanguluka, ki kua-nda tu bhonza kudibhana ni ibhidi ietu.

JIPHANGU JI TUA BHINGI KUKAIELA

Jihova ua mesenene kumona ima iambote mu ixi, ka mesenene o ima iaiibha i tuene mu mona lelu. Sumbala o athu a bhanga ima iaiibha, Jihova ka lungulula o ukexilu uê ua kusanguluka. O Bibidia izuela kuila, mu kididi ki kola kia Nzambi muala “nguzu ni kutana.” (1 Malunda 16:27) Jihova u sanguluka ue kiavulu mu kumona o ima iambote i bhanga o jiselevende jê mu ixi.—Jisabhu 27:11.

Tu kaiela o phangu ia Jihova, se ki tu luuala kioso o ima i kamba kubhita kala ki tua mesenene. Mu veji dia ku thandanganha, tu tena kubanza mu ima iambote i tuala na-iu, ni ku kingila ni muanhu  uoso o ima iambote i tua-nda tambula ku hádia. *—Tala ku luiji.

Mu Bibidia tu sanga-mu phangu ia athu avulu a dibhanene ni maka ku muenhu, maji a sangulukile. Mu kifika, Mbalahamu ua dibhanene ni ibhidi iavulu ku muenhu, sai athu a mu bhekela maka. Maji muene ua suluka ni kusanguluka. (Dimatekenu 12:10-20; 14:8-16; 16:4, 5; 20:1-18; 21:8, 9) Kiebhi Mbalahamu kia tenene kubhanga kiki? Muene uexile mu banza mu kidielelu kia kukala ku mundu uobhe, ueji tumina Mexiia. (Dimatekenu 22:15-18; Jihebeleu 11:10) Jezú uambe: “Tat’enu Mbalahamu, ua tanene ni ngalasa mukonda dia kumona o kizuua kiami.” (Nzuá 8:56) Tu tena kukaiela o phangu ia Mbalahamu mu kuxinganeka o kusanguluka ku tua-nda kala na-ku ku mundu uobhe.—Loma 8:21.

Phaulu ni Sila exile ni kixikanu kia kolo mu ikanenu ia Nzambi. Mukonda dia kiki, ene a suluka ni kisangusangu né muene ni ibhidi ia bhitile naiu. Mu kifika, kioso kia zubhile ku a beta ni ku a kasa mu kaleia, ene a suluka “mu kusamba ni kuimbila Nzambi.” (Ikalakalu 16:23-25) Ene a kolokota né muene ni ibhidi mukonda a suluka ni kuxinganeka mu ikanenu ia Nzambi ia lungu ni hádia. O kuijiia kuila, exile mu tala hadi mukonda dia kukaiela Kristu, kua a bhekela kusanguluka kua dikota. Tu kaiela o phangu ia Phaulu ni Sila, kioso ki tu lembalala o mabesá ijila mu ku kolokota mu ufiiele uetu kua Nzambi.—Filipe 1:12-14.

Mu izuua ietu, kuene jiphange javulu a kolokota ni kusanguluka né muene ni ibhidi iene mu bhita naiu. Mu kifika, mu mbeji ia kamoxi ua 2013, Divuua dia Dikota dia tula mu ixi ia Filipinas. Diene dia buikisa 1.000 ia jinzo ja athu exile Jimbangi ja Jihova. O inzo ia George, iexile mu mbanza ia Tacloban, ia budika. George uambe: “Sumbala ni ioso ia bhiti o jiphange ja sanguluka. Ki ngi tena kujimbulula o kusanguluka ku tuala na-ku.” Se tu sota kuxinganeka mu ima iene mu tu bhangela Jihova, ni kulondekesa o kisakidilu kietu, tua-nda kolokota ni kusanguluka, né muene se tu bhita mu jiphaxi javulu. Ima iebhi dingi i bhanga Jihova i tu sangulukisa?

O IMA I TU BHANGESA KUSANGULUKA

O kima ki tu bhekela dingi o kisangusangu o ukamba uetu ni Jihova. Tuejiia o Sobha ia ngongo ioso. Muene Tat’etu, Nzambi ni Kamba dietu!—Jisálamu 71:17, 18.

Tu sakidila ue Jihova mu ku tu bhana o muenhu ni ukexilu ua ku kemba ni kusanguluka. (Ndongixi 3:12, 13) Mukonda muene ua tu zukama, tu tena ku tendela ia mesena muene ko kuetu, tuejiia ue kiebhi ki tua tokala kuambata o muenhu. (Kolose 1:9, 10) Maji, athu avulu kejiia se mukonda diahi ala ku muenhu. Phala ku londekesa kuila o Jikidistá ka difu ni athu iá, Phaulu ua soneka: ‘Ima kiluua mesu a i mona, kiluua mátui a ivua, Kiluua ngó muxima ua muthu u i fika kuila hádia i bhita, Iene ima ia iudika Nzambi mu ku i bhana oso a mu zola. Maji etu-phe Nzambi ua tu tukuluila-iu kua nzumbi iê.’ (1 Kolindo 2:9, 10) O kuijiia o vondadi ia Jihova ni mukonda diahi muene ua tu bhange, ku tu bhekela kusanguluka.

Jihova ua bhange dingi ima iengi phala o mbote ietu. Muene ua bhange kima, phala ku loloka o ituxi ietu. (1 Nzuá 2:12) Jihova ua tu bhana o kidielelu kia muenhu ua kalelaku ku mundu uobhe, kua kambe ngó ua-nda bhixila. (Loma 12:12) Né muene kindala, Jihova ua tu bhana kiá makamba avulu, u tu bheza nau kumoxi. (Jisálamu 133:1) Muene u tu langa phala Satanaji ni madimonho mê ka tu bhange kima. (Jisálamu 91:11) Se tu kamba kujimba o ima ioso iene mu tu bhana Jihova, kisangusangu kietu kia-nda dibandekesa dingi.—Filipe 4:4.

KIEBHI KI TU TENA KUBANDEKESA O KUSANGULUKA KUETU

O kuila o Kidistá u tena kubandekesa dingi o kisangusangu kiê? Jezú uambe: “Nga mi ambela im’iíi, phala o kusanguluka kuami ku kale moxi dienu, o kusanguluka kuenu ku tenene.” (Nzuá  15:11) Kiki kilondekesa kuila, tu tena kubandekesa o kusanguluka kuetu. Tu tena kusokesa o kusanguluka kuetu ni túbhia. Se tua mesena kuila o túbhia tu uama dingi, tua tokala kubandekesa o jihuinhi. Lembalala: O nzumbi ikola i tu kuatekesa kusanguluka. Mu kiki se tua mesena kusanguluka dingi, tua tokala kusamba kua Nzambi mu kubhinga o nzumbi ikola. Kuxinganeka ue mu milongi ia Bibidia io soneke bhu kaxi ka nzumbi ikola, kua-nda tu kuatekesa.—Jisálamu 1:1, 2; Luka 11:13.

O kukalakala ni kusuina kuoso mu sidivisu ia Jihova, ku tena ue ku tu kuatekesa kubandekesa o kusanguluka kuetu. (Jisálamu 35:27; 112:1) Mukonda diahi? O Bibidia i tu tangela: “Xila Nzambi, u aluke o ijila iê, mukonda kiene kia fuama athu oso ku ki bhanga.” (Ndongixi 12:13) Etu a tu solo phala kubhanga o vondadi ia Nzambi. Mu kiki, kioso ki tu sidivila Jihova tu kala ni kisangusangu kua kidi ku muenhu uetu. *—Tala ku luiji.

MBOTE IJILA MU KULONDEKESA O KUSANGULUKA

Kioso ki tuia ni kubandekesa o kisangusangu kietu, tua-nda tambula dingi jimbote jengi. Mu kifika, Jihova ua-nda sanguluka dingi n’etu, se tu kolokota ni ku mu sidivila ni kusanguluka né-muene se tu kala ni maka. (Matendelelu 16:15; 1 Tesalonika 5:16-18) Kuma tuala ni kusanguluka kua kidi, ki tua-nda xinganeka kuila kukala ni jimbongo javulu kiene o kima kia beta-o-kota ku muenhu, kana. Mu veji dia kiki, tua-nda bhanga ioso phala kukuatekesa o Utuminu ua Nzambi. (Matesu 13:44) Kioso ki tu mona o mbote ijila mu kubhanga dingi mu kikalakalu kia Jihova, tua-nda sanguluka dingi, tua-nda divua kiambote ku muxima, tua-nda bandekesa o kusanguluka kua akuetu.—Ikalakalu 20:35; Filipe 1:3-5.

Lua mukuá, se o kisangusangu kietu ki vula, tua-nda kala ue dingi ni sauidi. O Bibidia iamba: “Muxima ua sanguluka, u di bhanga milongo ia mbote.” (Jisabhu 17:22) Sai ngijiie mu Universidade ia Nebraska, ku ixi ia Estados Unidos, ua tokuesa ia lungu ni sauidi. Muene uambe: “Se ua sanguluka ni muenhu ué kindala, kupholo ua-nda kala dingi ni sauidi ia soko.”

Mu kiki, né muene tuala mu ngongo ia bhonzo, tu tena ku sanguluka mu kidi, kioso ki tu tambula o nzumbi ikola mu kusamba, kudilonga ni kuxinganeka mu Mak’â Nzambi. Tu tena kubandekesa dingi o kisangusangu kietu, mu kuxinganeka mu ima iene ku tu bhana Jihova kindala, kukaiela o kixikanu kia akuetu, ni ku di suinisa phala kubhanga o vondadi ia Nzambi. Se tu bhanga kiki, tua-nda tena kuzuela kala kiambe Jisálamu 64:10: “Athu aiuka-phe a kà tanena mua Jihova, kuma a kondamena mua muene.”

^ kax. 10 Sai milongi ia-nda zuela ia lungu ni muanhu, mu mbandu iii ia lungu ni ‘kibundu kia nzumbi ikola.’

^ kax. 20 Phala kuijiia o maukexilu a mukuá a ku bandekesa o kusanguluka, tala o kaxa ni diambu: “ Maukexilu a Mukuá a Tena Kubandekesa o Kusanguluka.”