Ku bokona mu madisá

Ku bokona mu madisá

 KIBHUIDISU 6

Kiebhi ki Ngi Tena Kudituna o Kijijidiku Kia Jikoleka?

Kiebhi ki Ngi Tena Kudituna o Kijijidiku Kia Jikoleka?

MUKONDA DIAHI UA TOKALA KUIJIIA O MAKA ENHÁ?

Se u dimuka, ua-nda tena kulanga kiambote o muenhu ué, mu veji dia kueha athu engi kutumina o muenhu ué.

IHI I UEJI BHANGA?

Xinganeka o kifika kiki: Koleka jiiadi ja Brian a mu zukama, muéne anga u teketa. Mu semana íii, a mu tendala kia veji jiiadi phala kubuakula makanha. Íii o veji ia katatu kia.

O Muzangala ua dianga u zuela:

“Uala dingi ubheka ué? Zá, phala kuijiia kamba diami.”

Muéne ua “sasumuka” kioso kiévu o kizuelu kamba diami, kioso kia mu mono kukatula kima mu jibela jê, anga u sununa o lukuaku luê kua Brian.

Brian ua mono o xikalu mu milembu ia muzangala uenhó. Brian anga u kala dingi ni uôma anga u teketa.

Brian uambe, “ngi loloke.” “Nga kutangela kia kuila ki ngi mesena ku . . .”

O muzangala ua kaiiadi u zuela: “Kana kukala u matumbu!”

Brian u zuela ni kusuína, “Eme ngi matumbu?”

O muzangala ua kaiiadi u ta o lukuaku luê ku kisuxi kia Brian. Uzuela ni henda, “fikisa ngó.”

O muzangala ua dianga, u kuata o xikalu katé bhu pholo ia Brian, anga u zuela, uixi: “Ki tua-nda tangela muthu. Sé-ku muthu ua-nda kijiia.”

Se ua kexile bhu kididi kia Brian, ihi i ueji bhanga?

 XINGANEKA!

O kuila o jikoleka ja Brian, ejidile se ihi ia kexile mu bhanga? O kuila a bhange muene mu vondadi iá? Nange kana. Mu kidi, ene ehela athu engi kua funhisa. Ene a mesena kua xikina ku athu engi, mu kiki ene ehela o athu ku a tumina se ihi ieji bhanga.

Se ua dibhanene ni maka enhá, ihi i ueji bhanga?

  1. LENGA O KILUEZU

    O Bibidia i longa: ‘Njimu kiluezu u ki muena di kanga, anga u suam’é kiá; ilalu-phe a lundujuka ngó, katé kia mona divuua.’Jisabhu 22:3.

    Mu kidi, u tena kulenga o kiluezu. Xinganeka kuila eie ua mu mona kibuka kia jikoleka jê a mu xibha makanha. Se u dianga kuxinganeka, ua-nda dibhana kiambote ni maka enhá.

  2. XINGANEKA

    O Bibidia i longa: “Mu kale ni kitongoluelu kia zele.”1 Phetele 3:16.

    Dibhuidise: ‘Ibhidi iahi i ngeji dibhana na-iu se ngi kaiela o ukexilu ua athu?’ Mu kidi, nange kubhinga kubatula o ukamba ni jikoleka jiji. Kiebhi ki ua-nda divua? O kuila ua-nda zanga o ukamba ué ni Nzambi mukonda dia jikoleka jé?Makatukilu 23:2.

  3. SOLA NI UNJIMU

    O Bibidia i longa: “Muthu ua dimuka, o ima ia bhanga u iendesa kiambote.”Jisabhu 14:16.

    Ki kale lelu mba ku hádia, tua-nda mona o mbote mba ibhidi, mukonda dia ima i tu sola. O Bibidia izuela ia lungu ni Zuze, Jobe ni Jezú, kuila a solo kiambote. Izuela ué kuila Kaini, Izaú ni Juda, ka solo kiambote. Ihi i ua-nda bhanga?

O Bibidia i longa: ‘Kala u fiiele.’ (Jisálamu 37:3) Se uene mu xinganeka mu ibhidi ijila mukonda dia ima i u sola, ua tokala u dimuka ni kukolokotase u bhanga kiki ua-nda tambula mabesá.

Kana kuthandanganha—ku tokala kubhânga ni jikoleka jé. Kubhinga ngó kuzuela KANA, mba kulondekesa muene kuila ku mesena, u tena kuzuela kuila:

  • “Ki ngi mesena!”

  • “Ki ngi bhange o ima íii!”

  • “Eie ua ngijiia kia tundé ukulu, ima íii kana!”

O kima kiambote, o kutambuijila ni lusolo ni kusuína kuoso. Se u bhanga kiki, ua-nda tena kumona kiebhi o jikoleka jé a-nda kueha o ku kujijidika!

 SE A KUXONGUENA

Se uehela o jikoleka jé ku kujijidika, ua-nda kituka kála u makina a mu i bhangesa o kukalakala

Ihi i ua tokala o kubhanga se jikoleka jé a kuxonguena? Abha se ene a zuela “Ki kima kia iibha—o kuila eie u matumbu?” Kima kiambote kuijiia o maka enhá ande dia kubhita nau—phala kudibhana ni ijijidiku ia jikoleka. Kiebhi ki ueji dibhana ni kijijidiku? Saí ndunge jiiadi phala eie.

  • Kima kiambote kutambuijila ni kisangu-sangu se a kulokalala. (“Ua lungué, eme ngala muene ni uôma!” Mu kusuluka zuela se mukonda diahi.)

  • U tena kuvutuila o kijijidiku. Mu kusuluka zuela se mukonda diahi, anga u a bhangesa kuxinganeka mu maka enhá. (“Nga mono kuila eie u muthu uambote, ku tokala kubuakula makanha!”)

Se jikoleka jé, a suluka ni ku kulokalala, ndé kubhata! Ijiia kuila, kioso ki u kala kumoxi ni athu enhá, a-nda kuxonguena dingi. Se u kamba kudilunga ni athu enhá, eie ua-nda londekesa kuila, o athu engi ka tokala kutumina o muenhu ué.

Mu kidi, ki bhonza kulenga o kijijidiku kia jikoleka. Eie u tena kusola ihi i ua tokala o kubhanga, kusuína ni kudilanga. Eie ua tokala kusola!Josuué 24:15.