Ku bokona mu madisá

Ku bokona mu madisá

Kolokota Kubhânga, Phala Kutambula o Mabesá a Jihova

Kolokota Kubhânga, Phala Kutambula o Mabesá a Jihova

“Ua bhânge ni Nzambi, ua bhânge ni athu, ene oso ua a lende.”​—DIMATEKENU 32:28.

MIMBU: 60, 38

1, 2. Ibhidi iebhi iene mu dibhana na-iu o jiselevende ja Jihova?

TUNDÉ mu izuua ia Abele, katé lelu, o jiselevende ja Nzambi jene mu bhânga phala kukolokota mu kusidivila Jihova. Poxolo Phaulu ua tangela o Jikidistá akua Hebeleu kuila, ene a “talele hadi iavulu.” (Jihebeleu 10:32-34) Poxolo Phaulu ua sokesa o kubhânga kua Jikidistá, ni jijoko ja kexile mu bhanga mu ixi ia Ngeléxia, kála o joko ia kulenga, ia kubhânga, ni ku dibhana jihome. (Jihebeleu 12:1, 4) Lelu, tua mu lenga phala kutambula o muenhu, maji tuala ni jinguma javulu ja mesena ku tu landukisa, ni ku tu katula o kisangusangu kia kusidivila Nzambi, phala ki tu tambule o mabesá a tu kanena muéne.

2 O ita ia dikota i tuala na-iu, o kubhânga ni Satanaji ni mundu uê. (Efezo 6:12) Ki tu tokala kukaiela o ilongesu ia mundu iú. Ki tu tokala ué kubhanga o ima iaiibha kála o ufusa, kuxibha makanha, o uhôlua ni kuxibha jidroga. Tua tokala ué kubhanga ioso phala ki tu luuale kiavulu, ni ku tolola o jihanji jetu jaiibha.​—2 Kolindo 10:3-6; Kolose 3:5-9.

3. Kiebhi Nzambi kia tu kuatekesa kubhânga ni jinguma jetu?

 3 O kuila, tu tena kubhânga ni kutolola o jinguma joso jiji? Tu tena! Maji kua-nda tu bhonza kiavulu! Phaulu ua di sokesa ni mukuá kubhanga o joko ia kudibhana jihome. Muéne uambe: ‘Ngi di bhanga ue kala ngi mutonoki ua jihome, home jê ki ji lueza.’ (1 Kolindo 9:26) Kála o muthu u bhânga ni nguma iê, etu ué tua tokala kubhânga ni jinguma jetu. Jihova u tu longa, ni ku tu kuatekesa phala kutolola o jinguma jetu. Muéne u bhanga kiki bhu kaxi ka Bibidia. Muéne u tu longa ué bhu kaxi ka madivulu metu, iônge ietu mu kilunga, ni iônge ia makota. O kuila, uene mu katula mbote mu ima ioso íii? Se ki u katula mbote, o jihome jé ja-nda lueza. Mu kiki, ki ua-nda tena kutolola o jinguma jé.

4. Kiebhi ki tu tena kutolola o kuiibha?

4 Tua tokala kudilanga mu ithangana ioso. Mukonda diahi? Mukonda o jinguma jetu a tena ku tu kuata mu kithangana ki tu ki fika, mba kioso ki tu zoza. O Bibidia i tu bhana itendelesu iambote. Iene i zuela: “Kana kuehela phulu ku mi tolola, inda enu-ku mu tolola o phulu ni mbote.” (Loma 12:21) Se tu bhanga ioso phala kutolola o kuiibha, tua-nda ditunda kiambote! Maji, se tu zoza, anga tu bhuila mu ita ietu, Satanaji, ni mundu uê, ni jihanji jetu ja xitu, a-nda tu tolola. Mu kiki, kana kubhuila, kana ku lembua. Kolokota, kana kuehela o maku mê kuzonda!​—1 Phetele 5:9.

5. (a) Ihi i tua tokala ku di lembalala, se tua mesena kutambula o mabesá a Nzambi? (b) Tua-nda di longa o phangu ia nanhi?

5 Phala kutolola o jinguma jetu, tua tokala ku di lembalala se mukonda diahi tua mu luua o ita. Tua mu bhanga kiki, mukonda tua mesena kukala ni ukamba uambote ni Nzambi, ni ku tambula o mabesá mê. O divulu dia Jihebeleu 11:6 di zuela: “Kuma uoso uiza kua Nzambi ki kala u xikana kuila sai-ku Nzambi, kuma muène mukua kubhandulula oso a mu sota ni muanu.” Phala kukala ni ukamba uambote ni Jihova, tua tokala kusuína. (Ikalakalu 15:17) Mu Bibidia, tu sanga-mu phangu ia athu avulu exile ni ukamba uambote ni Jihova. Mu kifika, Jakobo, Lakele, Zuze, ni Phaulu, a dibhanene ni ibhidi iavulu. Maji ene a tolola o ibhidi ioso. O phangu iâ, i tu longa kuila, se tu bhanga nguzu, tua-nda tena ué kutambula o mabesá a tu kanena Jihova. Tu mone kiebhi ki tu tena kubhanga kiki.

SE U KOLOKOTA, UA-NDA TAMBULA MABESÁ

6. Ihi ia kuatekesele Jakobo kukolokota, ni ihi ia tambula? (Tala o foto ia dianga.)

6 Jakobo, o diiala dia fiiele, ua kolokotele mu ibhidi ioso, mukonda ua zolele Jihova. Muéne ua kexile mu bhana valolo iavulu ku ukamba ué ni Jihova. Muéne ua dielele ni muxima uoso kuila, Jihova ueji besoala o mbutu iê. (Dimatekenu 28:3, 4) Kioso Jakobo kia kexile ni 100 ia mivu, muéne ua bhânge ni anju, phala kutambula o dibesá dia Nzambi. (Tanga Dimatekenu 32:24-28.) O kuila Jakobo ua kexile muene ni kutena kua kubhânga ni anju mu nguzu iê? Kana! Maji muéne ua suínine. Muéne ua bhange nguzu iavulu phala kutambula dibesá! Jihova ua besoala Jakobo, mukonda dia kukolokota kué. Mukonda dia kiki, ua mu luku o dijina dia Izalaiele. O dijina didi, dilombolola “muthu ua bhânge ni Nzambi.”  Jakobo ua tambula o mabesá, anga u kala ni ukamba ni Jihova. Etu ué tua mu sota kukala ni ujitu iú.

7. (a) Maka-hi a dibhanene na-u Lakele? (b) Ihi ia bhange Lakele, ni kiebhi kia mu besoala?

7 Jakobo ua kexile ni muhatu uambote, a mu ixanene Lakele. Muéne ua mesenene ué kumona kiebhi Jihova kieji kumbidila o kikanenu kia bhangele kua muadi uê. Maji kuexile maka. Lakele ka tenene kuvuala mona. M’ukulu, o kukamba kuvuala, kuexile mu bhekesa jisonhi javulu ku ahatu. Kiebhi Lakele kia kolokota, sumbala ni maka iâ, akexile ku mu luualesa? Muéne ua kexile ni kidielelu kia dikota. Lakele ua kolokota mu kusamba dingi kua Jihova. Mukonda dia kiki, Nzambi uevu o misambu ia Lakele. Mu kusuka-ku, Lakele ua tambula o dibesá kioso kia vuala mona. Mu kiki, Lakele uambe: ‘Kubhânga kua nzungule ku nga bhânge. Eme nga lende!’​—Dimatekenu 30:8, 20-24.

8. Ibhidi iebhi ia dibhanene na-iu Zuze, ni phangu iebhi ia tu xila muéne?

8 O kixikanu kia londekesa Jakobo, ni Lakele, nange kia kuatekesa mon’ê Zuze, kioso kia dibhana ni ibhidi ku muenhu. Kioso Zuze kia kexile ni 17 dia mivu, o muenhu uê ua lunguluka. Kuma o jiphange jê akexile ni difuba, a mu sumbisa kala mubhika. Ku ixi ia Ijitu, muéne ua bhitile thembu iavulu mu kaleia, sumbala ka kexile ni kikuma. (Dimatekenu 37:23-28; 39:7-9, 20, 21) Maji Zuze ka luualele kiavulu, ka banze kuvutula phonzo. Mukonda diahi? Mukonda Zuze ua kexile mu bhana valolo iavulu ku ukamba uê ni Jihova. Mu kiki, muéne ua kexile mu bheza Nzambi ni muxima uoso. (Ijila 19:18; Loma 12:17-21) O phangu ia Zuze, i tena ku tu kuatekesa kiavulu. Né muene se tua dibhanene ni ibhidi iavulu mu undenge, mba tua mu bhita ni maka a zozesa o kidielelu kietu, tua tokala kukolokota. Se tu bhanga kiki, Jihova ua-nda tu besoala.​—Tanga Dimatekenu 39:21-23.

9. Kiebhi ki tu tena kukaiela o phangu ia Jakobo, Lakele, ni Zuze?

 9 Lelu, tuene mu dibhana ué ni ibhidi iavulu, mu kiki, tua bhingi ué kukolokota. Nange a ku tatela makutu, ua mu dibhana ni maka a lungu ni kathombo, mba ene mu ku xonguena. Mba nange saí muthu ua ku kuatela difuba. Mu veji dia ku luuala, lembalala o ima ia kuatekesele Jakobo, Lakele ni Zuze, kusuluka mu kusidivila Jihova ni kisangusangu. Nzambi ua kuatekesa o jiselevende jê, ni ku a besoala, mukonda ene a bhanene valolo iavulu ku ukamba uâ ni Nzambi. Ene a kolokotele ué kubhanga nguzu, phala kubhanga o ima ia kexile mu bhinga mu misambu iâ. Kuma tuala mu izuua isukidila-ku, tua tokala kukolesa o kidielelu kietu kia lungu ni hádia! O kuila eie ua mesena kubhanga ioso, phala kukala ni ukamba uambote ni Jihova?

KOLOKOTA U TAMBULE O MABESÁ

10, 11. (a) Mukonda diahi nange kubhinga kusuína, phala kutambula o mabesá a Nzambi? (b) Ihi ia-nda tu kuatekesa kusola o ima ia tokala?

10 Mukonda diahi, nange ku bhinga kusuína phala kutambula o mabesá a Nzambi? Mukonda tu akua ituxi, saí bhabha, nange tua-nda bhinga kusuína phala kutolola o jihanji jaiibha. Saí athu, a bhingi kubhanga nguzu iavulu phala kukala ni vondadi ia kuboka. A mukuá a bhingi kusuína mukonda dia uhaxi, mba nange a divua ubheka. Athu amukuá, ki a bhonza kuloloka ni lusolo o muthu ua a bhange kima kia a luualesa. Né muene se tua mu sidivila kiá Jihova thembu iavulu, etu enioso tua bhingi kubhanga nguzu, phala kutolola o ima i tena ku tu fidisa kubhanga kiambote o kikalakalu kietu kua Nzambi.

O kuila eie ua mu di suínisa phala kutambula o mabesá a Nzambi? (Tala o kaxi 10, 11)

11 Mu kidi, nange kibhonza kiavulu kusola kiambote, ni kukala Kidistá kia kidi, benge benge se tua mu bhânga ni jihanji jaiibha. (Jelemiia 17:9) Se ua mu bhita ni maka iá, samba kua Jihova mu ku mu bhinga o nzumbi ikôla. O musambu, ni nzumbi ikola, i tena ku ku kuatekesa kukala ni nguzu, phala kubhanga o kima kia tokala, ni kutambula o mabesá a Nzambi. Kumbidila o ima i u bhinga mu musambu. Sota kutanga o Bibidia izuua ioso, ni kukatula kithangana phala ku dilonga ubheka uê, ni kubhanga o ubhezelu ku muiji.​—Tanga Jisálamu 119:32.

12, 13. Ihi ia kuatekesa o jiphange jetu kutolola o jihanji jaiibha?

12 Saí phangu javulu, ji londekesa kiebhi o Mak’â Nzambi, o nzumbi ikôla, ni madivulu metu, ene mu kuatekesa o athu kutolola o jihanji jaiibha. Mu kifika, saí munzangala ua tange o milongi ni diambu “Como Vencer Desejos Errados?”, mu Despertai! de 8 de Dezembro de 2003. Kiebhi kia divu muéne? Muéne uambe: “Ngene mu bhanga nguzu iavulu phala kutolola o ibanzelu iaiibha. Kioso ki nga mono kuila, ‘athu avulu ene mu bhita ni maka enhá,’ muxima uami ua tululuka, mukonda ki ngala ubheka.” O munzangala iú, ua katula ué mbote mu milongi ni diambu: “Deus Aprova Estilos de Vida Alternativos?” mu Despertai! de 8 de outubro de 2003. Mu milongi íii, muéne ua mono kuila, saí athu ene mu dibhana ni maka enhá tundé ukulu. kifuá phala ene, o maka iá a difu ni “uhaxi uonéne mu xitu.” (2 Kolindo 12:7) Maji né kiki, ene a bhanga nguzu iavulu, phala kukala ni uendelu u sangulukisa Nzambi. Mukonda dia kiki, ene ala ni kidielelu kiambote kia lungu ni hádia. O kuijiia o ima íii, kua  kuatekesa o munzangala iú. Muéne uambe: “Ngejiia kuila, izuua ioso, eme ngi tena kukolokota mu ufiiele uami kua Jihova. Ngi sakidila kiavulu Jihova, mukonda, sé o kikuatekesu kia kilunga kiê, eme ki ngeji tena kubhânga ni mundu iú ua iibha.”

13 Tala ué o phangu ia phang’ietu ia muhatu ua tungu mu ixi ia Estados Unidos. Muéne ua soneka: “Nga sakidila kiavulu mu ku tu bhana o kima ki tua bhindamena, mu kithangana kia tokala. Saí ithangana, ngi mona kuila, o milongi mu madivulu metu, ene mu i soneka phala eme. Ku mivu iavulu, ngene mu bhanga nguzu, phala kutolola o jihanji ja iibha ja zembe Jihova. Maji, saí ithangana, ngi divua kuma ki ngala dingi ni nguzu phala kutolola o jihanji jiji. Ngejiia kuila, Jihova Nzambi muthu uambote, muéne mukuâ kuloloka. Maji mukonda dia kukala ni ukexilu iú ku muxima, ngi mona kuila, ki ngi fuama kutambula o kikuatekesu kiê. O kubhânga ni jihanji jiji ja iibha izuua ioso, ku ngi luualesa. . . . Kioso ki nga tange o milongi ni diambu: O Kuila ‘Uala ni Muxima ua Kuijiia Jihova?’ mu Mulangidi ua 15 ia Katanu ua 2013, nga mono kuila, Jihova ua mesena muéne ku ngi kuatekesa.”

14. (a) Ihi iejidile Phaulu ia lungu ni jihanji jê ja xitu? (b) Kiebhi ki tu tena kutolola o jihanji jetu jaiibha?

14 Tanga Loma 7:21-25. Phaulu uejiidile kiambote kuila, kibhonza kiavulu kutolola o jihanji jetu ja xitu. Maji muéne uejiidile ni kidi kioso kuila, ueji tena kutolola o jihanji jiji, se ua sambele ni kudielela ku kikuatekesu kia Jihova. Muéne uejiidile ué kuila, ua tokalele kulondekesa kixikanu mu sata ia kukula ia Jezú. Abha etu? O kuila tu tena kutolola o jihanji jetu jaiibha? Tu tena. Kiki kia-nda bhita ngó, se tu kaiela o phangu ia Phaulu ia kudielela kua Jihova ni muxima uoso, mu veji dia kudielela mu nguzu ietu, ni kulondekesa kixikanu mu sata ia kukula ia Jezú.

15. Kiebhi Jihova kia tena ku tu kuatekesa kukolokota mu ufiiele uetu?

15 Saí ithangana, nange Nzambi uehela kima kubhita n’etu, phala kumona kiebhi ki tu banza. Mu kifika, se tu kata, mba muthu ua mukuá ku muiji uetu u kata mba a mu bhanga kima kiaiibha, kiebhi ki tua-nda dibhana ni maka enhá? Se tu dielela kua Jihova ni muxima uoso, tua-nda samba kua muéne, phala ku tu bhana o nguzu i tua bhindamena phala kukolokota mu ufiiele uetu, ni kukolesa o ukamba uetu ni muéne. (Filipe 4:13) O phangu ia Jikidistá ja dianga, ni ja izuua ietu, ilondekesa kuila, o kusamba kua Nzambi, ku tena ku tu kuatekesa, ni ku tu bhana o nguzu i tua bhindamena phala kukolokota.

KU BHUILE, KOLOKOTA U TAMBULE MABESÁ A JIHOVA

16, 17. Ihi i ua mesena o kubhanga?

16 Se u bhuila, mba u kamba kidielelu, Diabhu ua-nda sanguluka kiavulu. Mukonda dia kiki, sota ku ‘kuatenena o ima ioso iauabha.’ (1 Tesalonika 5:21) Eie u tena kutolola Satanaji, o mundu uê, ni jihanji joso jaiibha! Maji phala kubhanga kiki, eie ua tokala kudielela kuila, Nzambi ua-nda kubhana nguzu ni kikuatekesu.​—2 Kolindo 4:7-9; Ngalásia 6:9.

17 Mu kiki-phe, kana kubhuila. Kana ku lembua. Kolokota mu kubhânga. Kolokota ni kusuína kuoso. Ejiia kuila, Jihova ua-nda ku ‘ku lunduluila dibesá, di ku soka anga di subhuka.’​—Malakiia 3:10.