Ku bokona mu madisá

Ku bokona mu madisá

 KIBATULU 9

‘Lenga o Undumbu’

‘Lenga o Undumbu’

‘Uila kiki, o jihanji jenu jala mu ngongo jene mu kalakala moxi dienu, jibhenu-ju: ni undumbu, ni ufusa, ni hanji jaiibha, ni vondadi ja bolo, ni luímbi, kuma o luímbi lua soko ni ku bheza o iteka.’—KOLOSE 3:5.

1, 2. Ihi ia bhange Balamu, phala ku kuata o mundu ua Jihova mu kibhetu?

O MUTAMBI uia bhu kididi kiê kia uabhela phala ku tamba. Muéne ua-ndala kídifua kimoxi kia mbiji. Kienhiki muéne u sola o kixika kia-nda ta, u takula o nzolo mu menha. Mu ku bhita kithangana u mona kuila o mbiji ia numata o kixika, muéne u sunga o mbiji. Muéne u sanguluka mukonda ua te o kixika, kia tokala phala ku kuata o mbiji.

2 Ku muvu ua 1473 A.K.K, Balamu, ua xinganekene kiavulu se kixika kiahi kia tokalele ku ta. Muéne ua mesenene ku kuata o mundu ua Nzambi ua tungile mu ixi ia Mouabhe, ia lungile ni Ixi ia Kanana. Balamu ua kexile mu zuela kuila, muéne polofeta ia Jihova, maji mu kidi, muéne uexile mukua luímbi, a mu solele phala ku bhubhidila akua Izalaiele. Maji Jihova ka muehela ku ki bhanga, mu veji dia kiki, Balamu ua besoala akua Izalaiele. Phala ku tambula kifutu, Balamu, ua xinganeka kuila Nzambi, ueji bhubhidila o mundu uê, se muéne ua bhangesele akua Izalaiele kuta kituxi. Balamu ua te o kixika—ua solo o ahatu akua Mouabhe a sendukisa—Dialuilu 22:1-7; 31:15, 16; Dijingunuinu 2:14.

3. O kuila o ndunge ia Balamu ia tundu kiambote?

3 O kuila o ndunge ia Balamu ia tundu kiambote? Ku  dimatekenu, ua di tundu kiambote. Mukonda nzungule dia akua Izalaiele a dibhalele mu kibhetu kiê, mu ku bhanga “undumbu ni akua Mouabhe.” Ene akexile ué mu bheza o jinzambi ja ixi ia Mouabhe, kála Baale-Peole o nzambi ia ku vuala. Mukonda dia kiki, 24 a midi, ia akua Izalaiele afú ande dia ku bokona mu Ixi ia Kanana. Kiki kia kexile kibuika kia dikota!—Dialuilu 25:1-9.

4. Mukonda diahi nzungule ia akua Izalaiele, a dibhale mu kibhetu kia ku bhanga undumbu?

4 Mukonda diahi a bhiti mu kibuika kiki? Athu avulu a mateka ku bheza o jinzambi ja makutu, a xisa o ubhezelu ua Jihova, o Nzambi ia kidi, ua a katula mu Ijitu, ua a lange mu kikangalakata mu ku a bhana o kúdia, ua mesenene ku ambata mu ixi ia kanana. (Jihebeleu 3:12) Mu ku xinganeka mu maka enhá, o Poxolo Phaulu ua soneka: ‘Ki tu fuama ué ku bhanga undumbu kála kia bhangele jinga ene amoxi-mu. Ene a bhangele kiki, anga a buila kizuua kimoxi, makuinhi aiadi a midi, ni midi jitatu.’ *1 Kolindo 10:8.

5, 6. Ihi i tu longa lelu o kituxi kia akua Izalaiele, mu ixi ia Mouabhe?

5 O musoso u tu sanga mu divulu dia Dialuilu, uala ni  valolo phala o mundu ua Nzambi lelu, ua zukama phala ku bokona mu ixi ia a kanena ia beta o kota mu ukulu ndenge. (1 Kolindo 10:11) Mu kifika, o mundu lelu uezala ni undumbu, kála kia kexile akua Mouabhe, maji o mundu lelu, ua somboka a akua Mouabhe. Mivu joso nzungule ia Jikidistá a a kaia mu kilunga, mukonda dia undumbu—ene mu a kuata uâ mu kibhetu kia kuatele akua Izalaiele. (2 Kolindo 2:11) Saí athu mu kilunga a difu ni Nzidi, ka kexile ni jisonhi ja kuambata muhatu mukua Midiiane mu balaka iê, athu enhá, ki phangu iambote phala o kilunga kia Kidistá.—Dialuilu 25:6, 14; Juda 4.

6 O kuila u tena ku xinganeka eie mu ixi ia Mouabhe mu izuua ietu? U tena ku mona o kifutu kiê—o mundu uobhe u ua kingila? Se kiene, bhanga ioso phala u kale mu henda ia Nzambi, mu ku belesela o kitumu kiê kia ku: ‘Lenga o undumbu.’ 1 Kolindo 6:18.

Di xinganeke mu Ixi ia Mouabhe

O UNDUMBU IHI?

7, 8. Ihi i tu longa lelu o kituxi kia akua Izalaiele, mu ixi ia Mouabhe?

7 O kizuelu “undumbu” mu Bibidia, mu (Ngeleku, porneía) kilombolola, ku bhanga undumbu ni muhatu, mba diiala ka ku tokala. Kia lungu ué ni ku zeka ni idianzunga, ku zeka ni muhatu se ku kazala, ni ku di xaxata ufusa. Kála o mala ku zeka ni mala ni akua, mba o ku zeka ni iama. *

8 O Bibidia i zuela kuma: Oso a bhanga undumbu ka tokala ku kala mu kilunga kia Nzambi, mba ku tambula muenhu ua kalelaku ku hádia. (1 Kolindo 6:9; Dijingunuinu 22:15) Ene a di bhekela jiphaxi javulu, kála o jisonhi, maka mu ukaza, kinemenu kia muxima, kuimita sé  ku mesena, mauhaxi, katé ué ni kufuá. (Ngalásia 6:7, 8) Phala-hi o ku bhanga o ima íii, i ku bhekela ngó ibhidi ku muenhu? Maji athu avulu a bhanga o ima íii, kene mu xinganeka mu ibhidi, kioso kia ta o kituxi—kála o ku mona o ufusa.

O UFUSA—U DIANGA ANDE DIA KITUXI

9. O kuila o ufusa ki u bhange kima, kála kiene mu zuela o athu? Jimbulula.

9 Saí jixi, o ufusa a u sanga mu ji jurnale, mu mimbu, mu mutelembe ia izunzumbia, ni mu Internete. * O kuila o ufusa ki u bhange kima, kála kiene mu zuela o athu? Tuejiia kuila ki bhanga kima! Oso a mona o ufusa a mu u bhanga, a kala ni “jihanji ja ufusa,” kiki kia a bhangesa ku kala ni kifua kia ku mesena ku zeka ni muhatu, mba diiala o ola joso, ni ku bhanga ufusa, kiki ki bheka maka mu ukaza, ki bheka ku di senga. * (Loma 1:24-27; Efezo 4:19) Saí ngijiie, ua sokesa o ukexilu iú ua ku dizeka kála o uhaxi, a uixana (câncer.) Muéne uambe kuila o ukexilu iú, “ua mu dibandekesa, ni ku di muangana.” Uambe ué kuila, “u dimuangana ni lusolo, ua bhonzo ku u saka.”

^ kax. 4 Phala kuijiia dingi maka alungu ni jihanji ja ufusa, tanga o Kibandekesu mu jimbandu ja 218-19.

Se u ta o komputadolo ia inzo iê mu kididi mu bhita athu, ua mu londekesa kuila uala ni kilunji

10. Kiebhi ki tu tena ku belesela o kitumu ki tu sanga mu divulu dia Tiiaku 1:14, 15? (Tanga ué o  kaxa mu mbandu ua 101.)

10 Xinganeka mu izuelu i tu sanga mu divulu dia Tiiaku 1:14, 15, iambe: ‘Maji muthu-phe u dianguka, ki mu sanga o hanji iê-muéne ia iibha, anga i mu bhomba. Kienhiki o hanji ia iibha ienhi’ii, ki zubha o kuimita, i vuala kituxi. O kituxi k’ila kiza ku kitala, ki vuala kalunga.’ Se o jihanji ja ufusa ji bokona mu kilunji kiê, katula-ju ni lusolo!  Mu kifika, se eie u mona o ufusa se ku mesena, ni lusolo ua tokala u tala kuengi, mba u jika o komputadolo, mba o mutelembe ua izunzumbia. Bhanga ioso phala ku lenga o jihanji ja ufusa, phala iene ki i ku bhangese ku ta kituxi!—Matesu 5:29, 30.

11. Se tu mona kuila o ibanzelu ia iibha ia mu bokona ku muxima uetu, kiebhi ki tu tena kulondekesa kuila tua dielela kua Jihova?

11 Mukonda dia ku tu ijiia kiambote, o Mubhangi uetu u tu tendelesa: ‘Uila kiki, o jihanji jenu jala mu ngongo jala ku kalakala moxi dienu, jibhenu-ju: ni undumbu, ni ufusa, ni hanji jaiibha, ni vondadi ja bolo, ni luímbi, kuma o luímbi lua soko ni ku bheza o iteka.’ (Kolose 3:5) Tuejiia kuila o ku belesela o kitumu kiki, ki tena ku bhonza. Maji ejiia kuila tuala ni Tata ietu, ia henda ua lenduka,  uene mu tu suua. (Jisálamu 68:19) Kienhiki, kioso ki u mona kuila o ibanzelu ia iibha, ia mu bokona ku muxima uê, xinganeka ni lusolo kua muéne. Samba phala ku bhinga “o nguzu i lenda” ni ku jijidika o muxima uê, ku banza ngó mu ima iambote.—2 Kolindo 4:7; 1 Kolindo 9:27; tanga o kaxa “ Kiebhi ki Ngi Tena Kueha o Kifua Kia iibha?” mu mbandu ia 104.

12. O “muxima” uetu ihi, ni kiebhi ki tua tokala ku u langa?

12 O njimu Solomá ua soneka: “Ku ima ioso ia fuama ku langa, langa o muxima ué, kuma mu muxima muene muala o dimatekenu dia matundilu moso ma muenhu.” (Jisabhu 4:23) O “muxima,” o muthu ua sonhi bhu pholo ia Nzambi. Tua tokala kuijiia kuila, o i mona Nzambi ku “muxima” uetu, ko ima i mona o akuetu kana—iene ia-nda londekesa se tua-nda tambula o muenhu ua kalelaku, mba kana. Kiki, ki kia bhonzo. Maji maka a dikota. Jobe ua bhangele kikutu ni mesu mê, muéne ua ditunu ku tala kilumba mu ukexilu ua ibhila Nzambi. (Jobe 31:1) Íii phangu iambote phala etu! Tua tokala ku banza kála o mukua jisalamu, kioso kia sambe: “Ngi katule mesu mu ku tala ima ia ulalu.”—Jisálamu 119:37.

 

DINAH KA SOLO KIAMBOTE O MAKAMBA

13. Diná uexile mon’â nanhi, mukonda diahi muéne ka solo kiambote o makamba mê?

13 Kála ki tua di longo kiá mu kibatulu kia 3, o makamba metu a tena ku tu longa ima ia iibha, mba iambote. (Jisabhu 13:20; 1 Kolindo 15:33) Xinganeka o phangu ia Dinah, mon’â Jakobo. (Dimatekenu 34:1) Sumbala muéne a mu longo kiambote tundé undenge, maji Dinah ua solo ku bhanga ukamba ni ilumba ia Kanana. O akua Kanana, a sokele ni akua Mouabhe mu undumbu. (Ijila 18:6-25) Bhu pholo ia maiala akua Kanana, katé muene ni Xikeme—‘uexile o dikota ku dibhata dia tat’â’—Ki kia kexile kima kia iibha ku zeka ni Dinah—Dimatekenu 34:18, 19.

14. Mukonda diahi o makamba a solo Dinah a mu bhekela maka?

 14 Mu kidi, Diná ka banzele ku zeka ni Xikeme, kioso kia mu mono. Xikeme ua bhange o kima kieji bhanga akuâ, se akexile ni vondadi ia ku zeka ni kilumba. Ki tuejiia se Dinah ua bhânge, maji tuejiia kuila Xikeme ua “mu nhana” iu ua “zeka nê.” Nange ku pholo Xikeme ua “zolo” Dinah, maji kiki, ki kia jimi o kima kia iibha kia bhange kua Dinah (Dimatekenu 34:1-4) Ki Dinah ngó ua luualele, mukonda dia kima kiki kia iibha. O makamba a solo, a mu bhekela maka ku muiji uê.—Dimatekenu 34:7, 25-31; Ngalásia 6:7, 8.

15, 16. Kiebhi ki tu tena ku kala ni unjimu ua kidi? (Tanga ué o  kaxa mu mbandu ia 109.)

15 Se Dinah a mu bhana disá, disá dia iibha. Oso a zolo Jihova, ene ku mu belesela, ka bhingi ku bhita mu ibhidi  íii. Mukonda dia ku belesela Nzambi, ene a sola ‘kuenda ni jinjimu.’ (Jisabhu 13:20a) Mukonda dia kiki, ene a tena kuijiia o “jinjila joso ja fuama” ni ku lenga o maka, ni jiphaxi.—Jisabhu 2:6-9; Jisálamu 1:1-3.

16 Athu enioso a mesena ku kala ni unjimu, a tena ku kala nau, se a u bhinga mu musambu, ni ku di longa o Bibidia izuua ioso, ni madivulu a bhana o kimbadi kia fiiele.  (Matesu 24:45, NW; Tiiaku 1:5) Kima kiambote ué o ukexilu ua ku lenduka, kiki tu ki mona mu ku xikina o milongi ia Bibidia. (2 Jisobha 22:18, 19) Mu kifika, o Kidistá u tena ku xikina kuila o muxima uê u bhomba. (Jelemiia 17:9) Maji o kuila kioso kia kala ni maka, muéne ulondekesa o ukexilu ua ku lenduka mu ku xikina o milongi ia mu bhana?

17. Tanga kifika, ki tena ku moneka ku muiji, londekesa kiebhi o tata kieji kuatekesa mon’ê mu maka enhá?

17 Xinganeka o kifika kiki. O tata ka mesena kuila o mon’ê u tunda ni kamba diê dia diiala, Kidistá ubheka uâ. O kilumba u tambuija: “Maji papa eie kua ngi dielela? Ki tua-nda bhanga kima kia iibha!” Kilumba ua zolo Jihova ka mesena ku bhanga kima kia iibha, maji o kuila ua mu ‘kuenda ni unjimu ua Nzambi?’ O kuila muéne ua mu ‘lenga o undumbu?’ Anga muéne ua mu kituka kiôua mu ku “dielela o muxima ué-muène?” (Jisabhu 28:26) Nange eie u xinganeka itumu ia mukuá, ieji kuatekesa o tata ni mon’ê, ku banza kiambote mu maka enhá.—Tanga Jisabhu 22:3; Matesu 6:13; 26:41.

 

ZUZE UA LENGE KU BHANGA O UNDUMBU

18, 19. Kijijidiku kiahi kia di bhana na-kiu Zuze, ni kiebhi kia tena ku di tunda kiambote?

18 Zuze phange ia Dinah, uexile munzangala ua zolele Nzambi, muéne ua lenge ku bhanga undumbu. (Dimatekenu 30:20-24) Tundé mu undenge, Zuze uejidile o ibhidi ia bhiti na-iu phang’ê. Se phata o ima iejidile Zuze, ni henda iê kua Nzambi, ia mu kuatekesa mu Ijitu, kioso o muhatu ua ngana iê, kia mesenene ku zeka nê, muéne ua kexile ku mu jijidika “izuua ioso.” Zuze keji tena ku xisa o kikalakalu kiê, mba ku xisa ngana iê, mukonda muéne uexile mubhika! Muéne ua tokalele ku dibhana ni maka enhá ni unjimu, ni ku suína kuoso. Zuze, ua ditunu veji  javulu o muhatu ua Potifale, mu kusuka-ku Zuze ua mu lenge.—Dimatekenu 39:7-12.

19 Xinganeka: Se Zuze ua kexile mu banza kiavulu ku ahatu, o kuila muéne ueji tena ku dituna ku bhanga kiki? Kana. Mu veji dia ku banza ku ta kituxi, Zuze ua xinganeka mu ukamba uê ni Jihova, kiki tu ki mona mu izuelu iê kua muhatu ua Potifale. Muéne uambe: “Muadi’ami-ze,” ‘kana-ku ué kima kia ngi [fidisa] ki kale ngó eie, mukonda eie u muhatu’ê; eme-phe ngi tena kiebhi ku bhanga ku iibha kuos’uku ni ku ta kituxi kua Nzambi?’—Dimatekenu 39:8, 9. Kijijidiku kiahi kia di bhana na-kiu Zuze, ni kiebhi kia tena ku di tunda kiambote?

20. Kiebhi Jihova kia lungulula o ima mu maka a Zuze?

20 Xinganeka o kisangusangu kia Jihova mu ku mona Zuze, ku dituna izuua ioso ku ta kituxi, sumbala ua kexile dikanga dia muiji uê. (Jisabhu 27:11) Mu kusuka-ku, Jihova ua lungulula o ima phala Zuze ku tunda mu kaleia, a mu bhana o kijingu kia ku tumina kála muenexi ua kaiiadi mu Ijitu, ni ku tambula konda ia kúdia kuoso mu Ijitu! (Dimatekenu 41:39-49) O izuelu i tu sanga mu divulu dia Jisálamu 97:10 ia kidi, iambe: “Enu mua zolo Jihova, ituxi i mi ibhile; muene u bhaka o mienhu ia jifiiele jê; hé u ua kudila bhu maku a kisuéia!”

21. Kiebhi o phang’etu ia munzangala mu ixi ia África, ua kolokota phala ka bhange undumbu?

21  Lelu ué saí jiselevende ja Nzambi, ene mu londekesa kuila ‘a ibhila ku bhanga ima ia iibha, a uabhela ku bhanga o ima iambote.’ (Amoji 5:15) Saí phang’etu ia munzangala mu ixi ia África, ua lembalala kuila o koleka iê, sé jisonhi ua mu kanene ku zeka nê, se muéne ua mu kuatekesele mu polova ia matemática. Muéne uambe, “mu kithangana kieniókio nga ditunu. Phala ku kolokota, nga xinganeka mu ukexilu uami uambote, uala dingi ni valolo, o ulu ni phalata ndenge.” Mu “kithangana kieniókio kima kiambote” ku ta o kituxi, maji ki bheka jiphaxi javulu. (Jihebeleu 11:25) O kisangusangu kiki, ki kia beta-kota, ni mabesá ijila mu ku belesela Jihova.—Jisabhu 10:22.

XIKINA O KIKUATEKESU KIA NZAMBI IA HENDA

22, 23. (a) Se o Kidistá u ta kituxi kia dikota, mukonda diahi muéne uala hanji ni kidielelu? (b) Kikuatekesu kiahi ki tena ku tambula ió ua te o kituxi?

22 Mukonda tu akua ituxi, etu enioso tua mu bhânga ni jihanji ja xitu, phala ku bhanga o vondadi ia Nzambi. (Loma 7:21-25) Jihova ‘uejiia kuma tuala tu mavu.’ (Jisálamu 103:14) Saí ithangana, o Kidistá u ta kituxi kia dikota. O kuila muéne kale dingi ni kidielelu? Uala ni kidielelu! Nange muéne u bhita ni jiphaxi, kála kia bhiti, ni Sobha Davidi. Nzambi ué u lenguluka ku “loloka” o ituxi ia muthu, u ‘fisala o ikuma iê.’—Jisálamu 86:5; Tiiaku 5:16; Jisabhu 28:13.

23 Nzambi mu henda iê, “o athu ua a uanena maujitu” mu Kilunga—o tufunga a kulu mu nzumbi, a tena ku kuatekesa o jiphange mu ilunga. (Efezo 4:8, 12; Tiiaku 5:14, 15) Ene a mesena ku kuatekesa oso a ta kituxi, ku kala dingi ni ukamba ni Nzambi, phala ku a kuatekesa ku ‘kala ni kilunji,’ kála kiambe o diiala dia unjimu, phala ene kate dingi o kituxi—Jisabhu 15:32.

 ‘KALA NI KILUNJI’

24, 25. (a) Kiebhi kia londekesa o munzangala a mu tange mu divulu dia Jisabhu 7:6-23, kuila ua ‘kambele kilunji?’ (b) Kiebhi ki tu tena ku ‘kala ni kilunji?’

24 O Bibidia izuela ia lungu ni athu a “kambe kilunji,” ni athu a ‘kala ni kilunji.’ (Jisabhu 7:7) O muthu ka kulu luua mu nzumbi, ni mu sidivisu ia Nzambi, “ua kambe kilunji,” ka tena ku sola kiambote o ima. Muéne u tena ku ta kituxi kia dikota kála o munzangala a mu tange mu divulu dia Jisabhu 7:6-23. Mukonda dia kiki, o muthu u ‘kala ni kilunji,’ u bhana valolo mu ukexilu uê, mu ku di longa o Bibidia izuua ioso, ni kusamba. Sumbala muéne mukua ituxi, maji u bhanga ioso phala ku lungulula o muenhu uê, mu ukexilu ua uabhela Nzambi. Kiki kilondekesa kuila muéne, “ua zolo o muenhu uê,” mu ku bhanga kiki, o “mbote u i mona.”—Jisabhu 19:8.

25 Dibhudise: ‘O kuila nga xikina kuila o itumu ia Nzambi kidi? Nga xikina kuila se ngi i belesela, nga-nda zediua ku muenhu?’ (Jisálamu 19:7-10; Izaia 48:17, 18) Se uala hanji ni phata, lungulula o ibanzelu iê. Xinganeka mu jiphaxi jijila mu ku kamba ku belesela o itumu ia Nzambi. ‘Dielela ni u mone kuma Jihova uene ni mbote,’ kala mu kilunga kiê, ni u te ku muxima uê—o ima ia kidi, ioso o ima ia ujitu, ioso o ima ia iuka, ioso o ima ia zele, ni ima ioso ia uabha. (Jisálamu 34:8; Filipe 4:8, 9) Ijiia-nakiu, kuila se u di suínisa mu ku bhanga kiki, o henda iê kua Nzambi, ia-nda kuvula dingi phala ku zola o ima ia zolo muéne, ni ku zemba o ima ia zembe. Zuze kexile muthu sé kituxi. Né kiki muéne ua tena ku ‘lenga o undumbu’ mukonda muéne uehela Jihova ku mu umba mu mivu iavulu, ni ku mu bhana kilunji. Tua kingila kuila u bhanga uê kála Zuze.—Izaia 64:8.

26. Maka ahi u tua-nda di longa ku pholo?

 26 O ujitu ua ku disokoloka ua tu bhana o Mubhangi uetu, ki kima kioso-kioso ngó, maji ki tu bhangesa ku kala ni tuana, ni ku tu bhekela kisangusangu mu ukaza uetu. (Jisabhu 5:18) Tua-nda di longa dingi o ibanzelu ia Nzambi ia lungu ni ukaza mu Ibatulu ia 10-11.

^ kax. 7 Mu 1.000 ia akua Izalaiele, mua kexile ué, o “makota oso ku kifuxi” a a jibha ku afundixi a Izalaiele, o a mukuá a a jibha kua Jihova. Nange exile midi ia athu.—Dialuilu 25:4, 5.

^ kax. 9 Phala kuijiia kiambote ia lungu ni ku kamba o ukexilu uambote, tanga A Sentinela 15 ua mbeji ua Kavua ua muvu ua 2006, mu “Ibhuidisu ia Atangi.”

^ kax. 9 “O ufusa,” u tua tange bhabha, ua lungu ni jifoto, ni izuelu i bhangesa athu ku kala ni vondadi ia ku bhanga undumbu. Mu kifika, o ufusa u tena ku kala foto ia athu a mu di zeka, kála athu kiiadi, mba kitatu a mu dizeka.

Phala kuijiia dingi maka alungu ni jihanji ja ufusa, tanga o Kibandekesu mu jimbandu ja 218-19.”