Ku bokona mu madisá

Ku bokona mu madisá

 DISÁ 13

Iebhi o Njimbu Iambote ia Lungu ni Jingeleja?

Iebhi o Njimbu Iambote ia Lungu ni Jingeleja?

1. O kuila o jingeleja joso jambote?

Tuejiia kuila mu jingeleja joso muala athu avulu a mesena ku bheza Nzambi ni kidi. Njimbu iambote kuijiia kuila Nzambi uejiia o athu enhá, ua mesena o mbote iâ. Maji o jingeleja jene mu bhanga ima iavulu ia iibha. (2 Kolindo 4:3, 4; 11:13-15) Kála kia londekesa, mu izuua íii, o jingeleja jene mu di ta mu ujibhangânga uene mu bhita ku mundu, ni mu ita, ni kuzangata o tuana. Kiki kiene mu luualesa o athu a mesena ku bheza Nzambi ni kidi!—Tanga Matesu 24:3-5, 11, 12.

O ubhezelu ua kidi, uene mu bhana kijingu kua Nzambi, maji o jingeleja ja makutu ene mu bhanga ima i mu luualesa kiavulu. Milongi iê ki i tundu mu Bibidia, a longa makutu alungu ni Nzambi, ni athu afú. Maji Jihova ua mesena kuila o athu ejiia o kidi kia lungu ni muéne.—Tanga Izekiiele 18:4; 1 Timote 2:3-5.

2. Iebhi o njimbu iambote ia lungu ni jingeleja?

O Nzambi ia ku sanguluka, ka tena ku mu sangulukisa ku jingeleja amba kuila a mu zolo, maji mu kidi a bheza o mundu ua Satanaji. (Tiiaku 4:4) O Mak’â Nzambi exana o kisangela kia jingeleja joso ja makutu mu dijina dia “Babilonha ia Dikota.” Babilonha, dijina dia mbanza mua mateka o ubhezelu ua makutu, kioso kia bhiti o Dilúvio mu izuua ia Noué. Kua kambe ngó, Nzambi ua-nda buika o jingeleja jene mu nganala o mundu.—Tanga Dijingunuinu 17:1, 2, 5, 16, 17; 18:8.

Saí dingi njimbu iambote. Jihova ka jimbi o athu ala mu jingeleja ja makutu ku mundu uoso. Muéne ua mu bhongolola o athu enhá mu ku a longa o kidi.—Tanga Mikeia 4:2, 5.

 3. Ihi ia tokala ku bhanga o athu a mesena ku bheza mu kidi?

O ubhezelu ua kidi uongeka athu

Jihova u langa o athu a zola o mbote ni kidi. Muéne u a tendelesa ku tunda mu jingeleja ja makutu. O athu a zolo Nzambi, a bhanga ioso phala ku bhanga o vondadi iê.—Tanga Dijingunuinu 18:4.

Ku hama ia dianga o athu evuile o njimbu iambote ku jipoxolo, a bhange kima ni kisangusangu kioso. A di longo ukexilu ua ubhe kala ki longa Jihova, muenhu ua zediua, ni kidielelu. Ene a tu bhana phangu iambote, mukonda ene a tambuijila o njimbu iambote mu ku dianga ku bhanga o vondadi ia Jihova ku mienhu iâ.—Tanga 1 Tesalonika 1:8, 9; 2:13.

Jihova u tambulula ku muiji uê, o athu a xisa o jingeleja ja makutu. Se u xikana kuíza kua Jihova, ua-nda kala kamba diê, ua-nda tokala ku muiji ua abhezi’ê, ku hádia ua-nda tambula muenhu ua kalelaku.—Tanga Marku 10:29, 30; 2 Kolindo 6:17, 18.

4. Kiebhi kia-nda bheka Nzambi o ku sanguluka mu ixi?

O dizubhilu dia jingeleja ja makutu, njimbu iambote. Dia-nda bheka o ufolo ku mundu uoso. Nuka dingi a-nda nganala, mba ku uana o athu. Oso a-nda kala ku muenhu, a-nda bheza ngó o Nzambi ia kidi.—Tanga Dijingunuinu 18:20, 21; 21:3, 4.