Ku bokona mu madisá

Ku bokona mu madisá

KIBANDEKESU

O Kizuua Kia Kufundisa—Ihi?

O Kizuua Kia Kufundisa—Ihi?

Ihi i u banza ia lungu ni kizuua kia Kufundisa? Saí athu a banza kuila, jimidi ja athu afú, a-nda kala ku diulu ku pholo ia Nzambi. Kuenhoko, kala muthu a-nda um fundisa. A mukuá a-nda tambula mabesá ia ku kala ku diulu, maji a mukua a-ndaia bhu kididi kia túbhia. Kiki-phe o Bibidia i tanga kima kiéngi kia lungu ni kizuua kiki. O maka a Nzambi ka zuela o kizuua kiki, kála kithangana kia iibha, maji a tanga maka alungu ni kidielelu ni ku bhuluka.

Mu divulu dia Dijingunuinu 20:11, 12 tua tange maka ambe poxolo Nzuá, alungu ni Kizuua kia Kufundisa: “Nga mono kiandu kia dikota kizela, ni muène ua xikama-bhu. O mu kulenga pholo iê, oxi ni diulu ia jimuka, ki ia moneka ni jindenge, emana bhu pholo ia kiandu. Anga a jikula madivulu, ni divulu dia mukuá a di jikula, diene o divulu dia muenhu. O madifundu anga a a fundisa o ima ioso iosonèke mu madivulu, hé a a bhana kioso kia tokala mu imbamba iâ ia bhanga jiga.”nanhi o mufundixi a mu tange mu jivelusu jiji?

Jihova Nzambi muéne o Mufundixi ua dikota ua ngongo. Kienhiki muéne ua bhana o kikalakalu kiki kia kufundisa, ku muthu uéngi. Kála ki tanga o divulu dia Ikalakalu 17:31, o poxolo Phaulu uambe kuma Nzambi, “ua xindi kiá kizuua kia kufundisa mundu uoso mu kidi, kua muthu uê ua mu tungula.” O Mufundixi iú, Jezú Kristu a mu fukununa. (Nzuá 5:22) O kizuua kiki kia Kufundisa, kia-nda mateka thembu kuxi? Kia-nda nangenena thembu kuxi?

O divulu dia Dijingunuinu di tanga kuila o Kizuua kiki kia Kufundisa, kia-nda mateka kioso kia-nda mateka o ita ia Alumajedone, kioso o ukexilu uoso ua iibha ua Satanaji ku mundu, kia-nda ku u buika.* (Dijingunuinu 16:14, 16; 19:19-20:3) Kioso kia-nda bhita o ita Alumajedone, Satanaji ni madimonho mê a-nda ku a kuta mu midi ia mivu. Mu kithangana kiki, 144.000 ‘a-nda tumina kumoxi ni Kristu, kála jisobha mu midi ia mivu.’ (Dijingunuinu 14:1-3; Loma 8:17) O Kizuua kiki kia Kufundisa ki kia-nda kala kizuua kia ji ola. Kia-nda nangenena midi ia mivu.

Mu kithangana kiki kia midi ia mivu, Jezú Kristu ua-nda “fundisa athu a muenhu ni madifundu.” (2 Timote 4:1) “Athu a muenhu” a-nda kala “mundu uavulu” a-nda bhuluka mu ita ia Alumajedone. (Dijingunuinu 7:9-17) O poxolo Nzuá ua mono ué “o madifundu…emana bhu pholo ia kiandu” phala kua fundisa. Kála kia kanena Jezú, “oso ala mu jimbila kuívua o dízui diê [Kristu], ni ku tunda-mu.” (Nzuá 5:28, 29; Ikalakalu 24:15) Maji-phe, athu a-nda kua fundisa mu ima iahi?

Kála kia mono Nzuá mu nzoji, “a jikula madivulu,…O madifundu anga a a fundisa o ima ioso iosonèke mu madivulu.” O kuila mu madivulu iá a soneka-mu o ima ioso ia bhangele athu m’okulu? Kana, athu ka-nda kua fundisa mu ima ia bhangela m’okulu. Kiebhi ki tua kijiia? O Bibidia i tanga: “ oso uafu, ua jituka kiá ku nguzu ia ituxi.” (Loma 6:7) O madifundu, a-nda kua fundisa ni kilunji kia zele. Mu madivulu iá muala o ijila ia Nzambi. Phala ku kala ni muenhu ua kalelaku, o ió a-nda bhuluka mu ita ia Alumajedone, ni ió a-nda kua fukununa, a tokala ku belesela o itumu ia Nzambi, katé ué, ni ijila ioso ia-nda bhana Jihova mu midi ia mivu. Kienhiki, athu a-nda ku a fundisa mu ima ia-nda bhanga mu Kizuua kia Kufundisa.

O kizuua kia Kufundisa kia-nda bhana kithangana ku jimidi ja athu phala a di longe o maka alungu ni vondadi ia Nzambi, ni ku belesela. Kiki kilombolola kuila, kua-nda kala kikalakalu kiavulu kia ku longa. Mu kidi, “akua-xi kulu dia mundu a di longa o kidi.” (Izaia 26:9) Maji saí athu, ka-nda bhanga o vondadi ia Nzambi. O divulu dia Izaia 26:10 diamba kuila “O mukua-phulu né ua mu bhange mbote, ki kiene ki mu bhangesa o ku dilonga o kidi; katé ni mu ixi ia kuiuka, muéne hanji a jijila o kubhanga ufusa, ka xikina kusuua o unené ua Jihova.” Akua phulu iá, a-nda fuá mu Kizuua kia Kufundisa.—Izaia 65:20.

Mu di sukilu dia Kizuua kia Kufundisa, athu oso a-nda bhuluka, a-nda kala ni ‘muenhu’ katé ku hádia. (Dijingunuinu 20:5) Kienhiki, o kizuua kia kufundisa, kia-nda bheka o kuiuka ku athu oso mu ngongo. (1 Kolindo 15:24-28) Mu kiki-phe, kua-nda kuíza o polova ia sukina-ku. Satanaji a-nda ku mu jituna, i a-nda mu ehela ku nganala athu oso mu ngongo. (Dijingunuinu 20:3, 7-10) Uoso ua-nda kolokota mu kixikinu, ua-nda kala ni muenhu ua kalelaku, kála ki kanena o Bibidia: “Ixi-phe i xalela ku athu iá aiuka, ene a i lundula, muene mua tunga o thembu iâ [katé ku hádia].” (Jisálamu 37:29) O Kizuua kia Kufundisa kia-nda kala kizuua kia kisangusangu phala ió ala ni kixikinu!


*  Phala kuijiia dingi ia lungu ni Alumajedone, tanga o divulu Estudo Perspicaz das Escrituras, mu volume—1 mu jimbandu ja 711-12, ni mu volume—2 mu jimbandu ja 286-7, ni mu kibatulu kia 20 kia divulu Adore o Único Deus Verdadeiro, a ji bhange ku Jimbangi ja Jihova.

← Tanga o kibandekesu kia bhingi o kibatulu