Ku bokona mu madisá

Ku bokona mu madisá

 KIBANDEKESU

Tolola o Ukexilu ua ku Bhânga ni Ufusa

Tolola o Ukexilu ua ku Bhânga ni Ufusa

O ufusa kífua kia iibha mu ukexilu ua nzumbi, ki bhangesa o muthu ku kala ni ibanzelu ia iibha, mu ku di banza ngó mudiê, ni ku xidisa o kilunji. * Uoso u bhanga ufusa, u kala mu mona akua, kála ima phala ku bhanga ufusa—kála ima phala ku bhanga o jihanji ja xitu. o jihanji ja xitu, ka ji bhange ni henda, jene ji moneka kála kima kioso-kioso ngó, ki bhana kisangusangu ku muthu. Maji o kisangusangu kiki, ki ki nangenena. Mu kidi, mu veji dia ku jibha o jihanji ja mukutu, ‘ja lungu ni undumbu, ni ufusa, ni jihanji ja iibha,’ o ufusa u bhangesa o muthu ku kala dingi ni vondadi ia ku bhanga o jihanji ja xitu.—Kolose 3:5.

O phoxolo Phaulu ua soneka: ‘Enu akuetu . . . tu dizelesie-nu, ku u ufusa uoso ua xitu, ni ua nzumbi, ni tu zubhe o kuzela, tu kale mu xila Nzambi.’ (2 Kolindo 7:1) Se ki ku bhonza luavulu phala ku belesela o izuelu íii, kana ku luuala. Jihova ‘u lenguluka ku loloka’ ni ku kuatekesa. (Jisálamu 86:5; Luka 11:9-13) Mu kidi, o kitongoluelu kia neme, ni nguzu i ua mu bhanga phala kueha o kífua kiki—sumbala u lueza kiki—maji kiki kilondekesa kuila uala ni ukexilu uambote. Lembalala ué kuila, “Nzambi uala kota o muxima uetu ndenge, kuma Muène uejiia o ima ioso.” (1 Nzuá 3:20) Nzambi ka mono ngó o ituxi ietu, maji u mona o muthu mu ukexilu uoso. Mukonda dia kuijiia  ioso ia lungu ni etu, muéne u tuívua ni henda ioso, kioso ki tu mu bhinga o muloloke. Kienhiki, kana ku bhuila mu ku samba izuua ioso kua Nzambi, ni ku lenduka, ni kidi kioso, kála o mona u bhinga kikuatekesu kua tat’ê, kioso kia bhita ni ibhidi. Jihova ua-nda ku besoala ni kitongoluelu kia zele. (Jisálamu 51:1-12, 17; Izaia 1:18) Mu kidi, eie ua tokala ku u suína mu ku bhanga ioso i u bhinga mu misambu iê. Mu kifika, ua tokala ku bhanga ioso phala kueha o ukexilu ua ku mona o ufusa, ni kueha mu kuenda ni makamba a iibha. *

Se uala hanji ni maka alungu ni ufusa, zuela ni tat’ê, mba mam’ê, mba kamba diê ua kulu kiá mu nzumbi, ua mesena o mbote iê. *Jisabhu 1:8, 9; 1 Tesalonika 5:14; Tito 2:3-5.

^ kax. 1 O ufusa, o ku tonoka ni ujitu ua tu bhana Jihova, ua ku bhanga tuana, i bhangesa o muthu ku kala ni vondadi ia ku bhanga o jihanji ja xitu.

^ kax. 2 Phala ku dilanga mu ima i bhita mu Komputadolo, miji iavulu a ta o Komputadolo bhu kididi mu bhita o athu, mu inzo iâ. A mukuá, a sumba ima ia a langa phala ka mone o ima ia iibha i moneka mu Komputadolo. Maji né kiki, ki i tu bhana kikuatekesu mu ima i moneka-mu.

^ kax. 1 Phala kuijiia dingi itendelesu i ku kuatekesa o kueha o ufusa, tanga o divulu, “Os Jovens Perguntam . . . Como posso vencer esse mau hábito?” ni Despertai! dia mbeji dia Kamoxi ua 2006, ni divulu, Os Jovens Perguntam—Respostas Práticas, Volume 1, mu jimbandu ja 205-11.