1, 2. Mukonda diahi o Jimbangi ja Jihova ala ni ukexilu uambote ua kuzuata? (Tala o foto ia dianga.)

SAÍ JURNALE ia ixi ia Holanda, ia tange o izuatu ia tele o atuameni a ngeleja mu kuia mu iônge iâ. O jurnale iambe: “Ene akexile mu ta izuatu ki ia fuama, benge-benge se kua kexile kalolo kavulu.” Maji o jurnale ia tange ué kuila, o Jimbangi ja Jihova a tele izuatu iambote mu kuia mu iônge iâ ia makota. Ia tange kuila o mala a zuatele tuzaku ni jingalavata, o ilumba ni ahatu a tele jisaia ja fuama, ja lebhele. O Jimbangi ja Jihova ene mu a ximana kiavulu mukonda dia ukexilu uâ uambote ua kuzuata. Poxolo Phaulu uambe kuila, o izuatu ia Jikidistá ia tokala i “fuama,” kála kia tokala kuzuata o jiselevende ja Nzambi. (1 Timote 2:9, 10) Sumbala Phaulu ua kexile mu zuela ia lungu ni ahatu, maji o itendelesu ia tokala ué ku mala Jikidistá.

 ² Tua tokala kukala ni ukexilu uambote ua kuzuata, mukonda tu mundu ua Jihova, ni kuila, o ukexilu iú uala ni valolo iavulu bhu pholo ia Nzambi. (Dimatekenu 3:21) O Bibidia i tu londekesa kuila Jihova, o Suke-ku mu ngongo ioso, uala ni ijila ia lungu ni uzuatelu ua jiselevende jê. Mu kiki, ki tu tokala ngó kuta izuatu mukonda tua i uabhela kana, maji o kia beta-o-kota, o izuatu ietu ia tokala kuiuka bhu pholo ia Suke-ku, Ngana Jihova.

3. O Kitumu kia bhele Nzambi ku akua Izalaiele ki tu longa ihi ia lungu ni ukexilu ua kuzuata?

³ Mu Kitumu Kia Mozé, mua kexile ijila ia langele akua Izalaiele ku maukexilu a iibha ni ufusa a athu a tungile mu’axaxi kâ. O Kitumu kia londekesele kuila, Jihova ka mesenene kuila, o diiala di ta izuatu ia muhatu, o muhatu u ta izuatu ia diiala. Lelu, o izuatu i bhonzesa kumona se o muthu diiala mba muhatu. (Tanga Matendelelu 22:5.) Mu Kitumu kiki, tua di longo kuma Jihova ua zembe o izuatu i bhangesa o mala kudifuangana ni ahatu, o ahatu kudifuangana ni mala, mba izuatu i bhonzesa kutungula se o muthu diiala mba muhatu.

4. Ihi i tena kukuatekesa o Jikidistá kusola kiambote o izuatu iâ?

⁴ O itumu ia Bibidia i tena ku tu kuatekesa kusola kiambote o izuatu ietu. O itumu íii ia tokala athu oso, né muene se mu ixi ietu mu bhanga mbambi iavulu mba kalolo. Ki tu bhingi ku tu tangela o izuatu ioso ia fuama ni izuatu ki ia fuama. Tua bhingi ngó kukaiela itumu ia Bibidia i tu kuatekesa kusola kiambote o izuatu i tua uabhela. Tua-nda dilonga itumu ia Bibidia ia-nda tu kuatekesa kusola o izuatu ietu, phala i kale izuatu “iauabha, ia ujitu, iatenena,” ia uabhela Nzambi.​—Loma 12:1, 2.

5, 6. Kiebhi o athu kia tokala kudivua mu kumona o uzuatelu uetu?

⁵ Nzambi ua tumina poxolo Phaulu kusoneka o kitumu kia dikota kiala mu divulu dia 2 Kolindo 6:4. (Tanga.) O ukexilu uetu ua kuzuata u londekesa kima ku athu a mu tu mona. Mu kumona o ukexilu uetu ua kuzuata, athu avulu a-nda xinganeka se tu athu a kídifua kiahi. (1 Samuuele 16:7) Kuma tu jiselevende ja Nzambi, ki tu tokala ngó kuta izuatu i tu bhangesa kudivua kiambote, mba izuatu i tua uabhela. O kubelesela o itumu ia Bibidia, ku tu kuatekesa kudituna o izuatu i naminina kiavulu  ku mukutu mba izuatu i suínisa o undumbu. Kiki kilondekesa kuila, ki tu tokala kuta izuatu ilondekesa o idiandu ia ujitu ia mukutu uetu. Kana muthu ua tokala kudivua kiaiibha mba kutala kuengi mukonda dia izuatu ietu.

⁶ Se tu zela ni kuta izuatu ia fuama, o athu a-nda tu xila dingi kuma tu jiselevende ja Jihova, o Ngana, Suke-ku. Amoxi a sota kuijiia dingi o Nzambi ietu, a xila dingi o kilunga kietu ni kuívua o njimbu i bhana o muenhu.

7, 8. Benge-benge mu kithangana kiebhi mu tua tokala kuzuata ni kilunji?

⁷ Kuma Nzambi ietu ia zele ni mukonda dia jiphange jetu, ni athu mu mbambe ietu, o izuatu ietu ia tokala i bhana kijingu kua Jihova ni ku njimbu i tuene mu boka. (Loma 13:8-10) Tua tokala kuta izuatu ia fuama, benge-benge kioso ki tuia mu iônge ni mu sidivisu ia kuboka. Tua tokala kuzuata mu ukexilu uambote, ulondekesa kuila, tu abhezi a Nzambi. (1 Timote 2:10) Mu kidi, saí  izuatu ia fuamena mu kididi kimoxi, maji mu kididi kiéngi kana. Kuma tu Jimbangi ja Jihova, ki tu tokala kubhangesa o athu kudivua kiaiibha, mukonda dia ukexilu uetu ua kuzuata.

⁸ Tanga 1 Kolindo 10:31. Kioso ki tuia mu iônge ia ilunga ni ia makota, tua tokala kuzuata kiambote ni kilunji. Ki tu tokala kukaiela o ukexilu uaiibha ua mundu ua kuzuata. Né muene ande mba kioso ki bhita o kiônge kia dikota, ni kioso ki tu bhixila mba ki tu tunda mu hotele, ki tu tokala kuta izuatu ia xidi. Mu kiki, ki tua-nda kala ni jisonhi ja kudilondekesa kuila, tu Jimbangi ja Jihova. Tua-nda kala ué polondo phala kubhana umbangi kabasa kithangana.

9, 10. Mukonda diahi o divulu dia Filipe 2:4, di tu kuatekesa kusola kiambote o uzuatelu uetu?

⁹ Tanga Filipe 2:4. Mukonda diahi tua tokala kuxinganeka kiebhi kia-nda divua o jiphange jetu ja mala ni ja ahetu mu kumona o uzuatelu uetu? Kima kimoxi o kuijiia kuila, o mundu ua Nzambi u bhanga nguzu iavulu phala kubelesela o kitendelesu kiki: “O jihânji jenu ja mu ngongo jala kukalakala moxi dienu, jibhenu-ju: ni undumbu, ni ufusa, ni hânji jaiibha, ni vondadi jabolo, ni luimbi, [kuma] o luimbi lua soko ni kukaiela iteka.” (Kolose 3:2, 5) Saí jiphange jetu, a xisa kiá o ukexilu ua undumbu, maji né kiki, ene mu bhânga hanji ni jihânji ja iibha. Se ki tu di lange, o ukexilu uetu ua kuzuata u tena ku a bhonzesa kubelesela o milongi ia Bibidia, ni kutolola o jihânji ja iibha. (1 Kolindo 6:9, 10) Mu kiki, ki tu mesena ku a bhangesa kukala ni jihânji ja iibha, kana.

¹⁰ Kioso ki tu kala mu’axaxi ka jiphange jetu, tu kala mu kididi kia kondama, mukonda ki tuala mu kaxi ka athu a suínisa o undumbu. O ukexilu uetu ua kuzuata, ua tokala kulondekesa kuila, tuala muene mu kididi kia kondama, ki kale kioso ki tu kala mu iônge mba mu ididi ia mukuá. Sumbala tuala ni ufolo ua kusola kioso ki tu zuata, maji o uzuatelu uetu ua tokala kukuatekesa akuetu kukala ni ibanzelu ni uzuelelu ua zele, ni ukexilu uambote bhu pholo ia Nzambi. (1 Phetele 1:15, 16) O henda ia kidi “ki iene kubhanga ufusa, ki iene kusota ngo o kiê.”​—1 Kolindo 13:4, 5.

11, 12. Kiebhi o divulu dia Ndongixi 3:1, 17 di tu kuatekesa kuzuata ni kilunji?

¹¹ Kioso o jiselevende ja Nzambi kia sola kioso kia-nda zuata, ene ejiia kuila, “sai thembu ia ima ioso, kixi ixinganeku mba ikalakalu.” (Ndongixi 3:1, 17) O thembu ia mbambi, ia kalolo, mba o uadiama  u tena ku tu bhangesa kuzuata kiaiibha. Maji o itendelesu ia Jihova ki iene mu lunguluka.​—Malakiia 3:6.

¹² Mu thembu ia kalolo, kubhonza kiavulu kusola izuatu ia ujitu ni ia fuama. O jiphange jetu a sakidila kiavulu kioso ki tu zuata kiambote, kana o izuatu i naminina mba ilondekesa o mukutu uetu. (Jobe 31:1) Né muene kioso ki tu kala mu palaia, mba mu kididi kioso-kioso kia kuzoua, o izuatu ietu ki i tokala kulondekesa o mukutu. (Jisabhu 11:2, 20) Né muene se o athu ku mundu ka zuata kiambote kioso kia kala mu ididi ia kuzoua, maji o uzuatelu uetu ua tokala kubhana kijingu kua Nzambi ietu ia zele, Jihova.

13. Mukonda diahi o milongi i tu sanga mu divulu dia 1 Kolindo 10:32, 33, i tu kuatekesa kusola kiambote o uzuatelu uetu?

¹³ Saí dingi kitumu kia mukuá ki tu kuatekesa kusola kiambote o izuatu ietu. Tua tokala kudilanga phala ki tu bhangese akuetu kudibhala. (Tanga 1 Kolindo 10: 32, 33.) Ki tu tokala kuta izuatu i bhalesa o jiphange jetu mba ió kene mu bheza Jihova. Poxolo Phaulu ua soneka: ‘Tuendienu kala muthu ni kuuabhela mukuâ, mu ima iambote i suínisa o kixikanu.’ Mu kusuluka, Phaulu uambe dingi: “Mukonda ni Kristu muène ka di uabhelele ngó muène.” (Loma 15:2, 3) Kála kia bhangele Jezú, o kubhanga o vondadi ia Nzambi ni kukuatekesa o athu, kuene kua tokala kukala ku pholo, o jivondadi jetu ndenge. Mu kiki, ki tua-nda sola izuatu i tua uabhela, maji i tena kufidisa o athu kuívua o njimbu iambote.

14. Kiebhi o jitata kia tena kulonga o tuana tuâ kubhana kijingu kua Nzambi mu ukexilu uâ ua kuzuata?

¹⁴ O jitata mu kilunga, ala ni kikalakalu kia kulonga o tuana tuâ kukaiela o itumu ia Bibidia. Kiki, kilombolola ué kuila, ene ni tuana tuâ a tokala kusangulukisa Nzambi mu kuzuata ni kilunji. (Jisabhu 22:6; 27:11) Kiebhi o jitata kia tena kulonga o tuana tuâ kuxila o Nzambi ietu ia zele, ni kubelesela o ijila iê? O jitata ja tokala kubhana phangu iambote ku tuana tuâ. Ni henda ioso, a tokala kulonga o tuana tuâ kuebhi ni kiebhi kia tena kusanga izuatu iambote. O tuana ka tokala kusola izuatu mukonda a i uabhela kana, maji o kia beta-o-kota a tokala kusola izuatu i bhana kijingu kua Jihova, mukonda tu akunji a Nzambi.

15. Ihi i tena ku tu kuatekesa kusola kiambote o izuatu?

¹⁵ O Bibidia, i tena ku tu kuatekesa kusola ima i bhana kijingu kua Nzambi. Né muene kiki, tua tokala kuta izuatu i tua uabhela. Nange ki tuala ni kitadi phala kusumba o izuatu i tua uabhela. Mukonda dia kiki, nange o izuatu i tu ta, ki sokela ni izuatu ia akuetu. Maji o izuatu ietu ia tokala i zela, i kala ia ujitu, i fuama phala o kithangana, a i xikina mu diembu dietu.

16. Mukonda diahi tua tokala kubhanga ioso-ni-ioso phala kuzuata kiambote?

¹⁶ Saí bhabha, kubhonza kusanga izuatu  ia ujitu ni ia fuama. Mu maloja avulu, tu sanga-mu ngó izuatu ki i fuama. Mukonda dia kiki, kubhinga thembu ni nguzu phala kusanga saia, buluza, mba kusola fatu, ni jikalasá ki ji naminina ku mukutu. Maji o jiphange jetu a-nda mona ni kuximana o nguzu i tu bhanga phala kuzuata ni kilunji. Kisangusangu kia dikota kubhana kijingu kua Tata ietu ia henda uene mu diulu, mu kubhanga ioso-ni-ioso, phala kuta izuatu i mu ximanesa.

17. Ihi i tena ku kuatekesa phange kuijiia se u kala ni muezu mba kana?

¹⁷ O kuila kima kia iibha o jiphange ja mala kukala ni muezu? Mu Kitumu kia bhele Nzambi kua Mozé, o mala a tokalele kukala ni muezu. Maji o Kitumu Kia Mozé, ki kia tokala ku Jikidistá, mu kiki, ka bhingi kukaiela o kitumu kiki. (Ijila 19:27; 21:5; Ngalásia 3:24, 25) Mu jixi ja mukuá, ki kima kiaiibha o muthu kukala ni muezu, mukonda ki ki fidisa athu kuívua o njimbu iambote. Katé muene saí jiphange tufunga ala uá ni miezu. Maji né muene kiki, akamukuá ka xikina kukala ni muezu. (1 Kolindo 8:9, 13; 10:32) Maji mu jixi ja mukuá, kikôla o muthu kukala ni muezu, mukonda dia kiki, o Jikidistá ka tokala kukala ni muezu. Mu jixi jiji, o kukala ni muezu kutena kufidisa o jiphange kubhana kijingu kua Nzambi, mba ‘kukala ni kima kia ku mu fundisa na-kiu.’​—1 Timote 3: 2, 7; Loma 15: 1-3.

18, 19. Kiebhi o divulu dia Mikeia 6:8, di tu kuatekesa?

¹⁸ Tu sakidila kiavulu Jihova mu kuila, muéne ka tu bhana mukanda muala o izuatu i tua tokala o kuta ni izuatu i tua tokala kudituna. Mu veji dia kiki, muéne ua tu bhana o ufolo ua kusola kioso ki tua-ndala kabasa tu belesela o itumu ia Bibidia. Mu kiki, kioso ki tu sola kiambote o ukexilu uetu ua kuzuata, tu londekesa kuila, tua mesena kusidivila Nzambi ni kuiuka kuoso.​—Mikeia 6:8.

¹⁹ Tu xikina ni kulenduka kuoso kuila, Jihova muthu ua zele, ukôla, ni kuila, o itendelesu iê ia beta-o-kota. Se tu londekesa o ukexilu ua kulenduka, tua-nda belesela o itendelesu iê. O kulenduka, kua-nda tu kuatekesa ué kuxila o ibanzelu ia akuetu.

20. Kiebhi o athu kia tokala kudivua mu kumona o uzuatelu uetu?

²⁰ O ukexilu uetu ua kuzuata, ua tokala kulondekesa kuila, tu jiselevende ja Jihova. Jihova uala ni itendelesu ia katunda, etu tua zediua mu ku i belesela. O jiphange jetu ja mala ni ja ahatu, ene mu a ximana kiavulu mukonda dia uzuatelu uâ, ni ukexilu uâ uambote. Ene a bhangesa athu avulu kuxikina o njimbu ia Bibidia i bhana muenhu, a bhana kijingu kua Jihova, ni ku mu sangulukisa. Kioso ki tu sola kiambote i tua-nda zuata, tua mu bhana kijingu kua Ió ‘u zuata ni ujitu ni ungana.’​—Jisálamu 104:1, 2.