Ku bokona mu madisá

Ku bokona mu madisá

KIBATULU KUINHI NI TANU

O Ubhezelu u Xikina Nzambi

O Ubhezelu u Xikina Nzambi

O kuila o jingeleja joso a ji xikina kuala Nzambi?

Kiebhi ki tu tena ku sanga o ubhezelu ua kidi?

A nanhi o abhezi a kidi a Nzambi lelu mu ixi?

JIHOVA NZAMBI ua tu uabhela kiavulu, iu ua mesena kuila tu katula o mbote ku milongi iê, ia henda. Se tu mu bheza mu ukexilu uambote, tua-nda zediua, ki tua-nda kala ni maka avulu ku muenhu. Tua-nda tambula ué o mabesá mê ni kikuatekesu kiê. (Izaia 48:17) Maji kuene jingeleja javulu jamba kuila, ene mu longa o kidi kia lungu ni Nzambi. Né kiki, ene kala ni ilongesu imoxi ia lungu ni Nzambi, ni ihi ia mesena muéne ko kuetu.

2 Kiebhi ki u tena kuijiia o ukexilu uambote ua ku bheza Jihova? Ki ua bhingi ku di longa, mba ku tonginina o ilongesu ia jingeleja joso. Eie ua tokala ngó kuijiia se mu kidi ihi i longa o Bibidia, ia lungu ni ubhezelu ua kidi. Phala ku londekesa: Saí jixi jala ni maka alungu ni ku bhanga kitadi kia makutu. Ihi ueji bhanga se a ku bhanene kikalakalu kia ku tonginina o kitadi kia makutu? Ueji kuijiia o kitadi kioso kia makutu? Kana. Ueji di longa ngó kiambote, o kitadi kia kidi. Kioso ki ueji kuijiia o kitadi kia kidi, ki kieji ku bhonza kuijiia o kitadi kia makutu. Kiene kimoxi ué, kioso ki tu sanga o ubhezelu ua kidi, tu tena kuijiia o jingeleja joso ja makutu.

3 Kia beta-kota ku bheza Jihova mu ukexilu u xikina muéne. Athu avulu a xikina kuila Nzambi u xikina jingeleja joso, maji kiki ki kiene ki longa o Bibidia. O muthu ka tokala ngó kuamba, ngi Kidistá. Mukonda Jezú uambe: “Ki ene oso a ng’ila ‘Ngana, Ngana,’ a kà bokona mu utuminu ua diulu; ki kale ngó ió u bhanga o vondadi ia Tata iami uene mu diulu.” Kiki-phe, phala ku tu xikina kuala Nzambi, tua tokala kuijiia ihi ia mesena Nzambi ko kuetu, ni ku ki kumbidila. Jezú uambe kuila ió ka bhanga o vondadi ia Nzambi “ati a ituxi.” (Matesu 7:21-23, NW) Kála o kitadi kia makutu, o jingeleja ja makutu ki jala ni valolo. Kienhiki, o jingeleja jiji ji bhanga kia iibha.

4 Jihova uene mu bhana kithangana ku athu uoso, phala ku kala ni muenhu ua kalelaku. Kienhiki-phe, phala ku kala ni muenhu ua kalelaku mu Palaízu, tua tokala ku bheza Nzambi mu ukexilu u xikina muéne. Kikola, athu avulu a dituna ku bhanga kiki. Mukonda dia kiki, Jezú uambe: “Bokuenenu bhu dibhitu dia tolo, mbata o dibhitu dia kulu ni njila iazanze iia ku’alunga; o athu a di bokona avulu. O kadibhitu-phe katolo, ni kanjila kòfele, kaia ku muenhu; athu k’a kidi a ka sanga.” (Matesu 7:13, 14) O ubhezelu ua kidi, uambata ku muenhu ua kalelaku. O ubhezelu ua makutu, uambata ku’alunga. Jihova ka-ndale kuila athu a fuá, mukonda dia kiki, muéne ua mu bhana kithangana ku athu ku mundu uoso phala ku muijiia. (2 Phetele 3:9) Kidi muene, o ukexilu uetu ua ku bheza Nzambi, u tena ku tu ambata ku muenhu, mba ku’alunga.

KIEBHI KI TU TENA KU SANGA O UBHEZELU UA KIDI

5 Kiebhi tu tena ku sanga o ‘njila ia muenhu’? Jezú uambe kuma o ubhezelu ua kidi eji ku ulondekesa ku abhezi a kidi. Muéne uambe, “Mu ejidila ku ibundu iâ. Kiene ué, muxi uoso uambote uima ibundu iambote.” (Matesu 7:16, 17) Kiki kilombolola kuma o kibuka kia abhezi a kidi, eji ku a ejiia mu ilongesu iâ, ni mu ima ia bhanga. Sumbala ene a ta ituxi, o abhezi oso a kidi, a bhanga o vondadi ia Nzambi. Ndoko tu di longe maukexilu a samanu a londekesa o kibuka kia abhezi a kidi.

O ABHEZI A NZAMBI A KIDI

  • o ilongesu iâ, a i katula mu Bibidia
  • a bheza ngó Jihova, a longa o dijina diê
  • a di zolo mudiâ
  • a xikina Jezú kála o mubhuludi ua bhana Nzambi
  • ka zolo o mundu
  • aboka o Utuminu ua Nzambi, kála o kidielelu kimoxi-élele kia athu.
Athu a jixi javulu abhezi a Nzambi ia kidi

6O ilongesu ia jiselevende ja Nzambi i tunda mu Bibidia. O Bibidia iamba: “Mikanda ioso ia bhusu Nzambi, mikanda ia kubhandulula, ni mu kulonga o kidi, ni mu kubazela itondalu, ni mu kuiukisa iabhengalala, ni mu kuijidisa uendelu uambote. Iene iosu’ii phala muthu ua Nzambi a tenene, ua di lungu kiasoko, mu kubhanga madimu moso mambote.” (2 Timote 3:16, 17) O poxolo Phaulu ua sonekena o Jikidistá: “Maka mene ma Nzambi, enu mua evu, mua a tambulala, kana kuma maka a muthu maji kuma ene o Maka ma Nzambi.” (1 Tesalonika 2:13) Kienhiki, o ilongesu ni ibhangelu ia abhezi a kidi, ki iene mu tunda mu ilunji, mba mu ijila ia athu. Maji ene mu i katula mu Maka a bhusu Nzambi, o Bibidia.

7 Jezú Kristu ua xisa phangu iambote, mukonda o ilongesu iê iexile mu tunda mu Maka ma Nzambi. Kioso kia sambe kua Tat’ê ia diulu, muéne uambe: “O maka mé kiene o kidi.” (Nzuá 17:17) Jezú ua xikinine ku Maka a Nzambi, ioso ia kexile mu longa ua kexile mu i katula mu Mikanda ikôla. Jezú uambele mu ithangana ioso: “Kiòsoneke.” (Matesu 4:4, 7, 10) Kienhiki, Jezú mu ithangana ioso ua tumbula o mikanda ikôla. Kiene kimoxi ué, o mundu ua Nzambi lelu, kene mu longa o kilunji kiâ. Ene a xikina kuma o Bibidia Maka a Nzambi, muene mu tunda o ilongesu iâ.

8Ió ala mu ubhezelu ua kidi a bheza ngó Jihova, a longa ué o dijina diê. Jezú uambe: “Mu kubheza kikale u bheza Jihova, Nzambi ié, muène ngó u mu tumaka.” (Matesu 4:10) Mukonda dia kiki, o jiselevende ja Nzambi ka bheza muthu uoso-uoso, ki kala ngó Jihova. O ubhezelu iú u bhinga ué ku longa athu, o dijina dia Nzambi ia kidi, ni ukexilu uê. O divulu dia Jisálamu 83:18 dizuela: “Phala a k’ijiie kuma eie ngó uavu o dijina dié dia Jihova…eie-muène ngó Suke-ku mu ngongo ioso.” Jezú ua xisa njila ia ku kuatekesa akuâ kuijiia Nzambi, kála kiambe mu musambu: “Eme nga tukulula o dijina dié ku athu u ua ngi bhana-nâ mu’ axaxe ka mundu.” (Nzuá 17:6) Kiene kimoxi ué, o abhezi a kidi lelu, ene mu longa o dijina dia Nzambi, ni ikanenu iê, ni ídifua iê, ku akuâ.

9O mundu ua Nzambi a di zolo mudiâ ni kidi kioso. Jezú uambe: “Kiene kia m’ijidila ku athu oso, kuma muala mu jixibulu jami, se mua di zolo mu dienu.” (Nzuá 13:35) O Jikidistá ja dianga a di zolele mudiâ. O henda ia kidi, ibhitakana o kathombo ka athu akua jixi jengi, mba a kikonda kiéngi, iongeka o abhezi a kidi kála muiji umoxi ngó. (Kolose 3:14) Akua jingeleja ja makutu, kala ni henda mudiâ. Kiebhi ki tua kijiia? Ene a di jibha mudiâ, mukonda ene mu bhânga ni athu a jixi jengi ni madiembu mengi. O Jikidistá ja kidi, kene mu kuata mata phala ku jibha o jiphange jê Jikidistá, mba muthu uoso-uoso. O Bibidia izuela: “Muene mu di monekena o an’a Nzambi ni an’a Diabhu. Uoso u kamba kubhanga iaiuka, ni ió kiá uoso u kamba kuzola phang’iê, ka tokala Nzambi.…Tu di zole mu dietu. Ki tu sokele ni Kaini ua tokalele kua Diabhu mukua kutondalesa, anga u jibha phangi’iê.”—1 Nzuá 3:10-12; 4:20, 21.

10 Mu kidi, o henda ia kidi, ki ku kamba ngó ku jibha akuâ. O Jikidistá ja kidi a bhana o thembu iâ, phala ku kuatekesa akuâ ni nguzu iâ, ni jimbote jâ, phala ku di suínisa mudiâ. (Jihebeleu 10:24, 25) Ene a di kuatekesa mudiâ mu thembu ia ibhidi, ni ku di bhana kiambote mu ibhangelu ni akuâ. Mu kidi, ene, mu kumbidila o milongi ia Bibidia ku muenhu uâ, ‘Tu bhangienu mbote ku athu uoso.’—Ngalásia 6:10.

11O Jikidistá ja kidi a xikina Jezú Kristu kála o mubhuludi ua bhana Nzambi. O Bibidia izuela: “O kubhuluka kikale kua Muène ngó. Kuma o bhoxi dia diulu’abha, bhu’axaxe k’athu, kana-bhu dingi dijina diengi dia bhana-bhu, dia tokala di kala dijina dia ku tu bhulula.” (Ikalakalu 4:12) Kála ki tua di longo mu Kibatulu 5, Jezú ua bhakula o muenhu uê mu kukula, athu a belesela. (Matesu 20:28) Kienhiki, Jezú a mu tuika o u Sobha kua Nzambi, mu Utuminu ua diulu, ua-nda tumina o ixi ioso. Nzambi ua mesena kuila tu belesela Jezú, ni ku kumbidila o ilongesu iê, se tua-ndala o muenhu ua kalelaku. Mukonda dia kiki, o Bibidia izuela: “Uoso ua xikina o Mona, uala ni muenhu ki uábhua. Maji uoso ka xikana o Mona, ka kà mona muenhu.”—Nzuá 3:36.

12O abhezi a kidi ka zolo o mundu. Kioso kia kexile ku mu fundisa kuala o nguvulu ia Loma, Pilatu, Jezú uambe: “O usobha uami, ki ua mu ngongo mumu.” (Nzuá 18:36) Kididi kioso kua tunga, o akaiedi a Jezú a belesela o Utuminu uê, ua diulu, ka di ta mu maka a ngongo. Né mu jinvunda ja isangela ia ngongo. Kienhiki, o abhezi a Jihova ka kuatekesa akuâ mu ku sola ku bhanga mbandu ia maka a ngongo, mba ku sola mutuameni ua ixi phala ku kala ku pholo. Sumbala o abhezi a kidi a Nzambi, kene mu di ta mu maka a ngongo, ene kene mu xibhaka o itumu ia ngongo. Mukonda diahi? Mukonda o Maka a Nzambi ua a tumina, “belesela o maungana.” (Loma 13:1) Kioso ki bhu kala maka mu kima kia mesena Nzambi ni ia mesena o isangela ia ngongo, o abhezi a kidi a kaiela o phangu ia jipoxolo kioso kiambe: “Tua bhingi tu tumaka Nzambi, kana athu.”—Ikalakalu 5:29; Marku 12:17.

13O akaiedi a kidi a Jezú aboka kuila o Utuminu ua Nzambi uene ngó o kidielelu kia kidi phala o mundu. Jezú ua kanena: “O Njimbu iíi Iambote ia Utuminu ua Nzambi, ia bhingi ku i tula mu ngongo ioso, mu kubhana umbangi ku akua jixi joso; kiene kiua kia kèza dizubhilu.” (Matesu 24:14) O akaiedi a kidi a Jezú Kristu, kene mu suínisa athu ku dielela ku jinguvulu, phala ku zubha o maka, mu veji dia kiki, ene aboka o Utuminu ua Nzambi kála kidielelu kimoxi ngó kia mundu. (Jisálamu 146:3) Jezú ua tu longo ku bhinga o unguvulu iú uaiuka, ku musambu, kioso kiambe: “Utuminu ué uize. Vondadi ié a i bhange bhoxi, kala kiala ku i bhanga ku diulu.” (Matesu 6:10) O Maka a Nzambi a kanena kuila o Utuminu iú ua diulu, “Uene kiá ua kà sasujula o mautuminu moso’ama [a lelu] anga a-bhua-ku, maji o uene ua kà xalela ni kutumina mu thembu joso katé ku hádia ni hádia.”—Daniiele 2:44.

14 Kála ki tua di longo kiá, dibhudise: ‘Kibuka kiahi kia abhezi a longa o Bibidia, a longa ué o dijina dia Jihova? Kibuka kiahi kilondekesa o henda ia kidi, ala ué ni kixikinu kua Jezú, ka zolo o mundu, aboka o Utuminu ua Nzambi kála kidielelu kimoxi ngó ku mundu? O kuila o jingeleja joso ji uejiia, ene mu bhanga kiki?’ Kála ki tuene mu mona, o kibuka kiki kia abhezi, o Jimbangi ja Jihova.—Izaia 43:10-12.

Mu ku sidivila Jihova ni mundu uê, ua-nda beta ku nganhala

Athu a jixi javulu a kala makamba a kidi

IHI I UA-NDA BHANGA?

15 Ki kisoko ngó ku xikina Nzambi phala muéne ku ku xikana. Manhi o Bibidia izuela kuma katé ué ni madimonho a xikina kuila kuene Nzambi. (Tiiaku 2:19) Maji ene ka bhange o vondadi ia Nzambi, mukonda dia kiki muéne ka a xikina. Phala ku tu xikina kua Nzambi, ki tu bhingi ngó ku mu xikina, maji tua tokala ku bhanga o vondadi iê. Tua tokala kueha o jingeleja ja makutu ni ku xikana o ubhezelu ua kidi.

16 O poxolo Phaulu uambe kuma etu ki tua tokala ku bhanga mbandu ia ngeleja ia makutu. Kienhiki muéne ua soneka: “Tundenu mu mundu uâ, mu di kalele, eme ngi Ngana [Jihova]. Kana kubabata kima kia ufusa, eme nda ngi mi tambulule.” (2 Kolindo 6:17; Izaia 52:11) O Jikidistá ja kidi, eha kima kioso-kioso kia lungu ni ngeleja ia makutu.

17 O Bibidia idikisa kuila maukexilu oso ua jingeleja ja makutu, abhanga mbandu ia “Babilónia ia dikota.”* (Dijingunuinu 17:5) O dijina didi di tu lembalala o mbanza iokulu ia Babilonha, kuene kua mateka o ubhezelu ua makutu, kioso kia bhiti o Dilúvio mu izuua ia Noué. O ilongesu ia jingeleja ja makutu lelu, ia tundu mu Babilonha iokulu. Mu kifika, akua Babilonha akexile mu bheza o tilindade, mba nzambi jitatu. Lelu, o Tilindade iene o ilongesu, ia jingeleja ja makutu. Maji o Bibidia i longa kuma kuene ngó Nzambi imoxi ia kidi, Jihova, ni kuila Jezú Kristu o Mon’ê. (Nzuá 17:3) Akua Babilonha a xikinine ué kuila o athu ala ni nzumbi, i tunda ku mukutu kioso ki fuá o muthu, inga i tala hadi mu kididi kia túbhia. Lelu, o ilongesu ia lungu ni nzumbi i tunda ku mukutu ua muthu, ni kuila o nzumbi i tala hadi mu ifernu, ene mu i longa mu jingeleja.

18 Tundé kia mateka ku muangana o ubhezelu uokulu ua Babilonha mu ixi ioso, o Babilonha ia Dikota ia lelu iene o kisangela kia mundu kia jingeleja ja makutu. Nzambi-phe ua kanena kuila o kisangela kiki, kia jingeleja ja makutu, kia-nda ia ku dizubhilu diê. (Dijingunuinu 18:8) Eie uejiia se mukonda diahi ua tokala kueha ku bhanga mbandu ia Babilonha ia Dikota? Jihova Nzambi ua mesena kuila eie u ‘tundamu’ ni lusolo, mukonda kuala hanji kithangana.—Dijingunuinu 18:4.

19 Mukonda dia kueha o ngeleja ia makutu, a mukuá a-nda kueha ku di bunda ni eie. Maji, mu ku sidivila Jihova ni mundu uê, eie ua-nda beta ku nganhala. Kála kia kexile o maxibulu okulu a Jezú, a xisa o ima ia mukuá phala ku mu kaiela, ua-nda kala ni jiphange ja vulu mu nzumbi. Ua-nda bhanga mbandu ia kisangela kia dikota kia muiji ua kidi, kia Jikidistá a-nda ku zola. Ua-nda kala ni kidielelu kia muenhu ua kalelaku “ku mundu uà keza-ku.” (Marku 10:28-30) Nange mu ku bhita thembu, ió a ku xisa mukonda dia ima i ua mu di longa, a tena ku di longa ué o Bibidia ni ku kala ué abhezi a Jihova.

20 O Bibidia i longa kuma Nzambi ua-nda buika o mundu iú ua iibha, iu ua-nda bheka o mundu uobhe uaiuka, a-nda ku u tumina ku Utuminu uê. (2 Phetele 3:9, 13) Ua-nda kala mundu uaiuka! Ku mundu iú uaiuka, kua-nda kala ngó ubhezelu umoxi ua kidi. Ki unjimu, se u dilunga ni abhezi a kidi lelu?

IHI I LONGA O BIBIDIA

  • Kuala ngó ubhezelu umoxi ua kidi. —Matesu 7:13, 14.
  • O ubhezelu ua kidi tu u mona mu ilongesu, ni mu ibhangelu iâ.—Matesu 7:16, 17.
  • O Jimbangi ja Jihova ala ni ubhezelu ua xikina Nzambi.—Izaia 43:10.

*  Phala kuijiia dingi se mukonda diahi o Babilonha ia Dikota ilondekesa o kisangela kia mundu kia jingeleja ja makutu, tanga o Kibandekesu.


Ibhuidisu

1. Mabesá ahi u tua-nda tambula se tu bheza Nzambi mu ukexilu uambote?

2. Kiebhi ki tu tena kuijiia o ukexilu uambote ua ku bheza Jihova, ni kilondekesu kiahi ki tu kuatekesa ku tendela o maka enhá?

3. Kála kiambe Jezú, ihi i tua tokala ku bhanga phala ku tu xikina kua Nzambi?

4. Ihi ilombolola o kizuelu kia Jezú kia lungu ni njila jiiadi, ni kuebhi kuambata o jinjila jiji?

5. Kiebhi ki tu tena kuijiia o abhezi a kidi?

6, 7. Kiebhi o jiselevende ja Nzambi kia mona o Bibidia, ni phangu iahi ia xisa Jezú ia lungu ni maka enhá?

8. O ubhezelu ua Jihova ua bhingi ihi?

9, 10. Mu ukexilu uahi o Jikidistá ja kidi ene mu londekesa o henda mudiâ?

11. Mukonda diahi kia beta-kota ku xikina Jezú Kristu kála o mubhuludi ua bhana Nzambi?

12. O ku kamba ku zola o mundu, ku bhinga ihi?

13. Kiebhi o akaiedi a kidi a Jezú kiene mu mona o Utuminu ua Nzambi, ni ihi iene mu bhanga?

14. Kibuka kiahi kia abhezi, eie u xikina kuila ala ni ibhangelu ia abhezi a kidi?

15. Ihi dingi ia mesena Nzambi mu veji ia ku mu xikina ngó?

16. Ihi i tua tokala ku bhanga ia lungu ni kueha o ngeleja ia makutu?

17, 18. O “Babilonha ia dikota,” ihi, ni mukonda diahi kua bhingi ku ‘tunda-mu’ ni lusolo?

19. Ihi i ua-nda nganhala mu ku sidivila Jihova?

20. Ihi ia-nda tambula ku hádia o abhezi a kidi?