Ku bokona mu madisá

Ku bokona mu madisá

 KIBATULU 14

Ku Zokela ni Ufiiele Uoso o Unguluvulu ua Nzambi Kana o Jinguvulu ja Mundu

Ku Zokela ni Ufiiele Uoso o Unguluvulu ua Nzambi Kana o Jinguvulu ja Mundu

MILONGI IA KIBATULU

Mukonda dia ku kala ji fiiele ku Utuminu, o jiselevende ja Nzambi ka bhanga mbandu ku mundu

JEZÚ ua kexile bhu pholo ia Pilatu, o mufundixi ua tundile o afundixi oso mu mbanza ia Judá, muéne ua zuela kima kiene mu kuendesa o akaiedi Iê a kidi katé lelu. Muéne uambe: “Eme o usobha uami, ki ua mu ngongo mumu. Se ua kexile ua mu ngongo, hinu makuenze mami eju bhânga phala eme ka ngi bhakule bhu maku ma Jijudé. Kala kiki-phe, o usobha uami ki ua kunu!” (Nzuá 18:36) Pilatu ua tumu ku jibha Jezú maji o ku sanguluka kuê ki ku nangenena, kana. Jezú a mu fukununa. O jinguvulu ja makota ja Kibatu kioso kia Loma a bhange ioso phala ku sasujula o akaiedi oso a Kristu, maji a lembua. O Jikidistá a bokele o njimbu ia Utuminu mu ngongo ioso.—Kol. 1:23.

1, 2. (a) Kitumu kiahi kiene mu kuendesa o akaiedi a Jezú lelu? (b) Ihi iene mu bhanga o jinguma jetu phala ku tu tolola ni ihi iene mu bhita?

2 Kioso kia tumbika o Utuminu ua Nzambi ku muvu ua 1914, saí jinguvulu ja mazonda ni masoladi mâ a mesenene ku buika o mundu ua Nzambi. Maji kana-ku muthu mudiâ ua tenene ku buika o mundu ua Nzambi. Jinguvulu javulu a soto ku tu jijidika ku di ta mu maka mâ ni jinvunda. Maji ene ka tenene ku tu uanuna. Lelu, o mundu ua Utuminu tu a sanga ku mundu uoso. Maji né kiki, tu makamba a kidi, ki tu di ta mu maka a jinguvulu ja mundu. O ukamba uetu ulondekesa kuila o Utuminu ua Nzambi ua mu tumina kiá ni kuila o Sobha ietu Jezú Kristu ua mu suluka ni ku tuendesa, ku zelesa ni ku langa o mundu uê. Talesa ihi iene mu bhanga muéne i tu kolesa o kixikanu ni kiebhi muéne kiene mu tu kuatekesa ku zokela o kidi mu ku belesela o kitumu kia ku ‘kamba ku bhanga mbandu ku mundu iú.’—Nzuá 17:14.

Maka Ala ni Valolo ia Dikota

3, 4. (a) Ihi ia bhiti mu kithangana kioso kia tumbika o Utuminu ua Nzambi? (b) O kuila tundé ukulu o mundu ua Nzambi ua tendela kiambote o maka a usoladi? Jimbulula.

3 Kioso kia tudika o Utuminu ua Nzambi, mu diulu mua bhiti ita, Satanaji anga a mu lundumuina mu ixi. (Tanga Dijingunuinu 12:7-10, 12.) Mua bhiti ué ita mu ixi, o ita íii ia lola o kixikanu kia mundu ua Nzambi. Maji ene a kolokotele mu ku kaiela o phangu ia tu xila Jezú ia ku kamba ku bhanga mbandu ku mundu iú. Maji mu dimatekenu ene ka kexile  mu tendela kiambote kuila kueji bhinga nguzu iavulu phala ka di te mu maka a jinguvulu.

4 Mu kifika, o Volume VI, ia divulu, Aurora do Milênio, * a di bhange ku muvu ua 1904, dia suinisa o Jikidistá phala ka di te mu ita. Maji o divulu dia londekesa ué kuila, se muthu kidistá a mu solo phala kuia mu usoladi, muéne ua tokalele ku bhanga ioso phala ku kala ni mukanda u tanga kuila muéne u tena ku bhanga ima ioso-ioso, maji o ku bhânga, kana. Se muéne ka tenene ku bhanga kiki ni ku mu tumikisa ku ita, muéne ua tokalele ku di langa phala ka jibhe muthu. Mu kuzuela ia lungu ni ithangana ióio, Herbert Senior, ua tungile mu ixi ia Britania, a mu batizala ku muvu ua 1905, uambe: “O jiphange ka kexile mu tendela kiambote se kiexile kituxi kuia mu usoladi, mukonda ki kuexile itendelesu ia lungu ni maka enhá kuila a tokalele ku bhanga ngó ikalakalu iengi, maji o ku luua ita kana.”

5. Kiebhi o A Sentinela ia 1 ia mbeji ia Katutu ia muvu 1915, kia mateka o ku tu jimbulula kiambote o maka?

5 Maji, o A Sentinela ia 1 ia mbeji ia Katutu ua muvu 1915, ia mateka o ku tu jimbulula kiambote o maka enhá. Ia lungu ni itendelesu ia bhana o divulu Estudos das Escrituras, ia zuela: “Etu tu dibhuidisa se o ku bhanga kiki, ki kua-nda londekesa kuila tua mu xibhaka o itumu ia Nzambi.” Maji ihi i tu bhanga se o Kidistá a mu tangela kuila a-nda mu jibha se u dituna ku ta izuatu ia usoladi ni kuia ku ita? O milongi iambe: “Ihi ia beta kota? O kufua mukonda dia ku kala fiiele ku Kilamba kietu kia Paze ni ku belesela o kitumu Kiê, inga o kufua mu ku kalakela o jisobha ja mundu mu ku a kuatekesa ni ku bhukumukina o milongi ia Sobha ietu ia diulu? Tueji sola o kufua mukonda dia ufiiele kua Sobha ietu ia Diulu.” Né muene ni izuelu íii, o milongi ia suku mu kuzuela: “Ki tua mu tendelesa o jiphange ku bhanga kiki. Tua mu bhana ngó ndunge.”

6. Ihi i ua di longo ku phangu ia Phang’etu Herbert Senior?

6 Sai jiphange a tendela kiambote o kitendelesu ia akexile polondo ia ku dibhana ni ibhidi. O Phange Herbert Senior, tua mu tange ku dimatekenu, uambe: “Phala eme o ku katula o jifundanga mu naviu ni ku jita mu uta, kiene kimoxi.” (Luka 16:10) Mukonda ka xikinine kuia mu ita, o phange Senior a mu te mu kangolondo. Muéne kumoxi ni jiphange 4 akexile mu kaxi ka kibuka kia 16 ka xikinine kuia mu ita, mua kexile ue mala a tokalele mu jingeleja ja mukuá, a bhitile kiá mivu mu kaleia ka Richmond mu ixi ia Britania, mu ku bhita thembu o kaleia kaka a ka exanene Richmond 16. O Phange Herbert ni a mukuá akexile nê kumoxi, a a te mu naviu mu kasuekele phala kuia mu ita mu ixi ia França. Kuenhoko, a a tangela kuila eji kua loza. Muéne ni akuâ akexile nê, a a tele ku munono phala ku a jibha kiá. Maji mu veji dia ku a jibha, a a tangela ngó kuila eji bhita dikuinhi dia mivu mu kaleia.

“Ande dia ku bokona mu inzo ia ku fundisa, nga dióndo kua Jihova, eme nga tena o ku tululuka.”—Ivailo Stefanov (Tanga o kaxi 13)

 7 Ku muvu kioso kia bhiti o Ita ia Kaiadi ia bhiti ku Mundu Uoso, o mundu uoso ua Jihova ua mateka o ku tendela kiambote o maka alungu ni ku dituna ku di ta mu usoladi ni kuijiia kiambote ihi ia tokalele o ku bhanga phala ku kaiela o phangu ia Jezú. (Mat. 26:51-53; Nzuá 17:14-16; 1 Phe. 2:21) Mu kifika, o A Sentinela ia 1 ia mbeji ia Kamoxi ia muvu ua 1939, ieza ni milongi ia zuelele maka alungu ni “Ku dituna ku di ta mu usoladi,” o milongi iambe: “O kijila kia tokala ku belesela o mundu ua Jihova mu kindala kiki, o ku dituna ku di ta mu maka a jinguvulu ni mu usoladi.” Ia lungu ni milongi ióio Simon Krake, ua sidivila mu mbonge ia Jimbangi ja Jihova, ku Brooklyn, mu mbanza ia Nova York, uambe: “Nga di longo kuila o mundu ua Nzambi ua tokalele ku di bhana kiambote ni athu oso katé muene ni mu ithangana ia ita.” O kudia kuenhoko kua nzumbi a ku bhanene mu kithangana kia tokala, kua kuatekesa o mundu ua Nzambi ku di sokejeka kiambote phala ku zokela o ufiiele uâ ku Utuminu ua Nzambi.

A a Kuatesa uôma ku “Ngiji” ia Izukutisu

8, 9. Kiebhi o izuelu ia poxolo Nzuá kia di kumbidila?

8 O poxolo Nzuá ua tangele kuila, kioso kieji tumbika o Utuminu ua Nzambi ku muvu ua 1914, o kimudikixi kia dikota, Satanaji o Diabhu, ueji sota ku buikisa o mundu ua  Utuminu ua Nzambi mu ku lukula mu kanu diê ngiji ia menha. * (Tanga Dijingunuinu 12:9, 15.) Kiebhi o izuelu ia Nzuá kia di kumbidila? Tundé ku muvu ua 1920, o mundu ua Nzambi a u zukutisa kiavulu. Kála kia bhiti ni jiphange ja mukuá a tungile ku ixi ia América do Norte, kioso kia kexile mu bhita o ita ia kaiadi, o Phange Kraker a mu takuile mu kaleia mukonda dia ku kala fiiele ku Utuminu ua Nzambi. Mu ithangana ia bhiti o ita, o Jimbangi ja Jihova a betele ku vula jipelezu ja mukua ndenge mukonda dia ku kaiela o kitongoluelu kiâ, a ditunu o kuia mu ita a ambatele mu kaleia ka ixi ia Estados Unidos.

9 O Diabhu ni mundu uê a mesenene ku zozesa o kixikanu kia mundu ua Nzambi akexile mu zokela o Utuminu bhuoso bhua tungile. Mu ixi ioso ia África, Europa, Estados Unidos, a ambatele ku afundixi mu inzo ia ku fundisa. Mukonda dia ku kolokota mu ufiiele uâ ni ku dituna kuia mu usoladi, a a jikila mu kaleia, a a beta ni ku a bukula o inama mba maku. Mu ixi ia Alemanha, o mundu ua Nzambi ua bhiti ni ijijidiku iavulu mukonda dia ku dituna ku bheza Hitler mba ku di ta mu usoladi. Nange 6.000 ja athu a a jikila mu kaleia ni ku bhanga ikalakalu iavulu mu utuminu ua akua Nazi, ni kuila 1.600 ja athu akua Alemanha exile Jimbangi ja Jihova ni athu a mukua kexile Jimbangi ja Jihova a a jibha ku jinguma jâ. Maji né kiki, Diabhu ka tenene ku jima o mundu ua Nzambi mu ixi ioso.—Marku 8:34, 35.

“O Ixi” ia Minha “o Ngiji”

10. Ihi ilombolola “o ixi” ni kiebhi iene kiene mu zokela o mundu ua Nzambi?

10 O izuelu ia soneka poxolo Nzuá, ia londekesa kuila “o ixi”—o athu a tetuluka ku mundu iú—eji minha “o ngiji” ia izukutisu, mu ku kuatekesa o mundu ua Nzambi. Kiebhi o izuelu íii kiene mu di kumbidila? Tundé o kithangana kia bhiti o Ita ia Kaiadi, “o ixi” iene mu zokela o mundu ua Utuminu ua Mexiia. (Tanga Dijingunuinu 12:16.) Mu kifika, jinzo javulu ja ku fundisa jene mu zokela o Jimbangi ja Jihova a dituna kuia mu usoladi ni ku dituna o kuimba o muimbu mba ku bheza o dibandela dia ixi. Kia dianga, talesa kiebhi Jihova kiene mu kuatekesa o mundu uê mu maka alungu ni ku di ta mu usoladi.—Jisá. 68:20.

11, 12. Maka-hi a bhitile ni ji phange Sicurella ni Thlimmenos ni kiebhi kia di tundu?

11 Estados Unidos. Anthony Sicurella uexile ué bhu kisamanu kia ana a a sasele ku ji tata exile Jimbangi ja Jihova. Kioso kia kexile ni 15 dia mivu, a mu batizala. Kioso muéne kia tenesa 21 dia mivu, muéne ua di sonekene kala mukunji ua ngeleja. Kioso kia bhitile mivu iiadi, ku muvu ua 1950, muéne a mu ixana muthu ka xikina kuia ku ita. Sumbala o Departamento Federal de Investigações (FBI), ka sange kima kia iibha kua muéne, o Inzo ia ku Fundisa ia ditunu ku mu kuatekesa. Mu ku bhita ithangana, o Inzo ia Dikota ia ku Fundisa ku  Estados Unidos, ievu o maka a phange Sicurella ia a mu lungisa. Kiki, kia kuatekesa athu a mukua ka mesenene kuia ku ita ku Estados Unidos.

12 Grecia. Ku muvu ua 1983, Iakovos Thlimmenos, a mu tatela kuila ua hungana mukonda ua ditunine ku ta izuatu ia usoladi, mukonda dia kiki a mu te mu kaleia. Kioso kia mu katula mu kaleia, muéne ua soto salu ia ku kalakala ni kitadi, ka mu xikana ku salu, mukonda a mu tatele kuila uexile muthu ua iibha. Muéne uambata o maka enhá mu jinzo ja kufundisa mu ixi ia Grécia, maji kuma o maka ka a batula kiambote, muéne ua sotele kikuatesu ku Inzo ia Dikota ia ku Fundisa (Corte Europeia Dos Direitos Humano.) Ku muvu ua 2000, o 17 dia Afundixi mu Corte Europeia Dos Direitos Humano, mala ni ahatu a mu zokela ni ku mu lungisa, a xisa phangu ia kueha o kathombo. Ande dia ku batula o maka enhá, 3.500 ja jiphange ku Grécia a a tatele kuila exile athu a iibha, mukonda a a tele mu kaleia mukonda dia ku kamba ku di ta mu maka a jinguvulu. Kioso kia lungisa o jiphange jetu, o jinguvulu mu ixi ia Grecia, a bhana kitumu phala ku jima o dijina dia lukile ku ji phange jetu kuila exile athu a iibha. A bhanene ué kitumu kia mukua ku athu oso akua Grécia kia ku kala ni ufolo ua ku sola ikalakalu ia mukua se ka mesenene kuia mu ita. O kitumu kiki kia kexile kiá mu ixi ia Grécia, maji kioso kia lungulula o Itumu ia ixi, o kitumu kiki a ki tono dingi.

“Nga di longo kuila o mundu ua Nzambi ua tokalele ku di bhana kiambote ni athu oso katé muene ni mu ithangana ia ita.”—Simon Kraker (Tanga o kaxi 7)

13 Bulgaria. Ku muvu ua 1994, Ivailo Stefanov uexile ni 19 dia mivu kioso kia mu ixana phala kuia mu usoladi, muéne ua ditunu ku kala disoladi, ua ditunu ué ku bhanga ikalakalu ia mukua ia lungu ni usoladi. Muéne ua bhiti 18 dia mbeji mu kaleia, maji muéne ua soto kikuatekesu mukonda muéne uejidile kuila, uexile ni ufolo ua ku sola se uia mu usoladi mba kana. O maka enhá a tula ku Corte Europeia Dos Direitos Humanos. Ku muvu ua 2001, o phange Stefanov a mu lungisa ande dia ku muivua. O nguvulu ua ixi ia Bulgária ka bhingi ngó muloloki kua phange Stefanov, maji ua bhingi ué ku athu oso akua Bulgária ka mesenene kuia mu ita, maji a mesenene ku bhanga ikalakalu iéngi. *

14 Arménia. O phange Vahan Bayatyan, a mu ixana phala kuia mu usoladi ku muvu ua 2001. * Muéne ua ditunine kuia mu usoladi, maji kioso kiai mu bhinga kikuatekesu mu jinzo ja ku fundisa, ka mu xikina. Ku mbeji ia Katutu ia muvu ua 2002, a mu balakala mu mivu iiadi ni kaxaxi, maji muéne a mu katuile kioso kia bhitile dikuinhi dia jimbeji ni kaxaxi. Mu kithangana kiki, muéne ua bhingile kikuatekesu ku Corte Europeia Dos Direitos Humanos, a mu bhana kikuatesu. Maji mu kizuua kia 27 ku mbeji ia Kamusasadi ku muvu ua 2009, o Corte íii ka mu xikana. kiki, kiedile kala o jiphange joso ku  Armenia akexile mu bhita ni maka enhó, keji ku a xikina uá. Maji o afundixi ku Corte Europeia Dos Direitos Humanos a tokuesa dingi o maka. Ku mbeji ia kavua mu kizuua kia 7 ku muvu ua 2011, o Corte ua lungisa phange Bayatyan. Kiki kiexile o veji ia dianga o Corte Europeia Dos Direitos Humanos, ua bhana o kitumu kia kuila, muthu uoso-uoso ka mesenene kuia ku usoladi mukonda dia ibanzelu iê, kitongoluelu mba ngeleja, ka tokalele ku mu zukutisa mba ku mu ta mu kaleia. O kitumu kiki, ki ki bhana ngó ufolo ku Jimbangi ja Jihova, maji ni ku mazunda ni mazunda a athu a tokala ku jixi joso ku Europa. *

Jiphange mu ixi ia Armênia, a a katula mu kaleia, mukonda a alungisa kioso kia a fundisa ku Corte Europeia dos Direitos Humanos

Kuimba o Muimbu ni ku Bheza o Dibandela Dia Ixi

15. Mukonda diahi o mundu ua Jihova u dituna ku bheza o dibandela ni muimbu ua ixi?

15 O mundu ua Jihova ua kolokota mu ufiiele ku Utuminu ua Mexiia ki mukonda ngó dia ku dituna kuia ku usoladi, maji mu ku dituna ué ku bheza o di bandela dia ixi mba ji fesa ja mukua ja ixi. Tundé kia bhitile o Ita ia Kaiadi ia bhite ku Mundu, o athu ene mu zangeleka ni ku ximana kiavulu o  jixi jâ. Ku jixi javulu, o athu ene mu sola uoso u tumina, emba o muimbu ua ixi ni ku bheza o di bandela. Maji etu tu bheza ngó Jihova. (Mak. 20:4, 5) Mukonda dia kiki, tu bhita mu izukutisu iavulu. Maji né kiki, Jihova ua bhangesa o “ixi” ku batula o izukutisu íii. Tu di longe o ikoué iene mu tu bhana Jihova bhu kaxi ka Kristu mu maka enhá.—Jisá. 68:20.

16, 17. Maka-hi a di bhana nau Lillian ni William Gobitas, ihi i ua di longo mu maka a bhiti nau?

16 Estados Unidos. Ku muvu ua 1940, o Inzo ia Dikota ia ku fundisa mu ixi ia Estados Unidos, ia lungisa o Jimbangi ja Jihova, mu maka a exana Distrito Escolar de Minersville v. Gobitis. O phang’etu ia muhatu Lillian Gobitas  * ua kexile mu kitala kia 12, o phang’iê ia diiala William ua kexile ni 10 dia mivu, a mesenene ku bheza ngó Jihova, mu kiki ene a ditunu kuimba o muimbu ua ixi, ni ku bheza o dibandela. Mukonda dia kiki, ene a a kaie mu xikola. O Inzo ia Dikota ia ku fundisa, ia lungisa o xikola, mukonda akexile mu kumbidila “o ijila ia ixi.” Kiki kia bheka kizukutisu kia dikota ku Jimbangi ja Jihova. An’a avulu a Jimbangi ja Jihova a a kaiele ku xikola, o adiakimi a a katuile ku salu, o a mukua a a talesa hadi ku jibandi. O divulu, The Lustre of Our Country, dizuela kuila “o kizukutisu kia Jimbangi ja Jihova tundé ku muvu ua 1941 katé ku muvu ua 1943, o mivu o athu a zembele kiavulu muthu uoso-uoso mukua ngeleja mu ixi ia America ku hama ia makuinhi’aiadi ni nake.”

17 O kisangusangu kia jinguma ki ki nangenena. Ku muvu ua 1943, o Inzo ia Dikota ia ku fundisa, ia batula maka a difuile ni maka a bhiti nau o jiphange Gobitis. O maka a exana West Virginia State Board of Education v. Barnette. Mu kithangana kieniókio, o Inzo ia Dikota ia ku fundisa, ia bhana kikoué ku Jimbangi ja Jihova. O Inzo ia Dikota ia ku fundisa mu ixi ia Estados unidos ia America, nuka ia lunguluile o kizuelu kiê, maji mu kithangana kieniokio, ia lungulula iu ua lungisa o Jimbangi ja Jihova. Kioso kia batula o maka enhá, o kizukutisu kia mundu ua Jihova ku ixi ia Estados Unidos kiabhu. Mukonda dia kiki, athu oso mu ixi ia Estados Unidos a tambula ufolo.

18, 19. Ihi ia zuela Phang’etu Pablo Barros ia mu kuatekesa o ku kolokota ni kiebhi etu tu tena ku kaiela o phangu iê?

18 Argentina. Pablo ni Hugo Barros, umoxi ua kexile ni dinake dia mivu, o ua mukuá ua kexile ni sambuadi dia mivu, a a kaie mu xikola ku muvu ua 1976 mukonda a ditunine kuimba o muimbu ua ixi. Saí kizuua, o mulongexi ua xikola ua lundulula Pablo iu ua mu bhana kingodi ku mutué. Muéne ua bhingi o kiiadi kiki phala ku xala kioso kieji zumbuka o xikola phala ku a jijidika o kuimba ni ku bhanga ima iengi i zangeleka o ixi. Pablo uambe: “Sé o kikuatekesu kia Jihova, eme ubheka uami ki ngeji tena ku di bhana ni izukutisu ni ku kala fiiele kua Jihova.”

19 Kioso kiambata o maka enhá ku inzo ia ku fundisa, o mufundixi ua lungisa o xikola mu ku kaia Pablo ni Hugo. Maji  o maka enhá a ambata ku Inzo ia Dikota ia ku fundisa ku Argentina. Ku muvu ua 1979 o Inzo ia Dikota ia ku fundisa, ia fundisa kiéngi, iambe: “Ku kaia muthu mu xikola ku lombolola kuila ki tua mu belesela o kitumu kia kuila o muthu ua tokala ku di longa ( Kitumu 14) ni kikalakalu kia ji nguvulu kia ku bhana ulogelu ku tuana (Kitumu 5).” Kiki kia kuatekesa 1.000 ia ana a Jimbangi ja Jihova. Kienhiki, o ji xikola ka kexile dingi mu kaia o tuana ku xikola, o mizangala kála Pablo ni Hugo a a kaiele mu xikola, a vutuka dingi o ku di longa mu ji xikola ja nguvulu.

Minzangala iavulu Jimbangi ja Jihova ene mu kolokota né muene ni izukutisu

20, 21. Kiebhi o ia bhiti ni Phang’etu Roel ni Emily ki suínisa o kixikanu kiê?

20 Filipinas. Ku muvu ua 1990, Roel Embralinag, * ua kexile ni 9 dia mivu, o phang’ê ia muhatu, Emily, ua kexile ni 10 dia mivu, ku moxi ni 66 a athu exile uá Jimbangi ja jihova a a kaiele mu xikola mukonda a ditunine ku bheza o dibandela. Roel ni tat’â Emily, Leonardo, a soto kuzuela ni atuameni a xikola maji né kiki ka a evu kana. Kuma ka a evu, Leonardo ua lengela ku Inzo ia Dikota ia ku Fundisa mu ku sota kikuatekesu. Leonardo kexile ni kitadi né muzokedi phala ku mu  zokela. Kienhiki, o muiji ua sambe mu ku diónda kua Jihova phala ku mu kuatekesa. Mu kithangana kieniokio, ana oso akexile mu a xonguena ni ku a zukutisa. Leonardo ka ki fikile kuila ueji tena ku batula o maka mukonda kexile ni kuijiia mba unjimu ua ku batula o maka enhó.

21 Maji o muiji a u zokela kuala Felino Ganal, muzokedi ua kalakalele mu ditenda dia fuma di zokela o itumu mu ixi. Mu kithangana kieniókio, o Phange Ganal ka kexile dingi mu kalakala mu ditenda dienhódio, muéne ua kitukile Mbangi ia Jihova. Kioso o maka kia tula ku Inzo ia Dikota ia Kufundisa, o Afundixi kuenhoko a lungisa o Jimbangi ja Jihova ni kuzuela kuila o ana ka tokalele ku a kaia mu xikola. Kala kia bhitile kiá, o azukutixi a mundu ua Nzambi ka tenene ku fidisa o Jimbangi ja Jihova o ku bhanga o vondadi iê.

O ku Dituna ku di ta mu Maka a Jinguvulu, ku Bheka Ukamba Mudietu

22, 23. (a) Mukonda diahi tuene mu tambula ikoué iavulu? (b) O ukamba uetu ni jiphange ku mundu uoso, ulondekesa ihi?

22 Mukonda diahi o mundu ua Jihova a tambula o ikouê ioso íii? Etu kene mu tu kuatekesa ku jinguvulu. Maji né kiki, mu jixi joso muala afundixi ambote ene mu tu zokela ku jinguma jetu ni ku xisa phangu iambote phala ku i kaiela. Sé phata, Kristu uene mu tu kuatekesa. (Tanga Dijingunuinu 6:2.) Mukonda diahi tuene mu bhânga phala ku tambula ufolo? Etu ki tu mesena ku lungulula o itumu ia jixi kana. Maji, tua mesena ku sidivila o Sobha ietu, Jezú Kristu sé ku tu fidisa.—Ika. 4:29.

23 Né muene ku mundu iú uezala ni unguma, o Sobha ietu, Jezú Kristu, uene mu besoala o nguzu ia akaidi’ê ku mundu uoso phala a tene ku kala sé ku di ta mu maka a mundu. Satanaji kene mu tena ku tu uanuna ni ku tu tolola. O Utuminu uene mu bhongolola ji midi ni jimidi ja athu ene mu dituna “ku di-longa dingi kúlua ita.” O ukamba uetu ni jiphange ku mundu uoso, madiuanu a dikota—ulondekesa kuila o Utuminu ua Nzambi ua mu tumina kiá!—Iza. 2:4.

^ kax. 4 O divulu didi a dixana ué A Nova Criação. Mu ku bhita kithangana o divulu, o Milénio da Aurora, a di xana, Estudos das Escrituras.

^ kax. 8 Phala kuijiia dingi o maka enhá, tanga o divulu Revelação—Seu Grandioso Clímax Está Próximo!, kibatulu 27, mu jimbandu ja 184-186.

^ kax. 13 O maka enhá a bhangesa o nguvulu ia ixi ia Bulgária ku bhana ikalakalu iéngi ki i lungu ni ita ku oso ka xikinine ku di ta mu usoladi.

^ kax. 14 Phala kuijiia dingi o musoso iú,tanga o A Sentinela 1 de Novembro de 2012 mu jimbandu ja 29 ndú 31.

^ kax. 14 Mu 20 a mivu, o unguvulu ua Arménia ua te mu kangolondo 450 ndenge a minzangala Jimbangi ja Jihova. O munzangala ua sukina, a mu katula ngó mu kaleia ku mbeji ia Kamoxi ka 2013.

^ kax. 16 O dijina dia muiji ka di soneka kiambote mu madukumendu a inzo ia ku fundisa.

^ kax. 20 Mu madukumendu a inzo ia ku fundisa, o dijina dia muiji a di soneka Ebralinag.