Ku bokona mu madisá

Ku bokona mu madisá

 DISÁ 14

Mukonda Diahi Nzambi Uala ni Kilunga

Mukonda Diahi Nzambi Uala ni Kilunga

1. Mukonda diahi Nzambi m’ukulu ua sokejeka akua Izalaiele?

Nzambi ua sokejeka o mbutu ia Mbalahamu mu kifuxi, iu ua a bhana Itumu. Muéne ua a luku “Izalaiele,” ene exile mu bhanga o ubhezelu ua kidi, ni ku bhaka o maka mê. (Jisálamu 147:19, 20) Kienhiki o athu a ifuxi ioso, eji katula mbote ku Izalaiele.—Tanga Dimatekenu 22:18.

Nzambi ua solo akua Izalaiele phala ku kala jimbangi jê. O musoso ua akua Izalaiele, ulondekesa kiebhi athu kia katula mbote mu ku belesela o itumu ia Nzambi. (Matendelelu 4:6) Kienhiki, bhu kaxi ka akua Izalaiele, athu a mukuá eji kuijiia o Nzambi ia kidi.—Tanga Izaia 43:10, 12.

2. Mukonda diahi o Jikidistá ja kidi a di sokejeka?

Saí kithangana akua Izalaiele a texi o ukamba uâ ni Nzambi, kienhiki Jihova ua solo o kilunga kia Jikidistá phala ku a bhingana. (Matesu 21:43; 23:37, 38) Lelu bhu kididi kia akua Izalaiele, o Jikidistá ja kidi, ene a mu sidivila Nzambi kala Jimbangi jê.—Tanga Ikalakalu 15:14, 17.

Jezú ua sokejeka o akaiedi’ê phala ku bhanga maxibulu athu a ifuxi ioso. (Matesu 10:7, 11; 24:14; 28:19, 20) O kikalakalu kiki, kia mu tula ku dizubhilu diê, mukonda o dizubhilu dia mundu iú dia zukama. Tundé ku dimatekenu Jihova uene mu kuongeka athu mu ubhezelu ua kidi. (Dijingunuinu 7:9, 10) O Jikidistá ja kidi a di sokejeka, a di suínisa, a di kuatekesa mudiâ. Ene a tambula o milongi imoxi ia Bibidia ku mundu uoso, mu iônge iâ.—Tanga Jihebeleu 10:24, 25.

 3. Kiebhi kia mateka o Jimbangi ja Jihova mu izuua ietu?

O kilunga kia Jimbangi ja Jihova mu izuua ietu, kia mateka ku muvu ua 1870. A mateka kioso kibuka kiofele kia athu adilongi a Bibidia a mateka ku tokuesa o kidi kia Bibidia. Ene ejidile kuila Jezú ua sokejekele o kilunga kia Jikidistá phala ku boka, kienhiki a mateka ku boka o Utuminu ku mundu uoso. Ku muvu ua 1931 ene a tambula o dijina Jimbangi ja Jihova.—Tanga Ikalakalu 1:8; 2:1, 4; 5:42.

4. Kiebhi kia di sokejeka o Jimbangi ja Jihova?

Ku hama ia dianga, o ilunga ia Jikidistá mu jixi javulu a katula mbote mu ku kala ni kibuka kia Utuminu, a xikina kuila Jezú muéne ua mu Kuendesa o kilunga. (Ikalakalu 16:4, 5) Lelu ué kiene kimoxi, ku mundu uoso o Jimbangi ja Jihova a katula mbote mu ku kala ni kibuka kia Utuminu, kia tufunga. O atuameni enhá, ene ala ku pholo mu kikalakalu kia jifiliale ja Jimbangi ja Jihova, kala o ku bhanga o madivulu, ni ku uana o madivulu mu 600 ja madimi. O Kibuka kia Utuminu ki suínisa o athu ni milongi ia Bibidia, a mu kalakela 100.000 a ilunga ku mundu uoso ndenge. Mu ilunga ioso muala tufunga. O mala enhá a langa o kilunga kia Nzambi ni henda ioso.—Tanga 1 Phetele 5:2, 3.

O Jimbangi ja Jihova a di sokejeka phala kuboka o njimbu iambote ni ku bhanga maxibulu. Kála kia kexile mu bhanga o jipoxolo, etu ué tu boka inzo ni inzo. (Ikalakalu 20:20) Tu longa o Bibidia kua ió a mesena kuijiia o kidi kia lungu ni Nzambi. Maji o Jimbangi ja Jihova ki kilunga ngó kana. Tu muiji uala ni Tata ia tu zolo. Tu jiphange, tu di kuatekesa mudietu. (2 Tesalonika 1:3) Mukonda dia ku disokejeka ni ku kuatekesa akuâ, o Jimbangi ja Jihova, muiji ua zediua mu ixi.—Tanga Jisálamu 33:12; Ikalakalu 20:35.