Ku bokona mu madisá

Ku bokona mu madisá

 KIBATULU KUINHI NI KISAMANU

Sola Kubheza Nzambi

Sola Kubheza Nzambi

1, 2. Ihi i ua tokala kudibhuidisa ni mukonda diahi?

MU KUDILONGA o Bibidia ua mono kuila athu avulu amba kuila a mu bheza Nzambi, mu kidi a longa ni kubhanga ima ia iibhila Nzambi. (2 Kolindo 6:17) Mukonda dia kiki, Jihova u tu tendelesa kutunda mu ngeleja ia makutu mba mu ‘Babilonha ia dikota.’ (Dijingunuinu 18:2, 4) Ihi i ua-nda bhanga? Kala muthu ua tokala kusola ni kudibhuidisa, ‘O kuila nga mu bheza muene Nzambi mu ukexilu ua uabhela muéne?’

2 Se ua tundu kiá mu ngeleja ia makutu, ua bhange kiambote. Maji moxi diê, eie nange ua uabhela hanji o ifua ni ima ia tokala mu jingeleja ja makutu. Mu kiki, tua-nda dilonga o ima íii ni kumona se mukonda diahi tua tokala ku i zemba kala ki bhanga Jihova.

UBHEZELU UA ITEKA NI KUBHANA MAUJITU KU MADIFUNDU

3. (a) Mukonda diahi amoxi ka tena kubheza Nzambi sé iteka? (b) Ihi i longa o Bibidia ia lungu ni iteka?

3 Saí athu ene ni iteka mba jisandu m’onzo iâ, phala kubheza Nzambi, ene a bhanga kiki mu mivu iavulu. Se kiene ué ki uene mu bhanga, eie nange u divua kia iibha kubheza Nzambi sé kukala ni ima íii m’onzo. Maji ua tokala kulembalala kuila, Jihova u tu longa kiebhi ki tua tokala ku mu bheza. O Bibidia i tu tangela kuila, Jihova ka mesena kuila, tu kala ni iteka phala ku mu bheza.​—Tanga Makatukilu 20:4, 5; Jisálamu 115:4-8; Izaia 42:8; 1 Nzuá 5:21.

4. (a) Mukonda diahi ki tu tokala kusambela o madifundu? (b) Mukonda diahi Jihova ua tendelesa o mundu uê m’ukulu phala ka zuele ni madifundu?

 4 Saí athu a ngastala kithangana kiavulu ni nguzu mu kusambela o madifundu. Saí bhabha a a bhana maujitu. Maji tua dilongo kiá kuila, o madifundu ka tena ku tu kuatekesa mba ku tu bhanga kia iibha. Ene kai mu kididi kiéngi kana. Mu kidi, kiluezu kia dikota kumesena kuzuela ni madifundu, mukonda o madimonho a tena kuzuela kima ni ku tu bhangesa kubanza kuila, mázui a jindandu jetu jafu. Kiki kiene kia bhangesa Jihova kutendelesa o mundu uê akua Izalaiele, phala ka sote kuzuela ni madifundu mba maukexilu a mukuá a uanga.—Matendelelu 18:10-12; tala o Kibandekesu kia 26 ni 31.

5. Ihi ia-nda ku kuatekesa kueha o iteka ni kubheza o madifundu?

5 Ihi ia-nda tu kuatekesa kueha o ubhezelu ua iteka ni ukexilu ua kusambela o madifundu? Ua bhingi kutanga o Bibidia ni kuxinganeka kiambote kiebhi Jihova kia mona o ima íii. Muéne ‘ua zembe’ o ima íii. (Matendelelu 27:15) Samba kua Jihova izuua ioso n’a ku kuatekese ku mu bheza mu ukexilu ua mesena muéne. (Izaia 55:9) U tena kudielela kuila Jihova ua-nda kubhana nguzu ia soko phala u tene kueha kima kioso-kioso kia tokala mu jingeleja ja makutu.

O KUILA TUA TOKALA KUBHANGA O FESA IA NATALE?

6. Mukonda diahi o atuameni a Ngeleja a solo o kizuua kia 25 kia mbeji ia Kaiiadi phala kulembalala o uvualukilu ua Jezú?

6 Ku mundu uoso, o fesa ia Natale a i ijiia kiavulu. Athu avulu a banza kuila o fesa ia Natale ene mu i bhanga phala kulembalala o uvualukilu ua Jezú. Maji mu kidi, o fesa ia Natale ia tundu mu ubhezelu ua makutu. Saí divulu dilombolola kuila, o jiphagão akua Loma, akexile mu bhanga o fesa ia uvualukilu ua nzambi muanha, mu kizuua kia 25  kia mbeji ia Kaiiadi. O atuameni a Ngeleja, a mesenene kuila jiphagão javulu a kituka Jikidistá. Kienhiki sumbala Jezú ka mu vualele mu kizuua kia 25 kia mbeji ia Kaiiadi, ene a solo kulembalala o uvualukilu uê mu kizuua kiki. (Luka 2:8-12) O maxibulu a Jezú ka kexile mu bhanga o fesa ia Natale. Saí divulu dizuela kuila, mu kubhita 200 ja mivu tundé kia vualele Jezú “ki bhu kexile muthu uejidile o kizuua kia vualele Jezú, ki bhu kexile ué athu avulu a mesenene kuijiia o kizuua kia uvualukilu uê.” (Origens Sagradas de Coisas Profundas) Kioso kia mateka kubhanga o fesa ia Natale, Jezú ka kexile dingi mu ixi.

7. Mukonda diahi o Jikidistá ja kidi kene mu bhanga o fesa ia Natale?

7 Athu avulu ejiia kuila o fesa ia Natale ni ijila iê kála o kudibhana maujitu, ia tundu mu ngeleja ia jiphagão. Mu kifika, m’ukulu mu ixi ia Inglaterra ni jimbandu ja América, o athu ka tokalele kubhanga o fesa ia Natale, mukonda iene ia tundile mu ngeleja ia jiphagão. Uoso a mu kuatele kubhanga o fesa íii, akexile mu mu kaxtikala. Maji mu kubhita thembu, o athu a mateka dingi kubhanga o fesa ia Natale. Mukonda diahi o Jikidistá ja kidi kene mu bhanga o fesa ia Natale? Mukonda ene a mesena kusangulukisa Nzambi mu ioso ia bhanga.

O KUILA TUA TOKALA KUBHANGA O FESA IA UVUALUKILU?

8, 9. Mukonda diahi o Jikidistá ja dianga ka kexile mu bhanga o jifesa ja uvualukilu?

8 O fesa ia mukuá iene mu bhanga kiavulu o athu, o fesa ia uvualukilu. O kuila o Jikidistá a tokala kubhanga o fesa ia uvualukilu? O Bibidia i tumbula ngó fesa jiiadi ja uvualukilu, maji o athu a bhangele o jifesa jiji kexile mu bheza Jihova. (Dimatekenu 40:20; Marku 6:21) O athu akexile mu bhanga o fesa ia uvualukilu, phala kujingisa o jinzambi  ja makutu. Kiene kia bhangesa o Jikidistá ja dianga “kumona o jifesa ja uvualukilu kála kifua kia tundu mu ngeleja ia jiphagão.”—The World Book Encyclopedia.

9 O akua Loma ni akua Ngeléxia m’ukulu, a xikinine kuila mu kithangana kia vuala muthu uoso-uoso, mu kala nzumbi, o nzumbi íii i kuatekesa o muthu ku muenhu uê uoso. M’ukulu o athu ka kexile Jikidistá, akexile mu bhanga o jifesa ja uvualukilu, mukonda ene akexile mu banza kuila o kubhanga kiki kubhangesa o jinzambi jâ kulanga o muthu a mu vuala mu kizuua kieniókio.

10. Mukonda diahi o Jikidistá kene mu bhanga o fesa ia uvualukilu?

10 Mudiê, o kuila Jihova u xikina o jifesa ja tundu mu ubhezelu ua makutu? (Izaia 65:11, 12) Kana, ua ji iibhila. Mukonda dia kiki, etu ki tuene mu bhanga o fesa ia uvualukilu mba jifesa ja mukuá ja tokala mu ngeleja ia makutu.

O KUILA TUA BHINGI KUIJIIA KUOSO KUA TUNDU O JIFESA?

11. Mukonda diahi amoxi ene mu bhanga o jifesa kála o fesa ia Natale? Ihi ia tokala kukala ku pholo ku muenhu uê?

11 Saí athu ejiia kiambote kuila, o fesa ia Natale ni izuua ia mukuá ia kunhoha, ia tundu mu ubhezelu ua makutu, maji né kiki a suluka mu ku ji bhanga. Ene a mona kuila o izuua íii ithangana iambote phala kukala kumoxi ni jindandu jâ. Kiene ué ki u banza? Ki kituxie-ku kumesena kukala kumoxi ni jindandu jê. Jihova ua bhange o muiji, muéne ua mesena kuila tu kala ni ukamba uambote ni muiji uetu. (Efezo 3:14, 15) Maji tua tokala kuta ku pholo o ukamba uetu ni Jihova, mu veji dia kusangulukisa o jindandu jetu mu kubhanga jifesa ja tundu mu ubhezelu ua makutu. Kiene kia bhangesa poxolo Phaulu kuzuela kuila: “Sotenu kudilonga jinga ioso i uabhela kiambote Nzambi.”—Efezo 5:10.

12. Mukonda diahi saí jifesa Jihova u ji iibhila?

 12 Athu avulu amba kuila, ki tu bhingi kuthandanganha se kuebhi kua tundu o fesa, maji Jihova u thandanganha. Jihova ka xikina jifesa ja tundu mu jingeleja ja makutu mba ji bhana kijingu ku athu mba ijimbuete ia ixi. Mu kifika, akua Ijitu akexile mu bhanga jifesa javulu phala o jinzambi jâ ja makutu. Kioso akua Izalaiele kia tundu mu Ijitu, ene a kaiela o ifua ia akua Ijitu, a bhange fesa a ixana “fesa ia Jihova.” Maji Jihova ua a kaxtikala mu kubhanga o fesa ienióio. (Makatukilu 32:2-10) Kála kiambe polofeta Izaia, ki tu tokala “kubabata kima kia ufusa!”—Tanga Izaia 52:11.

KALA U MUTHU UAMBOTE MU KUDIBHANA NI AKUENU

13. Ibhuidisu iebhi i ua-nda sota kuijiia kioso ki ua-nda kueha o kubhanga o jifesa ja mundu?

13 Kioso ki ua-nda banza kueha o ukexilu ua kubhanga o jifesa ja mundu, eie nange ua-nda dibhanga ibhuidisu iavulu. Mu kifika: Ihi i nga tokala o kubhanga se akuetu nga mu kalakala nau a ng’ibhuidisa, se mukonda diahi ki nga mu bhanga o fesa ia Natale? Ihi i nga tokala kubhanga se a ngi bhana ujitu ua Natale? Ihi i nga tokala o kubhanga se kaza diami, u mesena kuila ngi bhanga o fesa ia Natale? Kiebhi ki ngi tena kukuatekesa an’ami phala ka divue kia iibha mukonda dia kukamba kubhanga o fesa iâ ia uvualukilu?

14, 15. Ihi i ua tokala o kubhanga se a ku tangela bhita Natale iambote mba a ku bhana ujitu?

14 Kima kiambote kukala ni kilunji ni unjimu phala u tene kuijiia ihi iu ua tokala kubhanga mba kuzuela mu ithangana íii. Mu kifika, se muthu u ku tangela, bhita natale iambote, kana ku mu bhanga phoko. U mu tambuijila “Nga sakidila.” Maji se muthu ua mesena kuijiia dingi se mukonda diahi, eie kuene mu bhanga o fesa ia Natale,  mu tangele. Maji zuela kiambote, ni unjimu ni kuxila kuoso. O Bibidia i zuela: “O kuzuela kuenu ku kale kua ujitu, kuotoue ni môngua, phala uoso ua m’ibhula, mu ijiie ku mu vutuila kiambote ni ujitu.” (Kolose 4:6) Eie u tena ku mu tangela kuila, eie ua uabhela kukala kumoxi ni akuenu ni kua bhana maujitu, maji eie u bhanga kiki mu ithangana ia mukuá.

15 Ihi i ua tokala kubhanga se a kubhana ujitu? Mu Bibidia ki muala ijila phala ku ku kuatekesa mu ithangana íii, maji o Bibidia i tu tangela kuila tua tokala tu kala ni muxima ua zele ithangana ioso. (1 Timote 1:18, 19) Nange o muthu ua mu ku bhana o ujitu, k’ejiie kuila eie kuene mu bhanga o fesa ia Natale. Muéne nange u zuela kiki: “Ng’ejiia kuila, eie kuene mu bhanga o fesa ia Natale, maji né kiki nga mesena ku ku bhana o ujitu iú.” Mu ithangana íii, éie ua kijiia se ua-nda xikina o ujitu mba kana. Maji kima kioso-kioso ki u bhanga, ua tokala u ki bhanga ni muxima ua zele. Ki tu tokala kubhanga kima ki zanga o ukamba uetu ni Jihova.

EIE NI MUIJI UÊ

O athu a solo kusidivila Jihova, a sanguluka

16. Ihi i ua tokala o kubhanga se muiji uê ua mesena kubhanga o fesa ia Natale?

16 Ihi i ua tokala o kubhanga se muiji uê ua mesena kubhanga o fesa ia Natale? Kana kuzoka-nau. Lembalala kuila, kala muthu uala ni ufolo ua kusola ihi ia-nda bhanga. Kienhiki, kala u muthu uambote, xila o jivondadi jâ, kála ki ua mesena kuila ene uá a xila o ibanzelu iê. (Tanga Matesu 7:12.) Maji se muiji uê ua mesena kuila eie u kala-nau mu kubhanga o fesa ia Natale, ihi i ua tokala o kubhanga? Ande dia kubanza kubhanga kima, samba kua Jihova n’a ku kuatekese kusola kiambote. Xinganeka kiambote o maka, sota kuijiia dingi ihi i ua tokala o kubhanga.  Lembalala kuila, ua tokala kusangulukisa o muxima ua Jihova ithangana ioso.

17. Ihi i ua tokala o kubhanga phala an’ê ka dívue kuila kua a kambe kima, kioso kia mona akuâ a mu bhanga fesa ia uvualukilu ene kana?

17 Ihi i ua tokala o kubhanga phala kukuatekesa an’ê, kioso kia mona akuâ a mu bhanga o fesa ia uvualukilu ene kana? Saí ithangana ku muvu, ua tokala kua bhangela ué fesa. U a sumbila ima ia uabhela ene. Maji o ujitu ua beta-o-kota u u tena kubhana ku tuana tuê, o kukala nau ithangana iavulu ni kua zola.

KALA KU MBANDU IA UBHEZELU UA KIDI

18. Mukonda diahi tua tokala kuia mu iônge ia Jimbangi ja Jihova?

18 Phala kusangulukisa o muxima ua Jihova, tua tokala kutunda mu ngeleja ia makutu ni kueha o ifua iê ioso. Maji tua tokala kukala ku mbandu ia ubhezelu ua kidi. Kiebhi ki tu tena kubhanga kiki? Kia dianga, mu kuia jinga mu iônge ia Jimbangi ja Jihova. (Tanga Jihebeleu 10:24, 25.) O kuia mu kiônge, kulondekesa kuila tuala ku mbandu ia ubhezelu ua kidi. (Jisálamu 22:22; 122:1) Tu tena ku di suínisa mudietu kioso ki tu kala kumoxi.—Loma 1:12.

19. Mukonda diahi kima kiambote kulonga o kidi kia Bibidia ku akuenu?

19 Kima kia mukuá kilondekesa kuila uala ku mbandu ia ubhezelu ua kidi, o kuzuela kua akuenu o Mak’â Nzambi. Athu avulu a mu kema mukonda dia ima ia iibha ia mu bhita mu ngongo. Nange saí iá, eie ua ejiia. Zuela na-u ia lungu ni kidielelu kié kia lungu ni hádia. Se uia jinga mu Kididi kia Ubhezelu kia Jimbangi ja Jihova ni kubokela akuenu, kua-nda kala dingi ni vondadi ia kubhanga mbandu ia jingeleja ja makutu, ni jifesa jê. Sé phata, ua-nda sanguluka. Jihova ua-nda besoala o nguzu iê ia kusola ku mu bheza mu ukexilu uambote.—Malakiia 3:10.