Ku bokona mu madisá

Ku bokona mu madisá

 KIBANDEKESU

Kiebhi ki u Tena ku Dibhana, ni Muthu a mu Kaie mu Kilunga

Kiebhi ki u Tena ku Dibhana, ni Muthu a mu Kaie mu Kilunga

Ima iofele i tu luualesa kiavulu kioso ki tu mona ndandu ietu, mba kamba dietu, a mu kaie mu kilunga mukonda dia ku kamba ku diela o kituxi kiê. Kioso ki tu mona o kitendelesu kia Bibidia kia lungu ni maka enhá, ki tena kulondekesa se tua zolo Nzambi ni muxima uoso, ni ku kala jifiiele ku itumu iê. * Tala o ibhuidisu ia lungu ni maka enhá.

Kiebhi ki tua tokala o ku dibhana ni muthu a mu kaie mu kilunga? O Bibidia izuela: ‘Se muthu a mu ixana phange ietu u kala ndumbu, mba mukua luímbi, mba mubhezi a iteka, mba muxingi a jindaka, mba hôlua, mba mukua ku tatela akua ima ka i bhange, mba munhani, athu a kala kiki, kana ku a tambulula né ngó ku xikama-ni ene ku meza.’ (1 Kolindo 5:11) O kia lungu ni muthu uoso-uoso ‘u kamba o kuenda mu ilongelu ia Kristu,’ kio soneke: ‘Kana ku mu tambulula mu jinzo jenu, né ku mu menekena. Uoso u mu menekena, ua mu bhanga mbandu ia imbamba iê ia iibha iene mu bhanga, a sokela.’ (2 Nzuá 9-11) Etu ki tu dilungu ni athu a a kaie mu kilunga, ki kale mu ikalakalu ia nzumbi, mba ia xitu. A Sentinela ia 15, ia mbeji ia Katutu ua 1981, mu mbandu ia 21, iambe: “Né muene se tu zuela ngó ‘ua zekele’ ki tena ku kala njila phala ku mateka o ukamba ni muthu iú. O kuila tua mesena ku bhanga kiki, ni muthu a mu kaie mu kilunga?”

Mu kidi, o kuila ku bhinga kueha o ku di bhana né mu ima ioso? Kiene, mukonda dia ima iavulu. Kia dianga, phala kulondekesa o ufiiele kua Nzambi ni ku Maka mê. Tu belesela Jihova, ki ku ima ngó ia tokala, maji né muene mu ima ia bhonzo. O henda kua Nzambi, i tu suínisa ku belesela o itumu iê ioso, mu kuijiia kuila muéne Nzambi ia henda ni kuiuka, ni kuijiia kuila o ijila iê phala o mbote ia jiselevende jê joso. (Izaia 48:17; 1 Nzuá 5:3) Kaiadi, o ku kamba o ku di bhana ni muthu a mu kaie mu kilunga, mukonda dia ku kamba ku diela o kituxi kiê, ki tu kuatekesa ku zelesa o kilunga, ni kilunji kietu mu ukexilu ua nzumbi, ni ku kuatekesa  o kilunga ku kala ni ukexilu uambote. (1 Kolindo 5:6, 7) Katatu, o ku suína kuetu mu ku belesela o itumu ia Bibidia, ku tena ku kuatekesa ué o muthu a mu kaie mu kilunga. Mu ku kuatekesa o kibuka kia fundisa o phange íii, nange, ki tena ku kuatekesa o muthu ua te o kituxi ka diela o kituxi kiê, ni kikuatekesu kia mu bhana ku tufunga. O kueha mu di bhana ni athu a zolo, nange ki mu kuatekesa “ku sunga kilunji” phala ku mona kuila ua lueza, ni ku bhanga ioso phala ku vutuka ku bheza dingi Jihova.—Luka 15:17.

Se o muthu a mu kaie mu kilunga ndandu ietu? Mu kithangana kiki, o u ndandu ua miji, u tena ku kala polova ua ufiiele. Kiebhi ki tu tena ku dibhana ni ndandu a mu kaie mu kilunga? Ki tu tena kuzuela ioso ia lungu ni maka a tena o ku moneka mu ukexilu iú, maji tua-nda tala jipondo jiiadi ja lungu ni maka enhá.

Saí ithangana o ndandu íii, nange u bhanga mbandu ia muiji uetu, iu ua tungu kumoxi n’etu, mu inzo imoxi. Sumbala o muthu a mu kaia mu kilunga, ki kilombolola kuila o u ndandu ua bhu, mu kiki, a tena ku bhanga kumoxi o ikalakalu ia kizuua ni kizuua iene mu bhanga ku muiji. Kienhiki, o muthu a mu kaie, ua solo ku zubha o u kamba mu nzumbi ni muiji uê. Kienhiki, o jindandu jê ka tokala dingi ku dilunga nê mu ukexilu ua nzumbi. Mu kifika, se o muthu a mu kaie mu kilunga u kala kumoxi ni muiji mu kithangana kia ku bhanga o Ubhezelu ku Muiji, muéne ka tokala kuzuela kima. Maji se o muthu a mu kaie mu kilunga mona ndenge hanji, o jitata ene ala hanji ni kikalakalu kia ku mu longa. Kienhiki, o jitata mu henda iâ, a tokala ku longa o Bibidia ku mona. *Jisabhu 6:20-22; 29:17.

Mu ithangana iéngi, o ndandu a mu kaie mu kilunga, nange ka bhange mbandu ia muiji, mba ka tungu kumoxi n’etu. Sumbala saí ithangana, ku bhinga ku batula maka ni ndandu a mu kaie mu kilunga, maji, ka tokala ku kala nê mu ithangana iavulu. Jindandu ja fiiele ja muiji Kidistá, ka sota kithangana phala ku kala ni ukamba ni ndandu a mu kaie mu kilunga, ka tungu dibhata dimoxi.  Mu veji dia kiki, o ufiiele kua Jihova ni kilunga kiê, kia a bhangesa ku belesela o itumu ia Bibidia ia lungu ni ku kaia muthu mu kilunga. O ku belesela kuê, kima kiambote phala o muthu a mu kaie mu kilunga, ki tena ku mu kuatekesa ku katula mbote ku kaxtiku ka mu bhana. *​—Jihebeleu 12:11.

^ kax. 1 O itumu ia Bibidia ia lungu ni maka enhá, a i kumbidila ué ku athu a ditunu ku bheza Nzambi, mba a xisa o kilunga mu vondadi iâ.

^ kax. 2 Phala kuijiia dingi ia lungu ni an’a ndenge a a kaie mu kilunga, iú ua tungu hanji ni jitata, tanga A Sentinela ua 1 ua Kamusasadi ua 2001, mu jimbandu ja 16-17, ni 15 ua Kamoxi, ua 1988 mu mbandu ia 20.

^ kax. 3 Phala kuijiia dingi ia lungu se kiebhi kia dibhana ni muthu a mu kaie mu kilunga, tanga o itendelesu ia Bibidia i tu sanga mu, A Sentinela ua 15, ua mbeji ia Kasamanu ua 1988, mu jimbandu ja 26-31, ni 15 ua mbeji ia Katutu ua 1981 mu jimbandu ja 22-27.