Ku bokona mu madisá

Ku bokona mu madisá

 KIBANDEKESU

Ithangana Iebhi, ni Mukonda Diahi— o Muhatu ua Tokala Kuvunga o Mutué?

Ithangana Iebhi, ni Mukonda Diahi— o Muhatu ua Tokala Kuvunga o Mutué?

Ithangana iebhi ni mukonda diahi, o muhatu Kidistá ua tokala kuvunga o mutué, kioso kia bhanga ikalakalu ia lungu ni ubhezelu uê? Tua-nda zuela ihi ia tumina kua phoxolo Phaulu ku soneka ia lungu ni maka enhá. Muéne ua bhana o itendelesu ia tu tokala, phala ku sola kiambote i tua tokala o ku bhanga, phala ku bhana kijingu kua Nzambi. (1 Kolindo 11:3-16) Phaulu ulondekesa maukexilu atatu, u tua tokala ku xinganeka: (1) o ikalakalu i bhinga kuila o muhatu u vunga o mutué, (2) o ithangana ia tokala ku bhanga kiki, ni (3) mukonda diahi ua tokala ku kumbidila o kitumu kiki.

O ikalakalu. Phaulu ulondekesa maukexilu aiadi: Kia bhanga o musambu, ni ku longa. (Velusu 4, 5) O musambu mu kidi, ulombolola kuzuela ni Jihova. Lelu, o ku longa kulondekesa kioso o muboki ua Kidistá, kia lombolola o njimbu iambote ia Bibidia. O kuila Phaulu ua mu londekesa kuila o muhatu ua tokala kuvunga o mutué mu ithangana ioso, kioso kia samba, mba kia longa o kidi kia Bibidia? Kana. Mu ithangana mua bhanga o misambu, mba mu longa, muene mu londekesa se ua tokala ku bhanga kiki.

O ithangana. O izuelu ia Phaulu ilondekesa ithangana iiadi—mu muiji, ni mu kilunga. Muéne uambe: ‘O muhatu ua mu kala ku pholo, o diiala . . . muhatu uoso-phe u kala mu  samba mba mu tula o Njimbu Iambote ia Nzambi bhu iônge ia ku bheza, n’a kambe kuvunga o mutué uê, o muhatu iú ka mu bhana kijingu kua muadi’ê.’ (Velusu 3, 5) Ku muiji, Jihova ua solo o diiala phala ku kala ku pholo ia muhatu. O muhatu u tena ku bhanga o kikalakalu kia bhana Jihova ku diiala, maji se muéne u bhanga kiki, sé ku xila o ungana ua diiala, o muhatu iú, ka mu bhana kijingu kua muadi’ê. Mu kifika, se o muhatu kia longa o dixibulu diê ku pholo ia munumi’ê, muéne ua tokala ku xila o ungana uê, mu kuvunga o mutué. Muéne ua tokala ku bhanga kiki, ki kale se a mu batizala kiá, mba kana, mukonda muéne uala ku pholo dia muiji. * Se o muhatu u samba ku pholo ia mon’ê a mu batizala kiá, ua tokala ué kuvunga o mutué, sumbala ki mutuameni ua muiji, maji mukonda, o ungana a u bhana ku maiala a a batizala kiá mu kilunga kia Kidistá.

Phaulu ulombolola o kilunga kioso kia zuela: ‘Se bhu kala muthu-phe ua mesena u ki kuatela jiphata, eme ngi mu tangela ngó kuma etu ki tuala dingi ni kifua kiéngi mu ilunga ia Nzambi.’ (Velusu 16) Mu kilunga, o ungana a u bhana ngó ku maiala a a batizala. (1 Timote 2:11-14; Jihebeleu 13:17) O maiala ene ngó ene mua sola phala ku kála tufunga, ni akuatekexi a tufunga, phala ku bhanga o ikalakalu ia bhana Nzambi ia ku langa o kilunga kiê. (Ikalakalu 20:28) Saí ithangana, o muhatu nange a mu sola phala ku bhanga kikalakalu, kia tokala o diiala a mu batizala kiá, ua kulu mu nzumbi. Mu kifika, muéne nange u bhanga o kiônge kia sidivisu ia kuboka, mukonda ki bhuale diiala a mu batizala mu kilunga. Mba kioso kia longa o mulongexi uê bhu pholo ia phange a mu batizala. * Mukonda ua mu bhanga ikalakalu ia ilunga, muéne ua tokala kuvunga o mutué, mu kuijiia kuila  ua mu bhanga kikalakalu kia tokala ngó ku jiphange ja maiala a a batizala.

Mu ithangana iéngi, saí ikalakalu iavulu ia lungu ni ubhezelu, ki i bhingi kuila o phange ia muhatu kuvunga o mutué. Mu kifika, ka bhingi ku bhanga kiki kioso kia tambuijila o ibhuidisu mu kilunga, kioso kia boka o njimbu mu inzo ni inzo, ni munumi’ê, mba ni phange ia diiala a mu batizala, mba kioso kia longa ni ku samba ni an’ê, ka a batizala luua. Mu kidi, ku moneka ibhuidisu ia lungu ni maka enhá, se bhu kala phange ia muhatu uala ni phata, a tena ku sota dingi milongi alungu ni maka enhá. * Se né kiki, muéne uala hanji ni phata ia lungu ni maka enhá, mu kitongoluelu kiê, u banza kuila ua tokala kuvunga o mutué, ki kima kia iibha ku bhanga kiki.

O kikuma. Mu velusu 10, tu sanga-mu se mukonda diahi o Kidistá ua tokala o ku kumbidila o kitumu kiki: “Mukonda dia ji-anju, muhatu ua tokala kuvunga jinga o mutué uê ni mveu.” Kia dianga, tala o kizuelu, “kuvunga jinga o mutué uê ni mveu.” Kuvunga o mutué, kilombolola kuila o muhatu ua mu xila o ungana ua bhana Jihova ku maiala, a a batizala kiá mu kilunga. Mu kiki, muéne ulondekesa o henda iê ni ufiiele kua Jihova Nzambi. O kima kia kaiadi, tu ki sanga mu kizuelu, “mukonda dia ji-anju.” Kiebhi o muhatu kuvunga o mutué, kikuatekesu phala o ji-anju?

O ji-anju a uabhela o ku mona kuila o ungana ua nzambi, a mu u belesela, ki kale ku diulu, ni mu ixi. Ene uê a katula mbote mu phangu i bhana o athu a ituxi, mu ukexilu iú. Mu kidi, ene ué a tokala ku xila o kitumu kia ungana kia bhana  Jihova—o kima kia bhangesa ji-anju javulu m’ukulu, ku kamba ku i belesela. (Juda 6) O ji-anju nange a mona kioso o phange ia muhatu, ua kulu mu nzumbi, uala dingi ni kuijiia, ni ku kala dingi ni unjimu, kuila o phange ia diiala a mu batizala kiá mu kilunga ndenge; Maji né kiki, muéne u xila o ungana uê. Mu ithangana ia mukuá, o phange ia muhatu, a mu undu phala ku hádia kuia ku diulu, mu tumina ni Kristu. O phange íii, ua-nda kala bhu kididi kia beta-kota kia ji-anju, ni ku tumina ni Kristu ku diulu. Phangu iambote, phala o ji-anju ku i mona! Mu kidi, mu kaxi ka ufiiele ni ku xila o ungana, o jiphange ja ahatu, ala ni ujitu ua dikota, ua kulondekesa ku belesela ni ku lenduka, ku mesu a mazunda ni mazunda a ji-anju ja fiiele!

^ kax. 3 O muhatu Kidistá, ka sambe ni dízui dia suína ku pholo ia munumi’ê, maji muéne u tena ku bhanga kiki, se mu kifika, o diiala ka tena kuzuela mukonda ua kate.

^ kax. 1 O phang’etu ia muhatu ka bhingi ku ta dilesu bhu mutué mu ku di longa ni dixibulu diê ku pholo ia muboki ua diiala ka mu batizala luua se muéne ki muadi uê.

^ kax. 2 Phala kuijiia dingi tanga A Sentinela, ua 15 kia Kavua ua 2002, mu jimbandu ja 26-27 ni ua 15 dia Kauana, dia 1977 mu jimbandu ja 509-512.