Ku bokona mu madisá

Ku bokona mu madisá

 DISÁ 12

Kiebhi ki u Tena ku Zukama Kua Nzambi?

Kiebhi ki u Tena ku Zukama Kua Nzambi?

1. O kuila Nzambi uivua o misambu ioso?

Nzambi ua mesena kuila athu oso a mu zukama mu musambu. (Jisálamu 65:2) Maji muéne kene mu kuívua o misambu ioso. Mu kifika, o musambu ua diiala u talesa hadi kua muhatu’ê, Jihova ka tena ku ivua. (1 Phetele 3:7) Kioso akua Izalaiele kia jiji mu ku bhanga o ima ia iibha, Nzambi ua ditunu kuívua o misambu iâ. O musambu ujitu ua dikota. Nzambi u tena uê kuívua o misambu ia athu a ta kituxi kia dikota se a diela.—Tanga Izaia 1:15; 55:7.

Tala o vidyu O Kwila Nzambi Wívwa o Misambu Yoso?

2. Kiebhi ki tua tokala o kusamba?

O musambu kima kia bhingi mu ubhezelu uetu, tua tokala ku samba ngó ku Mubhangi uetu Jihova. (Matesu 4:10; 6:9) Tua tokala ku samba mu dijina dia Jezú mukonda muéne uafú mu ituxi ietu. (Nzuá 14:6) Jihova ka mesena kuila tu tumbula kima kimoxi mu musambu, mba tu u katula mu divulu. Muéne ua mesena kuila tu samba kua muéne ni muxima uoso.—Tanga Matesu 6:7; Filipe 4:6, 7.

O Mubhangi uetu u tena kuívua o misambu i tu bhanga ni muxima. (1 Samuuele 1:12, 13) Muéne ua mesena kuila tu samba mu ithangana ioso, mu kamene ni mu usuku, mu ola ia kudia, ni kioso ki tu dibhana ni maka.—Tanga Jisálamu 55:22; Matesu 15:36.

3. Mukonda diahi o Jikidistá ene mu diongeka?

Ki bhonza ku zukama kua Nzambi, mukonda a tu kondoloka ku athu kene ni kixikanu kua Nzambi, a xonguena o ikanenu iê ia ku bheka o kutululuka mu ixi. (2 Timote 3:1, 4; 2 Phetele 3:3, 13) Mukonda dia kiki, tua tokala ku di ongeka ni jiphange jetu, ene a bhindamena uê o kikuatekesu kietu.—Tanga Jihebeleu 10:24, 25.

 O ku di ongeka ni athu a zolo Nzambi ku tu kuatekesa ku zukama kua Nzambi. O iônge ia Jimbangi ja Jihova, kithangana kiambote phala ku suínisa o kixikanu kia akuetu.—Tanga Loma 1:11, 12.

4. Kiebhi ki u tena ku zukama kua Nzambi?

U tena ku zukama kua Jihova mu ku xinganeka mu milongi i uene mu di longa mu Maka mê. Ku xinganeka mu ibhangelu iê, ni mu ikanenu iê. O ku samba ni ku xinganeka ku tu bhangesa ku zola o henda ia Nzambi, ni unjimu uê.—Tanga Josuué 1:8; Jisálamu 1:1-3.

U tena ngó ku zukama kua Nzambi, se u mu dielela mba u kala ni kixikanu kua muéne. Maji phala ku kolesa o kixikanu, ku bhinga ku bhanga kima. Ua tokala ku di longa izuua ioso, phala ku kolesa o kixikanu kiê.—Tanga Matesu 4:4; Jihebeleu 11:1, 6.

5. Mukonda diahi o ku zukama kua Nzambi kima kiambote phala eie?

Jihova u langa o athu a mu zolo. Muéne u a langa mu kima kioso-kioso ki tena ku zozesa o kixikanu kiâ, ni kidielelu kia ku tambula o muenhu ua kalelaku. (Jisálamu 91:1, 2, 7-10) Muéne u tu dimuna phala ki tu kale ni ukexilu ua iibha ku muenhu, u tena ku ta o muenhu mu iluezu, ni ku fidisa o ku zediua. Jihova u tu longa o ukexilu uambote u tua tokala ku kala nau ku muenhu.—Tanga Jisálamu 73:27, 28; Tiiaku 4:4, 8.