Ku bokona mu madisá

Ku bokona mu madisá

Kibandekesu

Kibandekesu

1 JIHOVA

O dijina dia Nzambi Jihova, dilombolola “Muéne u Bhanga Ioso ia Mesena.” Jihova o Nzambi muteni-a-ioso, muéne ua bhange o ima ioso. Muéne uala ni kutena kua kubhanga ioso ia mu kala ku muxima.

Mu dimi dia Hebalaiku o dijina dia Nzambi a di sonekene ni ijimbuete iuana. Mu Kingileji o dijina didi a disoneka ni YHWH mba JHVH. O dijina dia Nzambi mu mikanda iokulu ia Bibidia mu dimi dia Hebalaiku, dimoneka 7.000 dia jiveji ndenge. O dijina dia Jihova a di tumbula mu maukexilu avulu kuala o athu kála kia fuama mu dimi diâ.

Kiba. 1, kax. 15

2 O BIBIDIA ‘A I BHUSU KUA NZAMBI’

O Bibidia ia Tokala kua Nzambi, maji muéne ua tumu mala phala ku i soneka. Kiki kia difuangana ni xefe ia ditenda, u tuma seketa iê kusoneka mukanda muala ibanzelu iê. Nzambi uendesa o mala a soneka o Bibidia bhu kaxi ka nzumbi iê ikôla, phala kusoneka o ibanzelu iê. O nzumbi ikôla ia Nzambi iendesa o mala enhá mu maukexilu avulu, amoxi a monene isumua, a mukuá a lotele jinzoji ia akexile mu soneka o ima ia muene.

Kiba. 2, kax. 5

3 ITUMU

O itumu, ilongesu ia Bibidia i jimbulula o kidi. Mu kifika, o Bibidia iamba kuila “o ku di lunga ni athu aiibha, ku bolesa o ifua iambote,” kiki ki tu longa kuila o athu u tu dilunga nau a tena ku tu bhangesa kubhanga ima iambote mba ia iibha. (1 Kolindo 15:33) O Bibidia iamba ué kuila “muthu kioso kia kuua, kiene kiandù bhongolola,” kiki ki tu longa kuila se tua bhange ima  iambote tua-nda mona ué mbote maji se tua bhange ima ia iibha, tua-nda bhongolola hadi.—Ngalasia 6:7.

Kiba. 2, kax. 12

4 IKANENU

O ikanenu, njimbu i tunda kua Nzambi. O ikanenu i tena ku tu jimbulula o vondadi ia Nzambi, ni ku tu londekesa o ilongesu iê, mba ku tu bhana ijila. O ikanenu i tena ué kukala kima kia-nda bhita ku hádia. Mu Bibidia muala ikanenu iavulu ia dikumbidila kiá.

Kiba. 2, kax. 13

5 IKANENU IA LUNGU NI MEXIIA

Jezú muéne ua kumbidila ikanenu iavulu ia Bibidia ia lungu ni Mexiia. Tanga o kaxa “ Ikanenu ia Lungu ni Mexiia.”.”

Kiba. 2, kax. 17, ku luiji.

6 O VONDADI IA JIHOVA IA LUNGU NI IXI

Jihova ua bhange o ixi phala kukala palaízu mba dibhata dia athu a mu zolo. O vondadi iê ki i lungululuka kana. Hádia, Nzambi ua-nda zubha o kuiibha kuoso, iu ua-nda bhana muenhu ua kalela-ku ku mundu uê.

Kiba. 3, kax. 1

7 SATANAJI O DIABHU

Satanaji, o anju ia diangela o kubhukumukina Nzambi. O dijina Satanaji dilombolola “Nguma,” a muixana kiki mukonda muéne ua lungulukila Jihova. A muixana ué Diabhu, dilombolola “Mukua Makutu.” A muixana kiki mukonda muéne ua tange makutu alungu ni Nzambi, muéne ué mukua kunganala o athu.

Kiba. 3, kax. 4

  8 JIA-NJU

Jihova ande dia kubhanga o ixi, muéne ua tuamena o kubhanga o jia-nju. Ene a a bhange phala kukala ku diulu. Kuene mazunda avulu a jia-nju. (Daniiele 7:10) Kala anju iala ni dijina diê ni ukexilu uê, o jia-nju ni kulenduka kuoso a dituna ku a bheza ku athu. Ene ala mu ibuka-ibuka, a bhanga ikalakalu iavulu. Mu kifika, ene a sidivila Jihova ua xikama bhu kiandu, a tula o njimbu iê, a langa ni kuendesa o mundu uê mu ixi, a kumbidila o izuelu ia Jihova ia lungu ni kufundisa ni kukuatekesa mu kikalakalu kia kuboka. (Jisálamu 34:7; Dijingunuinu 14:6; 22:8, 9) Ku hádia, ene a-nda kala ku mbandu ia Jezú mu ita ia Alumajedone.—Dijingunuinu 16:14, 16; 19:14, 15.

Kiba. 3, kax. 5; Kiba. 10, kax. 1

9 KITUXI

Kima kioso-kioso kia iibha ki tu banza mba ki tu bhanga bhu pholo ia Jihova, kituxi. Kuma o kituxi ki zanga o ukamba uetu ni Nzambi, muéne ua tu bhana ijila ni itumu phala ki tu te ituxi mu vondadi ietu. Ku dimatekenu, ioso ia bhangele Jihova ia iukile, maji kioso Adá ni Eva kia solo kubhukumukina Jihova, ene a te kituxi, k’exile dingi athu a iuka. Ene a kuka ia afu. Kuma tua lundula o kituxi kia Adá, etu ué tuene mu kuka ni kufua.

Kiba. 3, kax. 7; Kiba. 5, kax. 3

10 ALUMAJEDONE

O ita ia Nzambi phala kubuika o mundu ua Satanaji ni kuiibha kuoso.

Kiba. 3, kax. 13; Kiba. 8, kax. 18

 11 O UTUMINU UA NZAMBI

O Utuminu ua Nzambi, unguvulu ua Jihova ku diulu. Jezú Kristu muéne o Sobha ua mu tumina. Ku hádia, o Utuminu ua Jihova ua-nda zubha o kuiibha kuoso mu ngongo. O Utuminu ua Nzambi ua-nda tumina o ixi.

Kiba. 3, kax. 14

12 JEZÚ KRISTU

Nzambi ande dia kubhanga o ima mu ngongo, muéne ua tuamena kubhanga Jezú. Jihova ua tumu Jezú mu ixi phala kufuila athu oso. Kioso Jezú kia mu jibha, mu kubhita izuua itatu Jihova ua mu fukununa. Mu kiki, Jezú ua mu tumina kiá kála Sobha ia Utuminu ua Nzambi ku diulu.

Kiba. 4, kax. 2

13 O KIKANENU KIA LUNGU NI 70 A JI SEMANA

O Bibidia ia tangele kiá o kithangana kieji kuíza o Mexiia. Muéne ueji kuíza ku disukilu dia 69 a ji semana, o kithangana kiki kia mateka ku muvu ua 455 A.K.K. ki kiai katé ku muvu ua 29 K.K.

Kiebhi ki tuejiia kuila o kithangana kia suku ku muvu ua 29 K.K.? O 69 a ji semana ja mateka ku muvu ua 455 A.K.K., kioso Nehemiia kia bhixila mu mbanza ia Jeluzaleme iu ua mateka o kutungulula o mbanza ienioio. (Daniiele 9:25; Nehemiia 2:1, 5-8) Kioso ki tuivua o kizuelu “semana” ku kilunji kietu kuiza 7 dia kizuua. Mu kikanenu kiki o jisemana ki ji lombolola sambuadi dia izuua kana maji ji semana ja sambuadi dia mivu, mukonda mu ithangana iavulu ‘kala kizuua ki lombolola muvu.’ (Dialuilu 14:34; Izekiiele 4:6) Kiki kilombolola kuila kala semana, sambuadi dia mivu, o 69 a ji semana jilombolola 483 a mivu (69 x 7). Se tu kondala 483 a mivu tundé ku muvu ua 455 A.K.K. tua-nda bhixila ku muvu ua  29 K.K. Iú uene o muvu ua batizala Jezú, iu ua kituka o Mexiia a mu kanene!—Luka 3:1, 2, 21, 22.

O kikanenu kienhiki, kia tange dingi semana ia kamukuá, kifua sambuadi dia izuua. Mu kithangana kienhiki mba mu semana íenii, ku muvu ua 33 K.K., o Mexiia eji mu jibha, o ku muvu ua 36 K.K., o njimbu iambote ia Utuminu ua Nzambi eji mateka ku i tula ku ifuxi ioso kana ngó ku Jijudé.—Daniiele 9:24-27.

Kiba. 4, kax. 7

 14 ULONGELU UA MAKUTU UA TILINDADE

O Bibidia i tu longa kuila Jihova muéne o Mubhangi. Ande dia kubhanga o ngongo kia dianga ua bhange Jezú. (Kolose 1:15, 16) Jezú ki muéne o Nzambi ua Tena Ioso kana. Muéne nuka ua tangele kuila ua soko ni Nzambi, lémbua. Mu kidi muéne uambe: “O Tata uala kota, eme ndenge.” (Nzuá 14:28; 1 Kolindo 15:28) Maji saí jingeleja jene mu longa kuila Nzambi Tilindade mba athu kitatu ku muthu umoxi: Tata, Mona ni nzumbi ikôla. O kizuelu “Tilindade” ki kialé mu Bibidia kana. Iú ulongelu ua makutu.

O nzumbi ikôla, o nguzu ia tenena ia Nzambi iene mu bhanga na-iu o vondadi iê. Ki muthu kana. Mu kifika, o Jikidistá ja dianga ‘ezalele ni Nzumbi Ikôla,’ Jihova uambe: “Nga kà lundulula o Nzumbi iami ku thandu dia athu oso.”—Ikalakalu 2:1-4, 17.

Kiba. 4, kax. 12; Kiba. 15, kax. 17

15 DIKULUSU

Mukonda diahi o Jikidistá ja kidi kene mu bheza Nzambi ni dikulusu?

  1.  Tundé ukulu o jingeleja ja makutu jene mu bheza ni dikulusu. M’ukulu o athu akexile ni dikulusu mu ubhezelu uâ ni mu kukaiela o ijila iâ ia lungu ni undumbu. Kioso Jezú kiafu, mu kubhita 300 ja mivu, o Jikidistá ka kexile ni dikulusu mu ubhezelu uâ. Mu kubhita thembu iavulu, o ngana Constantine nguvulu ia Loma ua bhangesa o dikulusu kukala kijimbuete kia Ukidistá. A bhange o kijimbuete kiki phala kuijidisa o Ukidistá ku mundu uoso. Maji o dikulusu ki kima kia lungu ni Jezú Kristu kana. Saí divulu diambe kuila: “O dikulusu a di sanga kikale mu ijila ia athu akexile Jikidistá ni ku ijila ia athu kexile Jikidistá.”

  2.    Jezú kafu ku dikulusu. Mu Ngeleku o kizuelu “dikulusu” kilombolola “taka,” mba “muxi.” Saí Bibidia (The Companion Bible) iamba kuila: “Sé-ku kima mu Mikanda ia Ngeleku [Kikutu Kiobhe] kilombolola mixi iiadi ia dibhidika, sé-ku.” Jezú uáfu ku taka.

  3.  Jihova ka mesena kuila tu kala ni iteka mu ubhezelu uetu.—Makatukilu 20:4, 5; 1 Kolindo 10:14.

Kiba. 5, kax. 12

16 LEMBALASA

Jezú ua tumu o maxibulu mê Kulembalala o ufuilu uê. Ene a bhanga kiki mivu ioso mu kizuua kia 14 kia mbeji ia Nizá, akua Izalaiele akexile uá mu bhanga o fesa ia Phasu mu kizuua kiki. Mu fesa ia Lembalasa muene mu kala mbolo ni vinhu phala kulombolola o mukutu ni manhinga a Jezú. Oso a-nda tumina kumoxi ni Jezú ku diulu, a dia ku mbolo ni kunua o vinhu. Oso ala ni kidielelu kia kutambula o muenhu mu ixi, a kala uá mu Lembalasa maji ka dia ku mbolo mba kunua o vinhu kana, a tala ngó ni ujitu uoso.

Kiba. 5, kax. 21

17 MUENHU

Mu Tradução do Novo Mundo mu Kingileji, o kizuelu “muenhu” kilombolola (1) muthu, (2) kibhaku mba (3) o muenhu ua muthu mba ua kibhaku. Tala o ifika íii:

  • Muthu. “Mu izuua ia Noué . . . mu álaka muenhomo mua bokona athu, kavulu, nake ngó dia mienhu, anga a bhuluka ku menha.” (1 Phetele 3:20) Bhabha o kizuelu “mienhu” kilombolola athu—Noué ni muhatu’ê, an’ê kitatu ni ahatu’â.

  • Kibhaku. “Nzambi anga u zuela, uixi: Mu menha mu sokoloke ndumba dia iama ia muenhu, (i zouela momo),  ni jinjila ji bhita bhulu mu dinga-ni-dinga.” “Nzambi anga u zuela, uixi: Ku mavu kusokoloke jixitu ja muenhu ku idifua-idifua, ni ibhaku, ni ibamba i zanzala bhoxi, ni iama ia kanga, ku idifua-idifua; anga ki di bhanga kienhiki.”—Dimatekenu 1:20, 24.

  • O muenhu ua muthu mba ua kibhaku. Jihova ua tangela Mozé: ‘Ene oso endele ku ku katula o muenhu ué, áfu kiá.’ (Makatukilu 4:19) Kioso Jezú kia kexile mu ixi, muéne uambe: ‘Eme ngi mubhidi uambote. O mubhidi uambote, u bhana o muenhu uê bhu kididi kia jimbudi jê.’—Nzuá 10:11.

    Kioso muthu kia bhanga kima ni “muenhu uê uoso,” kiki kilombolola kuila muéne ua mu bhanga o kima kiki ni vondadi ioso ni uhete uoso. (Matesu 22:37; Matendelelu 6:5) O muthu kioso kiafua, o muenhu u jimuka.—Dialuilu 6:6; Jisabhu 23:2; Izaia 56:11; Ajeu 2:13.

Kiba. 6, kax. 5; Kiba. 15, kax. 17

18 NZUMBI

Mu Bibidia Tradução do Novo Mundo mu Kingileji o kizuelu “nzumbí” mu dimi dia Ngeleku ni Hebalaiku kilombolola ima iavulu. Maji kilombolola kima ki kamba kumoneka ku mesu, kala o kitembu ni munza uene mu bhuima o athu ni iama. O kizuelu kiki kilombolola ué muthu mu nzumbi mba nzumbi ikôla, o nguzu ia Nzambi i lenda ioso. Sé-ku milongi mu Bibidia i longa kuila kioso muthu kia fuá saí kima kitunda mu mukutu ua muthu anga kikala dingi ku muenhu.—Makatukilu 35:21; Jisálamu 104:29; Matesu 12:43; Luka 11:13.

kiba. 6, kaxi. 5; kiba. 15, kax. 17

GEENA

Geena dijina dia dikungu diexile mu mbanza ia Jeluzaleme mua kexile mu texi o ixete phala ku i toka. Ki  kuale misoso i zuela kuila mu izuua ia Jezú o athu mba iama akexile mu i toka bhu kididi kiki. Geena ki kididi bhuene mu toka o athu áfu. Kioso Jezú kia zuela ia lungu ni athu a-nda kua takula mu Geena, muéne ua kexile mu zuela o athu afua sé kidielelu kia kufukunuka.—Matesu 5:22; 10:28.

Kiba. 7, kax. 20

MUSAMBU UA NGANA IETU

Iú uene o musambu ua longo Ngana ietu Jezú ku maxibulu mê. A uixana ué musambu ua Tata Ietu. Mu kifika, Jezú ua tu longo kusamba kiki:

  • “O dijina dié a dixile”

    Etu tu samba phala kuzelesa o dijina dia Jihova ku makutu oso. Tu bhanga kiki phala athu oso ku diulu ni mu ixi a ximane ni kuxila o dijina dia Nzambi.

  • “Utuminu ué uize”

    Tuene mu samba phala o unguvulu ua Nzambi u buike o mundu ua iibha ua Satanaji, ni kutumina o ixi ni ku i kitula palaízu.

  • “Vondadi ié a i bhange bhoxi”

    Tu samba phala o vondadi ia Nzambi ia lungu ni ixi i di kumbidile phala o athu a lenduka, a iuka a tunge um Palaízu mu ixi katé ku hádia ni hádia, kála kia mesenene Jihova ku dimatekenu kioso kia bhange o athu.

Kiba. 8, kax. 2

21 O KUKÚLA

Phala kubhulula o athu ku ituxi ni kúfua, Jihova ua bhange kima phala ku tu kúla. O kukúla kifua o futu ia bhana Nzambi phala kubhulula o muenhu ua iuka ua texile o diiala dia dianga Adá, ni kujikula kiambote o njila phala o athu kukala dingi ni ukamba uambote ni Jihova. Nzambi ua tumu Jezú mu ixi phala ku fuila o ituxi ietu.  Mukonda dia kúfua kua Jezú, athu oso a a jikuila o njíla phala kukala ni muenhu ua kalelaku ni kukituka athu a iuka, a kambe ituxi.

Kiba. 8, kax. 21; Kiba. 9, kax. 13

22 MUKONDA DIAHI O MUVU UA 1914 MUVU UA KATUNDA?

O kikanenu ki tu sanga mu divulu dia Daniiele kibatulu kia 4, ki tu longa kuila Nzambi ueji zangeleka o Utuminu uê ku muvu ua 1914.

O kikanenu: Jihova ua bhangesa Sobha Nabukodonozolo kulota nzoji, o mu nzoji íii muéne ua mono muxi ua dikota a u batula. Ku kixinji kia muxi a te-ku lubhambu lua felu ni ngondo phala o muxi ki u kule dingi katé kieji bhita “sambuadi dia jithembu.” Mu kubhita o thembu íii, o muxi ueji kula dingi.—Daniiele 4:1, 10-16.

O kilomboluelu kia kikanenu: O muxi u lombolola o unguvulu ua Nzambi. Mu mivu iavulu Jihova ua solele jisobha mu Jeluzaleme phala kutumina o kifuxi kia Izalaiele. (1 Malunda 29:23) Maji o jisobha jojo a bhukumukina Nzambi, mu kiki o utuminu uâ ua suku. O mbanza ia Jeluzaleme a i buika ku muvu ua 607 A.K.K. Kiene kia mateka o “sambuadi dia jithembu.” (2 Jisobha 25:1, 8-10; Izekiile 21:25-27) Kioso Jezú kiambe: “Jeluzaleme-phe ia ká xala mu ku i titidila kuala akua jixi jengi, a kambe kuijiia Nzambi, katé kia kà bhua o thembu ia akua jixi jengi,” muéne ua kexile mu lombolola o “sambuadi dia jithembu.” (Luka 21:24) Mu kiki o “sambuadi dia jithembu” ki ja bhu mu kithangana kioso Jezú kia kexile mu ixi kana. Jihova ua kanene kutumbika Sobha ku disukilu dia “sambuadi dia jithembu.” O unguvulu ua Sobha íii, Jezú, ueji bheka mabesá a nzungule phala o mundu ua Nzambi a-nda kala mu ixi katé ku hádia ni hádia.—Luka 1:30-33.

O “sambuadi dia jithembu” jilombolola thembu jikuxi? O “sambuadi dia jithembu” ia bhange 2.520 a mivu. Se tu kondala 2.520 a mivu tundé ku muvu ua 607 A.K.K. tua-nda tula ku muvu ua 1914. Ku muvu uenhó Jihova ua bhangesa o Mexiia mba Jezú, kukala Sobha ia Utuminu ua Nzambi ku diulu.

 O 2.520 a mivu tua i katula kuebhi? O Bibidia iamba kuila thembu jitatu ni kaxaxi kilombolola 1.260 a izuua. (Dijingunuinu 12:6, 14) Mu kiki “sambuadi dia jithembu,” 2.520 a izuua. O 2.520 a izuua kilombolola 2.520 a mivu mukonda mu kikanenu “kala kizuua muvu,” mba kizuua kimoxi kilombolola muvu.—Dialuilu 14:34; Izekiiele 4:6.

Kiba. 8, kax. 23

23 MINGEDI KOTA DIA JIA-NJU

O Bibidia i tumbula ngó muthu umoxi kuila kota dia jia-nju, o dijina diê Mingedi.—Daniiele 12:1; Juda 9.

Mingedi muéne o Mutuameni ua kifuxi kia jia-nju ja fiiele ja Nzambi. Dijingunuinu 12:7 di zuela: ‘Mingedi ni ji-anju jê a luá ita ni mudikixi . . . ni ji-anju jê.’ O divulu dia Dijingunuinu di zuela kuila o Mutuameni ua kifuxi kia Nzambi, Jezú. Mu kiki Mingedi, dijina dia mukuá dia Jezú.—Dijingunuinu 19:14-16.

Kiba. 9, kax. 4

24 IZUUA ISUKIDILA-KU

O izuua isukidila-ku o kithangana kieji bhita o izulukutu ia makota ande dia Utuminu ua Nzambi kubuika o mundu ua Satanaji. O Bibidia i tumbula ué izuelu ia mukuá kala “dizubhilu dia mundu” ni “kutukuluka kua Mon’a muthu,” phala kulombolola izuua isukidila-ku. (Matesu 24:3, 27, 37) “O izuua isukidila-ku” ia mateka kioso o Utuminu ua Nzambi ki ua mateka o kutumina ku diulu ku  muvu ua 1914, í ia-nda bhua kioso o mundu ua Satanaji kia-nda u buika mu ita ia Alumajedone.—2 Timote 3:1; 2 Phetele 3:3.

Kiba. 9, kax. 5

25 DIFUKUNUKINU

O difukunukinu dilombolola Nzambi kubheka dingi ku muenhu o muthu uáfu kiá. Mu Bibidia muala misoso ia divua dia athu a fuile maji a fukunuka. Ilija, Ilizeu, Jezú, Phetele ni Phaulu, a fukunuine athu. Ene a tenene ngó kubhanga o madiuanu enhó mukonda dia kutena kua Nzambi. Jihova ua tu kanena kufukununa “athu aiuka ni athu abhukumuka” n’a kale dingi ku muenhu. (Ikalakalu 24:15) O Bibidia i tanga ué athu a-nda ku a fukununa phala kuia ku diulu. Kiki ki bhita kioso o athu a a solo mba a a undu kuala Nzambi, a a fukununa phala kuia mu diulu mu kukala kumoxi ni Jezú.—Nzuá 5:28, 29; 11:25; Filipe 3:11; Dijingunuinu 20:5, 6.

Kiba. 9, kax. 13

26 ULOJI (UANGA)

O uloji mba uanga, o ukexilu ua kumesena kuzuela ni jinzumbi mba madimonho bhu kaxi ka kimbanda mba muthu uengi. O athu a bhanga kiki mukonda ene a xikina kuila o jinzumbi ja athu ji kala ku muenhu kioso o muthu kia fuá ni kuila jene ji kituka nzumbi iala ni kutena kuavulu. O madimonho ué a bhanga ioso phala ki tu belesele Nzambi. O kuzambula ni umbanda ni ima ia mukuá dingi iala ué moxi dia uloji. Kuene madivulu avulu, ji filime ni mimbu ilondekesa o uloji ni uanga kála ima iambote. Kuene ué ijila iavulu ia lungu ni kufunda, kála kubhana maujitu ku difundu, kubhanga fesa ia muthu uáfu, kuxikama ku dixisa dia utudi ni ijila ia mukuâ. Ioso íii kifua ima ia madimonho. O athu saí  bhabha a tambula jidroga phala ku a kuatekesa kuala o madimonho.—Ngalásia 5:20; Dijingunuinu 21:8.

Kiba. 10, kax. 10; Kiba. 16, kax. 4

27 O UNGANA UA JIHOVA

Jihova o Nzambi ua Tena-Ioso, muéne ua bhange ngongo ioso. (Dijingunuinu 15:3) Mukonda dia kiki, muéne Uávu o ima ioso. Muéne uala ni ungana uoso ua kutumina o ngongo ni ima ioso iene-mu. (Jisálamu 24:1; Izaia 40:21-23; Dijingunuinu 4:11) Ima ioso ia bhange muéne, ua i bhange ni ijila phala ku iendesa. Jihova ué uala ni ungana ua kusola oso a tokala phala kutumina. Tu kuatekesa o ungana ua Nzambi mu ku mu zola ni ku mu belesela.—1 Malunda 29:11.

Kiba. 11, kax. 10

28 KUSELULA

O kuselula kifua kubhanga kima mu luelu phala kufuisa o mona uala mu mala. O kuselula ki kiluezu kiza ngó kana. Tundé o kithangana kia kala mu mala, o mona ki kidiandu kia mukutu ua mama kana. O mona mu divumu, muthu kiá.

Kiba. 13, kax. 5

29 KUTA MANHINGA MU MUKUTU

Ukexilu ua kusaka o jihaxi, mu ukexilu iú o manhinga a muthu a a ta mu mukutu ua muthu uengi. O jimbandu jiuana ja manhinga jenhiji: Plasma, ndundula ia kusuka, ndundula ia zele ni plaketa.

Kiba. 13, kax. 13

 30 KUBAZELA

Mu Bibidia o kizuelu “kubazela” ki kilombolola kukaxtikala. Kioso kia tu bazela, kifua a mu tu longa, ku tu bhana kilunji ni unjimu. Jihova ua tu zolo kienhiki muéne ka tu bazela phala ku tu bhanga kia iibha kana. (Jisabhu 4:1, 2) Jihova u bhana phangu iambote ku jitata kioso kia tokala kubazela o tuana. O ulongelu u bhana muéne ulongelu uambote u bhangesa o muthu ku u uabhela. (Jisabhu 12:1) Jihova ua zolo o mundu uê mukonda dia kiki u a longa kioso kia uabha. Muéne u a bhana itendelesu i a kuatekesa kukatula o ibanzelu ia iibha ku muxima ni ku a kuatekesa kubanza ni kubhanga o ima mu ukexilu ua uabhela muéne. Phala o jitata, o kubazela kulombolola kukuatekesa o tuana tuâ kuijiia se mukonda diahi ene a tokala kubelesela. Kulombolola ué ku a longa kuzola Jihova, kuzola o Maka mê o Bibidia ni kutendela o itumu iê.

Kiba. 14, kax. 13

31 MADIMONHO

Jinzumbi ki tu tena ku ji mona, jala ni kutena etu ndenge. O madimonho jia-nju ja iibha. Jene ja kituka jia-nju ja iibha kioso kia dibhange jinguma ja Nzambi ni ku mu bhukumukina. (Dimatekenu 6:2; Juda 6) Ene a di lungu ni Satanaji ua bhukumukina Jihova.—Matendelelu 32:17; Luka 8:30; Ikalakalu 16:16; Tiiaku 2:19.

Kiba. 16, kax. 4