Ku bokona mu madisá

Ku bokona mu madisá

 KIBATULU KUINHI NI KIIADI

Kiebhi ki u Tena Kukala Dikamba Dia Nzambi?

Kiebhi ki u Tena Kukala Dikamba Dia Nzambi?

1, 2. A nanhi exile o makamba a Jihova?

NANHI ua mesena u kala kamba diê? Muthu ua mu uabhela. Muthu u dibhana-né kiambote muéne ué u dibhana kiambote n’eie. Muthu uala ni ukexilu ni ídifua i ua uabhela.

2 Jihova Nzambi ua solo athu phala kukala makamba mê. Mu kifika Mbalahamu uexile dikamba dia Jihova. (Izaia 41:8; Tiiaku 2:23) Jihova ua zolele ué Davidi. Muéne uambe kuila Davidi ‘muthu ua mu zelela ku muxima.’ (Ikalakalu 13:22) O polofeta Daniiele uexile muthu ‘a mu zolele kinene’ kua Jihova.—Daniiele 9:23.

3. Mukonda diahi Mbalahamu, Davidi ni Daniiele exile makamba a Jihova?

3 Kiebhi o Mbalahamu, Davidi ni Daniiele a kituka makamba a Jihova? Jihova uambela Mbalahamu: “Mukonda ua tumaka dízui diami.” (Dimatekenu 22:18) Jihova u kala ni ukamba ni athu a mu belesela ni muxima uoso. Katé muene o ifuxi i tena kukala ni ukamba ni muéne. Jihova ua jimbulula o kifuxi kia Izalaiele: “Bhanenu mátui ku dízui diami eme ngi kale ngi Nzambi ienu, enu mu kale mu mundu uami.” (Jelemiia 7:23) Kienhiki-phe eie ua tokala ué u belesela Jihova se ua mesena kukala kamba diê.

JIHOVA U LANGA O MAKAMBA MÊ

4, 5. Kiebhi Jihova kiene mu langa o makamba mê?

4 O Bibidia izuela kuila Jihova ua mesena ‘kulondekesa o kusuína kuê mu ku kudila ió oso ala ni muxima ua tenena  kua muéne.’ (2 Malunda 16:9) Mu divulu dia Jisálamu 32:8, Jihova u kanena o makamba mê: “Ngi ku longesa, ngi ku [idikisa] njila ioso ia fuama ku iila; ngi kubhana kaiula, kuma nga ku te muene diesu.”

5 Kuene nguma ia dikota ua mesena ku tu fidisa kukala ni ukamba ni Nzambi. Maji Jihova ua mesena ku tu langa. (Tanga Jisálamu 55:22.) Mukonda tu makamba a Jihova, tu mu sidivila ni muxima uoso. Tu mu naminina né muene mu ithangana ia bhonzo. Tuala ué ni kidielelu kia kexile na-kiu o mukuá Jisálamu. Muéne ua soneka ia lungu ni Jihova: “Mukonda dia muene ku ng’imanena bhua zukama, ki bhuala u tena ku ngi lundumuna.” (Jisálamu 16:8; 63:8) Ihi ia mu bhanga Satanaji phala ku tu fidisa kukala ni ukamba ni Nzambi?

SATANAJI UA TATELA NZAMBI

6. Ihi iambe Satanaji ia lungu ni athu?

6 Mu kibatulu kia 11, tua dilongo kuila Satanaji ua tatela Jihova, uambe kuila muéne mukuá makutu, mukuá mangonha, kehela Adá ni Eva kusola o ima ia mesenene. O divulu dia Jobe di tu longa kuila Satanaji ua tatela ué o athu a mesena kukala makamba a Nzambi. Satanaji uambe kuila o athu ene mu bheza Nzambi mukonda dia ima iene mu a bhana Muéne, maji ka Mu zolo mu kidi. Satanaji uambe ué kuila, muéne u tena ku sondolola muthu uoso-uoso kua Nzambi. Tu dilonge ihi i tu longa o phangu ia Jobe ni kiebhi Jihova kia mu lange.

7, 8. (a) Kiebhi Jihova kia monene Jobe? (b) Ihi ia zuela Satanaji ia lungu ni Jobe?

7 Nanhi uexile Jobe? Muéne uexile diiala diambote, uexile ku muenhu 3.600 a mivu kudima. Jihova uambe kuila, mu kithangana kienhokio, mu ixi ki mu kexile muthu kála Jobe. Muéne uexile ni kijingu kua Nzambi, iu ua  zembele o ima ia iibha. (Jobe 1:8) Jobe uexile dikamba dia kidi dia Jihova.

8 Satanaji ua tatela Jobe kuila ka kexile mu bheza Nzambi mukonda dia henda kana. Satanaji uambela Jihova: “Manhi eie ku mu izalesa ni jimbote, ni muene ni dibhata diê dioso ni ioso iala na-iu? O kikalakalu kia maku mê eie ua ki zediuisa, o ibhaku iê ia sokoloka mu ngongo. Maji zènga hanji ngó o lukuaku luê, u mu kuate ku ioso iala na-iu, u tale se ka-nda ku ku xonguena bhu pholo iê.”—Jobe 1:10, 11.

9. Jihova uehela Satanaji kubhanga Ihi?

9 Satanaji ua tatela Jobe kuila, ua kexile ngó mu bheza Jihova mukonda Muéne ua kexile mu mu besoala kiavulu. Satanaji ua zuela ué kuila, muéne ueji tena kusondolola Jobe kua Jihova. Jihova ka xikina o izuelu ia Satanaji, maji ua mu bhana kithangana phala kupolovala Jobe se mu kidi ua kexile mu bheza Jihova mukonda dia henda mba kana.

SATANAJI U POLOVALA JOBE

10. Kiebhi Satanaji kia polovala Jobe ni ihi ia bhange Jobe?

10 Satanaji ua dianga kujibha o ibhaku ioso ia Jobe. Mu kukaiela ua jibha o jiselevende ja Jobe. Jobe ua xala sé kima. Mu kusuka-ku, Satanaji ua tumikisa kitembu kia jibha o dikuinhi dia an’a Jobe. Maji Jobe ua suína mu kubheza Jihova. “Mu ima ioso iii Jobe ka tela-mu kituxi, mba u ta ngó mulonga uoso-uoso kua Nzambi.”—Jobe 1:12-19, 22.

Jihova ua besoala Jobe mukonda dia ufiiele uê

11. (a) Ihi dingi ia bhange Satanaji kua Jobe? (b) Ihi ia bhange Jobe?

11 Satanaji ka bhuila. Muéne uambe dingi kua Nzambi: “Mu kuate hanji mu ifuba ni mu misuínhi, u mone mba ka-nda ku ku xonguena muéne bhu pholo ié!” Kienhiki-phe Satanaji ua kuama Jobe ni uhaxi ua dikota. (Jobe 2: 5, 7) Né kiki Jobe ka xisa Jihova. Muéne uambe: “Katé bhu nga kà fuila, nuka nga ká sanduka mu kidi kiami!”—Jobe 27:5.

12. Kiebhi kia londekesa Jobe kuila Satanaji mukua makutu?

12 Jobe kejidile kuila a mu tatela, kejidile ué se mukonda diahi ua kexile mu tala hadi. Muéne ua kexile mu banza kuila Jihova muéne ua kexile mu mu bhekela o ibhidi. (Jobe 6:4; 16:11-14) Maji né kiki Jobe ua kolokota mu ufiiele uê kua Jihova. Ki ku kexile dingi phata. Jobe kexile mukua luímbi. Muéne uexile dikamba dia Nzambi mukonda ua Mu zolele. O ima ioso ia iibha ia zuela Satanaji iexile ngó makutu!

13. Ihi ia tambula Jobe mukonda dia kukolokota mu ufiiele uê?

13 Sumbala Jobe kejidile o maka akexile mu bhita ku diulu, maji muéne ua naminina kua Nzambi iu ua londekesa kuila Satanaji muthu ua iibha. Jihova ua besoala Jobe mukonda dia kukolokota mu ku mu bheza.​—Jobe 42:12-17.

KIEBHI KIA KU TATELA SATANAJI?

14, 15. Ihi ia zuela Satanaji ia lungu ni athu?

14 Eie u tena kudilonga phangu mu ima ia bhiti ni Jobe. Lelu Satanaji ua mu tu tatela kuila tua mu sidivila ngó Jihova mukonda dia ima ia tu bhana Muéne. Mu divulu dia Jobe 2:4, Satanaji uambe: “O muthu ioso iala na-iu u i bhana mu ku kula o muenhu uê.” Kienhiki Satanaji u tatela athu oso ki kala mala mba ahatu, kuila akua luímbi, ka tatela ngó Jobe, kana. Kua bhiti kiá jihama ja mivu tundé kiafu Jobe, maji Satanaji uene hanji mu xonguena Jihova ni kutatela o jiselevende jê. Mu kifika, o divulu dia Jisabhu 27:11, di zuela: “Dimuka mon’ami, u tanese o muxima uami, phala ngi kale ni kia ku vutuila oso a ngi [sebhulula.]”

 15 Eie u tena kusola kusidivila Jihova ni kukala kamba Diê dia fiiele, ni kulondekesa kuila Satanaji mukua makutu. Né muene se kubhinga kulungulula o ukexilu uê phala kukala ni ukamba ni Nzambi, kiene o kima kia beta-o-kota ki ueji sola! O kubhanga kiki maka a dikota, Mukonda Satanaji uamba kuila eie ki ua-nda kala fiiele kua Nzambi kioso ki u kala mu ibhidi. Muéne u bhanga ioso phala ku tu nganala, phala tuehe kubheza Nzambi. Kiebhi kiene mu bhanga kiki?

16. (a) Jindunge jahi jene na-ju Satanaji phala kufidisa o athu kusidivila Jihova? (b) Ihi ieji bhanga Diabhu phala ku ku fidisa kusidivila Jihova?

16 Satanaji uala ni jindunge javulu phala ku tu fidisa kukala makamba a Nzambi. Muéne u mesena ku tu kuata kála o “hoji iala mu zuma, u nhunga jinga mu jimbandu . . . mu kusota uoso a mu dia.” (1 Phetele 5:8) Ku diuane se makamba mê mba jindandu jê ni athu amukua, a mesena ku ku fidisa kudilonga o Bibidia ni kubhanga o ima ia iuka. Nange u divua kála a mesena ku ku kuata. * (Nzuá 15:19, 20) Satanaji u “di bhangesa kála anju ia mukengeji.” (2 Kolindo 11:14) O ndunge ia mukua ia Satanaji, o ku tu bhangesa kubanza kuila tu athu a iibha, ki tuala ni valolo, nuka tua-nda tena kusidivila Nzambi.—Jisabhu 24:10.

BELESELA O ITUMU IA JIHOVA

17. Mukonda diahi tua tokala kubelesela Jihova?

17 Kioso ki tu belesela Jihova, tu londekesa kuila Satanaji mukua makutu. Ihi ia-nda tu kuatekesa kubelesela  Nzambi? O Bibidia izuela: “Zola-phe Jihova Nzambi ié ni muxima ué uoso, ni muenhu ué uoso, ni nguzu ié ioso.” (Matendelelu 6:5) Tu belesela Jihova mukonda tua mu zolo. Kioso ki tuia ni kuzola Jihova, tua-nda mesena kubhanga ioso ia tu bhinga. O poxolo Nzuá ua soneka: “O henda ia kuzola Nzambi inhi’íi, o kualuka o ijila iê. O ijila iê-phe ki ia bhonzo ku i aluka.”—1 Nzuá 5:3.

18, 19. (a) Ima iahi izuela Jihova kuila ima ia iibha? (b) Kiebhi ki tuejiia kuila Jihova ka tu bhingi kima kia tundu o nguzu ietu?

18 Maji ima iahi i zuela Jihova kuila ki tu tokala ku i bhanga? Saí ima tu i sanga mu kaxa, “ Zemba o Ima ia Zembe Jihova.” Ku dimatekenu nange u banza kuila o ima iii ki ia iibha kana. Maji kioso ki u tanga o jivelusu ja Bibidia, ni ku ji xinganeka, ua-nda mona o unjimu ua ku belesela o itumu ia Jihova. Ua-nda mona ué kuila saí ima i ua tokala ku lungulula ku muenhu uê. Sumbala saí ithangana kia-nda ku bhonza, maji se u bhanga kiki ua-nda kala  ni kutululuka ni kusanguluka kuijila mu kukala ni ukamba ni Nzambi. (Izaia 48:17, 18) Kiebhi ki tuejiia kuila ki ki bhonzo ku lungulula o ukexilu iú?

19 Jihova ka tu bhingi kubhanga kima kia tundu o kutena kuetu. (Matendelelu 30:11-14) Mukonda muéne dikamba dia kidi, muéne ua beta ku tuijiia etu ndenge. Muéne uejiia o ima i tu tena kubhanga ni ima ki tu tena ku i bhanga. (Jisálamu 103:14) O poxolo Phaulu ua tu suínisa: “O Nzambi-phe kizuelu kiê u ki kumbidila, kehela ku mi tendala mu kima kia túndu o nguzu ienu. Maji kioso k’iza o tendasá, Nzambi u mi bhana nguzu phala mu tene kubhalakata, ni ditundilu dia kutena kubhita.” (1 Kolindo 10:13) Tu tena kudielela kuila Jihova ua-nda tu bhana nguzu ia kubhanga o ima ia iuka. Muéne ua-nda kubhana “o nguzu i lenda,” phala ku ku kuatekesa kudibhana ni ibhidi. (2 Kolindo 4:7) Kioso kia mono o kikuatekesu kia Jihova mu ithangana ia jiphaxi, Phaulu uambe: “Ima ioso  nga soko na-iu mua Kristu ió mukua ku ngi bhana o kutena.”—Filipe 4:13.

DILONGE KU ZOLA IA ZOLO NZAMBI

20. Ídifua iebhi i ua tokala kukala na-iu ni mukonda diahi?

20 Se tua mesena kukala ni ukamba ni Jihova, tua tokala kueha o ima ia iibha ia zuela Jihova, maji tua tokala kubhanga dingi kima. (Loma 12:9) O makamba a Nzambi a zolo o ima ia zolo muéne. Kála o ima i tu sanga mu divulu dia Jisálamu 15:1-5. (Tanga.) O makamba a Jihova a fikisa o idifuá iê, ni kulondekesa ‘henda, ngalasa, kutululuka, kuxididika, kulenduka, kubhanga mbote, kukala fiiele, Kubelesela, ni ku di tumina jihânji.’—Ngalásia 5:22, 23.

21. Kiebhi ki u tena kudilonga kulondekesa o idifua ia zolo Nzambi?

21 Kiebhi ki u tena kudilonga kulondekesa o ídifua íii iambote? Ua tokala kudilonga ihi ia zolo Jihova mu kutanga ni kudilonga o Bibidia ithangana ioso. (Izaia 30:20, 21) Kioso ki uia ni kudilonga, o henda iê kua Jihova ia-nda dibandekesa, mu kukala ni henda íii, ua-nda mesena ku mu belesela.

22. Ihi i ua-nda tambula se u belesela Jihova?

22 O ima i ua-nda bhinga ku lungulula ku muenhu uê, ia difu ni kuzula o izuatu ia xidi ni kuzuata izuatu ia zele. O Bibidia izuela kuila eie ua tokala kuzula ‘o muthu uokulu’ ni kuzuata “muthu uobhe.” (Kolose 3:9, 10) Sumbala ki bhonza o kubhanga kiki, maji se tu belesela Jihova, muéne-phe u tu kanena ku tu ‘besoala.’ (Jisálamu 19:11) Sola kubelesela Jihova phala kulondekesa kuila Satanaji mukua makutu. Kana kusidivila ngó Jihova mukonda dia mabesá u ua-nda tambula ku hádia, maji mu sidivile mukonda dia henda. Se u bhanga kiki ua-nda kala u dikamba dia kidi dia Nzambi!

^ kax. 16 Kiki ki kilombolola kuila Satanaji muéne uene mu funhisa o athu a mesena ku ku fidisa kudilonga o Bibidia. Maji Satanaji muéne “o nzambi iaiibha ia mundu iú” ni kuila “o mundu uoso-phe [uala mu kutena kuê].” Mukonda dia kiki, ki tu tokala kudiuana se kumoneka muthu ua mesena ku tu fidisa kusidivila Jihova.—2 Kolindo 4:4; 1 Nzuá 5:19.