Ku bokona mu madisá

Ku bokona mu madisá

 O BIBIDIA I LUNGULULA O UKEXILU UA ATHU

Ng’exile Ngi Muthu Uaiibha o Muxima ni Mukuâ Jinvunda

Ng’exile Ngi Muthu Uaiibha o Muxima ni Mukuâ Jinvunda
  • MUVU UA MU VUALA:1974

  • MUKUA:MEXICO

  • MUSOSO:MU UNZANGALA UÊ MUÉNE UEXILE KISUÉIA NI MUKUÂ JINVUNDA

MUSOSO UAMI: A ngi vualela ku Ciudad Mante, mu mbanza ia Tamaulipas ku ixi ia México, kididi kiambote.

O athu a tungu mu mbanza íii, athu ambote ala ni ukexilu ua kubhana. Maji mukonda dia jibandi, athu mu diembu akexile ni uôma uavulu.

A tu vuala tu kiuana, eme ngi mon’â ua kaiiadi mu mala dia mam’etu. O jitata jami a ngi batizala mu Ngeleja ia Katolika, mu kubhita thembu nga bhangele mbandu ku kibuka kia kuimba. Nga mesenene kubheza Nzambi, mukonda nga kexile ni uôma ua ku ngi fundisa ni ku ngi takula mu túbhia tua ifernu.

Kioso ki nga kexile ni kitanu kia mivu, tat’etu ua tu xisa. Kiki kia ngi bhekela ndolo ia dikota ku muxima. Tua mu zolele kiavulu, ki ngi kijidile se mukonda diahi tat’etu ua tu xisa. Mu kiki mam’etu ua bhingile kukalakala ola javulu phala kudikila o ibhindamu ietu.

Nga xisa o xikola eme nga dibundu ni akuetu a sungile-ku kiá mu kitala. Ene a ngi longo kuxinga, kunhana, kubuakula ni kubhânga. Kuma nga kexile ni ukexilu ua ku tumina akuetu, nga dilongo o bokisi ni maukexilu a mukuâ a kubhânga ni kuloza. Nga kituka ngi kisuéia. Nga kexile mu bhânga ithangana ioso, saí bhabha nga kexile mu mbomba manhinga avulu, ia akexile mu ngi buazeka mu ikoka kala ngi kimbi. Nga bhekela malamba avulu kua mam’etu kioso muéne kia kexile mu ngi sanga kala ngi kimbi, iu ua kexile mu ng’ambata ku inzo ia kusaka!

Kioso ki nga kexile ni 16 kia mivu, kamba diami dia undenge, Jorge, ua tu kundu ku bhata. Muéne ua tu’ambela kuila uexile Mbangi ia Jihova, iu ua mesenene ku tu tudila njimbu iambote. Ua mateka ku tu longa o kidi kiejidile ni kikuatekesu kia Bibidia. Ku muenhu uami uoso nuka ng’evuile o njimbu ioio. Nga sangulukile kiavulu mu kuijiia o dijina dia Nzambi ni vondadi iê. Mu kiki, Jorge ua tu bhingi phala ku tu longa o Bibidia. Etu tua xikina.

O BIBIDIA IA LUNGULULA O UKEXILU UA MUENHU UAMI: Muxima ua ngi tululukile kiavulu mu kuijiia o kidi kia lungu ni ifernu ia túbhia—kuila ki ulongelu ua Bibidia. (Jisálamu 146:4; Ndongixi 9:5)

Mu kuijiia o kidi kiki, ki ngi kexile dingi ni uôma ua Nzambi kuila ua-nda ngi takula mu túbhia. Maji nga mateka ku mu mona kála Tata ia henda ua mesena o mbote ia tuana tuê.

 Kioso ki nga suluka mu kudilonga o Bibidia, nga mono kuila nga tokalele kulungulula o ukexilu ua muenhu uami. Nga tokalele kukala ngi muthu ua lenduka ni kueha o usuéia. O milongi i tu sanga mu divulu dia 1 Kolindo 15:33, ia ngi kuatekesa kiavulu. Iambe kuila o kudilunga ni athu aiibha “ku bolesa o ifua iambote.” Nga mono kuila, se nga mesenene kulungulula o ukexilu ua muenhu uami, nga tokalele kueha o ukamba ni athu akexile ni ukexilu uaiibha. Nga xisa o makamba mami okulu, eme nga mateka kudilunga ni jiphange mu kilunga kia Jikidistá—athu a batula o maka bhu kaxi ka itumu ia Bibidia, kana bhu kaxi ka jinvunda mba ka usuéia.

O mbandu ia mukuá ia Mikanda Ikôla ia ngi kuatekesa kiavulu, tu i sanga mu divulu dia Loma 12:17-19. dixi: ‘Kana kuvutula muthu uoso-uoso phulu mu phulu. . . . Se mua ki tena, kalenu ku paze ni athu oso; mvunda ki i tunde ko kuenu. Phange jami ki mu kale mù vutula phonzo ku muthu uoso-uoso, . . . kuma a ki soneka mu Mikanda Ikôla, exi: Phonzo ia ngi tokala eme ngi Jihova, eme-muène ngi futa.’ Ngeza mu kuijiia kuila, Jihova muéne ngó ua-nda zubha o kuiibha mu kithangana kia tokala. Bhofele-bhofele, nga lungulula o ukexilu uami uaiibha.

Saí kizuua m’usuku, mu kuvutuka kubhata, a ngi kuata ku jibandi. Nuka nga-nda jimba o kizuua kieniókio. O xefe ia ngi bhana home kudikunda iu ua mateka o kuzuela, “Dizokele!” Mu kithangana kieniókio, nga sambe kua Jihova, nga mu bhingi phala ku ngi kuatekesa kukolokota. Nga mesenene kiavulu ku mu vutula phonzo, maji mu veji dia kiki, nga’iami. Mu kizuua kia mukuá, nga disange ni xefe ioio ia jibandi, ua kexile ubheka uê. Njinda ia ngi kuatele, nga mesenene ku mu vutula phonzo, maji nga bhingi dingi kua Jihova ku muxima, phala ku ngi kuatekesa kulanga o njinda iami. Nga diuanene kiavulu, o munzangala uéza ko kuami, iu uambe: “Ngi loloke mu ioso i nga ku bhange mazá. Mu kidi, nga mesena ué kulungulula o ukexilu uami. Nga mesena kudilonga o Bibidia.” Nga sangulukile kiavulu mukonda nga tenene kulanga o njinda iami! Mukonda dia kiki, nga mateka ku mu longa o Bibidia.

O muiji uami ki u sulukile mu kudilonga o Bibidia. Maji eme nga solo kusuluka ni kudilonga o Bibidia, ki ng’ehela muthu mba kima kioso-kioso ku ngi fudisa. Ng’ejidile kuila o kudilunga izuua ioso ni mundu ua Nzambi, kueji saka o muxima uami, kueji ngi bhana ué o muiji u nga mesenene. Nga suluka mu kudilonga. Ku muvu ua 1991 a ngi batizala kála ngi Mbangi ia Jihova.

MABESÁ U NGA TAMBULA: Ng’exile ngi muthu uaiibha o muxima ni mukuâ jinvunda.

Maji o Mak’â Nzambi a lungulula o muenhu uami uoso. Lelu ngi tudila athu oso a mesena kuívua o njimbu ia Bibidia, o njimbu ia paze. Ngala ni ujitu ua dikota ua kukalakala kála ngi muboki ua thembu ioso mu 23 a mivu.

Nga kalakalele kiá mu filiiale ia Jimbangi ja Jihova ku ixi ia México. Muenhomo, nga disange ni Claudia, Kidistá, muhatu ua nguzu, mukalakadi, tua kazala ku muvu ua 1999. Ngi sakidila kiavulu Jihova mu ku ngi bhana muhatu uambote, ua fiiele!

Tua kalakala kumoxi mu kilunga kia mabubu ni maxilu ku ixi ia México, mu ku a kuatekesa kuijiia Jihova. Mu kubhita thembu, a tuixana phala kuia ku ixi ia Belize phala kulonga o Bibidia ku athu a tungu kuenhoko. Bhabha etu ki tu jimvuama kana, maji tuala ni imbamba ioso i tua bhindamena phala kusanguluka. Sé-ku kima kieji tu bhangesa kueha o ujitu iú.

Mu kubhita thembu, mam’etu ua mateka dingi kudilonga o Bibidia iá a mu batizala. Lelu o kota diami, muhatu’ê ni tuana tuê a kituka ué Jimbangi ja Jihova. Saí makamba mami okulu u nga a longo o njimbu ia Utuminu, lelu a mu sidivila uá Jihova.

Maji saí athu ku muiji uami áfu kiá, mukonda ka lungulula o ukexilu uâ ua usuéia. Se nga sulukile mu njíla ienióio, hinu nga fu ué. Ngi sakidila kiavulu Jihova mu ku ngi sunga mu kilunga kiê ni ku abhezi’ê, a ngi longo ni muanhu ni henda ioso kubelesela o itumu ia Bibidia ku muenhu uami.