Ku bokona mu madisá

Ku bokona mu madisá

 KIBANDEKESU

O Kitumu Kia Bibidia Kia Lungu ni ku di Xisa, ni ku di Senga

O Kitumu Kia Bibidia Kia Lungu ni ku di Xisa, ni ku di Senga

Jihova u kingila kuila o makaza a kumbidila o kikanenu kiá, kia lungu ni ukaza. Mu ku bhanga o ukaza ua diiala dia dianga ni muhatu ua dianga, Jihova uambe: ‘O diiala . . . u naminina kua mukaji’ê, ene kiiadi kiâ, a di bhanga xitu imoxi ngó.’ Mu ku bhita kithangana, Jezú Kristu ua bhitulula o kitendelesu kiki iú uambe dingi: “Ioso-phe ia bandeka Nzambi, ki bhu kale muthu u i uanununa.” (Dimatekenu 2:24; Matesu 19:3-6) Mu kiki, Jihova ni Jezú, a mona o ukaza kála kima ki nangenena, u bhua ngó kioso ki bhu fuá muthu umoxi mudiâ. (1 Kolindo 7:39) O kuijiia kuila o ukaza kima kikôla, o ku di xisa maka a dikota a tokala kua xinganeka kiambote. Mu kidi, Jihova ua ibhila kiavulu o  ukexilu ua ku di xisa ngó, sé maka alungu ni kitumu ki tanga o Bibidia.—Malakiia 2:15, 16.

Ihi i bhangesa o makaza ku di xisa? Mu kidi, Jihova ua ibhila o undumbu. (Dimatekenu 39:9; 2 Samuuele 11:26, 27; Jisálamu 51:4) Muéne ua ibhila kiavulu o undumbu, o ukexilu u bhangesa o makaza ku di xisa. (Phala kuijiia dingi ia lungu ni undumbu, tanga o kibatulu 9 mbandu 7, i zuela dingi maka enhá.) Jihova u ehela o kaza dia luuala se ua mesena ku kala hanji ni kaza diê ua bhange o undumbu, mba ku mu xisa. (Matesu 19:9) Kienhiki, se o kaza ua luuala u mesena ku xisa o kaza diê ua te kituxi, muéne ka mu bhanga kima ki ibhila Jihova. Mu kiki, mukonda dia ima iavulu i moneka, o kaza ua luuala, nange u mesena ku tunga ni kaza diê, se muéne ua diela ni muxima uoso o kituxi kiê. Maji se bhu kala kaza ua mesena ku xisa kaza diê, muéne ua tokala kuijiia se ihi ia-nda bhanga, ni ku xikina o ibhidi ia-nda moneka.—Ngalásia 6:5.

Mu ithangana ia ibhidi iavulu, saí Jikidistá a mesena ku senga, mba ku di xisa, né muene se o kaza diê ka bhange o undumbu. Mu ithangana íii, o Bibidia izuela kuila uoso u bhanga kiki, ua tokala ‘u kala dikudi, se kana, kota u vutuka dingi’ ni kaza diê. (1 Kolindo 7:11) O Kidistá u kala mu kithangana kiki, ka tokala ku sota muthu phala ku kazala nê. (Matesu 5:32) Xinganeka o ibhidi iavulu i moneka, i bhangesa o muthu ku senga kaza diê.

O ku dituna ku tambula konda ia muiji. O muiji nange u bhita mu ibhindamu, mukonda o diiala u dituna ku tambula konda ia muiji, sumbala muéne uala ni kitadi phala ku bhanga kiki. O Bibidia izuela: ‘Maji muthu-phe kia kamba ku tambula konda ia . . . muiji uê, muthu muenhó ua ditunu o kixikanu, ua tundu mu ku iibha, ió kiluua a xikina uala ndenge.’ (1 Timote 5:8) Se o diiala uala ni ukexilu iú, u dituna o ku xa o kifua kiki, o muhatu, muéne uejiia se kua bhingi ku senga mba kana, phala ku langa o tuana tuê. Mu  kidi, o tufunga a tokala ku tonginina kiambote o maka iá kioso kia bhana u mbangi ku Kidistá, kia ku mu zuela kuila ua ditunu ku dikila o muiji, mukonda o ku dituna ku dikila o muiji, ki tena ku bhangesa o muthu ku mu kaia mu kilunga.

Se muène u tá mu kiluezu o sauidi ni muenhu ua muhatu. O dikaza kijibhangânga, u ta mu iluezu o sauidi ni muenhu ua dikaza diê. Se o dikaza kijibhangânga Kidistá, o tufunga a tokala ku tonginina kiambote se o ima ia zuela ia lungu ni phange íii, kidi muene. O njinda iavulu, ni ujibhangânga, i bhangesa o muthu ku mu kaia mu kilunga.—Ngalásia 5:19-21.

Se muéne u fidisa o muhatu ku bheza Jihova. O dikaza u tena ku fidisa izuua ioso, o dikaza diê ku bheza Nzambi, nange u mu jijidika phala ka belesela o itumu ia Nzambi. Mu ithangana íii, o dikaza dia kidistá ua tokala kuijiia kuma o kima kia tokala ku bhanga ‘o ku belesela Nzambi, kana athu,’ mu ku senga.—Ikalakalu 5:29.

Mu ithangana kála íii, ki bhuala muthu ua tokala kuzuela ku dikaza dia luuala phala ku senga, né muene ku mu ambela kuila ua tokala ku xisa o munumi’ê, mba muhatu’ê. Sumbala o tufunga, ni makamba a kulu kiá mu nzumbi, a tena ku bhana kikuatekesu, ene kejiia ioso iene mu bhita ni diiala mba ni muhatu. Jihova muéne ngó u tena ku mona ioso. Mu kidi, o muhatu Kidistá, keji londekesa kuila ua mu xila Nzambi, né muene o ukaza, se muéne uzuela ima ki ia bhiti mu ukaza uê, mukonda ua mesena ku di senga ni diiala diê. Jihova uejiia se o muthu ua mu funha jindunge ja ku senga, né muene se u sueka o ukexilu iú. Mu kidi, ‘ima ioso ia zula ku mesu mê. O kua muéne, etu enioso kuene ku tua ka bhakula o ji konda.’ (Jihebeleu 4:13) Maji se bhu kala maka a dikota, ki bhuala muthu ua-nda bazela o Kidistá, ua mesena ku senga o dikaza diê. Ku disukilu dia ji konda, ‘etu-enioso ku hádia tua-nda kuimana bhu pholo ia Nzambi, phala muéne ku tu fundisa.’—Loma 14:10-12.