Ku bokona mu madisá

Ku bokona mu madisá

KIBATULU KUINHI NI DIVUA

Kolokota mu Henda ia Nzambi

Kolokota mu Henda ia Nzambi

Ku zola Nzambi Ihi?

Kiebhi ki tu Tena ku Kolokota mu Henda ia Nzambi?

Ihi Ia-nda Bhana Jihova ku Athu a Kolokota um Henda iê?

XINGANEKA kuila, eie ua mu kuenda mu njila, u mona o kitembu. Ku moneka matuta. Nzaji i bhenhesa o diulu, ni kinuminu kia dikota nga ku lauka di banda dia nvula. Eie u lenga mu sota kididi phala suama-mu. Ki u tala bhu mbandu ia njila, eie u mona kididi kia suama. Kididi kia kondoma, kia kukuta phala ku suama-mu. Mu kidi, eie ueji sanguluka mu sanga o kididi kiki kia kondama!

Diiala ua sota kididi phala ku suama-mu, mukonda dia kinuminu kia dikota

Jihova ua-nda kála dilengelu diê mu thembu íii ia bhonzo?

2 Etu tuala ué mu thembu ia bhonzo. O ukexilu ua mundu ua beta dingi o kuiibha. Maji, saí kididi kia kondama, ki tu langa ku ima ia iibha. Kididi kiki kiebhi? Tala i longa o Bibidia: “Ua kéla kuma: Jihova dilengelu, kimbaka; Nzambi iami, nga dielela kua muene” -Jisálamu 91:2.

3 Xinganeka ngó! Jihova, o Mubhangi ua ngongo, u tena ku kala dilengelu dietu. Muéne u tena ku tu bhulula, mukonda ua beta-kota mu kutena, u tana ku tu langa ku ima, mba ku muthu ua mesena ku tu bhanga kia iibha. Né muene se a tu bhanga kia iibha, Jihova u tena ku katula o ima ioso ia iibha. Kiebhi ki tu tena ku bhanga Jihova dilengelu dietu? Etu tua tokala ku mu dielela. Lua mukuá, o maka a Nzambi a suínisa: “ mu suíne ni di bhaka mu henda ia Nzambi.” (Juda 21) kienhiki, etu tua tokala ku kolokota mu henda ia Nzambi, mu ku kala ni ukamba ni Tata ietu ia diulu. Kiki-phe tu tena ku kala ni kixikinu kuma muéne dilengelu dietu. Kiebhi ki tu tena ku kala ni ukamba iú?

XINGANEKA O HENDA IA NZAMBI NI U I SAKIDILE

4 Phala ku kolokota mu henda ia Nzambi, tua tokala ku lembalala o henda iene mu londekesa Jihova ko kuetu. Xinganeka mu ilongesu ia Bibidia i ua di longo, ni kikuatekesu kia divulu didi. O Mubhangi uetu Jihova ua tu bhana o ixi kála dibhata dia uabha. Muéne ua i bhange ni kudia kua vulu, ni menha, ni ima iambote, ni iama, ni ididi ia uabha. Mukonda o Bibidia ia mu tokala, Nzambi ua tu tangela-mu o dijina diê, ni ídifua iê. O Maka mê, a tu tangela ué kuma, muéne ua tumikisa o Mon’ê ua kazola mu ixi, iu uehela kuila Jezú u tala hadi, ufuá mu ituxi ietu. (Nzuá 3:16) Ihi ilombolola o ujitu iú phala etu? O ujitu iú u tu bhana kidielelu ku ima iambote ia-nda kuíza ku hádia.

5 O kidielelu kietu ku hádia, kua bhingi dingi kima kia bhange Nzambi. Jihova ua tumbika o unguvulu ku diulu, o Utuminu ua Mexiia. Sé ku laleka, ua-nda zubha o hadi, ni ku kitula o ixi, palaízu. Xinganeka ngó! Etu tu tena ku kala-mu, ni ku tululuka, ni ku zediua, katé ku hádia. (Jisálamu 37:29) Mu kiki, Nzambi uene mu tu bhana milongi, i tu bhana ukexilu uambote mu kindal’ki ua ku kala ni muenhu. Muéne ué, u tu ehela kuzuela nê ku musambu. Iá, o maukexilu ene mu idikisa o henda ia Jihova ku mundu uoso, ni ko kuê.

6 O kibhuidisu ki ua tokala ku dibhanga kiki: Kiebhi ki nga-nda sakidila o henda ia Jihova? Saí athu a-nda zuela, “Eme nga tokala ku zola Jihova kála kia ngi zolo muéne.” Kiene ué ki u banza? Jezú uambe kuila, o kitumu kia beta-kota, kiki: “Zola [Jihova], Nzambi iê, ni muxima ué uoso, ni muenhu ué uoso, ni kilunji kié kioso.” (Matesu 22:37) Mu kidi, eie uala ni ima iavulu i ku bhangesa ku zola Jihova Nzambi. Maji o kuila o henda íii, iene ngó i ku bhangesa ku zola Jihova ni muxima uê uoso, ni muenhu uê uoso, ni kilunji kiê kioso?

Mbundu ia masá

7 Kála kia ki tange mu Bibidia, o ku zola Nzambi, kiene o kima kia beta-kota. Tua bhingi ku zola Jihova, maji kiki, o dimatekenu ngó dia henda kua muéne. Phala ku sabhuka u muxi ua masá, kua bhingi mbundu imoxi ngó. Maji-phe se eie ua-ndala kudia masá, ueji sanguluka se o muthu u ku bhana ngó o mbundu ia masá? Ki ueji sanguluka kana! Kiene ki moxi ué, o henda kua Jihova Nzambi o dimatekenu ngó. O Bibidia i longa kuma: ‘O henda ia ku zola Nzambi ienhi’íi, o ku kumbidila o ijila iê. O ijila iê- phe kia bhonzo ku i kumbidila.’ (1 Nzuá 5:3) O henda ia kidi kua Nzambi ia tokala ku bhana ibundu iambote. Ia tokala ku i londekesa ku ima i tu bhanga. -Matesu 7:16-20.

8 Etu tu londekesa o henda ietu kua Nzambi, kioso ki tu belesela o itumu iê. Ku bhanga kiki, ki kima kia bhonzo. O itumu ia Jihova ki ia neme kana, a i bhana phala ku tu kuatekesa ku zediua. (Izaia 48:17, 18) Kioso ki tu belesela o milongi ia Jihova, tu londekesa o henda kua Tata ietu ia diulu, ni kuila tua zola ioso iene mu tu bhangela. Ku kamba ku bhanga kiki, kikola-phe, mukonda saí athu ku mundu, kala ni kisakidilu. Etu ki tua-ndala ku kala, kála ió kala ni kisakidilu, kála o athu mu izuua ia Jezú. Jezú ua sake dikuinhi dia muthu exile ni dibhute, maji umoxi ngó ua vutuka phala ku mu sakidila. (Luka 17:12-17) Mu kidi, ki tua-ndala ku kala kála o dinake a kambe o kisakidilu!

9 Iebhi-phe o itumu ia Jihova i tua tokala ku belesela? Tua di longo kiá itumu iavulu mu divulu didi, maji ndoko tu bhitulule ia mukuá. Mukonda o ku belesela o itumu ia Nzambi ia-nda tu kuatekesa ku kolokota mu henda ia Nzambi.

KOLOKOTA KU ZUKAMA KUA JIHOVA

10 O ku di longa o itumu ia Jihova, kima kia beta-kota phala ku mu zukama. Kima ki kia tokala ku kieha. Se eie u kala bhu kanga mu kuota, mu usuku ua mbambi, ueji kuehela ku jima o túbhia? Kana. Ueji xinjika o jihuinhi phala o túbhia ki tu jimi. Se u kamba ku bhanga kiki, o muenhu ué ueji kala mu iluezu! Kála o jihuinhi ji mesena o túbhia, o ku “dijiia kiambote ni Nzambi” ku kolokotesa o henda ietu kua Jihova. -Jisabhu 2:1-5.

Kála o túbhia, o henda iê kua Jihova, i bhinga dingi jihuinhi phala ki i jime

Diiala ua mu kuota mu usuku ua mbambi mu túbhia

11 Jezú ua mesenene kuila o akaied’ê, a tokalalele ku kolokota o henda iâ kua Jihova, ni ku Maka Mê ma kidi. Kioso kia fukunuka, Jezú ua longo o maxibulu mê aiiadi, maka a lungu ni ikanenu ia mikanda ia Hebalaiku ia di kumbidila kua muéne. Kiebhi kia divu-phe? Ene mu kithangana kia mukuá a di ambela mudiâ, exi: “Manhi kiene o mixima ki ia kexile mu ku tu lema moxi, muène kia kexi ku tu zuelesa mu njila, ni ku tu jimbuila o maka mòsoneke mu Mikanda ia Ngana?!” -Luka 24:32.

12 Kioso ki ua mateka ku di longa ihi i longa o Bibidia, o muxima uê ki ua sangulukile ni henda ia Nzambi? Sé phata, ua sangulukile. Saí athu a sangulukile uê kála eie. O kima ki bhonza, o ku kolokota ku bandekesa o henda iê. Etu ki tua-ndal’etu ku kaiela o ukexilu ua mundu lelu. Jezú uambe kuma: “Athu avulu, o’henda iâ i zonda.” (Matesu 24:12) Ihi i ua tokala ku bhanga phala o henda iê kua Jihova, ni mu ima i uene mu di longa mu Bibidia, ki i zonde?

13 Kolokota kuijiia Jihova Nzambi, ni Jezú Kristu. (Nzuá 17:3) Xinganeka mu ima i uene mu di longa mu Maka a Nzambi, dibhuidise: ‘O maka iâ, a ngi longa ihi ia lungu ni Jihova Nzambi? Ihi dingi i ngi bhangesa ku mu zola ni muxima uoso, ni kilunji kioso, ni muenhu uoso?’ (1 Timote 4:15) O ku xinganeka kiki, kia-nda ku kolokotesa ku bandekesa o henda iê kua Jihova.

14 O kima kia mukuá kia-nda ku bhangesa ku kolokota mu henda iê kua Jihova, o ku samba izuua ioso. (1 Tesalonika 5:17) Mu kibatulu 17 kia divulu didi, tua di longo kuma o musambu ujitu ua dikota ua Nzambi kala o ku di zuelesa, ku suínisa o ukamba ua athu, kiene ué, o ukamba uetu ni Jihova u uabha dingi kioso ki tu samba izuua ioso. Kienhiki etu ki tua tokala kueha kuila o misambu ietu i kala ngó izuelu imoxi i tu bhinga izuua ioso-sé kilombuelelu kia kidi. Etu tua tokala ku zuela ni Jihova, kála o mona ndenge uzuela ni tat’ê ua kazola. Etu, tua mesena kuzuela ni ujitu, ni muxima uoso. (Jisálamu 62:8) Kienhiki, o ku di longa o Bibidia ni ku samba, o kima kia tokala ku ubhezelu uetu, ki tu kuatekesa ku kolokota mu henda ia Nzambi.

KALA NI KISANGUSANGU MU UBHEZELU UÊ

15 O ku di longa o Bibidia ni ku samba, ima ia bhingi mu ubhezelu u tua tokala ku bhanga ubheka uetu. Kienhiki, tu di longa kima kimoxi kia lungu ni ubhezelu u tuene mu bhanga mu kaxi ka athu: kuzuela ni akuetu o kixikinu kietu. O kuila o maka a Bibidia eie ua a tangela kiá akuenu? Se kiene, eie uala ni ujitu ua dikota. (Luka 1:74, NW) Kioso ki tu zuela o kidi ki tua di longo, kia lungu ni Jihova Nzambi, mu kidi etu tua mu bhanga o kikalakalu kia beta-kota kia bhana ku Jikidistá joso ja kidi-ene mu boka o njimbu iambote ia utuminu ua Nzambi.—Matesu 24:14; 28:19, 20.

16 O poxolo Phaulu ua monene o ukunji uê, kála kima kia beta-kota, ua u monene kála unvuama. (2 Kolindo 4:7) O kuzuela ni athu ia lungu ni Jihova Nzambi, ni ikanenu iê, kikalakalu kia beta-kota ki u tena ku bhanga. sidivisu i tu bhangela o Mesene ia dikota, i bheka mabesá avulu. Mu ku bhanga o kikalakalu kiki, eie ua mu kuatekesa athu ku zukama dingi kua Tata ietu ia diulu, ni ku nganhala o muenhu ua kalelaku! Kikalakalu kiahi kieji bhekesa dingi o kisangusangu kiki? Lua mukuá, kuzuela ia lungu ni Jihova ni maka mê, ki bandekesa o kixikinu kiê, ki suínisa ué dingi o henda iê kua muéne. Jihova ua uabhela kia vulu o kikalakalu kiê. (Jihebeleu 6:10) O ku bhanga o kikalakalu kiki, ki ku kuatekesa ku kolokota mu henda ia Nzambi.—1 Kolindo 15:58.

17 Tua tokala ku lembalala kuma, o kikalakalu kia ku boka o Utuminu, sidivisu ia ku bhanga ni lusolo. O Bibidia i zuela: ‘Enda ni ku tanga o maka; Lenguluka mu ku a jimbula.’ (2 Timote 4:2) Mukonda diahi tua tokala ku lenguluka mu bhanga o sidivisu íii, lelu? O maka a Nzambi a tu zuelela kuma: “Kizuua kionéne kia Jihova kia zukama; kia-nda kuiza muene lusolo.”(Sofoniia 1:14) Kienhiki, o kithangana kia zukama phala Jihova ku buika o ukexilu uoso ua iibha ua ngongo iú. O athu a tokala ku a dimuna! Ene a tokala kuijiia kuma kiki kiene o kithangana kia ku sola Jihova kála Ungana uâ. O kibuika “ki kia-nda ku [laleka].”—Habakuke 2:3

18 Jihova ua mesena kuila etu tu mu bheza mu kisangela kia Jikidistá ja kidi. Mukonda dia kiki, o Maka mê a zuela: “Tu di xinganekienu mudietu, tu di suinise mu ku dizola, ni kubhanga o mbote. Kana kufula ku diongeka jinga, uila amoxi ki ene kufula, maji tu di longesa mudietu. Uila kiki, tu di suinisienu mudietu, kota-kota dingi kioso ki mu mona o kizuua kia Ngana kí zukama.” (Jihebeleu 10:24, 25) Kioso ki tu di bhongolola ni jiphange jetu ja kixikinu mu iônge ia Jikidistá, etu tuala ni kithangana kia ku ximana ni ku bheza o Nzambi ietu ia kazola. Mu kithangana kiki, tuene mu di suínisa mudietu.

19 Kioso ki tu di bhongolola ni abhezi a Jihova, tu kolesa dingi o henda ietu ni ukamba mu kilunga. O kima kia beta-kota, o ku mona o ífua ia mbote ia jiphange jetu, kála kia mona Jihova o ífua ietu iambote. Kana ku jijidika kuiuka ku jiphange jê. Lembalala kuila, oso ka sokela mu ku kula mu nzumbi. Etu’oso tuene mu lueza. (Kolose 3:13) Se u kala ni ukamba ua mbote ni ió a zolo Jihova ni muxima uoso, eie ua-nda mona kuila, o kixikinu kiê kia-nda kola dingi. Kienhiki, o ku bheza Jihova ku moxi ni jiphange jê mu nzumbi, kua-nda ku kuatekesa ku kolokota mu henda ia Nzambi. Kiebhi Jihova kia besoala ió a mu bheza ni kidi kioso, ni kiebhi o ku bhanga kiki kia a kolokotesa mu henda iê?

KOLOKOTA MU SOTA O “MUENHU UA KIDI”

20 Jihova u besoala o jiselevende jê ja fiiele, ni muenhu, muenhu uahi-phe? Eie uala ni muenhu? Mu kidi, etu’oso tueji tambuijila kuila tuala ni muenhu. Mukonda, tuene mu bhuima, tuene mu dia, ni kúnua. Mu kidi, tuala ni muenhu. Mu ithangana ietu ia ku sanguluka, nange tuamba, “Iú uene o muenhu ua kidi! Maji o Bibidia ilondekesa kuila bhuala muthu uala ni muenhu ua kidi lelu.

O miji ioso a belesela Jihova, a-nda tambula o mabesá mu palaízu mu ixi

Jihova ua mesena kuila eie, u kala ni “muenhu ua kidi.” O kuila ua-nda ku u nganhala?

21 O Maka a tu suínisa ku nganhala “o muenhu ua kidi” (1 Timote 6:19) O maka iá, alondekesa kuila “o muenhu ua kidi” kima ki tua kingila. Kienhiki, kioso ki tua-nda kala athu a iuka, tua-nda kala ni muenhu ua kalelaku. Tua kala, kála kia mesenene Nzambi m’okulu. Kioso ki tua-nda kala mu palaízu mu ixi, ni sauidi, ni kutululuka, ni ku sanguluka, kiene ngó ki tua-nda kala ni “muenhu ua kidi”—o muenhu ua kalelaku. (1 Timote 6:12) Kiki, ki kidielelu kia uabha?

22 Kiebhi ki tu tena ku nganhala “o muenhu ua kidi”? Phaulu uambe kuila o Jikidistá, “a bhange jinge o mbote” ni “a kale ni unvuama ua ikalakalu ua fuama.” (1 Timote 6:18) Mu kidi phala ku tambula o muenhu iú, kua bhingi ku belesela o milongi i tuene mu di longa mu Bibidia. O kuila Phaulu uambe, tua-nda nganhala “o muenhu ua kidi” mu ku bhanga o ikalakalu ia fuama? Kana, o kikanenu kiki kia uabha, tu ki tambula ngó ku “ujitu” ua bhana Nzambi. (Loma 5:15) Kienhiki, Jihova ua uabhela kia vulu ió ene ku mu sidivila mu kidi. Muéne ua-ndala kuila, eie u kala ni “muenhu ua kidi.” O muenhu iú, ua ku sanguluka ni ua kutululuka, o muenhu ua kalelaku, a u bhake phala ió ene mu kolokota mu henda ia Nzambi.

23 Kala muthu ua tokala ku dibhula, ‘o kuila eme nga mu bheza Nzambi kála kia tumu muéne mu Bibidia?’ se tu di suínisa mu ukexilu iú izuua ioso, tua-nda kala mu njila ia kidi. Tua tokala ku dielela kuila Jihova o dilengelu dietu. Muéne ua-nda bhulula o mundu uê ua fiiele, kioso kia-nda buika o mundu iú. Jihova ua-nda bhulula ni ku tu ambata ku mundu uobhe ua zukama. Mu kizuu’okio, tua-nda kala ni kisangusangu kia vulu! Tua-nda sanguluka kia vulu mu kuijiia kuila, tua solo kiambote mu izuua íii ia sukidila! Se ua solo kiá ua-nda nganhala “o muenhu ua kidi” o muenhu ua mesenene Jihova Nzambi, katé ku hádia!

IHI I LONGA O BIBIDIA

  • Tu londekesa o henda ietu kua Nzambi, kioso ki tu belesela o itumu iê, ni ki tu kumbidila o ijila iê.—1 Nzuá 5:3
  • O ku di longa o Maka a Nzambi, ni ku samba kua Jihova ni muxima uoso, ni ku longa akuetu ia lungu ni muéne, ni ku um bhezela um iônge ia Jikidistá, ia-nda ku tu kuatekesa ku kolokota um henda.—Matesu 24:14; 28:19, 20; Nzuá 17: 3; 1 Tesalonika 5:17; Jihebeleu 10:24, 25.
  • O athu a kolokota um henda ia Nzambi ala ni kidielelu kia ku nganhala “o muenhu ua kidi.”—1 Timote 6:12, 19; Juda 21

Ibhuidisu

1, 2. Kuebhi ku tu tena ku sanga o kididi kia kondama lelu?

3. Kiebhi Jihova kia tena ku kala dilengelu dietu?

4, 5. Maukexilu ahi alondekesa o henda ia Jihova ko kuetu?

6. Kiebhi ki tu tena ku sakidila o henda ia Jihova, iene mu ku londekesa?

7. O kuila o ku zola Nzambi, o kuzuela ngó kuila tua mu zolo? Jimbulula.

8, 9. Kiebhi ki tu londekesa o henda ietu kua Nzambi?

10. Jimbulula se mukonda diahi kia beta-kota ku kolokota ku di longa ia lungu ni Jihova Nzambi.

11. O ilongesu ia Jezú ia bhangesa ihi ku akaidi’ê?

12, 13. Ihi iene um bhita lelu mu ngongo ia lungu ni henda kua Nzambi, ni um Bibidia? Ihi i tua tokala ku bhanga phala o henda ietu, ki izonde?

14. Kiebhi o musambu u tena ku tu kuatekesa ku kolokota mu henda ia Jihova?

15, 16. Mukonda diahi tua tokala ku mona o kikalakalu kia kuboka o Utuminu, kala ujitu ni umvama ua dikota?

17. Mukonda diahi o sidivisu ia kidistá, a tokala ku i bhanga ni lusolo lelu?

18. Mukonda diahi tua tokala ku bheza Jihova um kaxi ka Jikidistá ja kidi?

19. Kiebhi ki tu tena ku kolokota dingi o henda ietu ni jiphange um kilunga kia Jikidistá?

20, 21. “O muenhu ua kidi” ihi, ni mukonda diahi o kidielelu kiki kia uabha?

22. Kiebhi ki u tena ku nganhala “o muenhu ua kidi”?

23. Mukonda diahi kua bhingi ku kolokota um henda ia Nzambi?