Ku bokona mu madisá

Ku bokona mu madisá

 KIBATULU 15

Kemba ni Mbote Ioso ia Kikalakalu Kiê

Kemba ni Mbote Ioso ia Kikalakalu Kiê

‘Muthu uoso . . . a kembe ni mbote ioso ia kikalakalu kiê.’​—NDONGIXI 3:13.

1-3. (a) Kiebhi athu kiene mu mona o kikalakalu kiâ? (b) Ihi i tanga o Bibidia ia lungu ni kikalakalu, ni ibhuidisu iahi i tua-nda di longa mu kibatulu kiki?

SAÍ athu avulu ku mundu, a kalakala, maji ka uabhela ku kalakala. Mu ku ngastala ji ola javulu ku kikalakalu ka ki mesena, ene kia ibhila o kuia izuua ioso mu kalakala. Ni ukexilu kála iú, kiebhi o athu enhá, kia tena o ku divua kiambote phala ku kala ni kisangusangu mu kikalakalu kiâ?

2 O Bibidia i tu suínisa ku kala ni ukexilu uambote ua lungu ni kikalakalu. O Bibidia i tanga kuila o ku kalakala, dibesá dia dikota. Solomá ua soneka: “O muthu uoso u dia, n’a nu, n’a kembe ku mbote ioso ia kikalakalu kiê, ió-phe ujitu ua Nzambi kiá.” (Ndongixi 3:13) Jihova, mu henda iê ua mesena o mbote ietu, ni kuila tu kala ni kisangusangu mu ikalakalu ioso i tu bhanga. Phala tu kale mu henda iê, tua tokala ku xila o ibanzelu iê, ni itumu iê ia lungu ni kikalakalu.—Tanga Ndongixi 2:24; 5:18.

3 Mu kibatulu kiki, tua-nda di longa ibhuidisu iuana: Kiebhi ki tu tena o ku kemba ni ioso i tu bhanga mu kikalakalu kietu? Ikalakalu iebhi ia tokala ku i bhanga ku Jikidistá ja kidi? Kiebhi ki tu tena ku sokejeka o ikalakalu  ia xitu, ni ikalakalu mu nzumbi? Kikalakalu kiebhi kia beta-kota ki tua tokala ku bhanga? Kia dianga, tua-nda di longa o phangu ia akalakadi a dikota mu ngongo—Jihova Nzambi, ni Jezú Kristu.

O MUKALAKADI UA DIKOTA NI DIXIBULU DIÊ

4, 5. Kiebhi kilondekesa o Bibidia kuila Jihova mukalakadi uambote?

4 Jihova muéne o Mukalakadi ua Dikota. O divulu dia Dimatekenu 1:1 NW, diambe: “Ku dimatekenu Nzambi ua bhange diulu ni ixi.” Kioso Nzambi kia zubha ku bhanga o ima ioso, ni ixi, muéne uambe kuma “ia uabha muene kiavulu.” (Dimatekenu 1:31) Kiki kilombolola kuila, muéne ua sangulukile ni kikalakalu kioso kia bhange mu ixi. Sé phata, Jihova o ‘Nzambi ia ku sanguluka,’ ua sangulukile mu kuijiia kuila mukalakadi uambote.—1 Timote 1:11.

5 O Nzambi ietu uene mu kalakala izuua ioso. Kioso kia zubha ku bhanga o ima ioso mu ixi, Jezú uambe: “Tata iami ua mu kalakala katé kindala.” (Nzuá 5:17) Ihi iene mu bhanga o Tata? Tundé ku diulu muéne uene mu kalakala, ni ku langa o athu mu ngongo. Muéne ua ‘solo athu,’ o athu enhá, o Jikidistá a undu phala kuia ku diulu, ku tumina kumoxi ni Jezú. (2 Kolindo 5:17) Muéne uene mu kalakala hanji phala ku kumbidila o kikanenu kiê kia lungu ni—ku bhana o muenhu ua kalelaku ku athu a mu zolo, ku mundu uobhe. (Loma 6:23) Jihova uene mu sanguluka kiavulu ni kikalakalu kiê. Kuene athu avulu ene mu xikina o njimbu ia Utuminu, ni ku zukama kua Nzambi, ni ku lungulula o ukexilu ua muenhu uâ, phala ku kala mu henda ia Nzambi.—Nzuá 6:44.

6, 7. Mukonda diahi Jezú a mu tumbula kála mukalakadi uambote?

6 Tundé ukulu Jezú a mu tumbula ué kála mukalakadi uambote. Kioso kia kexile ku diulu, Jezú ua kalakala kumoxi ni Nzambi, kála “dixibulu diê,” mu ku bhanga o ima “ku diulu, ni mu ngongo.” (Jisabhu 8:22-31; Kolose 1:15-17) Kioso kia kexile mu ixi, Jezú ua kolokotele mu kalakala. Mu ixi muéne ua di longo o ufunu ua musongi ua mabaia, athu  a muijidile kála ‘kalupindelu.’ * (Maluku 6:3) O ufunu iú ua bhingile ku kala ni nguzu iavulu, ni uhete—bhenge-bhenge ua ku songa o mabaia, mukonda ki kua kexile ji makina ja ku songa o mabaia, ki kua kexile kididi kia ku sumbila mabaia. U tena ku xinganeka Jezú kuia mu kenga o mabaia—phala ku a bheka mu kididi kua kexile mu kalakala? U tena ku mu xinganeka mu ku tunga o jinzo—ku zambela o nzo, ku bhanga mabhitu, ni ku bhanga ji meza, jibango, ni ima ia mukuá dingi? Sé phata, Jezú uejidile o kisangusangu kijila mu ku bhanga kiambote o kikalakalu ni nguzu ioso.

7 Jezú ua ditundu ué kiambote mu kikalakalu kia ku bhanga o ukunji uê. Mu mivu itatu, ni kaxaxi, Jezú ua kexile mu bhanga ngó o sidivisu íii, ia beta-kota. Muéne ua mesenene ku longa athu avulu, ua kexile mu balumuka selu phala ku longa o athu, iu ua kexile mu zumbuka ngó mu tádidi. (Luka 21:37, 38; Nzuá 3:2) Jezú ua kexile mu nhunga “ku jimbanza ni mu jisanzala, mu ku boka ni kutula o Njimbu Iambote ia Utuminu ua Nzambi.” (Luka 8:1) Jezú uende ikoka iavulu bhoxi, sumbala ki kua kexile hanji makalu, phala ku tula o njimbu iambote ku athu.

8, 9. Kiebhi Jezú kia mono o mbote ia kikalakalu kiê, ni kiebhi muéne kia sangulukile mu ku bhanga o kikalakalu kiki?

8 O kuila Jezú ua mono mbote ni ku sanguluka mu ku bhanga o ukunji uê? Ua sangulukile! Muéne ua kunu jimbutu ja Utuminu ua Nzambi, ua xi o idima iabhi kiá iala kiá polondo phala ku i bhongolola. O kikalakalu kia Nzambi kia kexile mu suínisa dingi Jezú, muéne ua kexile mu jila o kudia, phala ku zubha o kikalakalu kia kuboka. (Nzuá 4:31-38) Xinganeka ku kisangusangu kia kexile na-kiu, mu disukilu dia ukunji uê mu ixi, muéne uambe kua Tat’ê: ‘Eme nga ku jingisa Eie mu ngongo, eme nga zubha o kikalakalu ki ua ngi bhana o ku bhanga.’—Nzuá 17:4.

 9 Jihova, ni Jezú, a tu bhana phangu iambote, ia ku kemba ni ikalakalu ioso ia bhanga. O henda ietu kua Jihova, i tu bhangesa ku ‘kaiela o phangu ia Nzambi.’ (Efezo 5:1) O henda ietu kua Jezú, i tu bhangesa ué ku mu ‘kaiela.’ (1 Phetele 2:21) Kienhiki, tua-nda di longa se kiebhi ki tu tena ku katula mbote, mu kikalakalu kietu kia kizuua ni kizuua.

KIEBHI KI TU KEMBA NI KIKALAKALU KIETU KIA KIZUUA NI KIZUUA

O ku kumbidila o itumu ia Bibidia u tena ku ku kuatekesa ku kemba ni kikalakalu kiê

10, 11. Ihi i tena ku tu kuatekesa ku kala ni ibanzelu iambote, ia lungu ni ku kalakala?

10 O Jikidistá ja kidi a uabhela o ku kalakala. Etu tua mesena ku kala ni kisangusangu, ni ku kala ni ukexilu ua ku tululuka mu kikalakalu kietu, maji se ki tua uabhela o kikalakalu kietu, ki tua-nda tena ku kala ni kisangusangu. Kiebhi-phe, ki tu tena ku sanguluka ni kikalakalu kietu, né muene se ki tua ki uabhela?

11 Mu ku kala ni kibanzelu kiambote. Ki tu tena ku kala sé ku kalakala, maji tu tena ku lungulula o ibanzelu ietu. O ku xinganeka mu ibanzelu ia Nzambi, ia lungu ni kikalakalu, ia-nda tu kuatekesa ku kala ni ibanzelu iambote, ia lungu ni sidivisu ietu. Se eie u mutuameni ua muiji, kana ku mona o kikalakalu kiê, kála kima kioso-kioso ngó, mukonda kiene ki ku kuatekesa ku dikila o ibhindamu ia muiji uê. O ku dikila o ibhindamu ia jindandu jê, iala ni valolo ia dikota bhu pholo ia Nzambi. O Maka mê, a zuela kuila o ió u dituna ku dikila o ibhindamu ia muiji uê ‘ua tundu mu kuiibha, ió kiluua a xikana, ala ndenge.’ (1 Timote 5:8) Ejiia kuila o kikalakalu kiê kiene ni valolo iavulu—ki ku kuatekesa ku kumbidila o kitumu kia bhana Nzambi, kia ku dikila o muiji uê—ki tena ué ku kuatekesa ku kalakala ni kisangusangu, nange kia kambe o jikoleka jê.

12. Mabesá ahi u tu tena ku tambula mu kalakala kiambote, ni ku kala tu athu a kidi mu sidivisu ietu?

12 Mu ku kalakala kiambote, ni mu ku kala muthu ua kidi.  O ku kalakala kiambote, ni kuijiia ku bhanga kiambote o sidivisu ietu, ku tu bhekela mabesá avulu. O jingana jene mu bhana valolo iavulu ku akalakadi ene mu lenguluka mu ku bhanga o sidivisu iâ, ni ió ene ni uhete ua ku bhanga o ima. (Jisabhu 12:24; 22:29) Etu tu Jikidistá ja kidi, tua tokala tu kala tu athu a kidi mu sidivisu ietu—ki tu tokala ku nhana kitadi, imbamba, mba ku kamba ku bhanga o sidivisu ia ngana ietu. (Efezo 4:28) Kála ki tua di longo kiá mu kibatulu 14, o ku kala tu athu a kidi, ku tu bhekela mabesá avulu. O mukalakadi a muijiia kuila muthu ua kidi, a tena ku mu dielela kiavulu ku phatalá iê. Ki kale se o ngana ietu, u tu mona o ukexilu uetu uambote, mba kana, tu tena ku kala  ni kisangusangu mu kuijiia kuila o ukexilu iú, u tu bhangesa ku kala ni “kitongoluelu kia zele” mu kuijiia kuila tua mu bhanga o vondadi ia Nzambi i tua zolo.​—Jihebeleu 13:18; Kolose 3:22-24.

13. Mabesá ahi u tu tambula mu ku kala ni ukexilu uambote mu sidivisu ietu?

13 Mu kuijiia kuila, o ukexilu ué uambote u bhana kijingu kua Nzambi. Kioso ki tu kala ni ukexilu uambote mu kikalakalu kietu, athu a-nda mona o ukexilu uetu. Mabesá ahi ijila mu ku kala ni ukexilu uambote? Phala tu “fuamese ulongelu ua Nzambi, Mubhuludi uetu.” (Tito 2:9, 10) O ukexilu uê uambote u bhangesa athu ku ximana o ubhezelu uê, ni ku u xikina. Xinganeka se kiebhi ki ueji divua se o koleka iê, u xikina ku di longa o Bibidia, mukonda dia ukexilu uê uambote ku sidivisu! Ihi ieji beta-kota mu ku u sangulukisa dingi, ko ku bhana kijingu kua Jihova, ni ku sangulukisa o muxima uê?​—Tanga Jisabhu 27:11; 1 Phetele 2:12.

KALA NI UNJIMU MU KU SOLA KIAMBOTE O KIKALAKALU

14-16. Kioso ki tua mesena ku sola kikalakalu ibhuidisu iebhi i tua tokala ku di bhanga?

14 O Bibidia ki i bhana ijila ioso ia lungu ni ikalakalu ioso i tua tokala o ku bhanga, ni íii ki tu tokala ku i bhanga. Maji kiki, ki kilombolola kuila tua tokala ku bhanga kikalakalu kioso-kioso. O Bibidia i tu kuatekesa ku sola kiambote o kikalakalu, ki tu kuatekesa ku kala tu athu a kidi mu kikalakalu kietu, phala ku sangulukisa o muxima ua Nzambi, ni ku tu kuatekesa ué kueha o kikalakalu kia ibhila Nzambi. (Jisabhu 2:6) Mu ku sola kikalakalu, tua tokala ku xinganeka mu ibhuidisu iiadi.

15 O kuila o sidivisu íii, a bhanga-mu ima i fidisa o Bibidia? O Maka a Nzambi, a fidisa o ku nhana, ku tanga makutu, ni ku bhanga iteka. (Makatukilu 20:4; Ikalakalu 15:29; Efezo  4:28; Dijingunuinu 21:8) Etu ki tua-nda xikina ku bhanga kikalakalu ki bhinga ku bhanga o ima íii. O henda ietu kua Jihova, iene i tu fidisa ku xikina kikalakalu kia ibhila Nzambi.—Tanga 1 Nzuá 5:3.

16 O kuila mu ku bhanga o kikalakalu kiki, tua-nda bhanga mbandu ia ukexilu ua iibha mba ku suínisa akuetu ku ki bhanga? Tala o phangu íii. O ku kalakala kála muthu u  tambulula athu ni ku a soneka majina (recepcionista), ki kia iibha. Maji tuila kiebhi se eie u kidistá, a ku solo phala ku kalakala mu kididi kia ku bhanga iselu (aborto)? Mu kidi, o salu iê, ki i bhingi kuila eie u kuatekesa o ku katula mona mu divumu (aborto). Maji né muene kiki, o sidivisu iê kikuatekesu ki bhangesa kuila o ikalakalu ienii, ia ku katula iselu iende ku pholo—maji ki ukexilu ua ibhila o Maka a Nzambi? (Makatukilu 21:22-24) Kuma tua zolo Jihova, ki tua-ndala ku bhanga mbandu ia lungu ni maukexilu a balakala o Mikanda Ikola.

17. (a) Ihi i tua tokala ku xinganeka kioso ki tu mesena ku sola kikalakalu? (Tanga o  kaxa mu mbandu 177.) (b) Kiebhi o kitongoluelu kietu ki tena ku tu kuatekesa ku sola ima i sangulukisa Nzambi?

17 Saí maka avulu alungu ni kikalakalu, maji tu tena ku a batula mu ku xinganeka mu ibhuidisu iala mu kibatulu 15 ni 16. Mukonda saí ima i tua tokala ku xinganeka kiambote  kioso ki tua mesena ku sola kikalakalu. * Ki tu tokala ku kingila kuila, o kimbadi kia fiiele, u tu ambela o kikalakalu ki tua tokala ku sola. Kioso ki bhu moneka maka enhá, tua tokala ku sunga kilunji phala kuijiia ku sola kiambote. Kála ki tua di longo mu Kibatulu 2, tua tokala ku longa o kitongoluelu, mu ku belesela o Maka a Nzambi, mu ukexilu uoso ua muenhu uetu. Se tu ‘longa o kilunji kietu,’ kiene kia-nda tu kuatekesa ku sola ima i sangulukisa Nzambi, ni ku tu kuatekesa ku kala mu henda iê.—Jihebeleu 5:14.

KALA NI UKEXILU UAMBOTE UA LUNGU NI KIKALAKALU

18. Mukonda diahi ki bhonza o ku kala ni ukexilu uambote, ni ima i tu bhanga mu nzumbi?

18 O ku kala ni ukexilu uambote, kima ki bhonza mu “izuua isukidila-ku,” mukonda o “jithembu jabhonzo.” (2 Timote 3:1) Ki bhonza kiavulu ku sanga kikalakalu ni ku kolokota ku kalakala-mu. Etu tu Jikidistá ja kidi tuejiia o valolo ia ku kalakala, phala ku dikila o muiji uetu. Maji se tu kamba ku di langa mu ijijidiku i moneka mu kikalakalu, se tu kala ué ni ibanzelu ia mundu ia ku kenga ngó o kitadi, i tena ku tu fidisa ku bhanga o ukunji uetu. (1 Timote 6:9, 10) Tua-nda di longa se kiebhi ki tu tena ku kala ni ibanzelu iambote ia lungu ni kikalakalu, phala tu tene ‘ku sola o ima ioso ia uabha.’—Filipe 1:10.

19. Mukonda diahi tua tokala ku dielela ngó kua Jihova, o kidielelu kiki, kia-nda tu kuatekesa kueha ukexilu uahi?

19 Dielela ngó kua Jihova. (Tanga Jisabhu 3:5, 6.) Mukonda diahi tua tokala ku dielela ngó kua Nzambi? Mukonda muéne uene mu tu langa. (1 Phetele 5:7) Muéne uejiia kiambote o ibhindamu ietu, o lukuaku luê ki lua butu. (Jisálamu 37:25) Kienhiki, tua tokala ku xinganeka mu  Maka mê kioso kia tu lembalala kuila: “Ki mu kale mu akua luimbi lua kitadi, ioso i mua mono i mi soke. Kuma Nzambi uambe uixi: ‘Eme nuka nga ka mi xisa, ki nga ka mi ehelela ué, kana.’” (Jihebeleu 13:5) O jiphange ala mu sidivisu ia thembu ioso, ejiia kiambote kiebhi Nzambi kia dikila o ibhindamu ia muenhu uâ. Se tu dielela kuila Jihova, ua-nda tu langa, ki tua-nda thandanganha kiavulu, mba ku kala ni hele, mukonda dia ibhindamu ia muiji uetu. (Matesu 6:25-32)  Ki tua-nda kuehela kuila o kikalakalu ki tu fidisa ku tula o njimbu iambote, ni kuia mu iônge.—Matesu 24:14; Jihebeleu 10:24, 25.

20. Ihi ilombolola ku kala ku mesu azele, ni kiebhi ki tu tena ku kala ni ukexilu iú?

20 Kala ku mesu azele. (Tanga Matesu 6:22, 23.) O ku kala ku mesu azele kilombolola ku sanguluka ni ima i tuala na-iu. O Jikidistá ala ku mesu azele, a suua ngó ku bhanga kima kimoxi—o vondadi ia Nzambi. Se tu kala ku mesu azele, ki tua-nda mesena ku kenga kikalakalu ki tu bhana kitadi kiavulu, mba ku suua ngó ku kala ni ima ioso ene mu moneka. Ki tua-nda kaiela o ima ioso iene mu ilondekesa ku jingijiie (propaganda), phala ku tu xikinisa kuila, tua tokala ku kala ni ima íii, phala ku zediua. Kiebhi ki u tena ku kala ku mesu azele? Kana ku ta makongo mu ithangana ioso. Kana ku suua ku kala ni ima ioso, i tena ku ku fidisa ku kala ni kithangana phala ku bhanga o sidivisu ia Nzambi. Belesela o milongi ia Bibidia ia ku sanguluka ni kima “kia kudia ni kia kudivunga.” (1Timote 6:8) Kana ku mesena o ima ioso i moneka ku mesu.

21. Mukonda diahi tua tokala ku sola ima ia tokala ku dianga ku muenhu uetu, ni ihi i tua tokala ku ta ku pholo ku muenhu uetu?

21 Sola o ima ia tokala ku dianga ku muenhu uê, ni ku i kumbidila. Mukonda o kithangana kia butu, tua tokala kuijiia kiambote o ima ia tokala ku kala ku pholo. Se ki tu bhanga kiki, tua-nda zanga o kithangana kietu mu ima sé valolo, ni ku kamba ku bhanga o ima ia beta-kota ku muenhu. Ihi ia tokala ku kala ku pholo ku muenhu uetu? Athu avulu ku mundu, ene mu ta ku pholo o ji xikola ja katunda, phala ku kala ni ikalakalu i bhana kitadi kiavulu ku mundu iú. Jezú uixi: “Diangenu-phe ku sota o Utuminu ua Nzambi.” (Matesu 6:33) O Jikidistá ja kidi, a dianga ku ta ku pholo o Utuminu ua Nzambi ku muenhu uâ. O ukexilu ua muenhu uetu—o ima i tu sola, o jimbambe ji tu suua mu sidivisu ia Nzambi—ilondekesa kuila tua mu ta ku pholo o  Utuminu ua Nzambi, ni kuila o vondadi iê iene ia beta-kota, o ima ia mukuá ndenge.

KALAKALA NI NGUZU IOSO MU SIDIVISU IA KUBOKA

Tu tena kulondekesa o henda ietu kua Jihova mu ku ta ku pholo o sidivisu ia kuboka ku muenhu uetu

22, 23. (a) Kikalakalu kiebhi kia beta-kota ku Jikidistá ja kidi, ni kiebhi ki tu tena kulondekesa kuila o kikalakalu kiki, kiene kia beta-kota ku muenhu uetu? (Tanga o  kaxa mu mbandu 180.) (b) Ibanzelu iebhi i uala na-iu ia lungu ni kikalakalu ki uene mu bhanga phala ku dikila o muiji uê?

22 Tuejiia kuila tuala mu izuua isukidila-ku, mukonda dia kiki, tua tokala ku bhanga o sidivisu ia tokala ku Jikidistá ja kidi—ia ku boka ni ku bhanga maxibulu. (Matesu 24:14; 28:19, 20) Kála kia bhange Jezú, etu tua mesena ku kolokota mu ku bhanga o sidivisu ia kuboka, phala ku bhulula o mienhu ia athu. Kiebhi-phe, ki tu tena kulondekesa kuila o kikalakalu kiki, kiene kia beta-kota ku muenhu uetu? O jiselevende ja Nzambi, ene mu tula o njimbu ni muxima uoso, kála aboki mu kilunga. Saí jiphange a bhange ioso, phala ku kalakala kála aboki a thembu ioso, ni akunji a jixi jengi. Mu kuijiia o valolo ia ku suua mbambe, saí jitata ene mu suínisa o tuana tuâ, phala ku kala mu sidivisu ia thembu ioso. O kuila o aboki a Utuminu ua Nzambi ene mu sanguluka mu ukunji uâ? Se phata ene mu sanguluka kiavulu! Mukonda ku sidivila Jihova ni muenhu uetu, u bheka kisangusangu, ni mabesá avulu.—Tanga Jisabhu 10:22.

23 Tuavulu mudietu, tuene mu kalakala ithangana iavulu phala ku dikila o ibhindamu ia muiji uetu. Ejiia kuila Jihova ua mesena kuila, tu sanguluka mu kikalakalu kietu. Se tu lungulula o ibanzelu, ni ibhangelu ietu, ia lungu ni ibanzelu ia Nzambi, ni ia itumu iê, tu tena ku kala ni kisangusangu mu kikalakalu kietu. Kienhiki-phe, ki tua tokala kuehela kuila o sidivisu ietu i tu fidisa ku—tula o njimbu iambote ia Utuminu ua Nzambi. Se tu ta ku pholo o sidivisu ia kuboka, tua-nda londekesa o henda ietu kua Jihova, ni kuila tua mesena ku kala mu henda iê.

^ kax. 6 O kizuelu mu Ngeleku ‘kalupindelu’ kilombolola “muthu u kalakala ni mabaia, Jezú ua kexile mu bhanga jinzo, ji meza, ni ima ia mukuá dingi.”

^ kax. 17 Phala kuijiia dingi ia lungu ni ku kalakala, tanga A Sentinela ia 15 ia mbeji ua Kasamanu ia muvu 1999 mu jimbandu ja 28-30, ni ia 15 ia mbeji ua Katatu ua muvu ua 1983 mu mbandu ia 26.