Ku bokona mu madisá

Ku bokona mu madisá

KIBANDEKESU

O Seialu ia Ngana—Fesa i Bhana Kijingu Kua Nzambi

O Seialu ia Ngana—Fesa i Bhana Kijingu Kua Nzambi

O JIKIDISTÁ a a tumina ku bhanga o Fesa ia ufuilu ua Kristu. O fesa íii, a ixana ué “o Seialu ia Ngana.” (1 Kolindo 11:20) Mukonda diahi iala ni kijimbuluilu iambote? Thembu kuxi, ni kiebhi kia tokala ku i bhanga?

Jezú Kristu ua bhange o fesa íii mu usuku ua Phasu ua Jijudé, mu muvu ua 33 K.K. O fesa íii ia Phasu, akexile mu i bhanga veji imoxi ngó ku muvu, mu kizuua kia 14 kia mbeji ia Nisã ua Jijudé. Phala ku kondala o kizuua kiki, o Jijudé a kingile kioso ki bhita o semana ia dianga ia mbeji ia Katanu. Mu kizuua kieniókio, kua kexile 12 ia ola ia muanha, ni 12 ia ola ia kitombe. O fesa ia dianga ia mbeji ia ubhe (lua nova), akexile mu i bhanga mu semana ia kaiiadi ia mbeji ia Katanu, íii iexile o dimatekenu dia Nisã. O Phasu akexile mu i bhanga kioso kia bhitile 14 ia izuua, kuila o dikumbi diáfu kiá.

Jezú ua bhange o fesa íii ia Phasu ni jipoxolo jê, maji ande dia ku bhanga o Seialu ia Ngana, muéne ua kaie Juda dia Kadiota. O Fesa íii ia bhingana o fesa ia Phasu ia Jijudé, kienhiki, a tokala ku i bhanga veji imoxi ngó ku muvu.

O Njimbu ia Matesu i tanga: “O kia kala mù kúdia, Jezú u katula mbolo, u sakidila Nzambi, hé u i bukujula, anga u i uanena jixibulu, uixi: Amenu, mu die. Uene o mukutu uami. Anga u katula kopho, u sakidila Nzambi, anga u a bhana, uixi: Nuenu-ku enuenu oso. Kuma iá ene o manhinga mami, ma di zunza mukonda dia mundu phala kuloloka o ituxi. Mene o manhinga ma kuatesa o Kikutu Kióbhe bhu kaxi ka athu ni Nzambi. ”—Matesu 26:26-28.

kioso kia bhana ué o vinhu, ua bhana o manhinga mê. Maji kioso kia bhana o mbolo, Jezú ua kexile hanji ku muenhu. O kuila o jipoxolo ja Jezú, adile muene o mukutu uê, ni a nuine ué o manhinga mê? Kana, mukonda kiki kieji kala kídifua kia kifumbe (Canibalismo), kieji kala ué kituxi mu kitumu kia Nzambi. (Dimatekenu 9:3, 4; Ijila 17:10) Kála kia ki tange mu divulu dia Luka 22:20, Jezú uambe: “Dikáu didi, kiene o Kikutu kiòbhe bhukaxi ka Nzambi ni athu, kiòkolese ni manhinga mami, manda kubhubha mukonda dienu.” O kuila o dikáu dienhodio dia kituka muene “o kikutu kiòbhe”? Kana, mukonda o kikutu kiobhe, kima kia ku xikana, ki kima kia ku kuata.

Mbolo ni vinhu

Kiki-phe, o mbolo ni vinhu ijimbuete ngó. O mbolo ijimbulula o mukutu uaiuka ua Kristu. Jezú ua kuata o mbolo ia subhukile mu fesa ia Phasu. O mbolo íii, a i bhangele sé felemendu. (Makatukilu 12:8) O Bibidia i tanga o felemendu kála o kijimbuete kia ituxi. Kiki-phe o mbolo, ilondekesa o mukutu uaiuka ua Jezú ua bhana mu sata, sé kituxi.—Matesu 16:11, 12; 1 Kolindo 5:6, 7; 1 Phetele 2:22; 1 Nzuá 2:1, 2.

O vinhu ilondekesa o manhinga ma Jezú. O manhinga iá, a bhangesa kuila o kikutu kiobhe ki kala ni valolo. Jezú uambe kuila, o manhinga mê a a zunzumuna phala ‘o muloloki ua ituxi.’ Kienhiki, athu a tena ku kala ni ukexilu ua zele ku pholo ia Nzambi, ni ku a xikina mu kikutu kiobhe ni Jihova. (Jihebeleu 9:14; 10:16, 17) O kikutu kiki, kia bhangesa kuila 144.000 ia Jikidistá aia ku diulu. Kuenhoko, ene a-nda tumina kála, jisobha, akunji, phala ku zediuisa athu uoso mu ngongo.—Dimatekenu 22:18; Jelemiia 31:31-33; 1 Phetele 2:9; Dijingunuinu 5:9, 10; 14:1-3.

Nanhi ua tokala kúdia o mbolo, ni kúnua o vinhu mu Fesa íii? Oso a tokala mu kikutu kiobhe—ió a-ndaia ku diulu—ene ngó a tokala kúdia, ni kúnua. O nzumbi ikôla ia Nzambi, iene i bhana o umbangi kuila a a solo, phala ku kala jisobha ku diulu. (Loma 8:16) Ene ué, ala kumoxi ni Jezú mu kikutu kia Utuminu.—Luka 22:29.

Ihi i tuamba ia lungu ni ió a kingila ku kala mu Palaízu mu ixi, katé ku hádia? Ene a belesela o kitumu kia Jezú, kia kuia mu Fesa ia Seialu ia Ngana, maji ene a mona ngó ni ku xila kuoso, ka dia o mbolo né kúnua o vinhu. Veji imoxi ngó ku muvu, o Jimbangi ja Jihova a bhanga o Fesa ia Seialu ia Ngana, mu kizuua kia 14 ia mbeji ia Nisã, kioso kífua o dikumbi. Sumbala athu a tolo a kingila kuia ku diulu, o Jikidistá joso a mona o fesa íii, kála kima kia valolo kia dikota. Mu kizuua kiki, o Jikidistá a xinganeka o henda ia Jihova Nzambi ni Jezú Kristu.—Nzuá 3:16.

← Tanga o kibandekesu kia bhingi o kibatulu